Tuesday, January 13, 2009

ကံ ကံ၏အကျိုး ( ၇ )

( တဦးက စေတနာ တဦးက မေတ္တာ )

ကျွန်တော်တို့ ဇေယ၀တီအရက်ပျံ စက်ရုံတွင် ကိုစိုးမြင့်ဆိုသူ လုပ်သားကြီးတဦးရှိသည်၊ သူသည် စက်မှုဌာနမှ ၀န်ထမ်းတဦးဖြစ်သည်၊ သူ၏အသက်မှာ ၃၆-နှစ်ရှိပြီဖြစ်၍ မိခင်ဖခင်အိုကြီးများကို လုပ်ကိုင် ကျွေးမွေးနေသော လူငယ်တဦးဖြစ်သည်၊ ကျွန်တော်တို့ စက်ရုံတွင် ကိုစိုးမြင့်သည် အလုပ်ဝတ္တရားများကို ကျေပွန်စွာ ထမ်းဆောင်သူ တဦးဖြစ်၍ အရာရှိများက ချစ်ကြည်ကြသည့်အပြင် ဘ၀တူအလုပ်သမားများ၏ လေးစားမှုကိုပါ ခံရသူဖြစ်သည်။

သူ၏ရိုးသားမှု ကြိုးစားမှုတို့ကြောင့် လူတိုင်းက ချစ်ခင်ကြသည်၊ ရပ်ကွက်ထဲတွင် သာရေးနာရေးများရှိပါက ရှေ့ဆုံးမှ တတပ်တအား ပါဝင်ကူညီ လုပ်ဆောင်ပေးတတ်သော စေတနာ အပြည့်အ၀ ရှိသည်။

တနေ့တွင်ဖြစ်သည်၊ ကျွန်တော်သည် အိမ်ပတ်ဝန်းကျင်တွင် ချုံနွယ်များ ထူထပ်နေသဖြင့် ရှင်းလင်းနေစဉ် ကိုစိုးမြင့် ရောက်လာပါသည်၊
ဗျို့-ကိုအုံးသောင်၊ တယောက်တည်း သန့်ရှင်းရေး လုပ်နေသလားဗျို့။
ဟုတ်ကဲ့-ကိုစိုးမြင့်၊
ဟာ-ဒီလိုဆို ကျွန်တော်လဲ အားနေတာနဲ့ အတော်ပဲ၊ ပါဝင်ကူညီပါရစေဗှာ၊ ပေး ကျွန်တော့ကို မြက်ရှင်းဓား၊
ကျွန်တော့ထံမှ ရှင်းလင်းစ မြက်ရှင်းဓားကို လျင်မြန်စွာ ဆွဲယူပြီး နေပူကျဲကျဲတွင် မြက်ရှင်းနေပါသည်၊ ၎င်း၏မျက်နှာတွင် ချွေးသီးချွေးပေါက်တွေ သီးနေပါသည်၊ ချွေးများကို လက်ဖမိုးဖြင့် သုတ်ရင်း-
ဒီချွေးက စေတနာ ဝေဖြာတဲ့ချွေးဗျ-ဟု ပြောပါသည်၊ သန့်ရှင်းရေးပြုလုပ်ပြီးသော အခါ ကိုစိုးမြင့်အား ၎င်း၏လုပ်အားစေတနာကို ဂုဏ်ပြုသောအနေဖြင့် သစ်သီးစုံ သက်သတ်လွတ် ထမင်းဟင်းဖြင့် ဧည့်ခံကျွေးမွေးပါသည်၊ ထို့နောက် ကျွန်တော် ယူရောင်းသော ကံတိုးထီဆိုင်မှ ထီစာအုပ် တအုပ်ထဲမှ ထီတစောင်ကိုဖြတ်၍ တဦးက စေတနာ, တဦးက မေတ္တာ-ဟုအတိတ်ရေး၍ ကျွန်တော်က လက်ဆောင်ပေးလိုက်ပါသည်၊ ထီဖွင့်သောအခါ ၎င်းထီလက်မှတ်သည် ( ၂၆၃ )ကြိမ်မြောက် အောင်ဘာလေ ထီဖွင့်ပွဲတွင် ( က-စ-၅၄၀၃၈၆ ) ဖြင့် ကျပ်တသောင်းဆု ဆွတ်ခူးသွားပါသည်။

သူ ယခုကဲ့သို့ ထူးထူးခြားခြား ထီပေါက်ခြင်းမှာ မိဘကိုလုပ်ကျွေးသော ကျေးဇူးတရားနှင့် လူတိုင်းကို ကူညီတတ်သော သေတနာ၊ ၎င်း၏စေတနာကို တုံ့ပြန်သော ကျွန်တော်၏မေတ္တာကြောင့် မေတ္တာရောင်ပြန်ဟတ်ကာ စေတနာအကျိုးပေးသည်ဟု ယုံကြည်မိပါသည်၊ ကျွန်တော်သည် အမှတ်မထင် ရေးပေးလိုက်သော ( တဦးက စေတနာ, တဦးက မေတ္တာ ) ဟူသော အတိတ်ကလေးကို မြင်ယောင်နေမိပါသည်။

( မြပုရစ်ဖူး-ဇေယျဝတီ )
*********************************************************************************

( ပြုသူအသစ် )

နေ့နေ့ညည သူတို့အသံပဲ လမ်းထဲမှာကြားနေရသည်၊ သူတို့ပဲ ဆူညံနေကြသည်၊ ကလေးများ၏ အသံလည်းမဟုတ် လူငယ်လူရွယ်များ၏ ဂစ်တာသံ သီချင်းအော်ဆိုသံများလည်း မဟုတ်၊ ထိုအသံများကား လမ်းထဲရှိ ကုက္ကုပင် မကျီးပင်များပေါ်မှ လင်းဝက်များ၏ အောသံများတည်း၊ ဤရပ်ကွက်တွင်တော့ ၎င်းတို့ကို မည်သူကမျှ အန္တရာယ်မပေးပေ။

တနေ့တွင် ကျွန်တော်သည် အိမ်နီးချင်းဖြစ်သူ ဦးစိုးဝင်းနှင့် ရောက်တတ်ရာရာ စကားစပ်မိရင်း လင်းဝက်များ၏ အကြောင်း ရောက်သွားမိသည်၊ ကျွန်တော်ကပင် ကျွန်တော်တို့ရွာမှာဆိုရင် အခုအော်ဆူနေတဲ့ လင်းဝက်တွေကို အချို့က သတ်ပြီး စားကြတယ်-ဟု ပြောမိသည်။

ဟာ-ဘယ့်နှယ်ပြောပါလိမ့်၊ လင်းဝက်သားက သိပ်စားလို့ကောင်းတာဗျ၊ အရင်ကဆို အသံကြားတာနဲ့ ကျွန်တော် လေးခွကိုင်ပြီး ပစ်နေပြီ၊ အခုတော့ လင်းဝင်းက သင်ခန်းစာပေးတာနဲ့ လေးခွ မကိုင်ဖြစ်တော့တာ အနှစ် ၃၀-လောက်ရှိနေပြီ-ဟု ဦးစိုးဝင်း ပြောလေသည်၊ ထို့နောက် သူတွေ့ကြုံရပုံ ဖြစ်ရပ်မှန်ကို အောက်ပါအတိုင်း ပြောပြသည်။

ဦးစိုးဝင်းသည် ယခင်က ရန်ကုန်တဖက်ကမ်း သန်လျင်မြို့တွင် နေထိုင်သူတဦး ဖြစ်သည်၊ အပေါင်းအသင်းများထဲတွင် လေးခွပစ် အလွန်လက်တည့်သဖြင့် သူငယ်ချင်းများ တောင့်တတိုင်း ကျီးကန်းများ ခိုများ ငှက်များ လင်းဝက်များကို ပစ်ခတ်ပေးရသူဖြစ်သည်။

လင်းဝက်များသည် မန်ကျည်းပင် ကုက္ကုပင်တို့တွင် များသောအားဖြင့် အသိုက်ဆောက်လုပ်တတ်သည်၊ အသိုက်လုပ်ရာတွင်လည်း ထိပ်ဖျားများတွင် လုပ်တတ်သည်၊ ယခုနှစ်တွင် ဆောက်လုပ်သည့်နေရာ၌ ဘေးအန္တရာယ် တခုခုနှင့်တွေ့ကြုံရပါက နောင်နှစ်တွင် ထိုနေရာသို့ ပြန်မလာတတ်ပေ၊ ၎င်းတို့သည် အသိုက်လုပ်ပြီးပါက ဥများဥပြီး သားပေါက်တတ်သည်၊ တမိုးခန့်နေထိုင်ပြီး မိုးကုန်လျှင် ပြန်လည် ထွက်ခွာသွားတတ်သည်။

တခါတွင် ဦးစိုးဝင်းခြံထဲရှိ မန်ကျည်းပင်တွင် လင်းဝက်များ လာရောက်အသိုက်လုပ်သဖြင့် ဦးစိုးဝင်းအဖို့ စားရကံ ကြုံ၍ မုတ်ဆိတ်ပျားစွဲခြင်းပင် ဖြစ်သည်။

တနေ့တွင် သူငယ်ချင်းများကလည်း လင်ဝက်သားကြော်နှင့် အရက်မြည်းရန် အာသီသရှိကြသဖြင့် လင်းဝက်သားရရှိရေးမှာ ဦးစိုးဝင်းအပေါ် တာဝန်ကျလာပေတော့သည်။
သည်တော့လည်း တာဝန်ကျသူ ဦးစိုးဝင်းအဖို့ မငြင်းသာ၊ လင်းဝက်သား ရရှိရေးအတွက် လင်းဝက်အသိုက်ဆောက်ရာ မန်ကျည်းပင်နှင့် အနီးဆုံး သရက်ပင်သို့ တက်သည်၊ ကိုယ်တွင်လည်း သစ်ခက်များထိုးကာ ရုပ်ဖျက်ပြီး လင်းဝက်ပစ်ရန် အသင့်စောင့်ဆိုင်းနေရပေတော့သည်၊ လင်းဝက်များသည် မြေကြီးပေါ်မှ ပစ်ခတ်သည့် လောက်စာလုံးဖြင့် တော်ရုံတန်ရုံ ရင်ဘတ်ထိမှန်သော်လည်း သစ်ပင်ပေါ်မှ ပြုတ်ကျလေ့ မရှိပေ၊ အသက်ပြင်းသည်၊ ဦးစိုးဝင်းအဖို့ သေချာပေါက် ပစ်ခတ်နိုင်ရန် အမြင့်သို့တက်ပြီး နေရာယူထားသည်။

သိမ်မကြာပါချေ၊ လင်းဝက်တကောင်က ၎င်းအသိုက်ရှိရာသို့ ပြန်လာသည်၊ အသိုက်တွင်းရှိ ၎င်း၏သားငယ်များကို ၎င်းမျိုလာသည့် ငါးများကို အန်ကျွေးနေသည်၊ သားသမီးကို ကျွေးမွေးချင်သည့်ဇောဖြင့် သူ့တွင် အန္တရာယ်ရှိနေမှန်း သိပုံမရချေ၊ ဦးစိုးဝင်းကလည်း စိတ်ကြိုက်နေရာယူထားမိပြီဖြစ်ရာ ချက်ကောင်းကို ထိမှန်အောင် ပစ်ခတ်နိုင်ပေတော့မည်၊ ဦးစိုးဝင်းက လေးခွကို အသေအချာချိန်တွယ်၍ ပစ်ခတ်လိုက်သည်၊ မှန်ပါသည်၊ အတိအကျပင် လင်းဝက်၏ ဦးခေါင်းကို မှန်သည်၊ လေးခွမှန်သော လင်းဝက်သည် သစ်ပင်ပေါ်မှ မြေကြီးပေါ်သို့ ဖုတ်ခနဲနေအောင် ကျပါသည်၊ သို့သော် မိမိခြံဝင်းအတွင်းမှာတော့ မဟုတ်၊ ခြံချင်းကပ်နေသည့် ခြံထဲသို့ ကျသွားတော့သည်၊ တဘက်ခြံမှ ခွေးများရှိရာ ခွေးအစာဖြစ်မည်စိုး၍ ဦးစိုးဝင်းအဖို့ ကမန်းကတန်း သစ်ပင်ပေါ်မှ မြေကြီးသို့ ဆင်းခဲ့ရပြီး တဖန် တဘက်ခြံစည်းရိုးကို ကျော်ဆင်းခဲ့ရသည်။

တဘက်ခြံစည်းရိုး ကျော်အဆင်း မြေကြီးပေါ်အနင်း ဘယ်ဘက်ခြေထောက်မှ အောင့်ခနဲ ခံစားလိုက်ရသည်၊ သို့သော် ဘာဖြစ်မှန် ပြန်မကြည့်အား၊ လင်းဝက်ကိုသာ အရကောက်ပြီး ယူခဲ့သည်၊ လင်းဝက်ကို ကြည့်လိုက်တော့ မျက်စိတဖက် မရှိတော့။

ထို့နောက် အိမ်ထဲပြန်ဝင်ပြီး သူငယ်ချင်းများကို လင်းဝက်ကို ပေးလိုက်ပြီးမှ ခြေထောက်ကို သတိရ၍ ကြည့်လိုက်သည်၊ နို့ဆီခွက် သံပြားရှသဖြင့် ခြေထောက်ကွဲနေသည်၊ အကွဲကို ဆွဲဟကြည့်လိုက်တော့ သွေးများက မြင်မကောင်းအောင် ပန်းထွက်လာသည်၊ သို့နှင့် သံလျင်ဆေးရုံသို့ သွားရောက်ပြသခဲ့ရာ ခြေမ,ကြော ပြတ်သွားကြောင်ါ်၊ ပြန်ဆက်ရန် မလွယ်ကြောင်း၊ သွေးတိတ်ရန်နှင့် အနာကိုသာ ချုပ်ပေးနိုင်ကြောင်း သိရသည်၊ ၎င်းဒဏ်ရာကြောင့် ခြေမသည် လက်အကူအညီမပါဘဲ ချိုး၍ခေါက်၍ မရတော့ပေ။

ခြေထောက်ဒဏ်ရာပျောက်ပြီး မကြာခင် ညာဘက်မျက်စိက နာလာသည်၊ ကြည့်၍မကောင်းတော့၊ မှုန်ဝါးဝါးသာ မြင်ရသဖြင့် မျက်စိ နား နှာခေါင်း လည်ချောင်း ဆေးရုံသို့ပြသည်၊ ရေတိမ်ဖြစ်နေကြောင်း သိရပြီး တဖက်မျက်စိသို့ မကူးခင် ခွဲစိပ်ကုသမှု ခံခဲ့ရသည်၊ သို့ရာတွင် ယင်းမျက်စိမှာလည်း ပါဝါများသော မျက်မှန် တပ်မှ မြင်ရတော့သည်။

သည်ဝဋ်ကြွေးက သည်မျှနှင့် မကုန်ခန်းသေးပါ၊ နောက်ဆက်တွဲဖြစ်ရပ်ကား ဦးစိုးဝင်း၏ ဇနီးသည်,သည် ၎င်းကိုခွဲခွါ၍ အိမ်ထောင်သစ် ထူထောင်ခဲ့သဖြင့် မိမိရင်သွေးများနှင့် ခွဲခွာနေထိုင်ရသည်အထိ ဖြစ်ခဲ့ရသည်။

ကျွန်တော် ဒီအဖြစ်တွေမဖြစ်ခင် ခြေထောက် ကွဲပြီးကတည်းက လေးခွမကိုင်တော့တာ ဒီနေ့ထိပါဗျာ၊ အရင်ကဆို လင်းဝက်သံကြားတာနဲ့ လက်က ယားနေပြီ၊ ခုတော့ ပြုသူအသစ် ဖြစ်သူအဟောင်း ဆိုတော့လဲ--
( အောင်မြသင်း )

( မြတ်မင်္ဂလာ ၁၉၉၁-ဇူလိုင်လ )

No comments: