Tuesday, September 30, 2008

ကုသိုလ်-ကောင်းမှု

ရတနာသုံးပါးနှင့် စပ်လျဉ်းသော ကိစ္စရပ်များ, သာသနာရေးနှင့် စပ်လျဉ်းသော ကိစ္စရပ်များကို ဆောင်ရွက်မှသာ ကုသိုလ်ကောင်းမှု-ဟု မထင်မှတ်စေလိုပါ၊ ယင်းသို့ ထင်မှတ်လျှင် ကုသိုလ်ကောင်းမှု၏ အနက်အဓိပ္ပါယ်သည် ဘောင်ကျဉ်းသွားပေလိမ့်မည်၊ မိမိကို အကြောင်းပြု၍ လူတဦးတယောက်၏ အခက်အခဲ ပြေလည်သွားလျှင် ယင်းသည် ကုသိုလ်ကောင်းမှုပင်၊ အစာငတ်နေသော တိရစ္ဆာန်တကောင် မိမိကြောင့် ၀မ်းဝသွားလျှင် ယင်းသည်လည်း ကုသိုလ်ကောင်းမှုပင်၊ မိမိ၏နေရာဝန်းကျင် လူသွားလမ်းတို့မှ အမှိုက်သရိုက်များကို ရှင်းလင်းခြင်း သည်လည်း ကုသိုလ်ကောင်းမှုပင်။
ကုသိုလ်ကောင်းမှုအတွက် အဓိကအရင်းအနှီးမှာ ငွေကြေး-မဟုတ်၊ နှလုံးသားထဲက သန့်စင်မွန်မြတ်သော စေတနာကောင်း-ပင်ဖြစ်၏၊ စေတနာကောင်းဟူသော အရင်းအနှီးသာ ရှိပါက ကုသိုလ်ကောင်းမှုကို ကောင်းစွာပြု နိုင်ပါသည်၊ ငွေကြေးဖြင့် လှူဒါန်းမှသာ ကုသိုလ်ကောင်းမှု-ဟု ယူဆနေခြင်းသည် ကုသိုလ်ကောင်းမှုအပေါ် ကျယ်ကျယ်ပြန့်ပြန့် သဘောမပေါက်သောကြောင့် ဖြစ်ပါသည်၊ အတွေးအခေါ် မကျယ်ပြန့် မဖွံ့ဖြိုးသောကြောင့်သာ ဖြစ်ပါသည်။
မိမိအသက်ရှင်နေသမျှ သူတပါးအကျိုး စွမ်းနိုင်သမျှ သယ်ပိုးမည်ဟူသော စေတနာကောင်းသာ မိမိ၏အတွင်း သန္တာန်၌ ထာဝစဉ် ဖူးပွင့်နေမည်ဆိုလျှင် ဤလောက၀ယ် ကုသိုလ်ကောင်းမှု ပြုနိုင်သည့်အခြေအနေ အချိန်အခါ အခွင့်အရေးများကား အနန္တပင်။
နေ့စဉ်နှင့်အမျှ ကုသိုလ်ကောင်းမှု ပြုဖြစ်အောင်ပြုသော အလေ့အထ စွဲမြဲလာလျှင် ကြာသော် ယင်းသို့ ပြုနေရခြင်းသည်ပင် မိမိ၏စိတ်နှလုံး၌ ကြည်နူးစရာ ဖြစ်လာပါသည်၊ ရွှင်လန်းချမ်းမြေ့စရာ ဖြစ်လာပါသည်၊ ကုသိုလ်ကောင်းမှု သန္ဓေတည် မွေးဖွားလာသော ပီတိနှင့် ရွှင်လန်းခြင်းကြောင့် ဘ၀သည် ပိုမို၍ နေပျော်စရာ ဖြစ်လာပါလိမ့်မည်၊ မိမိ၏ ဘ၀တန်ဘိုးလည်း မြင့်သည်ထက် မြင့်လာပါလိမ့်မည်။

မှတ်ချက်။ မင်းနန်-မော်ကျွန်း ၏ နှလုံးလှ အဆုံးအမတော်များ စာအုပ်မှ။

No comments: