Thursday, January 29, 2009

ကံ ကံ၏အကျိုး ( ၁၂ )

( ကံကောင်းလို့ )

ကိုကြာညွန့်သည် ပုလဲမြို့နယ် လက်ပံရွာ၌ နေထိုင်သူဖြစ်သည်၊ အသက် ၃၀-ကျော်သာ ရှိသေးသည်၊ အလုပ်အကိုင်မှာ မိရိုးဖလာ တောင်သူလယ်သမား လုပ်ငန်းအပြင် အရောင်းအ၀ယ် ကုန်သည်အလုပ်ကိုပါ လုပ်ကိုင်သည်၊ သူသည် အိပ်ရာဝင်တိုင်း ဘုရားရှိခိုးပြီးမှ အိပ်လေ့ရှိသည်၊ ထို့ပြင် ရေကန်တူးရာတွင် ပါဝင်လှူဒါန်းခြင်း၊ ၀ါဆိုသင်္ကန်းကပ်လှူခြင်း၊ ကထိန်သင်္ကန်း ကပ်လှူခြင်း၊ စသော ကုသိုလ်ကောင်းမှု ဒါနများကို မပြတ်ပေးလှူနေသူလည်းဖြစ်၏၊ အခါကြီး ရက်ကြီးများတွင် ခရီးမထွက်၍ အိမ်မှာရှိသည့်အခါမျိုး၌ အမြဲ ဥပုသ်သီလ ဆောက်တည်လေ့ရှိ၏။

၁၃၅၂-ခုနှစ် သီတင်းကျွတ်လဆန်း ၁၀-ရက်နေ့က မုံရွာဘက်တွင် မှိုရောင်း၍ ညောင်ပင်ကြီး ကားဆိပ်မှ ပုလဲသို့ ကားစီး၍ ပြန်ခဲ့သည်၊ အပြန်တွင် ကိုကြာညွှန့် အပါအ၀င် လူ ၄၀-ခန့်ကို တင်ဆောင်လာသော ဒိုင်နာကားလေးသည် အရှိန်နှင့်မောင်းလာသည်၊ ကြေးနီတောင် မိုင်းစခန်းအနီးသို့အရောက်တွင် ကားလမ်းမပေါ်သို့ ဘောလုံးလိမ့်သွား၍ ကလေးတယောက် အပြေးလိုက်ကောက်သည်၊ ထိုအခါ ကလေးကို တိုက်မိမည်စိုး၍ အရှိန်မထိမ်းနိုင်ဘဲ မှောက်သွားလေသည်၊ လူအများအပြား သေသူသေ၊ ကျိုးသူကျိုး၊ ဆေးရုံတက်သူတက် ဖြစ်ကြရလေသည်။

ကိုကြာညွှန့်ကား အနည်းငယ် ပွန်းရုံမှလွဲ၍ ဘာမှမဖြစ်ခဲ့ပါ၊ ရတနာသုံးပါး ဂုဏ်တော်ကို အမြဲ အောက်မေ့၍
ညစဉ် ဘုရားရှိခိုးခြင်း၊ လှူဒါန်းခြင်း၊ သီလဆောက်တည်ခြင်း စသော ကုသိုလ်ကောင်းမှုကံတို့က မသေမပျောက် ရွာသို့ပြန်ရောက်စေခဲ့သည်-ဟု ထင်မြင်မိပါသည်၊

ကိုကြာညွှန့်အကြောင်း ကြားသိရသော ရွာမှလူအများက ကံကောင်းလို့ မသေတာပေါ့ကွာ-ဟု တအံ့တသြ ပြောဆိုနေကြပါသည်။

( တသက်လှ-ပခုက္ကူ )
*********************************************************************************

( ရွာလုံးကျွတ် မီးလောင်ခြင်း )

xxxxx တရွာလုံး မီးလောင်လို့ တဲ့
လွန်ခဲ့သော ၁၉၇၈-ခုနှစ် ဧပြီလကဖြစ်သည်၊ မယုံနိုင်လောက်အောင် တရွာလုံး တအိမ်မကျန် မီးလောင်ကျွမ်းခံခဲ့ရသည်။

xxxxx ရွာသည် ချောင်းကမ်းနဖူးတွင် တည်ထားသော အိမ်ခြေ ၅၀-ကျော်ခန့် ရှိသည့် ရွာတရွာဖြစ်သည်၊ အိမ်ကြီးအိမ်ကောင်းများလည်း ရှိ၍ သေးသေးငယ်ငယ် အိမ်များလည်း ရှိသည်၊ ပူပြင်းသော နွေရာသီတွင် လောင်သောမီးသည် အဆိုပါအိမ်များကို တအိမ်မကျန် လောင်ကျွမ်းခဲ့ခြင်း ဖြစ်သည်၊ သို့သော် ရွာဦး ဘုန်းတော်ကြီးကျောင်းနှင့် ဘုရားများမှာ အံ့သြရလောက်အောင် မီးဘေးမှ ကွင်းကျန်ခဲ့လေသည်။

မီးစတင်လောင်ကျွမ်းပုံမှာ ရွာနှင့်နီးကပ်စွာ ဆက်စပ်လျက် တည်ရှိသော ကိုင်းတောမီးမှ ကူးစက် လောင်ခဲ့ခြင်းဖြစ်သည်-ဟု ဆိုပါသည်၊ ရွာသူရွာသားများက စုပေါင်း၍ ငြိမ်းသတ်ခဲ့ကြသော်လည်း မီးလောင်ရာတွင် လေပင့်နေပြန်သဖြင့် ငြိမ်းမနိုင် သတ်မရ ဖြစ်ကြရသည်။

တဖန် မီးလောင်နေသောအိမ်၏ ပတ်ဝန်းကျင်ရှိ အိမ်များကို အမိုးများဖျက်၍ လူအများ စောင့်ကြိုနေကြသော်လည်း မီးသည် အိမ်စဉ်လိုက် မကူးစက်ဘဲ ရွာအနောက်ပိုင်းအိမ်မှ ရွာလယ်အိမ်၊ ၄င်းမှ ရွာတောင်ပိုင်းအိမ်၊ ၄င်းမှ အရှေ့ပိုင်းရှိအိမ် စသည်ဖြင့် ကျော်လွှား၍ လောင်ခဲ့သောကြောင့် လူများ မငြိမ်းသတ်နိုင်ဘဲ ရှိခဲ့သည်-ဟု ဆိုပါသည်၊ ဤရွာသားများက မလုပ်ကောင်းသော အမှုကို ပြုကြ၍ မကောင်းကျိုးကို ခံစားခဲ့ရခြင်း ဖြစ်ပါသည်။

၁၉၇၈-ခုနှစ် စက်တင်ဘာလတွင် ဖြစ်သည်၊ မည်သည့်ရွာက ပူဇော်လိုက်သည်-ဟု မသိရသော ရှင်ဥပဂုတ္တ ဖောင်တော်ကြီးသည် ချောင်းစဉ်အတိုင်း ကြွမြန်းတော်မူလာပြီး ထိုရွာသို့ ဆိုက်ရောက်ခဲ့လေသည်၊ ထိုရွာသားများသည် ဖောင်တော်ကို လာရောက် ဖူးမြော်ကြသည်၊ ညနေစောင်းသောအခါ ရွာသားတဦးက စတင်ပြီး ဖောင်ပေါ်တွင် ပူဇော်ထားသော ဆင်းတုတော်တဆူကို မိမိအိမ်တွင် ပူဇော်ရန်-ဟုဆိုကာ ယူဆောင်သွားခဲ့ပေသည်၊ ဤသို့ဖြင့် ဆင်းတုတော်များ ကုန်လျှင် နောက်လူများက အလှူငွေများ, ခဲဘွယ်ဘောဇဉ်များနှင့် ဖောင်ဖွဲ့ထားသော မျောတိုင်များပါမကျန် ရွာလုံးကျွတ် ဖျက်ဆီးယူကြပါသည်၊
ဤရွာသားများသည် မလုပ်ကောင်းသည်ကို လုပ်ကြ၍ ရွာလုံးကျွတ် မီးသင့်သည်-ဟု ယူဆမိပါသည်။

( သောင်းဝင်း-စစ်ကွင်း )
*********************************************************************************

( လူအ,တိုင် )

ကျွန်မနေထိုင်သော ရွာကလေးသည် ဗုဒ္ဓဘာသာ မြန်မာလူမျိုးများ နေထိုင်ကြသော ရွာကလေး တရွာ ဖြစ်ပါသည်။

လွန်ခဲ့သော နှစ်ပေါင်း အတော်ကြာ ဒုတိယကမ္ဘာစစ်မဖြစ်မီ ကာလက ကျွန်မ၏အဘိုး အဘွားများ လက်ထက်တွင် မွေးရာပါ စကားမပြောတတ်သော ကိုလူအ ဆိုသည့် လူတယောက်ရှိခဲ့သည်၊ ကိုလူအ အသက် ၃၀-အရွယ်တွင် ကျွန်မတို့ရွာ၌ ခံ့ညားထည်ဝါသော ဘုန်းတော်ကြီးကျောင်း အသစ် ဆောက်လုပ်သည်၊ ရွာသူရွာသားများက ငွေကြေးများ တတ်နိုင်သမျှ
ထည့်ဝင် လှူဒါန်းကြသည်။ ကိုလူအ-လည်း ကျောင်းတိုင်တတိုင်ဖိုး ထည့်ဝင် လှူဒါန်းပါသည်။

ဤသို့ဖြင့် ကျောင်းတိုင်ထူပွဲ နေ့တွင် ဘုန်းတော်ကြီးကျောင်းဝင်းထဲ၌ လူအများ စည်ကားစွာ စုဝေးရောက်ရှိနေကြပါသည်၊ ထို့နောက် ကျောင်းတိုင်များကို စတင် စိုက်ထူကြပါသည်၊ ကိုလူအ လှူဒါန်းသည့်တိုင် စိုက်ထူသောအလှည့်တွင် အခြားတိုင်များ စိုက်ထူသကဲ့သို့ တိုင်ကိုတည့်မတ်အောင် စိုက်ထူရာ၌ တ,ဟေး ဟေး-ဖြင့် ညာသံပေး၍ စိုက်ထူကြသည်။ ကိုလူအ-လည်း အခြားသူများနည်းတူ ၀မ်းမြောက်ဝမ်းသာစွာဖြင့် ဟေး ဟေး ဟေး-ဟု အော်ဟစ်လိုက်ရာ အသံများထွက်ပေါ်လာပြီး စကားလည်း ပြောတတ်လာပါသည်၊ ထို့ကြောင့် ထိုကျောင်းတိုင်ကြီးကို လူအ-တိုင် ဟု ခေါ်စမှတ်ပြုကြပါသည်။

ဒုတိယကမ္ဘာစစ်အတွင်း လေယာဉ်ဖြင့် ဗုန်းချခံရမှုကြောင့် ယင်းဘုန်းတော်ကြီးကျောင်းသည် မီးလောင်ပျက်စီးသွားခဲ့သည်၊ သို့သော်လည်း လူအ-တိုင်ကြီးမှာ ကျန်ရစ်နေခဲ့ပါသည်၊ ယခုအခါ ထိုလူအ-တိုင်မှာ ငုတ်တို နေရာသာ ကျန်ရှိပါတော့သည်။

နှစ်တွေအလီလီ ကြာညောင်းခဲ့သော်လည်း လူအ-တိုင် ရာဇ၀င်ကား ကျွန်မတို့ရွာကလေးတွင် ယခုတိုင် မကွယ်ပျောက်ဘဲ ကျန်ရှိနေပါသည်။

မွေးရာပါ စကားမပြောတတ်သော ကိုလူအ-သည် ဘုန်းတော်ကြီးကျောင်းတိုင် လှူရသော ကုသိုလ်ကြောင့် အသက် ၃၀-အရွယ်တွင် စကားပြောတတ်လာခဲ့ခြင်းသည် အံ့သြဖွယ်ကောင်းလှပေစွ၊ ကောင်းမှုကုသိုလ်ကံ၏ အကျိုးကို လက်ငင်း ခံစားရခြင်း ဖြစ်သည်-ဟု အများက ယုံကြည်နေပါတော့သည်။

( သပြေခက်-မြန်မာစာ )

( မြတ်မင်္ဂလာ-၁၉၉၁ ဧပြီလ )

No comments: