Wednesday, January 14, 2009

ကံ ကံ၏အကျိုး ( ၈ )

( ၀ဋ်ကြွေး )
မနွယ်သည် အသက်သုံးဆယ်အရွယ်အိမ်ထောင်သည် အမျိုးသမီးတဦးဖြစ်သည်၊ အိမ်ထောင်သက် ၂-နှစ်ကျော်ခဲ့ သော်လည်း သားသမီးမထွန်းကားသေးပေ၊ ထို့ကြောင့် သာသမီးလိုချင်ရှာသည်၊ ကလေးများကိုလည်း အလွန်ချစ်သည်၊ သူ၏အိမ်၌လည်း ကလေးများကိုခေါ်၍ ကစားစေသည်။

မနွယ်သည် အိမ်မှာ ခေါ်ကစားနေကျ ကလေးများထဲမှ အောင်ခန့်ကျော်-လေးကို အချစ်ဆုံးဖြစ်သည်၊ အောင်ခန့်ကျော်သည် ချိုချဉ်နှင့် ဘီစကစ်ကို အလွန်အမင်းကြိုက်သူဖြစ်သည်၊ ကလေးများကို မုန့်ဝေသောအခါတွင် ချိုချဉ် နှစ်လုံးသုံးလုံး၊ ဘီစကစ် တချပ်နှစ်ချပ်မျှဖြင့် သူက ကျေနပ်လေ့မရှိပေ၊ မနွယ်လက်ထဲမှ မုန့်ကို ငိုယို၍ လုယူတတ်၊ ထိုအခါ မနွယ်က စိတ်ဆိုးမာန်ဆိုးဖြင့်-

ဒီကလေးလေးဟာလေ မျက်နှာလေးလှသလောက် အကျင့်သိပ်ဆိုးတာပဲ၊ ဘယ်လောက်ကျွေးကျွေး ၀တယ်လို့ကို မရှိဘူး၊ ငတ်ကို ငတ်လွန်းတယ်-စသည်ဖြင့် ပြောဆိုတတ်၏၊
အောင်ခန့်ကျော်တို့ မိသားစုသည် ဆွေမျိုးများနေထိုင်ရာ မုံရွာမြို့သို့ ပြောင်းရွှေ့သွားကြသည်၊ ကံအားလျော်စွာပင် မနွယ်နှင့် ကိုပြည့်စုံတို့ ဇနီးမောင်နှံသည်လည်း သားသမီးရတနာဖြစ်လာမည့် ပဋိသန္ဓေကို ရရှိခဲ့ကြသည်။

ကိုယ်ဝန်လွယ်ချိန် ကိုးလကျော် ဆယ်လရောက်ချိန်မှာတော့ သမီးဦးရတနာ ဆုချမ်း-လေးကို မွေးဖွားခဲ့သည်၊ ဆုချမ်းလေးမှာ ဖောင်းဖောင်းပြည့်ပြည့်နှင့် ချစ်ချင်စဖွယ် အဆင်းသဏ္ဍာန်ရှိသည်၊ အနီးအနားမိသားစုများကပါ လက်ကမချစတမ်း အချစ်ခံရသူလေးဖြစ်သည်၊ တနေ့ သမီးကလေး ငါးလအရွယ် မြို့ဦးစေတီသို့ သွားကြရာ မိတ်ဆွေမိသားစုများနှင့် တွေ့ဆုံကြသည်။

ဟယ်-မနွယ်သမီးကလေးက ချစ်စရာကောင်းလိုက်တာ။
ဒါပေမယ့် သူ့အသားကလေးက ဘာလို့ ညိုရတာတုံး၊ မိဘတွေ ဒီလောက်ဖြူနေတာကို။
နေဦး နေဦး ကျွန်မ ခုမှ သတိရတယ်၊ သမီးလေးက မုံရွာပြောင်းသွားတဲ့ အောင်ခန့်ကျော်နဲ့ တူမနေဘူးလား၊
အေး-ဟုတ်တယ်၊ ခုမှ သေချာကြည့်မိတယ်၊ အောင်ခန့်ကျော်ရုပ်မှ အောင်ခန့်ကျော်ရုပ်ပဲဟေ့။

မိတ်ဆွေမိသားစုပြောစကားကို နားထောင်ရင်း မနွယ်၏စိတ်များ လှုပ်ရှားလာသည်၊ မှန်ပါသည်၊ သမီးကလေး ဆုချမ်းမှာ အသားညိုညို မျက်လုံကလေးဝိုင်းဝိုင်း၊ နှုတ်ခမ်းထူထူကလေးနှင့် အောင်ခန့်ကျော် မျက်နှာပေါက် အတိုင်း ဖြစ်နေသည်။

မနွယ်သည် အောင်ခန့်ကျော်လေးကို မမုန်းပါ၊ သို့သော်လည်း ဆိုးတေလွန်းသူလေးမို့သာ ဒေါသအလျောက် ပြောဆိုမိခြင်းဖြစ်သည်၊ ထိုဒေါသ အပြုအမူသည်ပင် ၀ဋ်လည်သည့်သဘောမျိုး ဖြစ်လာသည်၊ သမီးကလေး ဆုချမ်း ရှစ်လကျော် ကိုးလအရောက်တွင် ချိုချဉ်နှင့် ဘီစကစ်တို့ကို အခြားစားစရာများထက် ပို၍ ကြိုက်နှစ်သက်သည်ကို တွေ့ရသည်၊ တခါတရံ မိခင်နို့ရည်ကိုတောင် မစို့တော့ဘဲ ချိုချဉ်နှင့် ဘီစကစ်ကိုသာ ပူဆာနေသည်၊ မရလျှင် လူးလိမ့်ငိုယိုနေတတ်သည်၊ အောင်ခန့်ကျော်၏ အကျင့်စရိုက်အတိုင်း ဖြစ်သည်။

ခုတော့ မနွယ် နောင်တရပါပြီ၊ ဘာမဟုတ်သော စကားလေးတခွန်း အပြုအမူလေးတခုသည်ပင် ၀ဋ်ကြွေးသဘောကို ဆောင်သည်ဟုလည်း နားလည်သဘောပေါက် သိမြင်ခဲ့ရပါပြီ။

( ဇွဲနေရောင်ခြည် )
*********************************************************************************

( မေတ္တာစွမ်းအား )
ကျွန်ုပ်သည် နေ့စဉ်နှင့်အမျှ မေတ္တာပို့ခြင်းအမှုကို အချိန်မရွေး နေရာမရွေး ပို့သလေ့ရှိပါသည်၊ ကယ်တင်ဖွယ်ရာ သတ္တ၀ါကလေးများ မိမိရှေ့တွင် တွေ့ရှိပါက ကယ်တင်ပေးလေ့ရှိပါသည်၊ အထူးသဖြင့် ငါးသတ္တ၀ါများကို မကြာမကြာ လွှတ်လေ့ရှိပါသည်။

အိမ်က ငါးဝယ်၍ အရှင်ပါလာလျှင်သော်၎င်း၊ လှေလှော်ရင်း လှေပေါ်ခုန်တက်လာသော ငါးအရှင်များကိုသော်၎င်း၊ ပြန်လွှတ်လေ့ရှိပါသည်။

ကျွန်ုပ်၏ အဓိကစီးပွားရေးလုပ်ငန်းမှာ ကိုင်းကျွန်းတောင်ယာစိုက်ပျိုးရေးလုပ်ငန်း ဖြစ်သည်၊ ကျွန်ုပ်တို့ဒေသမှာ မြစ်ဝကျွန်းပေါ်ဒေသဖြစ်သဖြင့် မြစ်ရေများလျှံတက်ပြီးပြန်ကျသွားသောအခါ နှုန်းရေများ တင်ကျန်ခဲ့သည်၊ ထိုနှုန်းမြေများပေါ်တွင် ပဲများ ကြဲပက်စိုက်ပျိုးရပါသည်။

ကျွန်ုပ်၏မြေကွက်မှာ အနိမ့်အ၀ှမ်းဖြစ်သဖြင့် ရေကျသွားသောအခါ ငါးများတင်ကျန်လေ့ရှိပါသည်၊ ရေများ ခန်းခြောက်နည်းပါးသွားသောအခါ ငါးပေါက်များမှာ တကောင်နှင့်တကောင် တိုးဝှေ့ပြီးလွတ်လမ်းရှာကြသည်မှာ သနားစဖွယ်ဖြစ်သည်၊ သို့သော် လွတ်လမ်းမရှိပါ၊ ရေများခန်းခြောက်ပြီး သေဖို့သာရှိသည်။

ကျွန်ုပ်သည် ထိုငါးကလေးများကို ဆန်ကာဖြင့် ယူငင်ပြီး ရေများသော အင်းမကြီးထဲသို့ နှစ်စဉ် လွှတ်ပေးလေ့ရှိသည်၊ ဤသို့လွှတ်ပေးသောအခါ မိမိအကျိုးကို မမျှော်လင့်ခဲ့ပါ၊ လွတ်လမ်းမရှိသော ငါးများကို စာနာသနားစိတ်များဖြင့်သာ လွှတ်ပေးခြင်းဖြစ်သည်။

သို့သော် မိမိပြုသောကံ၏ အကျိုးကား မနေပါ၊ ကျွန်ုပ်မြေကွက်သည် လူလေးဦး ပြောင်းလဲလုပ်ရသော မြေကွက်ဖြစ်သည်၊ ကျွန်ုပ်လုပ်သည့် နှစ်မှစ၍ သီးနှံများ ဖြစ်ထွန်းအောင်မြင်သဖြင့် အနီးအနားရှိ တောင်သူများက ထုတ်ဖော်ချီးမွမ်းကြသည်။

ယခုနှစ် ၂၀၀၈-တွင် တောင်သူများ ရာသီဥတုကြောင့် သီးနှံများ အထွက်မကောင်းကြပါ၊ ကျွန်ုပ်၏ စိုက်ခင်းမှာလည်း ယခင်နှစ်များလောက် မကောင်းသည်ကို တွေ့ရသည်၊ သို့သော်လည်း တပေါင်းလရောက်သောအခါ ပဲပင်များမှာ အသီးအပွင့်များ ဝေဆာပြီး ပဲတောင့်များမှာ ခူးဆွတ်လိုက်၊ သီးလာလိုက်နှင့် အလွန်အားရစရာ ကောင်းလှသည်။

ဤသည်မှာ မေတ္တာပွားများမှု၏ အကျိုးတရားကြောင့် ဖြစ်သည်ဟု ယုံကြည်ယူဆမိပါသည်၊ မေတ္တာပို့ခြင်းကို ရွတ်ဆိုနေရသည်ဆိုလျှင်ပင် စိတ်အေးချမ်းမှု ဖြစ်စေပါသည်၊ ကိုယ်ထိလက်ရောက် ကူညီရိုင်းပင်းကြမည် ဆိုလျှင်ကား အကျိုးကျေးဇူး ထူးကဲစွာ ရရှိမည်မှာ အမှန်ပင် ဖြစ်ပါသည်။

( ခင်အောင်ထွန်း-ဟင်္သာတ )

( မြတ်မင်္ဂလာ ၂၀၀၈-ဒီဇင်္ဘာ )

No comments: