Wednesday, February 11, 2009

ကံ ကံ၏အကျိုး ( ၁၆ )

( စေတနာ ရောင်ပြန် )

ကျွန်မသည် သာရဝေါ အ-ထ-က တွင် တာဝန်ထမ်းဆောင်နေသော ဆရာမတဦးဖြစ်ပါသည်။ လုပ်ဖော်ကိုင်ဖက် ဆရာ ဆရာမအများ ရှိသည့်အနက် ဆရာမလေးတဦးမှာ ကျွန်မထက် အသက်အနည်းငယ် ငယ်ရွယ်ပြီး ၀ါသနာတူ စရိုက်တူကလေး ဖြစ်ပါသည်။
ကျွန်မတို့နှစ်ယောက်၏ အတူညီဆုံး ၀ါသနာမှာ ဗုဒ္ဓတရားတော်များကို စိတ်ဝင်စားခြင်း၊ လေ့လာခြင်း၊ ကျက်မှတ်ခြင်းတို့ ဖြစ်ပါသည်။ အိမ်ထောင်တာဝန် မရှိသူများပီပီ ကျောင်းသူ ကျောင်းသား တပည့်ငယ်လေးများကို လိမ္မာအောင် မည်သို့ ဆုံးမရမည်ကို နှစ်ယောက်သား တိုင်ပင်လေ့ရှိပါသည်။

သူမနှင့် ကျွန်မဘ၀ အကျိုးပေး တူလိုက်ပုံမှာ ရာထူးတိုး ပြောင်းရွှေ့ရာ၌ပင် ပြည်မြို့သို့ တမြို့တည်း အတူရောက်ခဲ့ပါသည်။ ပြည်မြို့၌ တာဝန်ထမ်းဆောင်စဉ် မိဝေးဖဝေးမို့ နှစ်ယောက်အတူ နေကြပြီး ညနေတိုင်း ပြည်မြို့ ရွှေဆံတော်ဘုရားကြီးပေါ်တက်၍ ၆-နာရီမှ ၉-နာရီအထိ အဓိဋ္ဌာန်ပုတီး စိပ်ရာ၌လည်း စိတ်တူကိုယ်တူ ရှိခဲ့ပါသည်။

ထို့နောက် ကျွန်မတို့ နှစ်ဦးလုံး မွေးရပ်မြေ သာရဝေါသို့ ပြန်လည်ပြောင်းရွှေ့ခဲ့ရပါသည်။ ယခုလည်း နံနက်တိုင်း သူမ၏ စာသင်ခန်းမှရော ကျွန်မအခန်းကပါ ကလေးများ၏ ဘုရားရှိခိုးသံ မေတ္တာပို့သံများကို ကြားနိုင်ပါသည်။

တနေ့သော် ကျွန်မ သတိပြုမိသော အကြောင်းအရာတခုကို သူမအား မေးကြည့်မိပါသည်။ လွန်ခဲ့သော ၇-နှစ်ခန့်က သူမမျက်စိမကောင်းသဖြင့် မျက်မှန်တပ်ခဲ့ပြီး ယခု မတပ်တော့သောအကြောင်းကို သိလိုသောကြောင့်ဖြစ်ပါသည်။ ထိုအခါ သူမက မည်သူ့ကိုမျှ ပြောပြခဲ့ခြင်း မရှိသေးသော အောက်ပါ အကြောင်းအရာလေးကို ပြောပြပါသည်။

တခါက ကိုယ်ရေးကိုယ်တာကိစ္စတခုဖြင့် သူမ၏အမကြီးရှိရာ ရန်ကုန်သို့ တယောက်တည်း သာရဝေါ-ရန်ကုန် အမြန်ရထားဖြင့် လိုက်ပါသွားခဲ့သည်။ ထိုစဉ်က မျက်မှန်မတပ်လျှင် မျက်ရိုးကိုက်ခြင်း၊ ခေါင်းမကြည်လင်ခြင်း၊ မျက်စိဝေခြင်း ဖြစ်တတ်သောကြောင့် သူမ၏ ဆေးမျက်မှန်လေးကို တပ်ဆင်ထားပါသည်။ ရထားပေါ်တွင် သူမရှေ့ ထိုင်ခုံ၌ လိုက်ပါလာသော ရဟန်းအိုကြီးတပါးကို ဂရုပြုမိပါသည်။

ရဟန်းအိုကြီးမှာ ကျောင်းသားငယ်တယောက်နှင့် အတူဖြစ်ပြီး သင်္ကန်းကို မျက်စိ၌ကွယ်၍ ပြတင်းဝမှ ၀င်လာသည့် နေရောင်ဒဏ်ကို ကာကွယ်နေရရှာသည်။ သေသေချာချာ လေ့လာကြည့်သောအခါ ဘုန်းကြီး၏ မျက်စိမှာ နီရဲရောင်ကိုင်းနေပြီး အလင်းရောင်ကို မကြည့်နိုင်ရှာဘဲ မျက်ရည်ပူများ ကျဆင်းနေသည်ကို တွေ့နေရပါသည်။ စုံစမ်းမေးမြန်းကြည့်သောအခါ မျက်စိနာရာမှ ရောဂါဖြစ်သဖြင့် ရန်ကုန်သို့ သွားရောက်ကုသမည်ဖြစ်ကြောင်း သိရပါသည်။

မျက်စိဝေဒနာရှင် ရဟန်းအိုကြီးအား အလွန်သနားလှသဖြင့် နေကာမျက်မှန်ပါလျှင် တပ်ဆင်ထားပါက သက်သာမည့်အကြောင်း လျှောက်ထားမိလေသည်။ မပါကြောင်း ပြောသဖြင့် ဘာမျှမစဉ်းစားတော့ဘဲ သူ၏ဆေးမျက်မှန်လေးကို ချွတ်၍ ဤမျက်မှန်လေးကို တပ်ထားပါဘုရား-ဟု လျှောက်ထားသည်။ ရဟန်းကလည်း ကျေးဇူးတင်စွာ ယူဆောင်တပ်ဆင်လိုက်လေသည်။ ထိုအခါ မျက်ရည်ပူကျခြင်း သက်သာသွားပြီး နေရောင်ကို ကြည့်နိုင်ကြောင်း ဘုန်းကြီးပြောသဖြင့် သူမ အလွန်ဝမ်းသာမိလေသည်။

ရန်ကုန်ဘူတာကြီးသို့ရောက်သောအခါ ဘုန်းကြီးက မျက်မှန်ပြန်ပေးသော်လည်း စေတနာထက်သန်နေသောကြောင့် ပြန်မယူလိုကြောင်းနှင့် အရှင်ဘုရား မျက်စိကုသပြီး လိုအပ်သည်အထိ အသုံးပြုရန် လှူဒါန်းပါကြောင်း လျှောက်ထားရာ ဘုန်းကြီးက သာဓု သုံးကြိမ် ခေါ်လေသည်။

သူမစိတ်ထဲတွင် နောင်မှ မျက်မှန်တလက် ထပ်လုပ်မည်-ဟု စိတ်ကူးခဲ့သော်လည်း ထိုအချိန်မှစ၍ သူမခံစားနေရသော မျက်စိဝေဒနာများမှာ အံ့သြဖွယ် လုံးဝပျောက်ကင်းသွားသဖြင့် မျက်မှန် ထပ်မလုပ်ရတော့ကြောင်း ကျွန်မအား ပြောပြပါသည်။

ကျွန်မလည်း သူမ၏ ဝေဒနာကင်းစင် ကြည်လင်နေသော မျက်စိလေးများကို ကြည့်၍ ကံ ကံ၏အကျိုးကို အထူးယုံကြည် သာဓုခေါ်နေမိပါတော့သည်။
( အ-ထ-က သာရဝေါမှ ဆရာမ ဒေါ်မြင့်မြင့်ဝင်း-၏ ကိုယ်တွေ့ဖြစ်ရပ်မှန်ကို တင်ပြပါသည်။ )

( ခင်ဌေးမူ-သာရဝေါ )

( မြတ်မင်္ဂလာ ၁၉၉၂-ခု အောက်တိုဘာလ )

No comments: