Thursday, January 29, 2009

ဘာသာရေးပြဿနာ ( ၁၂ )

( ဘဒ္ဒန္တ တိလောကသာရ-ဖြေသည် )

( အဇာတသတ်နှင့် ပစ္စေကဗုဒ္ဓါဆု )
( မေး ) ဇိနတ္ထပကာသနီကျမ်းတွင် အဇာတသတ်မင်းသည် လွန်မင်းသော ပိတုဃာတကကံကြောင့် မဂ်ဉာဏ် ဖိုလ်ဉာဏ်သို့ မရောက်၊ လောဟကုမ္ဘီငရဲ၌ အနှစ်ခြောက်သောင်းခံ၍ လွတ်ပြီးလျှင် မေတ္တေယျဘုရားရှင် အကြား၌ ၀ိဇိတာဝီမည်သော ပစ္စေကဗုဒ္ဓါ ဖြစ်လတံ့သတည်း၊ ဟု တွေ့ရပါသည်၊
တပည့်တော်ဖတ်ဖူးသည်မှာ ပစ္စေကဗုဒ္ဓါတို့သည် နှစ်သင်္ချေနှင့်ကမ္ဘာတသိန်း ပါရမီဖြည့်ရသည်-ဟု တွေ့ရပါသည်၊
ယင်းအဇာတသတ်သည် ပါရမီဖြည့်ပြီးပါပြီလား၊ ဖြည့်ပြီးသော် ပါရမီရှိ နိယျတဗျာဒိတ် ရသူသည် ပစ္စေကဗုဒ္ဓါ မဖြစ်ဘဲ
ပကတိ သာဝကဖြင့် နိဗ္ဗာန်သွားနိုင်ပါသလားဘုရား၊ ထိုပြဿနာကို ရှင်းလင်းပေးတော်မူပါရန်။
( အောင်ထိုက်-၆၁-သမိုင်းဘူတာရုံလမ်း မရမ်းကုန်း )

( ဖြေ )
အဇာတသတ်သည် မေတ္တေယျဘုရား မပွင့်မီ ဤကမ္ဘာ၌ပင် ၀ိဇိတာဝီအမည်ဖြင့် ပစ္စေကဗုဒ္ဓါ ဖြစ်ရမည့်သူဖြစ်သည်၊
နှစ်သင်္ချေနှင့် ကမ္ဘာတသိန်းထက်က ဗျာဒိတ်ရပြီးသူ၊ ပါရမီဖြည့်ပြီးသူ တဦးလည်း ဖြစ်သည်-ဟု ဆိုရပါမည်။
ပစ္စေကဗုဒ္ဓါဖြစ်ရန် ဗျာဒိတ်ရထားသူအဖို့ ပစ္စေကဗုဒ္ဓါမဖြစ်ဘဲ ပကတိသာဝကအဖြစ်ဖြင့် နိဗ္ဗာန်ဝင်မည် မဟုတ်ပါ။
လွန်မင်းသော ပိတုဃာတကကံကြောင့် မဂ်ဉာဏ် ဖိုလ်ဉာဏ်သို့ မရောက်-ဟူသော စကားမှာ ပိတုဃာတက-ကံက
မဂ်ဉာဏ် ဖိုလ်ဉာဏ်ကို တားမြစ်ကြောင်း ထင်ရှားစေလို၍လည်း ဖြစ်သည်၊
အဇာတသတ်သည် မဂ်ဉာဏ် ဖိုလ်ဉာဏ်ကို ရနိုင်လောက်သော ပညာဉာဏ်ရှိခြင်းတို့ကို ပေါ်လွင်စေလိုခြင်းတို့ကြောင့်လည်း ဖြစ်သည်-ဟု ယူနိုင်ပါသည်၊

ဂေါတမဗုဒ္ဓ ဘုရားအလောင်းတော်သည် သုမေဓာဘ၀တွင် မဂ်ဖိုလ်ကို လိုလျှင် ရနိုင်သော ဉာဏ်ရှိသည့် ဥဂ္ဃါဋိတညူ ပုဂ္ဂိုလ်
ဖြစ်ကြောင်း စကား၊ ဘုရားအလောင်းဘ၀ ကိုးဘ၀တွင် ဘုရားရှင်များနှင့်တွေ့၍ ရဟန်းပြုကာ တရားအားထုတ်ခဲ့ရာ၌ မဂ်အနီးရောက် အနုလောမဉာဏ်အထိ အားထုတ်၍ ရှေ့သို့မတက်ရောက်ခဲ့-ဟူသော စကားများကိုထောက်ထားနိုင်ပါသည်၊

အဇာတသတ်သည် အကယ်၍ ပိတုဃာတကကံ မထိုက်လျှင်လည်း ပစ္စေကဗုဒ္ဓါအလောင်းဖြစ်၍ မဂ်ဖိုလ်ကိုရယူရန် အားထုတ်မည်မဟုတ်ကြောင်း မှတ်သားသင့်ပါသည်။
********************************************************************************

( အိပ်စက်ခြင်း )
( မေး )၁။ လူသားတို့သည် ပင်ပန်းနွမ်းနယ်မှုကြောင့် အိပ်စက်ခြင်းကို ပြုကြသည်၊ ထိုသို့ အိပ်စက်ကြရာတွင် နှစ်ခြိုက်စွာ အိပ်ပျော်သွားသောအခါ အသိစိတ်ကလေး မရှိတော့ပါ၊ ထိုအသိစိတ်ကလေး အဘယ်သို့ ရောက်သွားပါသလဲဘုရား။

၂။ လူများကဲ့သို့ နတ်များမှာလည်း ပင်ပန်းနွမ်းနယ်မှု ရှိပါသလား၊ နတ်တို့အိပ်စက်မှု မရှိဆိုသော် ညအခါ အဘယ်သို့ အချိန်ကုန်လွန်စေပါသလဲဘုရား။
( ကေသီ-တောင်ဥက္ကလာပမြို့ )

( ဖြေ )
လူတို့တွင် ပဋိသန္ဓေစိတ် ဘ၀င်စိတ် စုတိစိတ်-ဟူ၍ စိတ်သုံးမျိုးရှိသည်။
ပဋိသန္ဓေအခါမှ စုတိ ( သေဆုံးကွယ်လွန် ) သည်အထိ ဘ၀င်စိတ်ဟူသော ဘ၀၏အစိတ်အပိုင်း စိတ်အမျိုးအမည် တမျိုးမှာ စိတ်သာဖြစ်သည်၊ မည်သည့်အာရုံကိုမျှ မယူ မသိသော စိတ်မျိုး ဖြစ်သည်၊
အကြောင်းအားလျော်စွာ မြင်စိတ် ကြားစိတ် စသည့် အာရုံငါးပါးဆိုင်ရာ ၀ိညာဉ် ( အသိစိတ် ) များ ပေါ်ပေါက်လာမှသာ ဘ၀င်စိတ်များ ပြတ်၍ ၄င်းအသိစိတ်များ ဖြစ်ပေါ်ရပါသည်၊
အသိစိတ် တခုနှင့်တခု အကြားမှာပင် ဘ၀င်စိတ်များက ၀င်၍ ဖြစ်ပါသေးသည်၊ တနေ့တာလုံး မြင် ကြား နံ လျက် ထိသိစိတ်များ တမျိုးပြီးတမျိုး ဖြစ်သည်၊

လုပ်ငန်းကိစ္စတို့ကြောင့် ပင်ပန်းနွမ်းနယ်သွားသောအခါ ထိနမိဒ္ဓခေါ် စိတ်စေတသိက်တို့ ထိုင်းမှိုင်း နွမ်းနယ်ခြင်းဖြစ်ပြီး မြင်ကြားစသော အသိစိတ်များ ပြတ်သွားသည်၊ ထိုအခါ ဘ၀င်စိတ်ခေါ် မသိစိတ်များသို့ သက်ရောက် ဖြစ်ပေါ်သွားပါသည်။
ယင်းသည်ပင် အိပ်စက်ခြင်းသဘော ဖြစ်ပါသည်၊ အပန်းပြေ၍ ထိနမိဒ္ဓတို့ ပျောက်ကွယ်ပြီး မြင် ကြား အသိစိတ်များ ပေါ်လာပြန်သော် ဘ၀င်ခေါ် မသိစိတ်များ ပြတ်၍ အိပ်ရာမှ နိုးလာရပါသည်၊
( ဤသည်တို့ကို ထောက်၍ နားမလည်နိုင်သည်ကို ဘ၀င်မကျပါဘူး-ဟု ဆိုသော ဤခေတ်စကားလုံး မှန်မမှန် စဉ်းစားစေလိုပါသည် )။

နတ်တို့သည် လူတို့ကဲ့သို့ပင် ဘ၀င်စိတ် ရှိသော်လည်း လုံ့လ၀ီရိယထုတ်၍ စားသောက်နေထိုင်ရသော ဘ၀မျိုးမဟုတ်ပါ၊ ပင်ပန်းနွမ်းနယ်ခြင်း ထိနမိဒ္ဓများပြားခြင်း မရှိနိုင်ပါ၊ လူတို့ကဲ့သို့ အိပ်စက်ရမှု ဘ၀င်သို့ သက်ရောက်ရမှု မရှိနိုင်ပါ၊ ခေတ္တခဏ အနားယူရုံမျှဖြင့် ကိစ္စပြီးနိုင်ပါသည်၊
နေ လ တို့မှာလည်း ၄င်းတို့ အောက်၌သာ ရှိ၍ နေ့-ည-ဟူ၍လည်း နတ်ပြည်တွင် မရှိပါ၊
၎င်းတို့၏ သက်တမ်း သတ်မှတ်မှုမှာလည်း လူတို့ကဲ့သို့ နေ့ ည လ-နှစ်မျိုးဖြင့် သတ်မှတ်ဖွယ်ရာ မရှိ၊
ကုသိုလ်ကံအားလျော်စွာ သတ်မှတ်စရာရှိသည်-ဟု ယူဆနိုင်ပါသည်။
*********************************************************************************

( စံပယ်လေးရုံ ကဗျာနှင့် သင်္ကန်းပုံစံ )

( မေး ) ၁။ စံပယ်တဲ့ လေးရုံ၊ အပွင့်ငယ်စုံ၊ တငုံကျန်ပါသေးတယ်၊ ပန်ချင်သူ ပျို့မောင်ထွေးရယ်၊ ခေါင်းဖြီးခဲ့လေး။
ကဗျာကို ဆွေးနွေးကြရာ ဘုရားငါးဆူပွင့်မှာ တဆူကျန်သေးကြောင်း ဆိုသည့် အဓိပ္ပါယ်ဖြစ်ပါသည်။
အဘယ်ကြောင့် စံပယ်ငါးရုံ-ဟု မဆိုဘဲ လေးရုံဆိုရကြောင်း ဆွေးနွေးကြပါသည်၊ ထိုအချက်ကို ရှင်းလင်းပေးစေလိုပါသည်
ဘုရား။

၂။ သံဃာတော်များ ၀တ်ရုံသည့် သင်္ကန်းမှာ ( ၁ ) အနားလေးဘက် ( ၂ ) မျဉ်းနှစ်ပါးသွား လေးချောင်း
( ၃ ) အခန်း ၅-ခန်းတွင် အကြီးတကန့်၊ အသေးတကန့် ပါရှိပါသည်၊
၎င်းသုံးချက်၏ရည်ရွယ်ချက်ကို ရှင်းလင်းဖြေကြားတော်မူပါဘုရား။
( ဦးဘညွှန့်-အမှတ် ၉၈၊ မြင်းကကုန်း၊ ဘိုကလေးမြို့နယ် )

( ဖြေ )
၁။ စံပယ်လေးရုံ ကဗျာ အပြည့်အစုံမှာ-
စံပယ်တဲ့ လေးရုံ၊ မလေးခင် မပန်ထိုက်၊ ပန်းပြတ်ခိုက်ကြုံ၊
အပွင့်ငယ်စုံ၊ တရုံကျန်ပါသေး၊ ပန်ချင်သူ ခင်ခင်လေးရယ်၊ ခေါင်းဖြီးခဲ့လေး။ ဟူ၍ဖြစ်သည်။

ဤကဗျာ၏ ဒုတိယပိုဒ်ကို၎င်း၊ အပွင့်ငယ်စုံ၊ တရုံကျန်ပါသေး-ဟူသည်ကို၎င်း၊ စဉ်းစားလျှင် လိုရင်းအဓိပ္ပါယ် ပြည့်စုံပါသည်။

၂။ ရဟန်းတော်တို့၏ သင်္ကန်းမှာ မဂဓပုဏ္ဏားတို့၏ လယ်ကွင်းကို ပြ၍ မြတ်စွာဘုရားက အရှင်အာနန္ဒာအား ချုပ်ခိုင်းကြောင်း
မဂဓလယ်ကွင်း၏ ရေသွင်းမြောင်း တလုပ် ( တာလုပ် ) မြောင်းများအတိုင်း ပုံစံယူ၍ ချုပ်လုပ်ကြောင်း ၀ိနည်းပါဠိတော်တို့တွင် ပါပါသည်၊
အနားလေးဘက် ပိတ်စသီးခြားဖြင့် ထပ် ချုပ်ရသော ထပ်နားပတ် ပါရသည်၊
အတွင်း၌ ငါးစပ်ဖြတ်၍ ချုပ်ရာတွင် တစပ်နှင့်တစပ် ချုပ်ရာ၌ မျဉ်းနှစ်ကြောင်း ပါရသည်၊
မဂဓလယ်ကွင်း၌ ရေသွင်းတလုပ် မြောင်းခံ၍ အတွင်းအခန်းတို့တွင် မြောင်းတို ကန့်လန့် အတိုမြောင်း ထားသကဲ့သို့
အခန်းကြီး တခန်း၊ အခန်းငယ် တခန်းစီ ထား၍ ချုပ်ရပါသည်၊ တလုပ်မြောင်းကို ကုသိ၊ အခန်းကြီးကို မဟာမဏ္ဍလ၊ အခန်းငယ်ကို အဍ္ဎမဏ္ဍလ စသည် အမည်မှည့်ခေါ်ပါသည်။

ဤကဲ့သို့ ငါးစပ် ငါးဖြတ် ဓားလှီး ဓားဖြတ်နှင့် ထပ်နားပတ်စုံမှ သင်္ကန်းဖြစ်ပါသည်။
သင်္ကန်းဖြစ်မှသာ အဓိဋ္ဌာန်တင်ခြင်း၊ ကပ္ပဗိန္ဒု ထိုးခြင်း၊ ကထိန်သင်္ကန်း ပြုလုပ်ခြင်း၊ ၀ိနည်းတိစီဝရိတ်၊
ဓုတင် တိစီဝရိတ်ဆောင်၍ ၀တ်ရုံခြင်း စသည်တို့ ပြုနိုင်သည်။

လှူဒါန်းသော ဒါယကာများကလည်း သင်္ကန်းအကြောင်း နားလည်ထားရန် လိုအပ်ပါသည်။

( မြတ်မင်္ဂလာ-၁၉၉၁-ဧပြီလ )

No comments: