Friday, January 30, 2009

ဘာသာရေး ပြဿနာ ( ၁၃ )

( ဘဒ္ဒန္တ တိလောကသာရ ဖြေသည် )

( လက်ဝတ်ရတနာ ဌာပနာသွင်းခြင်း )
( မေး ) ဘုရားစေတီများတွင် အဖိုးတန် လက်ဝတ်ရတနာများ ထည့်သွင်း ဌာပနာခြင်း၏ အဓိပ္ပါယ်ကို ရှင်းလင်းစွာ ဖြေကြားပေးတော်မူပါဘုရား။
( မောင်စိုးလတ်-ထားဝယ်မြို့ )

( ဖြေ )
ဘုရားစေတီများတွင် အဖိုးတန် လက်ဝတ်ရတနာများကို ဌာပနာရာ၌ အဓိပ္ပါယ် ၂-မျိုးရှိပါသည်။
၁။ အဓိပ္ပါယ်တမျိုးမှာ စေတီတော်အတွင်း ဌာပနာတိုက်၌ ကိန်းအောင်း စံပယ်တော်မူကုန်သော သရီရဓာတ်တော်
မွေတော်များနှင့် ဥဒ္ဒိဿစေတီတော်များအား မိမိ၏အသုံးအဆောင် လက်ဝတ်ရတနာများဖြင့် ပူဇော်ခြင်းဖြစ်သည်။

၂။ အခြားအဓိပ္ပါယ်တမျိုးမှာ နောင် ဤဓာတုစေတီတော် ပျက်စီးသွားလျှင် မိမိဌာပနာလိုက်သော အဖိုးတန် လက်ဝတ်ရတနာများကို ထုခွဲ၍ ရရှိလာသော ငွေအသပြာတို့ဖြင့် ပြန်လည်ပြုပြင် တည်ထားရန် ရည်ရွယ်ခြင်း ဖြစ်ပေသည်။

ယင်းအမှတ် ၂-အဓိပ္ပါယ်ကို အသောကမင်းကြီး ဓာတ်တော် မွေတော်များကို မြှုပ်နှံဌာပနာရာ၌ ကြီးမားလှစွာသော ပတ္တမြားကြီးကို ဌာပနာသွင်းကာ နောင်သောအခါ မင်းဆင်းရဲသည် ဤပတ္တမြားကိုယူ၍ ထုခွဲရောင်ချပြီးသော် ဓာတ်တော်များအား ပူဇော်မှု ပြုစေသတည်း-ဟု ကမ္ပည်းရေးထိုးခဲ့ကြောင်းဖြင့် ထင်ရှားသည်။

ထို့ပြင် မြန်မာနိုင်ငံ အထက်ပိုင်း မြို့တမြို့တွင် ရှေးဟောင်းစေတီတဆူ ပြိုပျက်ရာတွင် ဌာပနာတိုက်မှ ၁၇ိ/သားခန့်ရှိသော ငွေတုံးတတုံးကို တွေ့ရကြောင်း ထိုငွေတုံးကြီးတွင် နောင် ဤစေတီ ပြိုပျက်ပါက ဤငွေတုံးကြီးကို ထုခွဲရောင်းချ၍ ရရှိသော ငွေဖြင့် ပြန်လည်တည်ထားကြပါကုန်-ဟု ကမ္ပည်းရေးထိုးထားကြောင်း ကြားသိရဖူးပေသည်။
မည်သည့်အဓိပ္ပါယ်နှင့် ဌာပနာသွင်းသည်ဖြစ်စေ အလွန်ထက်သန် ကောင်းမွန်သော စေတနာများဖြစ်သည်၊
ကုသိုလ်အထူး ဆည်းပူးပြုလုပ်မှုမျိုးပင် ဖြစ်သည်။ အလွန်အကျိုးရှိသည်ဟူ၍သာ မှတ်သားသင့်ပါသည်။
*********************************************************************************

( ပုဝါတင်ခြင်းနှင့် ဆန်ပန်းပေါက်ပေါက် )
( မေး ) ရတနာသုံးပါးကို ပူဇော်ကန်တော့ခြင်း စသည့်ကိစ္စများတွင် အမျိုးသမီးများ ပုခုံးပေါ်တွင် ပုဝါ တဘက် စသည်တင်ကြသည်ကို တွေ့ရသည်၊ အမျိုးသားများ တင်ကြသည်ကိုမူ မတွေ့ရပါ၊ အဘယ့်ကြောင့်ပါနည်း၊

ထို့ပြင် ကန်တော့ရာ၌ ဆန်ပန်းပေါက်ပေါက်တို့ကို လက်တွင် ညှပ်ကိုင်၍ ကန်တော့ကြသည်မှာ အဘယ်အဓိပ္ပါယ်ပါနည်း၊
ဖြေကြားတော်မူပါရန်။
( ဦးကုမာရ-ရေနံ့သာ )

( ဖြေ )
ပုဝါတင်ခြင်း၊ ပုဝါပေါင်းခြင်းတို့မှာ ရှေးရိုးမြန်မာ့ ယဉ်ကျေးမှု ဖြစ်ပါသည်၊
ပွဲလမ်းသဘင် အခမ်းအနားတို့တွင် အမျိုးသားဝတ်စုံဖြင့် တက်ရောက်ရလျှင် အမျိုးသားများ ခေါင်းပေါင်းပေါင်း၍
အမျိုးသမီးများ ပုဝါတင်ရမြဲ ထုံးစံဖြစ်သည်၊ ရတနာသုံးပါး ဆိုင်ရာတို့၌ အမျိုးသမီးများသာ ပုဝါတင်၍ အမျိုးသားများ ပုဝါပေါင်းခြင်း ( ခေါင်းပေါင်းခြင်း ) အလေ့ ပျက်ပြယ်နေသည်မှာ ကြာလေပြီ။
ဤခေတ်တွင် အလွန်ရိုသေလေးစားရမည့် ကျောင်းကန်ဘုရား သွားလာရာတို့တွင် အမျိုးသားဝတ်စုံဖြင့် လုံခြုံပိပြားစွာ သွားလာရမည့် ယဉ်ကျေးမှုတို့ကို အထူးဂရုပြုရန် လိုအပ်လှပါသည်။

ဆန်ပန်းပေါက်ပေါက်နှင့် ပတ်သက်၍ ဒဗ္ဗတိဏ, သုဒ္ဓတဏ္ဍုလ, သိဒ္ဓတ္ထ, သုမန, မုကုလ, လာဇသင်္ခါတာနိ-ဟု ဇာတ်ဋီကာ၌ လာသော နေဇာမြက်, ဆန်ပန်း, မုန်ညင်း, မုလေး (မြတ်လေး ), ငုံ, ပေါက်ပေါက်-ဟူ၍ ကြဲမြှောက်ပစ်လွင့်၍ ပူဇော်ရသော ပန်းငါးမျိုးတွင် ဆန်ပန်းပေါက်ပေါက် ပါသည်၊ ၄င်းပန်းငါးမျိုးကို ကန်တော့ပြီးလျှင် ဘုရားစသည်၌ မြှောက်ကြဲပူဇော်ရသည်၊

ထိုသို့ပူဇော်ရန် ကန်တော့စဉ် လက်အကြား၌ ညှပ်ထားကိုင်ထား၍ ကန်တော့ပြီးနောက် မြှောက်ကြဲရန် ဖြစ်သော်လည်း ဦးဆောင်သူများကလည်း ပြောမထား၊ ကန်တော့သူများကလည်း မသိသဖြင့် အဓိပ္ပါယ်ပျောက်၍နေလေသည်၊
ထို့ကြောင့် ဆန်ပန်းပေါက်ပေါက်များကို ဘုရား၌ မြှောက်ကြဲပူဇော်ကြရန် နည်းပေး သင်ကြားကြရန် လိုပေသည်။
*********************************************************************************

( ဆံတော် လက်နှစ်သစ် )
( မေး ) မြတ်စွာဘုရား၏ ဆံတော်သည် တောထွက်တော်မူစ အနောမာမြစ်ကမ်းတွင် ပယ်တော်မူခဲ့၍
ကျန်ရှိသော ဆံတော်အတိုင်းပင် ဖြစ်ပါသလားဘုရား၊
အခြားရဟန္တာများကဲ့သို့ ရှည်ထွက်ခြင်း ရှိပါသလားဘုရား ဖြေကြားတော်မူပါရန်။
( ကိုဟန်ဝင်း-အင်းစိန်မြို့သစ် )

( ဖြေ )
ယင်းပြဿနာ၏အဖြေကို မဟာဗုဒ္ဓ၀င် ဒုတိယတွဲ ၂၀၃-လာ အောက်ပါစကားရပ်ဖြင့် ရှင်းလင်းစွာ သိနိုင်ပါသည်။
ထို့နောက် အလောင်းတော်သူမြတ်သည် ငါ၏ ဤဆံပင်တို့ကား ရဟန်းတို့နှင့် မလျောက်ပတ်ကုန်ချေ၊ ထိုဆံပင်တို့ကို သန်လျက်ဖြင့် ပယ်ဖြတ်ပေအံ့-ဟု ကြံစည်၍ လက်ယာလက်ဖြင့် သန်လျက်ကို စွဲကိုင်ကာ လက်ဝဲလက်ဖြင့် မကိုဋ်နှင့်တကွသော ဆံထုံးကိုကိုင်၍ ဖြတ်ပယ်တော်မူလေ၏။

ဆံတော်တို့သည် လက်နှစ်သစ်ပမာဏ အညီအမျှ ကြွင်းကျန်ရစ်ကြ၍ လက်ယာရစ်လည်ကာ ဦးခေါင်းတော်မှာ
ကပ်ငြိ တည်ရှိကြကုန်၏၊ ထိုဆံတော်တို့၏ ပမာဏကားအသက်ထက်ဆုံးပင် အသစ်တဖန် မရိတ် မပယ်ရဘဲ
ထိုလက်နှစ်သစ် ပမာဏသာ ရှိပေ၏၊
ဘုရားအလောင်းတော်မှာ နောက်တဖန် ထိုဆံပင်တို့ကို ရိတ်ပယ်ဖွယ်ကိစ္စ လုံးဝမရှိတော့ပြီ။
********************************************************************************

( ဂုဏ်တော်အဆုံး တိ-စာလုံး )
( မေး ) ဣတိပိ သော-စသော ဂုဏ်တော်တို့ကို ရွတ်ဆိုဘုရားရှိခိုးရာ၌ ဘုရားဂုဏ်တော်, တရားဂုဏ်တော်, သံဃာဂုဏ်တော် အဆုံးတို့တွင် အချို့က တိ-ထည့်၍ ရွတ်ဆိုကြပါသည်။ အချို့က မထည့်ပါ၊ ဘယ်ဟာက မှန်ပါသလဲဘုရား။
( (၁) အရှင်ထေရ၀ံသ-ဒီပဲရင်း။ (၂) ဦးမုန်း-မြောက်ဥကကလာပမြို့ )

( ဖြေ )
တိ-ဟူသည်မှာ ဣတိ-သဒ္ဒါဖြစ်ပါသည်၊
ဂုဏ်တော်ကိုဆို၍ ဘုရားရှိခိုးရာ၌ ထည့်၍ဆိုရန် လိုအပ်ပါသည်။
ဣတိ-ဤသို့ ဂုဏ်တော်ကိုးပါးနှင့် ပြည့်စုံတော်မူသော မြတ်စွာဘုရားကို၊ အဟံ-အကျွန်ုပ်သည်၊ ၀န္ဒာမိ-ရှိခိုးပါ၏။ ဟု ဆက်ရမည်ဖြစ်ပါသည်။

တရားဂုဏ်တော် သံဃာ့ဂုဏ်တော်တို့မှာလည်း အလားတူ သင့်လျော်သလို ဆိုရန်ဖြစ်ပါ၏။

ရိုးရိုးဂုဏ်တော်ကို ရွတ်ဆို ပွားများရာ၌ကား ပါရန်မလိုပါ၊ ထို့ကြောင့် နှစ်မျိုးစလုံးပင် မှန်ပါသည်။
*********************************************************************************

( ဘွဲ့အမည်တော်များ )
( မေး ) အောက်ပါ ဘွဲ့တံဆိပ်တော်နှင့် အမည်များ၏ အဓိပ္ပါယ်ကို ရှင်းလင်းပြပေးတော်မူပါဘုရား။
(၁) အဘိဓဇမဟာရဋ္ဌဂုရု
(၂) အဂ္ဂမဟာပဏ္ဍိတ
(၃) အဘိဝံသ
(၄) အလင်္ကာရ
(၅) ဘဒ္ဓန္တ
( မောင်ရွှေပြည်စိုး-၁၇၈၊ ကမ်းနားလမ်း ပန်းတနော် )

( ဖြေ )
( ၁ ) အလွန်မြင့်မားစွာ စိုက်ထူအပ်သော တံခွန်အလံသဖွယ် ကြီးကျယ်မြင့်မြတ်တော်မူသည့် နိုင်ငံတော်၏ ဆရာသခင်
အရှင်မြတ်-ဟု ဆိုလိုပါသည်။
( ၂ ) အလွန်မြင့်မြတ် ကြီးကျယ်သော ပညာရှိ မထေရ်မြတ်-ဟု ဆိုလိုပါသည်။
( ၃ ) မန္တလေးမြို့ သကျသီဟစာမေးပွဲ၊ ရန်ကုန်မြို့ စေတိယင်္ဂဏ စာမေးပွဲ စသော ပရိယတ္တိစာမေးပွဲကြီးတို့မှ
အောင်မြင်တော်မူသော ရဟန်းတော်များအား ဆက်ကပ်သော ဘွဲ့-ဖြစ်သည်။
( ၄ ) မန္တလေး၊ ပဲခူး၊ ရန်ကုန် စသည်တို့တွင် ကျင်းပသော သာမဏေကျော် စာမေးပွဲများတွင် အောင်မြင်တော်မူသော သာမဏေများအား ယင်းအသင်းအဖွဲ့များက ဆက်ကပ်သောဘွဲ့ ဖြစ်သည်။
ယင်း ၃-နှင့် ၄-ဘွဲ့များကို မူလဘွဲ့တော်နှင့် ဆက်၍ခေါ်ဝေါ်ရသဖြင့် မူလဘွဲ့ ဦးပဏ္ဍိတ, ရှင်ပဏ္ဍိတ ဖြစ်လျှင်
ဦးပဏ္ဍိတာဘိဝံသ, ရှင်ပဏ္ဍိတာလင်္ကာရ-ဟူ၍ ဖြစ်သည်။
( ၅ ) ဘဒ္ဓန္တ-ဟူသည်မှာ ပေးအပ်သော ဘွဲ့ထူး ဂုဏ်ထူး မဟုတ်၊ လေးစားရိုသေအပ်သော ဆရာတော် သံဃာတော်တို့အား ဘွဲ့တော်၏ရှေ့မှ ဦး, အရှင်-တို့အစား ရေးသား ခေါ်ဝေါ်အပ်သော အသုံးအနှုန်း ဖြစ်ပါသည်၊
ဦးပဏ္ဍိတ-ဟုဆိုလျှင် ဘဒ္ဒန္တ ပဏ္ဍိတ-ဟု ဆိုပါသည်။
ဦး အရှင်တို့အစား ပါဠိဘာသာဖြင့် ခေါ်ဆိုခြင်းဖြစ်ပါသည်။

( မြတ်မင်္ဂလာ ၁၉၉၁-မေလ )

No comments: