Thursday, December 11, 2008

ဘာသာရေး ပြဿနာ ( ၆ )

ဘဒ္ဒန္တ တိလောကသာရ-ဖြေသည်။

( ငရဲ နှင့် ၀ဋ် )
( မေး)။ ငရဲမှာ အပ ၀ဋ်မှာအမြဲ-ဟူသော ဆိုရိုးစကားရှိပါသည်၊ မည်သည့်အတွက်ကြောင့် ငရဲမှာ ကုသိုလ်ဖြင့် ဆေးကြောလို့ရပြီး ၀ဋ်ကျတော့ မရပါသလဲဘုရား၊ ရှင်းလင်း မိန့်ကြားပေးပါရန်။
( မနိုင်နိုင်မော်-ပုလောမြို့ )

( ဖြေ )။ ငရဲဟူသည်မှာ အကုသိုလ်၏ ပဋိသန္ဓေကျိုးဖြစ်၍
ဝဋ်ဟူသည်မှာ အကုသိုလ်၏ ပ၀တ္တိအကျိုး ဖြစ်ပါသည်။
ကုသိုလ်ကောင်းမှုများကို စဉ်ဆက်မပြတ် ပြုလုပ်ခြင်းဖြင့် ကုသိုလ်ကောင်းမှုများက သုဂတိဘ၀များ၌ ပဋိသန္ဓေ အကျိုးများ ဆက်ကာဆက်ကာ ပေးသွားလျှင် ငရဲပဋိသန္ဓေများ ကြားမ၀င်နိုင်ပါ၊
ဘ၀တခုခု၌ မဂ်တရား ဖိုလ်တရားများကို ရရှိသွားလျှင် ငရဲဟူသော ပဋိသန္ဓေကျိုးမှာ အဟောသိကံ ဖြစ်သွားရသည်။
ဝဋ်ဟူသည်မှာ ပဋိသန္ဓေကျိုး မဟုတ်ပါ၊ သုဂတိဘ၀၌ပင် ကုသိုလ်ကျိုးများ အကြား၌ အခြားအကုသိုလ်ကံ တခုခု၏ ဥပထမ္ဘက-ထောက်ပံ့မှုကို ရလျှင် ကုသိုလ်အကျိုးပေးတို့ ကွာဟ လစ်ဟင်းနေရာ၌ အန္တရာယ်အနေဖြင့် ၀င်ရောက်၍ အကျိုးပေးနိုင်ပါသည်။
*********************************************************************************

( ဈာန် အဘိညာဉ် )

( မေး)။ ဈာန်နှင့်အဘိညာဉ်တို့၏ အဓိပ္ပါယ်ကို ခွဲခြားသိလိုပါသည်၊
ဘုရားလောင်းသိဒ္ဓတ္ထ တောထွက်ပြီး ပထမဈာန်မှ အဋ္ဌမဈာန်အထိ ဈာန်ရှစ်ဆင့် ရရှိအောင် အဆင့်ဆင့် ကျင့်ကြံအားထုတ်ပုံကို အကျဉ်းချုံး၍ ရှင်းပြပေးတော်မူပါရန်
( မောင်သန်းနိုင်-မြန်မာစာအဓိက၊ မေဓာဝီလမ်း-မြောက်ဥက္ကလာပ )

( ဖြေ )။ ကာမစ္ဆန္ဒစသော နီဝရဏတရားတို့ကို လောင်မြိုက်တတ်သော တရားကို ဈာန်ဟုခေါ်သည်။
စတုက္ကနည်းအားဖြင့် ရူပဈာန်လေးပါး၊ အရူပဈာန်လေးပါး၊ ယင်း ၈-ပါးကို သမာပတ် ၈-ပါးဟုခေါ်သည်။
အဋ္ဌမဈာန်ဟု အသုံးမရှိပါ၊
ရူပါဝစရ ကုသိုလ် ကြိယာ ပဉ္စမဈာန်ကို အထူးသိတတ်သော သဘောတရားများ ဖြစ်၍ အဘိညာဉ်ဟုခေါ်သည်။
အဘိညာဉ်မှာ ဣဒ္ဓိဝိဓ-စသည်ဖြင့် ငါးပါးရှိပါသည်။
ဈာန် ၈-ဆင့်ရရှိရန် အဆင့်ဆင့် အားထုတ်ပုံမှာ-ပ၀ထီစသော ကသိုဏ်းဝန်းကို ရှု၍ ရူပပထမဈာန် စသည်ဖြင့် ရူပဈာန် ၅-ဆင့်၊ ထို့နောက် ကောင်းကင်ပညတ် စသည် အာရုံဖြင့် အရူပဈာန် ၄-ဆင့်ကို ဆက်လက် အားထုတ်ရပါသည်၊
အားထုတ်ရပုံကို ဖော်ပြရလျှင် အလွန်ကျယ်ဝန်းလှပါသည်၊ အဘိဓမ္မာ စိတ်ပိုင်း ရူပ-အရူပ အပိုင်းအခန်းကို လေ့လာဖို့ လိုအပ်ပါသည်။
*********************************************************************************

( အရှင်မောဂ္ဂလိပုတ္တတိဿ နှင့် အရှင်နာဂသိန် )

( မေး )။ တတိယသံဂါယနာ ဦးဆောင်အရှင် မောဂ္ဂလိပုတ္တိဿနှင့်
မိလိန္ဒမင်းကြီး အမေးကို ဖြေတော်မူသည့် အရှင်နာဂ၀ိန်တို့၏ အကြောင်းအရာမှာ ဆင်သလိုဖြစ်နေပါ၍
ရှင်းလင်းဖြေကြးပေးတော်မူပါဘုရား။
( မောင်ခင်ဦး-ကြို့ချောင်းရွာ၊ ဥက္ကံနယ် )

( ဖြေ )။ အရှင်မောဂ္ဂလိပုတ္တတိဿ၊ အရှင်နာဂသေန တို့သာမက အဋ္ဌကထာကျမ်းပြု အရှင်မဟာဗုဒ္ဓဃောသတို့ပါ လူ့ဘ၀သို့ ရောက်လာရသော အတ္ထုပ္ပတ္တိအကြောင်းမှာ တူညီသလို
ဖြစ်နေကြပါသည်၊
ဤသည်မှာလည်း သဘာဝမလွန်ပါ၊ ရဟန္တာအရှင်မြတ်ကြီးများသည် အနာဂတ်သာသနာတော်ကြီး မည်သည့်ဘေးရန်များ ထိပါးမည်နည်း၊ မည်သို့အခက်အခဲများ ပေါ်ပေါက်မည်နည်း၊ စသည်ဖြင့် အနာဂတံသ ဉာဏ်ဖြင့် ကြည့်ရှုတော်မူကြသည်၊ ယင်းသို့ ကြည့်ရှုတော်မူရာမှ ဤမည်သောအချိန်အခါ၌ ဤမည်သော အန္တရာယ်များ အခက်အခဲများ တွေ့ကြုံရလိမ့်မည်-ဟု မြင်တော်မူလျှင် ဤအန္တရာယ်အခက်အခဲတို့ကို မည်သူဖယ်ရှား သုတ်သင်နိုင်မည်နည်း-ဟုကြည့်တော်မူသည်၊ ထိုအချိန်၌ ပညာရှိ ရဟန္တာလောင်းများမှာ နတ်ပြည်၌သာ ရှိနေကြကြောင်း မြင်တော်မူသည်နှင့် ထိုအချိန်အခါ၌ လူပြည်၌ဖြစ်ရန်၊ ဖြစ်လျှင် စောင့်ရှောက်၍ ပညာသင်ရန် တာဝန် အသီးသီးယူစေပြီးမှ စိတ်ချလက်ချ ပရိနိဗ္ဗာန်ပြုတော်မူကြသည်၊
ဆိုင်ရာဆိုင်ရာ အချိန်အခါတို့၌ ပညာရှင် နတ်သားတို့က နတ်ပြည်မှစုတေ၍ လူ့ပြည်ဖြစ်ခြင်း၊ စောင့်ရှောက် ပညာသင်ပေးရမည့် ရဟန်းသံဃာတော်တို့က သာသနာတွင်းရောက်အောင် ဆွဲဆောင်၍ ပညာသင်ပေးရခြင်း စသည်တို့မှာ ပြုမူပြောဆိုပုံမှစ၍ တူညီနေကြပါသည်၊ တူညီနေ၍ မဟုတ်နိုင်ပါဘူး-ဟု ပြောဆိုရန်မသင့်။
ဤသို့ဖြစ်လျှင် ဤနည်းဖြင့် သာသနာတော်ကို သုတ်သင်ကြရပါကလား-ဟု ရှေးရှေး သာသနာတော်စောင့် ရဟန္တာအရှင်မြတ်ကြီးများအား အကြည်ညိုပွားကြရန်ပင် ဖြစ်ပါသည်။
*********************************************************************************

( သီလအကြောင်း )

( မေး )။ ဥပုသ်စောင့်လိုသူများသည် ရဟန်းတပါးပါးထံမှဖြစ်စေ၊ ရုပ်ပွားတော် စေတီတော်များ ရှေ့၌ဖြစ်စေ ခံယူဆောက်တည်နိုင်ကြောင်း သိရပါသည်။
သို့တည်းမဟုတ် မည်သူ့ထံမှ မဆောက်တည်ဘဲ ငါးပါးသီလ ရှစ်ပါးသီလ တို့ကို စိတ်ဖြင့် စောင့်စည်းနေထိုင် ကျင့်ကြံလျှင် ဖြစ်နိုင် မဖြစ်နိုင် ဖြေကြားပေးတော်မူပါ ဘုရား။
( မင်းနွယ်သစ်-ကွမ်ရိုက်ရွာ၊ ချောင်းဆုံမြို့နယ် )

( ဖြေ )။ ငါးပါး ရှစ်ပါး သီလတို့ကို မိမိဘာသာ စောင့်ရှောက် ဆောက်တည်နိုင်သော်လည်း နှုတ်မြွက်ဆို၍ကား ဆောက်တည်ရပါမည်။
နှုတ်မမြွက်ဘဲ စိတ်ထဲက ဆောက်တည် စောင့်စည်း နေထိုင်ရုံဖြင့် မရပါ။
အနည်းဆုံး-တပည့်တော်သည် ငါးပါးသီလကို ဆောက်တည်ပါ၏ ဘုရား။
ရှစ်ပါးသီလကို ဆောက်တည်ပါ၏ ဘုရား-ဟစသည်ဖြင့်
မြန်မာဘာသာဖြင့် နှုတ်မြွက် ပြောဆို၍ ဆောက်တည်ရပါမည်။
*********************************************************************************

( ကိုယ်စောင့်နတ်နှင့် သာဝက ဆုရှင်များ )

( မေး )။ ၁။ ကုသိုလ်အဖို့ဘာဂကို အမျှဝေရာတွင် ကိုယ်မှာစောင့်ကြပ် ကိုယ်စောင့်နတ်မှ အရင်းစ၍-
စသည်ဖြင့် ပေးပို့လေ့ရှိကြရာ ခန္ဓာကိုယ်ကို စောင့်ကြပ်သော ကိုယ်စောင့်နတ် တကယ် ရှိ-မရှိ သိလိုပါသည်ဘုရား။
၂။ အဂ္ဂသာဝက၊ မဟာသာဝက၊ ဧတဒဂ်ရ ရဟန္တာအရှင်၊ အရှင်မ အလောင်းများသည် မိမိတိုပတောင့်တသော ဆုကို ဘ၀တိုင်း သတိရနိုင်ကြပါသလား ဖြေကြားတော်မူပါရန်။
( မမီးမီး-ဗိုလ်တထောင်မြို့နယ် )

( ဖြေ )။ ၁။ အရက္ခဒေ၀တာ-ဟူသော ကိုယ်စောင့်နတ်ရှီကြောင်း ဗုဒ္ဓစာပေတွင် အထင်အရှားရှိသည်။
သို့သော် ကိုယ်စောင့်နတ်ဆို၍ စောင့်ရှောက်အပ်သောသူ၏ ကိုယ်တွင် အမြဲကပ်မှီ၍နေသည်-ဟု မမှတ်ရာ၊ အခြေအနေအရ ကြည့်ရှုစောင့်ရှောက်ခြင်းမျိုးသာဖြစ်၍ ယင်းတို့ကုသိုလ်အားလျော်စွာ ဘုမ္မဋ္ဌ၊ ရုက္ခဋ္ဌ စသည်ဖြင့် ဘုံဗိမာန်များ၌ နေကြသော နတ်များသည်ဖြစ်သည်၊
ဥပမာ-ရုက္ခစိုး ဆိုပါစို့၊ ၄င်းတို့မှာ သစ်ပင်ပေါ် သစ်ကိုင်းပေါ် ခွဆုံ စသည်၌ နေသည်မဟုတ်၊
သစ်ပင်၏ထိပ်ဖျား၌ဖြစ်စေ၊ အနီးအပါး၌ဖြစ်စေ၊ ကုသိုလ်အားလျော်စွာ ဖြစ်လာသော ဘုံဗိမာန်ရှိလေသည်။
ယင်းဘုံဗိမာန်၌ နေကြ၏၊ သစ်ပင်ပျက်စီးလျှင် ဘုံဗိမာန်လည်း ပျက်စီးတော့သည်၊
ကိုယ်စောင့်နတ်မှာ မိမိဆိုင်ရာ လူ ကွယ်လွန်လျှင် အခြားတဦးသို့ ပြောင်းရွှေ့သွားရတတ်လေသည်၊ သို့သော် လူတိုင်းတွင် ကိုယ်စောင့်နတ် ရှိသည်မဟုတ်၊ ကုသိုလ်ရှိသူ ကောင်းမှုရှင် ဘုန်းကံရှင်များ၌သာ ရှိနိုင်ကြောင်း သတိပြုပါလေ။

၂။ အလွန်လေးနက်သော ဧတဒဂ်ဆုကဲ့သို့ အဓိကရကိစ္စကြီးကို မဆိုထားဘိ၊ မိမိ၏ စွဲလမ်းမှု ၀ါသနာသည်ပင် တဘ၀နှင့် တဘ၀ လိုက်ပါစွဲထင်လေ့ရှိသည်၊
အရှင်ပိလိန္ဒ၀စ္ဆသည် ဘ၀များစွာ ဇာတ်မြင့်ပုဏ္ဏားမျိုးဖြစ်ပြီး မိမိအောက်လူများကို သူယုတ်-ဟု ခေါ်လေ့ရှိကြောင်း နောက်ဆုံးဘ၀ ရဟန္တာဖြစ်သည့်တိုင်အောင် လူများအား သူယုတ်-ဟု ခေါ်လေ့ရှိကြောင်း၊ မျောက်ဘ၀နှင့်နီးစပ်သော ရဟန္တာတပါးမှာ မြောင်း-စသည်ကို ခုန်၍သွားတတ်ကြောင်း၊
ဗြဟ္မာပြည်မှ လာသူများမှာ ကာမကို ရွံရှာ စက်ဆုပ်၍ ၀ိသဘာဂအာရုံများကို ရှောင်ရှားတတ်ကြကြောင်း ဆိုပါသည်။
ဧတဒဂ်ဆုရှင်များကား ယင်းဆုကို အလွန့်အလွန် မြတ်နိုးလှသည်၊ သမုဒ္ဒရာ လက်တကမ်းသို့ အရောက်သွားနိုင်လျှင် ယင်းဆုကို ရမည်ဆိုလျှင်ပင် သမုဒ္ဒရာကို လက်ပစ်ကူး၍ သွားနိုင်သော ဆန္ဒရှိသည်။
ဤမြေအောက် ရောက်အောင်သွားနိုင်လျှင် ဤဆုကို ရမည်ဆိုပါက မြေကြီးကိုယက်၍ အရောက်သွားနိုင်သည့် ဆန္ဒရှိသည်။ ဤမျှ လိုအင်ဆန္ဒကို လွန်လွန်မင်းမင်း စွဲပိုက်ထားသူများဖြစ်၍ ဘ၀ပေါင်းမည်မျှ ကွာခြားလင့်ကစား မိမိတောင်းထားသောဆုကို သတိရနိုင်ပေသည်။
ရှင်သီဝလိအလောင်း သတို့သားသည် ကမ္ဘာတသိန်းထက်က လာဘ်လာဘ ပေါများရာတွင် အမြတ်ဆုံး ဧတဒဂ်ဆုကို တောင်းထားကြောင်း၊ ၉၁-ကမ္ဘာထက် ၀ိပဿီမြတ်စွာဘုရားလက်ထက် လှူဒါန်းရာတွင်လည်း ထိုဆုကိုပင် ထပ်၍တောင်းကြောင်း ထို့အတူ ဘ၀တိုင်းပင် ဤဆုကိုသာ တောင်းဆိုခဲ့ကြောင်း အပါဒါန်တွင် ပါရှိပေသည်။
*********************************************************************************

( ဘုရားခန်းနှင့် အောက်ထပ် )

( မေး )။ အောက်ထပ် အိမ်ထောင်စုများ၌ ဘုရားခန်းထား၍ ကိုးကွယ်ရာ အပေါ်ထပ် အိမ်ထောင်စုတို့၏ အောက်မှာ ဖြစ်နေတတ်၍ ဘုရားခန်း၏အပေါ်၌ သွားလာနေထိုင်သူများ၌ အပြစ်ရှိပါသလား၊
သို့မဟုတ် အောက်ထပ်၌ ဘုရားခန်း ထားသူများမှာ အပြစ်ရှိပါသလား၊
ဖြေကြားပေးပါရန် လျှောက်ထားပါသည်ဘုရား။
( ဒေါ်တင်တင်-ရန်ကင်း )

( ဖြေ )။ အထက်ထပ်၌ နေသည်ဖြစ်စေ၊ အောက်ထပ်၌ နေသည်ဖြစ်စေ၊ ဗုဒ္ဓရှင်တော်မြတ်ဘုရား၌ ကြည်ညိုကိုးကွယ်ကြသော ဗုဒ္ဓဘာသာဝင်များပီပီ ဘုရားခန်းကို တခမ်းတနားထား၍ ကိုးကွယ်ကြခြင်းမှာ ဓမ္မတာဖြစ်ရသည်။
အောက်ထပ်ဖြစ်၍ ဘရားခန်း မထားသင့်-မကိုးကွယ်သင့်ဟူ၍ မဖြစ်သင့်ပါချေ။
မိမိတို့နေထိုင်ရာ နေရာ၌ အထွတ်မြတ်ဆုံးထား၍ ကိုးကွယ်ကြရန်သာ ဖြစ်သည်။
ဤသို့ အောက်ထပ်၌ ဘုရားထား၍ ကိုးကွယ်ခြင်းကြောင့် အထက်ထပ်၌ နေသူတို့အတွက်လည်း မရိုမသေ ပြုမူသည်မမည်။ ပကတိနေမြဲအတိုင်း နေပါ၊ အပြစ်ဖြစ်စရာ အကြောင်းမရှိပေ။

သာဓကအနေဖြင့် ဆိုရသော်
ဥတ္တရသတို့သမီးသည် မိမိခင်ပွန်းဖြစ်သူက ဗုဒ္ဓရှင်တော်မြတ်ဘုရားအား ကိုးကွယ်သူမဟုတ်၍ ခင်ပွန်းဖြစ်သူအား မိမိကိုယ်စား သီရိမာအား အထက်ထပ်၌ ပြုစုလုပ်ကျွေးစေခဲ့သည်၊ မိမိက အောက်ထပ်သို့ ဆင်းလာပြီး ဘုရားအမှူးရှိသော သံဃာတော်တို့အား ခုနစ်ရက်ပတ်လုံး ပင့်ဖိတ်၍ ဆွမ်းလုပ်ကျွေးခဲ့လေသည်။
မြတ်စွာဘုရားကိုယ်တော်တိုင်လည်း ဥတ္တရာရှိရာ ပြသာဒ်အောက်ထပ်၍ ကြွရောက်ချီးမြှောက်ခဲ့သည်။
ထို့ကြောင့် အိမ်အောက်ထပ်၌ နေထိုင်သော်လည်း ဘုရားခန်းထား၍ ကိုးကွယ်သင့်သည်သာ ဖြစ်ပါ၏၊ ဘုရားခန်းသို့ အမှုန်အမှိုက်များ မကျရောက်နိုင်ရန် အ၀တ်မျက်နှာကြက်စသည် လှလှပပ ပြုလုပ်ပူဇော်ထားကြရန်ကား လိုပေလိမ့်မည်။

No comments: