Monday, February 9, 2009

ကံ ကံ၏အကျိုး ( ၁၅ )

( အပျော်မှားသူ )

ပြီးခဲ့သော မိုးရာသီ နေ့တနေ့၏ ညအချိန်တွင် ဖြစ်ပါသည်။ စာရေးသူ၏ ဆေးခန်းနှင့် မလှမ်းမကမ်းတွင် လူအုပ်စုတစု ရုတ်ရုတ်သဲသဲ ဖြစ်နေပြီး အမျိုးသမီးတဦး၏ ”ဆရာမရေ ကယ်ပါဦး နာလှချည်ရဲ့”ဟူ၍ သနားစဖွယ် အော်သံကိုပါ ကြားလိုက်ရပါသည်။

စာရေးသူလည်း လှမ်းကြည့်နေစဉ် မကြာမီတွင်ပင် ထိုအမျိုးသမီးကို လူတယောက် ကျောပိုးပြီး စာရေးသူ၏ ဆေးခန်းအတွင်းသို့ ၀င်ရောက်လာကြပါသည်။ ဆေးခန်းတွင်းရှိ လူနာများ ထိတ်ထိတ်ပျာပျာဖြစ်သွားကြပြီး သူ့ထက်ငါ သိလိုဇောဖြင့် စူးစမ်းကြပါသည်။

လူနားအား ဆေးခန်းတွင်းရှိ ခုတင်ပေါ်တွင် တင်ရန် ညွှန်ကြားပြီး စစ်ဆေးသောအခါ အမျိုးသမီး၏ ညာဘက်ခြေဖ၀ါးတွင် ယောက်ျား ပုဆိုးစုတ်တခုဖြင့် ထူထပ်စွာပတ်ထားပြီး ၄င်းအ၀တ်ပေါ်တွင်လည်း သွေးများစိုရွှဲနေသည်ကို တွေ့ရှိရသည်။ အသာအယာ ဖြေကြည့်လိုက်ရာတွင် သွေးမှာ ခြေဖ၀ါး၏ အလယ်တည့်တည့်မှ စိမ့်ထွက်နေပြီး ချွန်ထက်သော အရာဝတ္ထုတခု စူးနစ်ဝင်ရောက်သွားသည့် ဒဏ်ရာတခုကို တွေ့ရပါသည်။ အပြင်ဘက် ဒဏ်ရာဝမှာ ၁-လက်မခန့် ကွဲနေပြီး အတွင်းသို့ အတော်လေး စူးနက်ခဲ့ပုံပေါ်သည်။ လူနာ အမျိုးသမီးမှာလည်း မချိမဆံ့ ခံစားနေရသည်။

စာရေးသူလည်း ရေနွေးဖြင့် သူ၏အနာအတွင်းရှိ အမှိုက်သရိုက်များ စင်ကြယ်အောင် သေသေချာချာ ဆေးကြောပေးသည်။ ထို့နောက် အနာဝန်းကျင်အား သန့်စင်အောင် ဆေးများဖြင့် ဆေးကြော၍ သွေးစိမ့်နေသော အနာဝကို ခပ်စိပ်စိပ် ချုပ်လိုက်ရပါသည်။ တော်တော်ပင် ခံစားရပေမည်။ ထို့နောက် အနာကို ဆေးထည့်၊ ပတ်တီးစည်း၊ ဆေးထိုး၊ စားဆေးပေးသည်။ နေ့စဉ်လာရောက်ရန် ညွှန်ကြားလိုက်ပါသည်။ ချို့တဲ့သူများဖြစ်၍လည်း စာရေးသူက စေတနာဖြင့် အခမဲ့ ကုသပေးပါသည်။ ပြီးနောက် မည်ကဲ့သို့ဖြစ်ပုံကို မေးမြန်းကြည့်ရာ-

ထိုနေ့ ညနေဘက် မိုးရွာနေစဉ် ၄င်းတို့ အိမ်အနောက်ဘက်ရှိ ချောင်းတွင် ရေများတက်လာသည်။ ငါးများပါလာသဖြင့် ဓားချွန်တခုကို ၀ါးလုံးရှည်တွင် ခိုင်မြဲစွာ ချည်နှောင်၍ ရေထဲသို့ဆင်းကာ ငါးများကို ထိုးဖမ်းကာ ပျော်ရွှင်နေမိကြသည်။ ၄င်းငါးများကို တောင်းတလုံးထဲတွင် ထည့်ပြီး ဆက်လက်ဖမ်းယူနေသည်။ ထိုစဉ် ရုတ်တရက် ၄င်း၏ ညာခြေဖ၀ါးအတွင်းသို့ အရာဝတ္ထုတခု စူးခနဲဝင်သွားသကဲ့သို့ ခံစားရသည်။ မကြာမီပင် ရေထဲတွင် သွေးရောင်နီလာသည်ကို တွေ့ရသည်။
ကမ်းပေါ်သို့တက်၍ ကြည့်လိုက်ရာ သွေးများပန်းထွက်နေသော ခြေဖ၀ါးမှ ဒဏ်ရာကို တွေ့ရသည်။ နာလည်း နာလာသည်။ အိမ်ရှိလူများကို လှမ်းခေါ်ကာ အကူအညီတောင်းနေစဉ်တွင်ပင် ခြေထောက်မှာ ထောက်မရဘဲ အတော် နာကျင်နေသည်-ဟု ပြောပြပါသည်။ ရက်သတ္တ ၃-ပတ်မျှ စာရေးသူထံတွင် ဆေးဝါးကုသမှု ခံယူပြီးမှပင် ပျောက်ကင်းသွားတော့သည်။ ၄င်းလည်း အတော်ပင် ခံစားလိုက်ရပါသည်။

ထို့ကြောင့် ထိုအမျိုးသမီးအား စာရေးသူက- အဲဒါ ကံ ကံ၏အကျိုးလို့ ခေါ်တယ်၊ သူတပါးကို နာကျင် ဒဏ်ရာ အနာတရဖြစ်အောင် လုပ်ရင် မိမိလည်း ဒီလိုပဲ ခံစားရတယ်ဆိုတာ လက်တွေ့သိပြီ မဟုတ်လား။ နောင်ကို အဲသလို မပြုမိအောင် သတိထားပေါ့-ဟု ပြောဆိုလိုက်ပါသည်။

အမျိုးသမီးမှာ တကယ်ပင် နောင်တ ရသွားပါသည်။ နောင်ကို မလုပ်တော့ပါ-ဟု ၀န်ခံသွားပါသည်။

( ဒေါက်တာ အေးအေးမြင့် )
*********************************************************************************

( မေတ္တာရောင်ပြန် )

မကြာမီက ကျွန်မတို့အိမ်ကို ခွေးမ မည်းမည်းလေး တကောင် ရောက်လာပါတယ်။ ကျွန်မတို့တအိမ်လုံး ခွေးမ မည်းမည်းလေးကို အရမ်းချစ်ကြတယ်။ ခွေးမလေးဟာ မည်းလွန်းလို့ သူ့ကို ကျွန်မက နောက်ပြောင်ပြီး ဖြူဖွေး-လို့ နာမည်ပေးထားတယ်။

ဖြူဖွေးဟာ အရမ်းလိမ္မာတယ်။ တနေ့ ကျွန်မ လုံချည်ကို သူ့ပါးစပ်နှင့်ကိုက်ပြီး ဆွဲခေါ်တယ်။ ကျွန်မလည်း ဘာမှန်းမသိဘဲ လိုက်သွားတော့ အိမ်ဘေးတနေရာမှာ ခွေးကလေး ၄-ကောင် မွေးထားတာတွေ့ရတယ်။ သူ့ကလေး ၄-ကောင်ထဲမှာ မည်းတူနေတဲ့ ခွေးထီးလေးတကောင် ပါလာပြန်တယ်။ သူ့ကိုတော့ ဖြူတုတ်လို့ အမည်ပေးလိုက်တယ်။

ဖြူတုတ် တနှစ်သားလောက်မှာ အရိုးကြီးတခု သူ့လည်ချောင်းထဲ စူးဝင်နေတယ်။ ဖြူတုတ်ဟာ ပက်လက်လန်ပြီး လဲနေတယ်။ အာခေါင်ထဲက အရိုးက ထောက်ထားတော့ မအော်နိုင်ရှာဘူး။

ကျွန်မလည်း အလွန်သနားသွားတယ်။ အရိုးကို လက်နှင့်နှိုက်လို့လည်း မရဘူး။ ဒါနဲ့ ညီမလေးတွေကို ခွေးရဲ့လက်တွေ ချုပ်ကိုင်ခိုင်းပြီး ကျွန်မက ကတ်ကြေးနှင့် အရိုးကို ညှပ်ပြီး တအား ဆွဲထုတ်ပစ်ရတယ်။

နောက်တနှစ်လောက်ကြာတော့ ကျွန်မ ငါးကြော်စားရင်း လည်ချောင်းမှာ အရိုးစူးပြီး အခံရခက်နေပါတယ်။ ၃-ရက်လောက်နေတော့ အရိုးစူးတဲ့နေရာက နည်းနည်းရောင်လာတယ်။ ခွဲရတော့မှာပဲလို့ ထင်မိတယ်။

လည်ချောင်းမှာ အရိုးစူးရင် လမ်းတွေ အမှိုက်ရှင်းရတယ် ဆိုလို့လည်း ရှင်းတယ်၊ မရဘူး၊ အသံတွေလည်း ကောင်းကောင်း မထွက်ဘူး။

ကျွန်မညီမက အကြံပေးတယ်။ ဖြူတုတ်ကို အရိုးထုတ်ပေးတာ မျက်စိထဲ မြင်ယောင်ပြီး ရေသောက်လိုက်တဲ့။ ကျွန်မလည်း ဘုရားရှိခိုးပြီး မေတ္တာဆိုတာ ရောင်ပြန်ဟပ်တယ်ဆိုရင် ကောင်းတာ ပြုလုပ်ထားလို့ ကောင်းသောအကျိုး ခံစားရတယ် ဆိုရင်ဖြင့် ဖြူတုတ်ကို အရိုးထွင်ပေးဘူးသော ကျေးဇူးကြောင့် ကျွန်မလည်ချောင်း၌ စူးနေသောအရိုး ကျသွားရပါလို၏ဘုရား-လို့ ဆိုပြီး ရေကို တ၀ သောက်လိုက်ပါတယ်။

အံ့စရာပါပဲ။ တကယ်ပဲ အရိုးဟာ စူးနေရာက ၀မ်းထဲ ကျသွားပါတယ်၊ အခု မျက်မှောက်မှာပင် ကောင်းကျိုးခံစားရခြင်း ဖြစ်ပါတယ်။ မကောင်းကျိုးများ ပြုလုပ်ခဲ့လျှင် မကောင်းကျိုး ခံစားရမှာ ဖြစ်ပါတယ်။

( စန္ဒာ-တောင်အူရွာ )

( မြတ်မင်္ဂလာ ၁၉၉၂-ခု စက်တင်ဘာလ )

No comments: