Friday, January 16, 2009

ဘာသာရေးပြဿနာ ( ၁၀ )

( ဘဒ္ဒန္တ တိလောကသာရ ဖြေသည် )

( မေး ) ( ဥပုသ်ထွက်ခြင်း )
ဥပုသ်နေ့တွင် ဥပုသ်ဆောက်တည်ပြီး နောက်နေပတွင် ဘုရားရှေ့တွင် ဥပုသ်ထွက်ကြောင်း ခွင့်ပန်ဖို့ လိုအပ်ပါသလား။
ခွင့်မပန် ဥပုသ်မချဘဲ အစားအစာများစားလျှင် အပြစ်ဖြစ်ပါသလား။
( ဒေါ်စီစီဝင်း-၁၆၃/၂ ငှက်တော်လမ်း၊ မြင်သာ။)
( အေးမွန်ခိုင်-၆၆/၁၆၅ လမ်း တာမွေ။)
( မမြမြ-လောင်းလုံမြို့ တနင်္သာရီတိုင်း။)

( ဖြေ )
ဥပုသ်သီလမှာ ရိုးရိုးခံယူဆောက်တည်လျှင် ဥပုသ်နေ့ကုန်ဆုံး၍ နောက်တနေ့ အရုဏ်တက်ချိန်တွင် အလိုအလျှောက် ခံယူချက် ပျက်ပြယ်သွားပါသည်။
ဥပုသ်ထွက်ကြောင်း ခွင့်ပန်ခြင်း၊ ငါးပါးသီလ စသည် ခံယူ၍ ဥပုသ်ချခြင်း စသည် ပြုဖွယ်မလိုပါ။

အဓိဋ္ဌာန်ဖြင့် ၇-ရက် ဥပုသ်ဆောက်တည်မည်၊ ၉-ရက် ၄၅-ရက် စသည် ဆောက်တည်မည်ဟု ဆို၍ ခံယူဆောက်တည်လျှင်လည်းအစတနေ့ ခံယူဆောက်တည်ပြီး နောက်နေ့များတွင် ထပ်ပြီး
ခံယူဆောက်တည်ရန် မလို၊ အဓိဋ္ဌာန်ရက် ကုန်ဆုံးမှ အလိုလို ပျက်ပြယ်သွားပါသည်။
*********************************************************************************

( မေး ) ( ယမမင်းလက်နက် )
ယမဿ နယနာဝုဓံ-ဟု စာများတွင် ရှိ၍ ယမမင်းကြည့်ကာမျှဖြင့် သတ္တ၀ါတို့ သေကြေရပါသလား၊
ယမမင်းကြည့်၍ သေလျှင် ၄င်းယမမင်း မကြည့်အောင်၊ ကြည့်သည့်တိုင် မသေအောင် မည်သည့်ဂါထာများကို ရွတ်ရမည်နည်း၊ မည်သည့်ကောင်းမှုကုသိုလ်များဖြင့် ကာကွယ်နိုင်ပါသနည်း အရှင်ဘုရား။
( ညိုမြင့်-၀န်းသို )

( ဖြေ )
စက္ကာဝုဓ ဟိ သက္ကဿ ၊ ယမဿ နယနာဝုဓံ ။
ဂဒါ ၀ဿဝဏဿာပိ ၊ ဒုဿံ အာဠ၀ကဿ စ ။-ဟု ကျမ်းဂန်များတွင် လာပါသည်၊
သိကြားမင်း၏ လက်နက်မှာ-၀ရဇိန်
ယမမင်း၏ လက်နက်မှာ-မျက်စိ,
ဝေဿ၀ဏ်နတ်မင်း၏ လက်နက်ကား-လှံကန် ( သို့မဟုတ် ) ချွန်းတောင်း၊
အာဠာဝက ဘီလူး၏ လက်နက်ကား-ဘွဲ့ဖြူပုဆိုး-ဟု
လက်နက်ကြီးလေးပါးကို ဆိုသည်။

အမှတ် ၂-ဖြစ်သော ယမမင်းဟူသည်ကား ကုမ္ဘန်ဘီလူးတို့ကို အုပ်ချုပ်သော ယမနတ်မင်း ဖြစ်ပါသည်။
ငရဲပြည်က ယမမင်း မဟုတ်ပါ။
ထိုယမနတ်မင်းသည် အမျက်ထွက်၍ကြည့်လျှင် ကုမ္ဘန်ဘီလူးတို့သည် အိုးကင်းပူတွင် ထည့်သော နှမ်းတို့ကဲ့သို့ ဖျစ်ဖျစ်မြည်လျက် သေပျောက်ကြရသည်-ဟု ဆိုပါသည်။
လူတို့နှင့်မဆိုင်၍ ၄င်းအတွက် အကာအကွယ် အတားအဆီးများ လုပ်ရန် မလိုပါ။
*********************************************************************************

( မေး ) ( သီလရှင်ဝတ်ခြင်း )
သီလရှင် ၀တ်ခြင်းသည် ၀တ်သူနှင့် ၀တ်သူ၏မိဘများ၌ မည်ကဲ့သို့ အကျိုးကျေးဇူး ရှိနိုင်သည်ကို ရှင်းပြပေးတော်မူပါဘုရား။
( နုနုခိုင်-မြို့နယ်စာရင်းရုံ၊ အိမ်မဲမြို့ )

( ဖြေ )
ဗုဒ္ဓစာပေတွင်
၁။ ဥပသမ္ပဒ ပဗ္ဗဇ္ဇ
၂။ သာမဏေရ ပဗ္ဗဇ္ဇ
၃။ ဣသိ ပဗ္ဗဇ္ဇ
၎။ ပရိဗ္ဗာဇက ပဗ္ဗဇ္ဇ ဟူ၍ ပဗ္ဗဇ္ဇ ၄-မျိုး ရှိပါသည်။
ရဟန်းပြုခြင်း၊ သာမဏေပြုခြင်း၊ ရသေ့ပြုခြင်းနှင့် သီလရှင်ပြုခြင်းဟု ဆိုရပါမည်။
သီလရှင်မှာ အမှတ် ၄-ပရိဗ္ဗာဇက ပဗ္ဗဇ္ဇ ဖြစ်၍ မိန်းကလေးတဦးအနေဖြင့် မိမိ၏ အလှအပ ဗန်းတင်ပစ္စည်း ဖြစ်သော ဆံပင်ကို ရိတ်ပယ်လိုက်နိုင်ခြင်းပင် အလွန်ခံယဉ်းသော ကိစ္စဖြစ်၍ ပစ္စည်းဥစ္စာ ရတနာရွှေငွေတို့ကို စွန့်လွှတ်သကဲ့သို့ နိက္ခမပါရမီ တမျိုးပင် ဖြစ်ပါသည်။
ထို့နောက် လူဝတ်ကြောင်ကိုပယ်၍ သီလရှင်ဝတ် ဖန်ရည်ဆိုးဝတ်ကို ၀တ်ကာ လူတို့ဆောက်တည်နိုင်ခဲသော ၈-ပါး ၉-ပါး ၁၀-ပါး သီလများကို နိစ္စ ဆောက်တည်နေနိုင်ခြင်း။
စာပေကျမ်းဂန် သင်အံနိုင်ခြင်း၊ တရားစာပေ လေ့လာခြင်း၊ သမထ ၀ိပဿနာ ဘာဝနာများကို ပွားများနေထိုင်ခြင်း စသည်ဖြင့် ဘုရားသာသနာကို ချီးမြှောက်နိုင်ခြင်းမှာ မိန်းမဘ၀ပင် ဖြစ်သော်လည်း အလွန်ရခဲသော ဒုလ္လဘတရားကို ရခြင်းဖြစ်၍ အထူးမြင့်မြတ်လှပါသည်။
ဘ၀ပေါင်းများစွာက လင်ယူ သားမွေး လောကီရေး ကိစ္စများဖြင့်သာ အကုသိုလ်နယ်ပယ် ဒုဂ္ဂတိနယ်ပယ်တွင် ကျင်လည်ရာ ကျင်လည်ကြောင်း ကျင့်ကြံနေခဲ့ရာမှ ယခု ဘုရားသာသနာနှင့်တွေ့ခိုက်တွင် မဂ်ဖိုလ်ရရေး အသက်ပေး အားထုတ်ရခြင်း၊ သာသနာနွယ်ဝင် ဖြစ်ခွင့်ရခြင်းတို့မှာ ဘ၀၏အနှစ်သာရ အစစ်ပင်ဖြစ်ပါသည်၊

သမီးကို မိမိတို့ကိုယ်တိုင် ဘုရားသမီးတော်ဘ၀ိသို့ ပို့ဆောင်ပေးကြသော မိဘများမှာလည်း သာသနာနုဂ္ဂဟ ကုသိုလ်ထူးကို ဆည်းပူးကြသူများပင်ဖြစ်၍ လွန်စွာ အကျိုးကြီးလှပါသည်။
*********************************************************************************

( မေး ) ( အမျိုးသမီးများနှင့် နိဗ္ဗာန်တရား )
ဘုရားလက်ထက်က ရဟန္တာမ၊ အနာဂါမ် သောတာပန် အမျိုးသမီးများ ရှိသလို ဘုရားပရိနိဗ္ဗာန်စံပြီးသည်မှ ဤခေတ်အထိတွင်လည်း ရဟန္တာ အနာဂါမ် သောတာပန် အမျိုးသမီးများ ပေါ်ထွန်းနိုင်ပါသလားဘုရား။
( ဒေါ်စီစီဝင်း-၁၆၃/၂ ငှက်တော်လမ်း၊ မြင်သာ )

( ဖြေ )
ဘုရားရှင်ပရိနိဗ္ဗာန်စံပြီးနောက် ဤဘက်သာသနာတော် တလျှောက်လုံးတွင် အမျိုးသမီးရဟန္တာ၊ အနာဂါမ်အရိယာ များစွာရှိခဲ့ပါသည်။
မဇ္ဈိမဒေသတွင် အသောကမင်းကြီး သမီးတော် သံဃမိတ္တာထေရ်ရီမ၊ ထိုမှ သိဟိုဠ် (သီရိလင်္ကာ) သာသနာ တခေတ်လုံး ရဟန္တာမများ များလှပါသည်။
မြန်မာနိုင်ငံတွင်လည်း ရှင်သောဏ ရှင်ဥတ္တရတို့ သာသနာပြုစဉ်က အမျိုးသမီး ၁၅၀၀ သာသနာဝင်၍ အချို့  ရဟန္တာ၊ အနာဂါမ် သောတာပန် ဖြစ်ကြပါသည်။
သာသနာနှစ်ငါးရာခန့်တွင် ပေါ်သော မိလိန္ဒမင်း၏ ပြဿနာတို့ကို ဖြေကြားသည့် ရှင်နာဂသိန်သည် ဆွမ်းဒါယိကာမတဦးအား အနုမောဒနာ တရားဟောရာ နာသူ ဒါယိကာမကြီးလည်း သောတာပတ္တိမဂ်ဖိုလ်ရ၊ ဟောသူ အရှင်နာဂသ်ိန်လည်း သောတာပတ္တိမဂ်ဖိုလ် ရကြောင်း လာရှိပါသည်၊ ဤသို့ မဂ်ဖိုလ်ရရှိသူများ ရှိမည်ဖြစ်သော်လည်း မဂ်ဖိုလ်ရသူတို့ကလည်း မဂ်ဖိုလ်ရကြောင်း ပြောကြားမြဲ ဓမ္မတာမရှိ၊ မှတ်တမ်းတင် ဟောကြားမည့် ပုဂ္ဂိုလ်လည်းမရှိ၍ မသိကြရခြင်းသာ ဖြစ်ဖွယ်ရှိပါသည်၊ ဘုရားတရားတော်များ အပြည့်အစုံ ရှိခြင်း၊ ဟောကြားသူ ပြသသူ ကျင့်သုံးသူတို့ မပြတ်လတ်ခြင်းတို့ကြောင့် မုချ အရိယာဖြစ်သူ အမျိုးသား အမျိုးသမီးများ ရှိမည်မှာ မလွဲပါ။
*********************************************************************************

( မေး ) ( ရဟန်းတော်များနှင့် နိဿဂ္ဂိပစ္စည်းအလှူ )
ရဟန်းတော်များသည် နိဿဂ္ဂိထိုက်သော ပစ္စည်းဝတ္ထုတို့ဖြင့် အလှူဒါနပြုလျှင် ကုသိုလ်ရနိုင်ပါသလား။
ဥပမာ-ကျောင်းကန် ဘုရား စေတီများ၌ ငွေလှူဒါန်းခြင်း၊ ဒုက္ခသည်တို့အား ငွေကြေး စွန့်ကြဲခြင်း၊ စသည်များကို ပြု၍ ကုသိုလ် ဖြစ်-မဖြစ် သိလိုပါသည်ဘုရား။
( အရှင်ဝရသာမိ-ပဉ္စနိကာယကောင်းတိုက်၊ ကံဘဲ့၊ ရန်ကင်း )

( ဖြေ )
ငွေကြေးစသော နိဿဂ္ဂိပစ္စည်းများမှာ ရဟန်းတော်များအဖို့ မုချစွန့်ပစ်ရမည် ဖြစ်ပါသည်။
စွန့်ပစ်ပြီးနောက် ဒေသနာကြားမှ စင်ကြယ်နိုင်ကြောင်း ၀ိနည်းလမ်းကြောင်းရှိ၍ ၄င်းစွန့်ပစ်ပစ္စည်း၌
အာလယ မပြတ်ခြင်း၊ တွယ်တာခြင်း မရှိဖို့ လိုပါသည်၊ ယင်းကိစ္စမှာ ၀ိနည်းကိစ္စ သက်သက်ဖြစ်သည်။
စွန့်ပစ္စည်းကို အကျိုးရှိသော ဘုရားတည်ခြင်း ဆေးရုံ စာသင်ကျောင်းနှင့် ဒုက္ခသည်တို့အား လှူဒါန်းခြင်းမှာ ၀ိနည်းကိစ္စနှင့် မသက်ဆိုင်ပါ။
၎င်းစွန့်သော ငွေကြေးဖြင့် ကျောင်းဆောက်လျှင် ထိုကျောင်း၌ မိမိလည်း မနေထိုက်၊ အခြားသံဃာများအားလည်း မအပ်သဖြင့် ပစ္စည်းလေးပါးဆိုင်ရာ၌ မစွန့် မသုံးသင့်ကြောင်း ထင်ရှားပါသည်။
ဘုရားတည်ရာ၌ကား ဆရာတော် ဦးဗုဓ် ထေရုပ္ပတ္တိ၌ ငါ့ကျောင်းက ကိုရင်တွေ ဆေးလိပ်သောက်တာ သာသနာပိုင် ဘုရားတည်တာလောက် အပြစ်မကြီးပါဘူး-ဟူ၍ ဆိုကြောင်း၊ ထိုစဉ်က သာသနာပိုင် ဆရာတော်သည် မိမိဇာတိရွာ၌ ဘုရားတည်နေကြောင်း။
ထိုစကားကို ထိုခေတ်ဆရာတော်များက သာသနာပိုင်သည် ကိုယ်တိုင် ငွေအလှူခံ၍ ဘုရားတည်လျှင်
ဘုရားမှာ သာသနာပိုင်အတွက်သာ မအပ်သောဘုရားဖြစ်၍ အခြားရဟန်းရှင်လူများ အတွက်ကား ရှိခိုးပူဇော်၍ ကုသိုလ်ဖြစ်သည်-ဟု အဆုံးအဖြတ် ပေးကြောင်း ဖတ်ရှုရပါသည်။
ထို့ကြောင့် ဘုရားတည်ခြင်း၊ ဆေးရုံ စာသင်ကျောင်းနှင့် ဒုက္ခသည်တို့အား
လှူဒါန်းစွန့်ကြဲခြင်းတို့ဖြင့် ၀ိနည်းကြောင်းအရ စင်ကြယ်အောင် ပြုထိုက်ပါကြောင်း၊
ဤသို့ လှူဒါန်းဖြင်းကြောင့် ၀ိနည်းပြစ်လည်းလွတ်၊ ကုသိုလ်ကောင်းမှုလည်းဖြစ်၍
ပြုသင့် ပြုထိုက်သောကိစ္စ ဖြစ်ပါကြောင်း ဖြေကြားအပ်ပါသည်။
*********************************************************************************

( မေး ) ( ဘုရားနှင့် တံခွန်ကုက္ကား စသည် )
ဘုရားမှာ တံခွန်၊ ကုက္ကား၊ ထီး၊ အလံ၊ ဂြိုဟ်တိုင် စသည်များကို ဘယ်အဓိပ္ပါယ်ဖြင့် လှူကြပါသနည်း၊ ထိုသို့လှူသဖြင့် မည်သို့ အကျိုးရှိပါသနည်း အရှင်ဘုရား။
( မတင်တင်လှိုင်-ကမာရွတ် )

( ဖြေ )
တံခွန်တိုင်ဆိုသည်မှာ=ဤနေရာတွင် ဘုရားစေတီ ရှိသည်၊ လာရောက် ပူဇော်ကြပါ-ဟူသော အဓိပ္ပါယ်ဖြင့် တိုင်မြင့်မြင့်ထူ၍ အဝေးက မြင်နိုင်အောင် အ၀တ်ကို အပြား၊ အလုံးရှည်ရှည် ပြုလုပ် ဆွဲလှူသည်ကို တံခွန်၊

အ၀တ်စက္ကူစသည်များကို ကားကားစွင့်စွင့် ပြုလုပ် စိုက်ထူထားသည်ကို ကုက္ကားခေါ်၍
ဘုရားစေတီတို့တွင် ဝေေ၀ဆာဆာနှင့် ကြည်ညိုဖွယ်ဖြစ်အောင် လှူဒါန်းကြပါသည်။

တံခွန်တွင်ဆွဲသော အပြားတွင် အလွတ်မထားဘဲ ဂြိုဟ်ရုပ်များ ရေးခြယ်လှူဒါန်းခြင်း၊ ကြိုးဆွဲ၍ ကြက်လျှာ အလံများဆွဲခြင်း၊ ထီးဖြူ ရွှေထီးများ လှူဒါန်းခြင်းမှာလည်း ရှေးဟောင်းဓလေ့များပင် ဖြစ်ပါသည်။
ဘုရားကိုးဆူ ကပ်ရာ၌ကား တံခွန်ကုက္ကား အသေးစားများ ပြုလုပ်လေ့ရှိကြပါသည်၊ ဘုရားစေတီများ၌ ထင်ရှားပေါ်လွင်အောင် လှလှပပ ဆွဲချိတ်လှူဒါန်းခြင်းကြောင့် အခြံအရံများခြင်း၊ အန္တရာယ်ကင်းခြင်း စသော အကျိုးများ ဖြစ်ထွန်းနိုင်ပါသည်။
*********************************************************************************

( မေး ) ( သီဟိုဠ် ( သီရိလင်္ကာ ) မူ သမ္ဗုဒ္ဓေ ၂-မျိုး )
၁။ မြန်မာသမ္ဗုဒ္ဓေ ဂါထာတွင် နှစ်ကျိပ်ရှစ်ဆူ, တသောင်းနှစ်ထောင်, ငါးသိန်း-ဟု ဆိုပါသည်။
သီဟိုဠ်မူဂါထာတွင် လေးသင်္ချေအတွင်း နှစ်ကျိပ်ရှစ်ဆူ၊
ခုနစ်သင်္ချေ အတွင်း တသိန်းနှစ်သောင်းငါးထောင်၊
ကိုးသင်္ချေအတွင်း သုံးသိန်းရှစ်သောင်း ခုနစ်ထောင်-ဟု ပြရာ ကွဲလွဲချက်ရှိနေပါသည်။
မြန်မာမူဂါထာ၌ လာသော သင်္ချာတို့နှင့် မည်သို့ တူညီအောင် ညှိယူရမည်ကို မိန့်ကြားရှင်းလင်းပေးတော်မူပါဘုရား။

၂။ မြန်မာမူ သမ္ဗုဒ္ဓေဂါထာတွင် ဘုရားရှင်ပေါင်း ငါးသိန်း တသောင်း နှစ်ထောင် နှစ်ကျိပ်ရှစ်ဆူ ထင်မြင်အောင် ပါဠိ-မြန်မာ ယှဉ်တွဲဖော်ပြပေးပါရန် လျှောက်ထားပါသည်ဘုရား။
( ၁-ဦးထွန်းလင်း၊ အမှတ် ၁၁၊ ၆-ရပ်ကွက် ကလောမြို့ )
( ၂-ဦးခင်မောင်မြင့်၊ မြန်မာ့ဆက်သွယ်ရေး လုပ်ငန်း၊ မြင်းခြံမြို့ )

( ဖြေ )
သမ္ဗုဒ္ဓေ အဋ္ဌ၀ီသဉ္စ-စသော မြန်မာသမ္ဗုဒ္ဓေဂါထာတွင် သင်္ချေ နှစ်ဆယ်အတွင်း၌ ပွင့်သည့် ဘုရားပေါင်း ငါးသိန်းတသောင်း နှစ်ထောင်နှင့် နှစ်ကျိပ်ရှစ်ဆူကို ကိုးသင်္ချေ, ခုနစ်သင်္ချေ, လေးသင်္ချေ ( ကမ္ဘာတသိန်း ) မခွဲဘဲ ပေါင်း၍ ဖော်ပြပါသည်။
ဤသို့ဖော်ပြရာ၌ ပါဠိမိဿကသင်္ချာ (ပေါင်း၍ယူရသောသင်္ချာ) အနေဖြင့် အနည်းဆုံးမှစ၍ စီကုံးထားပါသည်၊
အားလုံးပေါင်းလျှင် လိုအပ်သော ဘုရားပေါင်း ပြည့်ပါသည်၊ သီဟိုဠ် သမ္ဗုဒ္ဓေဂါထာမှာ အက္ခရာ စာလုံးများသည့်အတိုင်းပင် စိန္တိတံ သတ္တသင်္ချေယျံ-မူအတိုင်း ၇-သင်္ချေအတွင်း ပွင့်သောဘုရားများ၊
၉-သင်္ချေ အတွင်းပွင့်သောဘုရားများနှင့် လေးသင်္ချေ (ကမ္ဘာတသိန်း) အတွင်း ပွင့်သောဘုရားများကို
တသန့်စီ စီကုံးပြထားခြင်းဖြစ်ပါသည်၊ နောက်ဆုံး သရုပ်ပေါင်းလိုက်လျှင်ကား အတူတူပင်ဖြစ်ပါသည်။

၂။ မြန်မာသမ္ဗုဒ္ဓေဂါထာ ( ပထမပုဒ် )၏ လိုရင်း အနက် အဓိပ္ပါယ်မှာ-
အဋ္ဌ၀ီသံ-နှစ်ကျိပ်ရှစ်ဆူကုန်သော၊ သမ္ဗုဒ္ဓေစ-မြတ်စွာဘုရားတို့ကို၎င်း၊
ဒွါဒသဉ္စ သဟဿကေ-တသောင်းနှစ်ထောင်ကုန်သော၊ သမ္ဗုဒ္ဓေစ-မြတ်စွာဘုရားတို့ကို၎င်း၊
ပဉ္စသတသဟဿာနိ-ငါးသိန်းကုန်သော၊ သမ္ဗုဒ္ဓေစ-မြတ်စွာဘုရားတို့ကို၎င်း၊
( ဤသို့ သုံးစု စုပေါင်း ငါးသိန်း တသောင်း နှစ်ထောင် နှစ်ကျိပ်ရှစ်ဆူသော မြတ်စွာဘုရားတို့ကို )
အဟံ-အကျွန်ုပ်သည်၊ သိရသာ-ဦးခေါင်းရတနာဖြင့်၊ နမာမိ-ရှိခိုးပါ၏-ဟု ဆိုလိုပါသည်။

( မြတ်မင်္ဂလာ ၁၉၉၁-အောက်တိုဘာလ )

No comments: