Wednesday, January 28, 2009

အဘိဓဇ / အဂ္ဂမဟာပဏ္ဍိတ သမိုင်း

( အဂ္ဂမဟာပဏ္ဍိတသမိုင်း )

အဂ္ဂမဟာပဏ္ဍိတဘွဲ့နှင့် စပ်၍ သမိုင်းကြောင်းကို လေ့လာကြည့်သောအခါ မြန်မာသက္ကရာဇ် ၁၂၇၇-ခုနှစ်
( ခရစ်နှစ် ၁၉၁၅-ခု ) မှစ၍ ဆက်ကပ်လာကြောင်းသိရှိရပါသည်၊

အ၈္ဂမဟာပဏ္ဍိတ-ဆိုသောအမည်မှာ ပါဠိအခေါ်ဖြစ်၍
မြန်မာလို-ကြီးကြယ်မြင့်မြတ်သော ပညာရှိ-ဟု အဓိပ္ပါယ်ရပါသည်။

ထိုစဉ်က အဂ္ဂမဟာပဏ္ဍိတဘွဲ့ ချီးမြှင့်ထိုက်သော ဂုဏ်အဂ်ါ အရည်အချင်းများကို တောင်ခွင် သာသနာပိုင် ဆရာတော်၏ အမိန့်ပြန်တမ်းတွင် အောက်ပါအတိုင်း ဖော်ပြထားပါသည်။

၁။ ပရိယတ္တိ ၀ိသာရဒ တိပိဋကဓရ ပဋိပတ္တိမာမက-ဟူသော ဂုဏ်ထူးဝိသေသရှိ၍ ၀ိနိစ္ဆယ ကျွမ်းကျင်ခြင်း။
၂။ အာစရိယလဒ္ဓေါပဒေသ-စသော ကျေးဇူးဂုဏ်ရှိသဖြင့် တပည့်သားတို့အား အဆက်မပြတ် စာပေပို့ချခြင်း။
၃။ ဆန်း, အဘိဓာန်, အလင်္ကာ, ဗျာကရုဏ် တတ်ကျွမ်း၍ ကျန်းဂန်ပြုစု ရေးသားနိုင်ခြင်း။
၎။ သဂ္ဂမောက္ခ ပရာယန အကျိုးငှါ တရားဓမ္မ ဟောပြောဆုံးမနိုင်ခြင်း။
၅။ ၀ိနယ ဂရုက သီလ၀န္တ ဖြစ်ခြင်း။

ဗြိတိသျှအစိုးရ လက်ထက် ၁၂၇၇-ခုနှစ်မှစ၍ နှစ်စဉ်ဆက်ကပ်လာသော အဂ္ဂမဟာပဏ္ဍိတ ဘွဲ့တံဆိပ် ဆက်ကပ်မှုသည် ဒုတိယကမ္ဘာစစ်မီးကြောင့် ၁၃၀၂-ခုနှစ်တွင် နောက်ဆုံးထား၍ ရပ်ဆိုင်းသွားခဲ့ရသည်။


( ဘွဲ့တံဆိပ်တော် စီစဉ်သတ်မှတ်ရေး ကော်မတီ )
လွတ်လပ်ရေးရပြီးနောက် မြန်မာနိုင်ငံအစိုးရ အဆက်ဆက်တို့က ၁၃၁၂-ခုနှစ်မှ စ၍ အဂ္ဂမဟာပဏ္ဍိတ ဘွဲ့တံဆိပ် တော်ကို ပြန်လည်ဆက်ကပ်လှူဒါန်းခဲ့ပါသည်၊ ဒုတိယကမ္ဘာစစ်မီးကြောင့် ကြားကာလတွင် ၁၀-နှစ်တိတိ ပြတ်လပ်နေခဲ့သည်၊ မြန်မာသက္ကရာဇ် ၁၃၁၅-ခု၊ ခရစ်နှစ် ၁၉၅၃-ခုတွင်---

၁။ ဟင်္သာတမြို့ အဘိဓဇမဟာရဋ္ဌဂုရု ဆရာတော်ကြီး
၂။ မန္တလေးမြို့ အဘိဓဇမဟာရဋ္ဌဂုရု ညောင်ရမ်းဆရာတော်ကြီး
၃။ မန္တလေးမြို့ မဟာဝိသုဒ္ဓါရာမတိုက် မြောင်းမြဆရာတော်
၎။ ရန်ကုန်မြို့ အဂ္ဂမဟာပဏ္ဍိတ လေသာဆရာတော်-တို့ ပါဝင်သော ဘွဲ့တံဆိပ်တော် စီစဉ်သတ်မှတ်ရေး ကော်မတီက
အဂ္ဂမဟာပဏ္ဍိတ ဘွဲ့တံဆိပ်တော် လှူဒါန်းထိုက်သော အင်္ဂါ ၅-ရပ်ကို သတ်မှတ်ထားပါသည်၊ ယင်းအင်္ဂါ ၅-ရပ်မှာ
အောက်ပါတို့ ဖြစ်ပါသည်။

၁။ ပါဠိတော် အဋ္ဌကထာ ဋီကာ စသည်တို့၌ ကျွမ်းကျင်ခြင်း
၂။ ပါဠိတော် အဋ္ဌကထာ ဋီကာ စသည်တို့ကို အမြဲမပြတ် ပို့ချခြင်း
၃။ အနည်းဆုံး သိက္ခာဝါ ၂၀-ရှိရခြင်း
၎။ ပါဠိတော် အဋ္ဌကထာ ဋီကာ စသည်တို့၌ ပျွမ်းကျင်လိမ္မာသည်ဟု ကျော်ကြားခြင်း
၅။ သီလ၀န္တ ဖြစ်ခြင်း

၁၉၅၃-ခုနှစ်က သတ်မှတ်ထားသော ဤစည်းမျဉ်းပါ အင်္ဂါ ၅-ချက်တို့ကို ယခုအချိန်အထိ ဤမူအတိုင်း ဆက်လက်
ကျင့်သုံးဆဲ ရှိနေပါသည်။

( ထောက်ပံ့ချီးမြှောက်မှု )
အဂ္ဂမဟာပဏ္ဍိတ ဘွဲ့တံဆိပ်တော် အတွက် ဗြိတိသျှ အစိုးရ လက်ထက်က ၁-နှစ်လျှင် ဆွမ်းဆန်တော် အလှူငွေ
ဒင်္ဂါး ၁၀၀-ကျပ်နှင့် ညီမျှသော ထောက်ပံ့မှုကို ဆက်ကပ်ပါသည်၊
လွတ်လပ်ရေးရပြီး မြန်မာအစိုးရလက်ထက်တွင် ၅၀၀-ကျပ် တိုးမြှင့် လှူဒါန်းပါသည်။
နိုင်ငံတော် ကောင်းစီလက်ထက်တွင် ၇၅၀-ပျက် တိုးမြှင့်လှူဒါန်းကြောင်း သိရပါသည်။
နိုင်ငံတော် ငြိမ်ဝပ်ပိပြားမှု တည်ဆောက်ရေး လက်ထက်တွင် ဆွမ်းဆန်တော် အလှူငွေ ၅၀၀၀-ကျပ် တိုးမြှင့်
လှူဒါန်းကြောင်း ၀မ်းမြောက်ဖွယ်ရာ သိရပြန်ပါသည်။

ယခင်က အဂ္ဂမဟာပဏ္ဍိတ ဘွဲ့တံဆိပ်တော်ရ ဆရာတော် ပျံလွန်တော်မူလျှင် ဈာပနထောက်ပံ့ငွေ ၂၀၀၀-ကျပ် လှူဒါန်းခဲ့ရာ န-၀-တ လက်ထက်တွင် အလှူငွေ ၃၀၀၀-ကျပ် အထိ တိုးမြှင့် လှူဒါန်းခဲ့ပါသည်။

အထက်ပါ လှူဒါန်းငွေများအပြင် အဂ္ဂမဟာပဏ္ဍိတဘွဲ့ ဆက်ကပ်ရရှိသော ဆရာတော်အား ကုန်းနှင့်ရေ ပထမတန်းမှ အခမဲ့ ခရီးသွာလာခွင့် လက်မှတ်ကိုလည်း ဆက်ကပ်ထားပါသည်၊ နောက်ပါ တပည့်တယောက်ကိုလည်း ကပ္ပိယ ကာရက အဖြစ် ခေါ်ဆောင်ခွင့် ပြုပါသည်။

( အဂ္ဂမဟာပဏ္ဍိတဘွဲ့ စစ်တမ်း )
၁၂၇၇-ခုနှစ်မှစ၍ ဆက်ကပ်လာသော အဂ္ဂမဟာပဏ္ဍိတ ဘွဲ့တံဆိပ်တော် ကပ်လှူခြင်း သမိုင်းကြောင်းသည် ယခုဆိုလျှင် နှစ်ပေါင်း ၇၅-နှစ် ရှိပါပြီ၊ ယင်း ၇၅-နှစ်တွင် ဒုတိယကမ္ဘာစစ်ကြောင့် ၁၀-နှစ် လစ်လပ်ပြီး တော်လှန်ရေးကောင်စီလက်ထက် ၁၇-နှစ် ရပ်နားခဲ့သောကြာင့် အမှန်တကယ် ဘွဲ့တံဆိပ်တော် ဆက်ကပ်ခဲ့သောနှစ်ပေါင်းမှာ ၄၈-နှစ်သာ ရှိပါသည်၊
ယင်း ၄၈-နှစ်တွင်

( က )ဗြိတိသျှ အစိုးရလက်ထက် ၂၅-နှစ် ၉၂-ပါး
( ခ ) နိုင်ငံရေး အစိုးရလက်ထက် အတွင်း ၇၉-ပါး
( ဂ ) နိုင်ငံရေးနှင့် တော်လှန်ရေးအစိုးရ ပေါင်းစပ်သောကာလ ၁-နှစ်အတွင်း ၂၈-ပါး
( ဃ ) နိုင်ငံတော် ကောင်စီလက်ထက် ၆၈-ပါး
( င ) နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ လက်ထက် ၃-နှစ်အတွင်း ၁၀၉-ပါး
စုစုပေါင်း ၃၇၆-ပါး တိတိ ရှိသွားပါပြီ။

ယင်း ၃၇၆-ပါးတွင် မြန်မာပြည်တွင်းမှ ၃၅၀-ပါး၊ ပြည်ပနိုင်ငံမှ ၂၆-ပါး ရှိကြောင်း သိရပါသည်၊
ပြည်ပနိုင်ငံမှ အဂ္ဂမဟာပဏ္ဍိတဘွဲ့ရ ၂၆-ပါးတွင်
ထိုင်းနိုင်ငံမှ ၁၃-ပါး
သီဟိုဠ်နိုင်ငံမှ ၈-ပါး
ကမ္ဘောဒီးယား နိုင်ငံမှ ၁-ပါး
လောနိုင်ငံမှ ၁-ပါး
နီပေါနိုင်ငံမှ ၁-ပါး
ဂျပန်နိုင်ငံမှ ၁-ပါး
အင်္ဂလန်နိုင်ငံမှ ၁-ပါး တို့ဖြစ်ပါသည်။

( အဘိဓဇမဟာရဋ္ဌဂုရု ဘွဲ့သမိုင်း )
မြန်မာနိုင်ငံ သာသနာရေးဆိုင်ရာ ဘွဲ့များတွင် အဘိဓဇမဟာရဋ္ဌဂုရု ဘွဲ့တံဆိပ်တော်မှာ အမြင့်ဆုံးသော ဘွဲ့ ဖြစ်ပါသည်။
မြန်မာနိုင်ငံ လွတ်လတ်ရေး ရပြီးနောက် ဆဋ္ဌသင်္ဂါယနာ အကြိုခေတ်၊ မြန်မာသက္ကရာဇ် ၁၃၁၅-ခုနှစ်မှစ၍ အဘိဓဇမဟာရဋ္ဌဂုရု
ဘွဲ့တံဆိပ်တော်ကို မြန်မာနိုင်ငံအစိုးရ အဆက်ဆက်တို့က ဆက်ကပ်လှူဒါန်းခဲ့ပါသည်။

ဘွဲ့တံဆိပ်တော် စီစဉ်သတ်မှတ်ရေးကော်မတီက အဘိဓဇမဟာရဋ္ဌဂုရု ဘွဲ့တံဆိပ်တော် ဆက်ကပ်လှူဒါန်းနိုင်သော အင်္ဂါ ၄-ရပ်ကို
အောက်ပါအတိုင်း သတ်မှတ်ထားပါသည်။
၁။ အဂ္ဂဟာပဏ္ဍိတ ဘွဲ့တံဆိပ်တော် ရပြီးဖြစ်ခြင်း။
၂။ အနည်းဆုံး သိက္ခာဝါ ၄၀ ( သက်တော် ၆၀ ) ရှိရခြင်း။
၃။ ဗဟုသုတ အကြားအမြင်များခြင်း။
၎။ လူရှင်ရဟန်းတို့အား ကျေးဇူးများသော ဗုဒ္ဓဘာသာ စာပေကျမ်းဂန်ကို ရေးသားဖူးခြင်း။

( ချီးမြှင့်ထောက်ပံ့မှု )
အဘိဓဇမဟာရဋ္ဌဂုရု ဟူသော ဘွဲ့၏အဓိပ္ပါယ်ကို အောက်ပါအတိုင်း မှတ်သားနိုင်ပါသည်-
အဘိ-ထူးကဲသော၊
ဓဇ-အလံတံခွန်သဖွယ်၊
မဟာ-ကြီးကျယ်မြင့်မြတ် ထင်ရှား၍၊
ရဋ္ဌ-နိုင်ငံတ၀ှမ်းလုံးက၊
ဂုရု-အလေးအမြတ်ပြုအပ်သော ဆရာတော်။

အဘိဓဇမဟာရဋ္ဌဂုရု ဘွဲ့တံဆိပ်တော် ဆက်ကပ်ခံရသော ဆရာတော်များကို နိုင်ငံတော်အစိုးရက ကုန်း-ရေ-လေ အခမဲ့ ခရီးသွားလာခွင့်လက်မှတ် ဆက်ကပ်လှူဒါန်းသည့်အပြင် နောက်ပါ တပည့် ၂-ယောက်ကိုလည်း ခေါ်ဆောင်ခွင့် ပြုထားပါသည်၊
နှစ်စဉ် ဆွမ်းဆန်တော်အလှူငွေ ၁၅၀၀-ကျပ် ကပ်လှူခဲ့ရာမှ နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ လက်ထက်တွင် ၆၀၀၀-ကျပ်အထိ တိုးမြှင့်ဆက်ကပ်ကြောင်း သိရပါသည်။

ယခင်က အဘိဓဇမဟာရဋ္ဌဂုရု ဘွဲ့တံဆိပ်တော်ရ ဆရာတော် ပျံလွန်တော်မူသည့်အခါ ဈာပနစရိတ် ၃၀၀၀-ကျပ် ထောက်ပံ့ခဲ့ပါသည်။
ယခု နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ လက်ထက်တွင် ဈာပနထောက်ပံ့ငွေ ၅၀၀၀-ကျပ်အထိ တိုးမြှင့် ထောက်ပံ့ကြောင်း သိရပါသည်။

( အဘိဓဇ စစ်တမ်း )
၁၃၁၅-ခုနှစ်မှ ၁၃၅၂-ခုအထိ ၃၇-နှစ်အတွင်း အဘီဓဇမဟာရဋ္ဌဂုရု ဘွဲ့တံဆိပ်တော်ကို ပြည်တွင်းပြည်ပ ဆရာတော်ကြီး ၃၅-ပါးတို့အား ဆက်ကပ်လှူဒါန်းပြီး ဖြစ်ပါသည်၊ ပြည်တွင်းမှ အပါး ၃၀၊ ပြည်ပမှ ၅-ပါး ဆက်ကပ်ခဲ့ပါသည်။

ပြည်ပနိုင်ငံမှ အဘိဓဇမဟာရဋ္ဌဂုရု ဘွဲ့တံဆိပ်တော် ဆက်ကပ်ခံရသော ဆရာတော်ကြီး ငါးပါးမှာ-
၁။ ထိုင်းနိုင်ငံ ဗန်ကောက်မြို့ ၀ပ်ဘော်ဝင် နိဝိသ်ကျောင်းတိုက်မှ ဆွမ်ဒက် ဖရ၀ဇီရဉာဏ၀ံသ ( ၁၃၁၈-ခု ဘွဲ့ကပ် )
၂။ သီရိလင်္ကာနိုင်ငံ ကန္နီမြို့ မာလာဝတု ကျောင်းတိုက်မှ အရှင်အသရဏ သရဏ သီရိသရဏင်္ကရ ( ၁၃၁၈-ခု ဘွဲ့ကပ် )
၃။ လောနိုင်ငံ လူယင် ပအုဆင်ဝပ် သုဝဏ္ဏဘူမိကျောင်းတိုက်မှ အရှင်ဓမ္မဉာဏ ( ၁၃၁၈-ခု ဘွဲ့ကပ် )
၎။ ကမ္ဘောဒီးယားနိုင်ငံ ဖနွမ်းပင်မြို့ ၀ပ်ဥဏ္ဏာလောမာရာမတိုက်မှ အရှင်မဟာသုမေဓာဓိပတိ ( ၁၃၁၈-ခု ဘွဲ့ကပ် )
၅။ ထိုင်းနိုင်ငံ ဗန်ကောက်မြို့ ဖရသာသနသောဘန ၀ပ်ဘိုဝိုရ်နိဝေစ် ကျောင်းတိုက်မှ ထိုင်းနိုင်ငံ သံဃရာဇာ ဆုမ်ဒေ့ဂ်ျ ဖရဉာဏ်
သံဝရ ( ၁၃၅၂-ခု ဘွဲ့ကပ် )

အထက်ဖော်ပြပါ ဆရာတော်ကြီး ငါးပါးအနက် ယခုနှစ် ဘွဲ့တံဆိပ်ဆက်ကပ်ခံရသော ဖရဉာဏ သံဝရ ဆရာတော် ၁-ပါးသာ သက်တော်ထင်ရှားရှိပါတော့သည်၊ ကျန်လေးပါးမှာ ပျံလွန်တော်မူကြပါပြီ။
( အရှင်ပညာသာမိ )

( မြတ်မင်္ဂလာ ၁၉၉၁-ဧပြီလ )

No comments: