Wednesday, January 28, 2009

ဘုရားရှင်အား မီးကျီးတွင်းကျရန် စီစဉ်ထားပုံ

သာဝတ္ထိပြည်တွင် မြတ်ဗုဒ္ဓ၏တပည့် သီရိဂုတ္တ သူဌေးနှင့် နိဂဏ တက္ကတွန်းတို့၏ တပည့် ဂရဟဒိန္နတို့ ရှိကြ၏၊
မိတ်ဆွေ ဂရဟဒိန္န-က အတန်တန် တိုက်တွန်းမှုကြောင့် သီရိဂုတ္တသူဌေးသည် ကြည်ညိုစိတ် မရှိဘဲနှင့် တက္ကတွန်းတို့အား အိမ်သို့ ဖိတ်မန်ခဲ့၏၊ အိမ်သို့ရောက်ကြသောအခါ တက္ကတွန်းတို့အား တစုံတခု မလှူဒါန်းဘဲ မစင်တွင် ကျရောက်အောင် စီမံထားသဖြင့် တက္ကတွန်းများ အရှက်တကွဲ ပြန်ပြေးကြရသည်၊

ထိုအမှုကို လက်စားချေရန် တက္ကတွန်းတို့၏တပည့် ဂရဟဒိန္နက မြတ်ဗုဒ္ဓနှင့် တပည့်ရဟန်းတို့အား သူ့အိမ်သို့ ဆွမ်းဖိတ်ကြား၏၊ အိမ်တွင် တွင်းတူး၍ မီးကျီးခဲများ ပြုလုပ်ထားပြီး အပေါ်တွင် ဟန်ဆောင်အခင်းများ ခင်းထားလေသည်၊ ထိုင်လိုက်သောအခါ ကြမ်းခင်းများကျိုးပြီး မီးကျီးခဲတွင်း ကြစေရန် စီစဉ်ထားခြင်းဖြစ်၏၊
ဘုရားရှင်နှင့် သံဃာတော်များ ရောက်လာ၍ အခင်းပေါ်တွင်ထိုင်ရန် ညွှန်ပြရာ မီးကျီးခဲများအတွင်းမှ ဖြူစင်လန်းဆန်းသော ပဒုမ္မာကြာပန်းများ ပေါ်ထွက်လာပြီး ချမ်းမြေ့စွာ ထိုင်တော်မူကြရသည်၊ ဂရဟဒိန္နသည် ကြောက်ရွံ့ထိတ်လန့်လျက် ၀န်ချတောင်းပန်ကာ မြတ်ဗုဒ္ဓ၏ သာဝကတပည့် ဖြစ်လာလေသည်၊ ဘုရားက အောက်ပါဂါထာကို ဟောတော်မူ၏။

( ဂါထာ )
ယထာ သင်္ကာရဓာနသ္မိံ ၊ ဥဇ္ဈိတသ္မိံ မဟာပထေ ။
ပဒုမံ တတ္ထ ဇာယေထ ၊ သုစိဂန္ဓံ မနောရမံ ။
ဧ၀ံ သင်္ကာရ ဘူတေသု ၊ အန္ဓ ဘူတေ ပုထုဇ္ဇနေ ။
အတိ ရောစတိ ပညာယ ၊ သမ္မာ သမ္ဗုဒ္ဓ သာဝကော ။

( မြန်မာပြန် )
ခရီးလမ်းတွင် စွန့်ပစ်ထားသော အမှိုက်ပုံ၌ အနံ့မွှေးကြိုင်၍ နှစ်သက်ဖွယ်ရှိသော ကြာပန်းသည်
တင့်တယ်စွာ ပေါ်ရာသကဲ့သို့
ထို့အတူ အမှိုက်ပုံသဖွယ် ဖြစ်ပေသော လူတို့အလယ်၌နေသည့် ဘုရားတပည့် ဖြစ်သောသူသည် ပညာမျက်စိမရှိသဖြင့်
အကန်းသဖွယ် ဖြစ်ကုန်သော လူသာမန်တို့ကို သီလ သမာဓိ ပညာဖြင့် လွှမ်းမိုး၏။

( ဆောင်ပုဒ် )
မြို့ရွာလမ်းလယ်၊ ပစ်ပယ်စုပုံ၊ အမှိုက်ပုံဝယ်၊ သင်းထုံကြိုင်လှောက်၊ ကြာပန်းပေါက်သို့၊
ထိုက်လျောက်ပညာ၊ မရှိရာသည့်၊ ဗာလာအန္ဓ၊ လူ့ဌာန၀ယ်၊ ဗုဒ္ဓတပည့် ပညာရှိသည်၊
သီလ သမာ- ဓိ ပညာဖြင့်၊ သြဇာလွှမ်းမိုး၊ ဂုဏ်ကြီးစိုး၏။

( ပုပ္ဇ၀ဂ်၊ ဂရဟဒိန္န၀တ္ထု )

No comments: