Thursday, December 11, 2008

ကံ ကံ၏အကျိုး ( ၆ )

( မိဘလုပ်ကျွေး ဘေးရန်ဝေး )

ဦးလှကြီး ဒေါ်နန်းစောတို့သည် ကျောက်ပန်းတောင်းမြို့နယ် အိုင်လျားကျေးရွာတွင် ထန်းအလုပ်ဖြင့် အသက်မွေးဝမ်းကျောင်းပြု၍ နေထိုင်သည်၊ တနေ့တွင် ဦးလှကြီး မျက်စိကို ထန်းရွက်နှင့်ထိုးမိသည်၊ ထိုဒဏ်ရာကြောင့် မျက်စိမကောင်းတော့၊ ထန်းမတက်နိုင်တော့ပါ၊ ထို့ကြောင့် သားအလတ် အလယ်တန်း ကျောင်းသား မောင်ကျော်မြိုင်က ဖခင်၏ထန်းအလုပ်ကို ကျောင်းမသွားမီနှင့် ကျောင်းအပြန်များတွင် ၀င်ရောက်လုပ်ကိုင်ရသည်။
မောင်ကျော်မြိုင်သည် ထန်းလုပ်ငန်းကို ဖခင်ကြီးကိုယ်စား ၀င်ရောက်လုပ်ကိုင်ရသော်လည်း ကျောင်းစာများတွင် ထူးချွန်သည်၊ ၁၉၈၇-၈၈ စာသင်နှစ် အဋ္ဌမတန်းစာမေးပွဲတွင် သင်္ချာနှင့်အထွေထွေသိပ္ပံ ဘာသာရပ်များတွင် ဂုဏ်ထူးဖြင့်အောင်မြင်ခဲ့သည်။
မောင်ကျော်မြိုင် ၈-တန်းစာမေးပွဲတွင် ဂုဏ်ထူးနှစ်ဘာသာဖြင့် အောင်မြင်သောကြောင့် မိဘနှစ်ပါးနှင့် ဆွေမျိုး မွေးချင်းများသာမက အိုင်လျားတရွာလုံးကပါ ၀မ်းမြောက်ဂုဏ်ယူလျက် ရှိကြပါသည်။
ကျောင်းပြန်ဖွင့်သည့်အချိန်တွင် ဦးလှကြီး ဒေါ်နန်းစောတို့ မိသားစုသည် သား-မောင်ကျော်မြိုင်ကို ကျောင်းဆက်ထားရေးအတွက် ရတက်မအေးကြရပါ။
မောင်ကျော်မြိုင် ကျောင်းဆက်နေလျှင် ကျောင်းစရိတ်များ ကုန်ကျမည်၊ ကျောင်းစရိတ်ကို ဆွေမျိုးတစုက ၀ိုင်းဝန်းထောက်ပံ့လျှင် ဖြစ်နိုင်သေး၏၊ မောင်ကျော်မြိုင် ကျောင်းဆက်နေလျှင် မည်သူထန်းတက်တော့မည်နည်း၊ မိသားစု၏ စားဝတ်နေရေးသည် ထန်းလုပ်ငန်းပေါ်တွင် အမှီပြု နေကြရပါသည်။
နောက်ဆုံးတော့ မောင်ကျော်မြိုင် ကျောင်းဆက်နေလိုသော်လည်း မိသားစု စားဝတ်နေရေးကို ငဲ့ညှာလျက် ကျောင်းထွက်ကာ ထန်းတက်ရပေတော့သည်။
မောင်ကျော်မြိုင်သည် ထန်းတက်ရသော်လည်း စိတ်ဓာတ်ကျဆင်းခြင်း မရှိပေ၊ ၄င်း၏ဘ၀ကို အနစ်နာခံ၍ မိဘများအား လုပ်ကျွေးရခြင်းကိုပင် ၀မ်းသာဂုဏ်ယူပါသည်ဟု အမြဲပြောသည်။
၁၃၅၂-ခုနှစ် ၀ါခေါင်းလဆန်း ၁၄-ရက်နေ့ နံကတွင် လာကြပါဦး တော်ရေ၊ ကျော်မြိုင် ထန်းပင်ပေါ်က လိမ့်ကျလို့၊ လာကြပါဦး-ဟု ဒေါ်နန်းစော၏ အော်သံကြောင့် လူအများပြေးသွားကြသည်၊ သို့ရာတွင် မောင်ကျော်မြိုင်သည် ထန်းပင်ပေါ်မှကျသော်လည်း ပြင်းထန်စွာ ဒဏ်ရာမရ၊ အနည်းငယ် မူးသွားသည်မှ အပ၊ ဘာမျှ မဖြစ်သလို ထိုင်လျက်ရှိနေသည်ကို တွေ့ကြရသည်။
အတောင်နှစ်ဆယ်ခန့်ရှိသော ထန်းပင်ပေါ်မှ မောင်ကျော်မြိုင် လိမ့်ကျသော်လည်း မည်သို့မျှမဖြစ်သောကြောင့် ရွာသူရွာသားများလည်း အံ့သြခြင်း၊ ၀မ်းသာခြင်းများ ဖြစ်ကြရပါသည်။
ဤသည်မှာ မိဘလုပ်ကျွေး-ဘေးရန်ဝေးခြင်း-ပင် ဖြစ်ပေသည်ဟု ရွာသူရွာသားများက မှတ်ချက်ချကာ သာဓုခေါ်လျက် ရှိကြပါတော့သည်။
( ဂွေးပင်ချို-ထွန်းလှိုင် )
*********************************************************************************

( ကြက်သင်းကွဲ )

သွားရင်းလာရင်း ကြက်များကိုတွေ့လျှင် ကျွန်တော်ငယ်စဉ်က အိမ်တွင်ရှိသော ကြက်သင်းကွဲကို သတိရမိသည်၊ ကြက်သင်းကွဲဆိုသည်မှာ ကျွန်တော်တို့ အိမ်သူအိမ်သားများက ပေးထားသော နာမည်ပင် ဖြစ်ပါသည်၊ ကျွန်တော် ကျောင်းသားအရွယ်က အိမ်တွင် ကြက်များမွေးမြူထားသည်၊ တခါသော် အိမ်ကကြက်မကြီး သားပေါက်ရာတွင် ကြက်ကလေးတကောင်မှာ အခြားကြက်ငယ်များလို ဥမှ ချက်ချင်း မဖောက်နိုင်ပဲ ရှိသည်၊ အခြားကြက်ငယ်များ ပေါက်ပြီး နောက်နေ့လောက်ကျမှ ဥထဲမှ ခေါင်းကလေးသာ ထွက်နိုင်သည်၊ တညပ်ညပ်နှင့် အော်နေ၍ အကိုက ဥကိုခွဲပြီး ထုတ်ယူရသည်။
ထိုကြက်ငယ်ကလေးမှာ သူ့မိခင် ကြက်သားအုပ်သို့ မ၀င်နိုင်တော့၊ မိခင်ကြက်မကြီးကပင် အ၀င်မခံ၊ သူလာလျှင် ဆိတ်၍လွှတ်သည်၊ သို့နှင့် သူ့ကိုကြက်မအုပ်သို့ မသွင်းတော့ပဲ အိမ်ပေါ်မှာပင် မွေးထားရသည်၊ ဆန်ကွဲများကျွေး၍ ညတွင် ၀ါဂွမ်းများပုံ၍ အိပ်စေရသည်၊ သို့နှင့် ကြက်သင်းကွဲလေးသည် တစတစ ကြီး၍လာကာ အိမ်သားများကို အထူး ခင်မင်နေသည်၊ သွားရာသို့ လိုက်နေတတ်သည်၊ အထူးအားဖြင့် သူ့အား ဂရုတစိုက် ကျွေးမွေးပြုစုသော အမေ့ကို ပိုခင်သည်၊ အမေသွားရာ လိုက်သည်၊ ထို့ကြောင့် အမေသည် ဈေးသွားလျှင် သူ့ကိုခြင်းဖြင့် အုပ်ထားခဲ့ရသည်၊ ကျွန်တော်တို့ အိမ်သားအားလုံးပင် သူ့ကိုချစ်ခင်ကြ၍ ကြက်သင်းကွဲ-ဟု ခေါ်ကြသည်၊ သူကလည်း ကြက်သင်းကွဲရေ-ဟု ခေါ်လျှင် ကြားရာက ပြေးလာလေ့ရှိသည်။
ကြက်သင်းကွဲသည် ကြက်ဖလေးဖြစ်၍ အခြားကြက်များနှင့် မနေ၊ တကောင်တည်းသာ နေလေ့ အစာရှာလေ့ရှိသည်၊ နေ့လည်ဆိုလျှင် အမေက ဆန်များကို အိမ်ရှေ့တွင်ပက်ကာ ကြက်သင်းကွဲရေ-ဟု ခေါ်ကျွေးလေ့ရှိသည်၊ ကြက်သင်းကွဲ စ၍တွန်တတ်စအရွယ် တနေ့လည်တွင် အမေသည်ထုံးစံအတိုင်း အိမ်ရှေ့တွင် ဆန်များကိုပက်၍ ကြက်သင်းကွဲရေ-ဟုခေါ်သည်၊ ကြက်သင်းကွဲသည် အိမ်ခြံထောင့်တနေရာတွင် ယက်ကာယက်ကာ အစာစားနေရာ အမေနှစ်ခွန်းသုံးခွန်း ခေါ်သည့်တိုင်အောင် မလာ၊ သို့နှင့်အမေသည် သူပက်ထားသောဆန်ရှိရာသို့ မောင်းခေါ်ရန် ကြက်သင်းကွဲရှိရာသို့ သွားပြီး ဟဲ့-လာခဲ့၊ ဟဲ့-လာခဲ့နှင့် ခေါ်သည်၊ ကြက်သင်းကွဲသည် အမေ့ကို တချက်နှစ်ချက်လှည့်ကြည့်ပြီး ယက်မြဲယက်နေသည်၊ အမေသည် သူ့အနားသို့ ရောက်သွားချိန်တွင် ကြက်သင်းကွဲယက်လိုက်သော မြေကြီးမှုန်များ အကြားမှ ၀င်းခနဲထွက်လာသော အရာဝတ္ထု တခုကို မြင်လိုက်သည်၊ အမေသည် ကြက်သင်းကွဲကို လက်တဖက်က ကောက်ချီလိုက်ရင်း လက်တဖက်က ၀င်းပြောင်နေသော အရာဝတ္ထုကို ယူကြည့်လိုက်ရာ လက်စွပ်တကွင်း ဖြစ်နေလေသည်။
လက်စွပ်မှာ နီလာကျောက်ပါသော ရွှေလက်စွပ် ဖြစ်သည်၊ အတော်ရှေးကျဟန်ရှိပါသည်၊ မည်သူ့လက်နှင့်မှမတော် ကွင်းကျယ်သည်၊ အဖေ့လက်နှင့်သော်မှ လက်ခလယ်နှင့်မှ တော်ရုံရှိသည်၊ လွန်ခဲ့သော နှစ်သုံးဆယ်ကျော်လောက်က ဖြစ်ရာ ထိုအချိန်က ရောင်ချလိုက်ရာ၌ ငွေလေးရာခန့် ရသည်ဟု မှတ်မိပါသည်၊ ကြက်သင်းကွဲသည် သူ့အား စောင့်ရှောက်သော ကျွန်တော့မိသားစုကို ကျေးဇူးပြုခြင်းပင် ဖြစ်ပါသည်၊ ကျွန်တော်တို့မှာလည်း သူတပါးအား ကယ်ဆယ်၍ ပြုစုကျွေးမွေး စောင့်ရှောက်သော ကောင်းကျိုးကို ခံစားခဲ့ရပါသည်။
( မောင်တင်ထွန်း-ပြည်မြို့ )
*********************************************************************************

( တူသောအကျိုး )

ထီးချိုင့်မြို့နှင့် မနီးမဝေးတွင် သပြေပင်ဆိုသော ရွာတရွာရှိ၏၊ ထိုရွာမှ လူအများသည် တောင်ယာလုပ်ငန်းဖြင့် အသက်မွေးကြသည်၊ ဤရွာမှ လူများသည် ရှေးလူကြီးတို့၏ ဆိုရိုးစကား ဓလေ့ထုံးစံတို့ကို လက်ကိုင်ပြု၍ နေထိုင်ကြသော ရွာတရွာဖြစ်၏၊ ကျီးသာလျှင် ဧည့်ရောက်မည်၊ ကြင်နီပုရွက်တို့ အိမ်ပေါ်တက်လျှင် ရေကြီးမည်၊ မိမိတို့ အိမ် ခြံဝင်း စသည်တို့တွင် ပျားအုံစွဲလျှင် စီးပွားတက်မည်၊ စသော အယူအဆများ ရှိကြသည်၊ ထိုရွာတွင် အရက်သမား ကိုသာအေး တယောက်သာ လူ့ကန့်လန့်ဖြစ်သည်၊ ရွာမှ လူများက အဖြူဆိုလျှင် ကိုသာအေးက အမည်း၊ သူများက အမည်းဆိုလျှင် သူက ဖြူစမြဲ။
တနေ့ ကိုသာအေးတို့ခြံဝင်း သရက်ပင်ပေါ်တွင် ပျားအုံကြီးတအုံ စွနြေသည်၊ မြင်မြင်သမျှ ရွာသားများက ဗျို့-ကိုသာအေး ခင်ဗျားသည်နှစ်တော့ တောင်ယာဖြစ်အုံးမှာပဲဗျာ၊ ဟု ချီးမွမ်းစကားဆိုလေ့ရှိသည်၊ ထိူစကားသံများကို ကိုသာအေး မနှစ်မြို့။
စီးပွားဆိုတာ ဖြစ်ချိန်တန် ဖြစ်မှာပဲ၊ ပျားအုံစွဲလို့ စီးပွားဖြစ်တယ်ဆိုတဲ့ သကား ကျုပ်မယုံဘူး၊
သွားကြ၊ လာမပြေကြနဲ့၊
စသည်ဖြင့် ကိုသာအေး အော်လွှတ်သည်၊ ထို့ကြောင့် ပျားအံကိစ္စနှင့်ပတ်သက်၍ ကိုသာအေးကို မည်သူမျှ မပြောကြတော့ပေ။
တနေ့ ကိုသာအေးတယောက် အိမ်ရှေ့ကွပ်ပြစ်တွင် ရေနွေးကြမ်း သောက်နေသည်၊ ထိုစဉ် ထီးချိုင့်မှ ကိုသာအေး သူငယ်ချင်း ကိုအောင်နိုင်-ဆိုသူ ရောက်လာသည်၊ ကိုအောင်နိုင်နှင့် ကိုသာအေးတို့ စကားစမြည် ပြောနေစဉ် ကိုအောင်နိုင် စရက်ပင်ပေါ်မှ ပျားအုံကို မြင်သွားသည်။
ဟ-ကိုသာအေး၊ ခင်ဗျား သည်နှစ်တော့ စီးပွားတက်ဦးမှာပဲဗျ၊
ဘာဖြစ်လို့လဲ
ဟော-ဟိုမှာ ပျားအံစွဲနေတယ်လေ၊
မဆိုင်တာပဲဗျာ
မဆိုင်တာ ဆိုင်တာ အပထား၊ ခင်ဗျား သည်ပျားအံကို မောင်းမထုတ်နဲ့နော်၊ သူတို့ ဘာသာ သူတို့ နေပါစေ။
ကိုသာအေး ဘာမျှမပြောပဲ ငြိမ်နေလိုက်သည်၊ ကိုအောင်နိုင် နှုတ်ဆက်ပြန်သွားသည်အထိ ကိုသာအေး ဘ၀င်မကျပေ၊ စိတ်ထဲကလည်း ပျားအုံကို မောင်းထုတ်ဖို့ တေးထားသည်။
တနေ့ ကိုသာအေး လယ်ထဲမသွားဘဲ မူးမူးနှင့် ပျားအုံကို မီးမှိုင်းတိုက်လေသည်၊ ၀ါးလုံးနှင့် မမှီသောကြောင့် သစ်ပင်ပေါ်တက်ပြီး မှိုင်းတက်လေသည်၊ ပျားတွေလဲ မီးမှိုင်းကြောင့် ကစဉ်ကလျား ပြေးကုန်ကြ၏၊ ကိုသာအေးလည်း မီးလောင်နေသော ပျားတွေကို ကြည့်၍ ပီတိဖြစ်နေသည်၊ ထိုစဉ် ၀ါးလုံး၌ ပတ်ထားသော ရေနံချေးမီးဝတ်သည် သရက်ပင်အောက်သို့ ပြုတ်ကျသွားသည်၊ အပင်ခြေရင်းမှသစ်ရွက်တွေကို မီးစွဲလောင်သည်၊ နွေရာသီဖြစ်၍ လေလည်းတိုက်နေသည်၊ သစ်ရွက်ခြောက်များမှတဆင့် ပင်စည်အထိ မီးကူးစက်လာသည်၊ ကိုသာအေးသည် အပေါ်တက်၍လည်းမဖြစ်၊ အောက်ဆင်း၍လည်းမဖြစ်၊ အရူးမီးဝိုင်းနေပေပြီ၊ မီးဟပ်လိုက်သဖြင့် ကိုသာအေး အောက်ပြုတ်ကျသွား၏၊ ဘေးပတ်ဝန်းကျင်အိမ်မှ လူများရောက်လာပြီး အတင်းဝင်ဆွဲကြသည်၊ ကိုသာအေးကား သတိမရတော့၊ ထာဝရအိပ်စက်သွားလေသည်။
ပျားအုံစွဲလျှင် စီးပွားတက်မည် ဆိုသည်ကို ကိုသာအေး မယုံကြည်သည်ပင် ထားဦး၊ သူတပါးကို မီးရှို့သတ်သဖြင့် မိမိလည်း မီးလောင်မြိုက်ခံရသော အကျိုးကို ကိုသာအေးတယောက် ကြုံတွေ့သွားရလေသည်။
( မွန်ဆူး (န) ထီးချိုင့် )
( မြတ်မင်္ဂလာ ၁၉၉၁-ဇန်န၀ါရီ )

No comments: