Thursday, January 29, 2009

မင်္ဂလာဗျူဟာ သာမဏေကျော်

ဗုဒ္ဓသာသနာတော် သန့်ရှင်းတည်တံ့ ပြန့်ပွားရေးတွင် ရဟန်းသံဃာများသည် အရေးကြီးသော ကဏ္ဍမှ ပါဝင်သည်၊ ရဟန်းသံဃာများတွင်လည်း သာမဏေများသည် အခြေခံဖြစ်သည်၊ ခေတ်အဆက်ဆက် နေလိုလလို ထင်ရှားသော ဆရာတော်ကြီးများသည် များသောအားဖြင့် သာမဏေဘ၀ကပင် ထူးချွန်သော အရှင်မြတ်များ ဖြစ်ကြသည်။

ဂေါမတမြတ်စွာဘုရားသခင်သည် ဘုရားအဖြစ်သို့ ရောက်ရှိတော်မူပြီး ၁-နှစ်မြောက်အချိန်မှာပင် ဖွားတော်မူရာဖြစ်သော ကပိလ၀တ် နေပြည်တော်သို့ ကြွချီတော်မူခဲ့သည်၊ ထိုအချိန်မှာပင် သားတော်ရာဟုလာအား လောကုတ္တရာအမွေပေးမည်-ဟု မိန့်တော်မူကာ သာမဏေ ပြုပေးတော်မူခဲ့သည်။ ထိုအချိန်၌ ရာဟုလာသည် ၇-နှစ်အရွယ်မျှသာ ရှိသေးသည်။
ပထမဦးဆုံးသော သာမဏေသည် ရာဟုလာ သာမဏေပင် ဖြစ်သည်၊ ရာဟုလာ သာမဏေသည် သီလ သမာဓိ ပညာ
တည်းဟူသော သိက္ခာသုံးပါးကို ကြိုးစားကျင့်ကြံအားထုတ်ရာ သက်တော် ၁၈-နှစ်အရွယ်မှာပင် ရဟန္တာအဖြစ်သို့ ရောက်တော်မူခဲ့သည်။

ရှင်ရာဟုလာသည် သိက္ခာကို ထိန်းသိမ်းရာတွင် အလွန်ခိုင်မြဲသည်၊ အလွန် ထူးချွန်သည်၊ ထို့ကြောင့် မြတ်စွာဘုရားသည် အရိယာ သာဝကတို့အလယ်၌ ရှင်ရာဟုလာ-ကို သိက္ခာကာမ-ဧတဒဂ်ဘွဲ့ ပေးတော်မူခဲ့သည်။

ရှင်ရာဟုလာ နည်းတူပင် ထူးချွန်သော သာမဏေများ ရှိသေးသည်၊
အရှင်သာရိပုတ္တရာ၏ တပည့်တဦးဖြစ်သူ ရှင်တိဿ-သည် ၇-နှစ်အရွယ်မှာပင် မထေရ်မြတ်ထံ၌ သာမဏေပြုခဲ့သည်၊
ထို့နောက် တောကျောင်းတွင် ၀ါဆို၍ တရားအားထုတ်သည်၊ ၀ါမကျွတ်မီမှာပင် ရဟန္တာဖြစ်တော်မူသည်။

အရှင်သာရိပုတ္တရာ၏ အခြားတပည့်တဦးဖြစ်သူ ရှင်ပဏ္ဍိတ-ကား သာမဏေပြုပြီး ၈-ရက်မြောက်တွင် ရဟန္တာဖြစ်တော်မူသည်၊
၇-နှစ်သားအရွယ်သာ ရှိသေးသည်။

မြန်မာတို့က သီရိဓမ္မာသောကမင်း-ဟုခေါ်သော အသောကမင်းကြီး၏ တူတော် နိဂြောဓ သာမဏေသည်လည်း ၇-နှစ်သားအရွယ်တွင် သာမဏေပြုသည်၊ ယင်းသို့ သာမဏေပြုရန် ဆရာမထေရ်က ဆံပယ်ပေးသည်၊
ဆံပယ်နေစဉ် တစပဉ္စက ကမ္မဋ္ဌာန်း-ကို စီးဖြန်းစေသည်၊
ထိုကမ္မဋ္ဌာန်းကား ဆံပင်၊ မွေးညှင်း၊ ခြေသည်း လက်သည်း၊ သွား၊ အရေ-ဟူသော ဤငါးပါးအပေါင်းကို ရှုမှတ်ဆင်ခြင် ပွားများခြင်းဖြစ်သည်၊ နိဂြောဓ သာမဏေလည်း ထိုကမ္မဋ္ဌာန်းကို စီးဖြန်းရာ ဆံပယ်ပြီးသော အဆုံး၌ပင် ရဟန္တာအဖြစ်သို့ ရောက်သွားလေသည်၊
နိဂြောဓ သာမဏေသည် အသောကမင်းနှင့်တကွ ပရိသတ်တို့အား တရားဟော၍ သရဏဂုံ ၃-ပါးနှင့် ၅-ပါးသီလကို
တည်စေခဲ့သူဖြစ်သည်။

ဤသို့လျှင် သာသနာတော်၌ ထူးချွန်သော သာမဏေကျော်များ အများအပြား ရှိခဲ့သည်၊ ယခုခေတ်တွင်လည်း ခေတ်ကာလ
အားလျော်စွာ သာမဏကျော်များ ပေါ်ထွန်းရေးကို ရည်ရွယ်လျက် သာမဏေကျော်စာတော်ပြန်ပွဲများကို ကျင်းပလျက်ရှိကြသည်။

မန္တလေးမြို့ ပရိယတ္တိ သာသနဟိတအသင်းကြီးသည် သာမဏေကျော် စာတော်ပြန်ပွဲကို ကျင်းပလာခဲ့သည်မှာ နှစ်ပေါင်း ၅၀-ကျော် ရှိခဲ့ပြီ။
ထို့နောက် ပဲခူးမြို့ ပရိယတ္တိ သဒ္ဓမ္မရက္ခိတ အသင်းကြီးကလည်း သာမဏေကျော် စာတော်ပြန်ပွဲကို ကျင်ပလာခဲ့သည်။
၅-နှစ်ကျော် ရှိခဲ့ပြီ။
ထို့နောက် ရန်ကုန် မင်္ဂလာဗျူဟာ အသင်းကြီးက သာမဏေကျော် စာတော်ပြန်ပွဲကို ၁၃၅၀-ပြည့်နှစ်မှ စတင်ကျင်းပခဲ့သည်၊
၃-နှစ်ကျော် ရှိခဲ့ပြီ။
ထို့နောက် မော်လမြိုင်ကျွန်းမြို့ ပရိယတ္တိ သာသနာလင်္ကာရ အသင်းကြီးက ယမန်နှစ် (၁၃၅၃) မှစ၍ သာမဏေကျော် စာတော်ပြန်ပွဲကို ကျင်းပလာခဲ့သည်။

မင်္ဂလာဗျူဟာအသင်းသည် ရှေ့ဆောင်အသင်းကြီးများနည်းတူပင် သာမဏေကျော် စာတော်ပြန်ပွဲကို ၁-နှစ် ၁-ကြိမ် ကျင်းပသည်၊
ပထမဆင့်, ဒုတိယဆင့်, တတိယဆင့် ဟူ၍ အဆင့် ၃-ဆင့်ခွဲထားသည်၊
အဆင့်ဆင့်ဖြေဆို၍ တတိယဆင့်ကို အောင်မြင်သောအခါတွင်မှ သာမဏေကျော်ဘွဲ့ ဆက်ကပ်သည်၊
ဖြေဆိုရာ၌ အဆင့်လိုက် ပြဋ္ဌာန်းထားသော ကျမ်းစာများကို နှုတ်ဖြေ၊ ရေးဖြေ နှစ်ရပ်စလုံး ဖြေဆိုရသည်။
( မင်းယုဝေ )

( မြတ်မင်္ဂလာ-၁၉၉၁-ဧပြီလ )

No comments: