Friday, February 13, 2009

ကံ ကံ၏အကျိုး ( ၁၇ )

( လောက ငရဲ )

စာရေးသူတို့ရွာတွင် ရွာ၏လူဆိုး စာရင်းဝင် အသက် ၃၀-ကျော်အရွယ် လူတဦးရှိသည်။ သူသည် မိဘတို့၏ ပြောဆို ဆုံးမသည်ကို နားမထောင်၊ မကောင်းသော မိတ်ဆွေနှင့်သာ ပေါင်းသင်းသူဖြစ်သည်။ သို့ရာတွင် သူသည် ရွာသားများနှင့်အတူ ချောင်းကူးတံတား၊ ရွာဦး ဘုန်းတော်ကြီးကျောင်း ဆောက်လုပ်ရာတို့၌ ကူညီဆောင်ရွက်ခဲ့ဘူးသည်။

တနေ့တွင် သူအိမ်သို့ အပေါင်းအသင်းများ ရောက်လာကြပြီး `၀က်သားဈေး ကောင်းတယ်ကွ၊ ၀က်ဝယ် ပေါ်ကြရအောင်-ဟု တိုင်ပင်ကြသည်။ ထိုနေ့တွင်ပင် ၀က်ဝယ်ကြသည်၊ အနီးအနား ရွာတရွာမှ ၀က်ကြီးတကောင် ၀ယ်လာခဲ့ကြသည်။ နက်ဖြန်နံနက် မြို့ဈေးအမီ ရောင်းရန်အတွက် ထိုနေ့ ညနေပင် ဆောင်ရွက်ကြသည်။

ဝက်မွေးချွတ်ရန် အတွက် တည်ထားသော မိုးပြဲဒယ်အိုးကြီးထဲတွင် ရေများ ကျိုက်ကျိုက် ဆူပွက်နေသည်၊ ၀က်ကြီးသည် မီးဖိုအနားတွင် နှစ်ခြိုက်စွာ အိပ်နေသည်။ ဗလကောင်းသော ထိုသူသည် ၀က်ကြီးကိုခွပြီး လေးလံလှသော ပုဆိန်ကို ကိုင်မြှောက်လျက် ၀က်၏ထိပ်ကို `ဒုန်း-ခနဲ ထုချလိုက်သည်။ ၀က်ကြီးသည် ချက်ချင်း မသေဘဲ အော်ဟစ်လျက် ထ၍ ပြေးသည်တွင် ထိုသူကို ၀က်ကြီးက ထမ်း၍ ပစ်လိုက်သကဲ့သို့ ဖြစ်ပြီး ကျိုက်ကျိုက်ဆူသော မိုးပြဲဒယ်အိုးကြီးထဲသို့ `ဗွမ်း-ခနဲ ကျသွားလေတော့သည်။

သူ၏ အပေါင်းအသင်းများ မမျှော်လင့်သော ဖြစ်ရပ်ကြောင့် ထိတ်လန့်ကာ တွေဝေနေကြသည်၊ သူသည် ကျိုက်ကျိုက်ဆူသော ဒယ်အိုးထဲမှ ခုန်ထွက်ကာ မီးဖိုးအနားတွင် ခွေလဲကျသွားသည်။ နှုတ်မှလည်း ကယောင်ကတမ်း အော်နေသည်၊ အိမ်နီးချင်းသို့ ၀ိုင်းဝန်းလာကြပြီး ဆေးမြီးတိုများဖြင့် ပြုစုကုသကြသည်။

ထိုသူသည် ဤဝေဒနာဖြင့် ရက်ပေါင်းများစွာ အ၀တ်မ၀တ်နိုင်၊ အစာမစားနိုင်ဘဲ အလူးအလဲ ခံခဲ့ရသည်၊ ဤအလုပ်မလုပ်ခင် ရွာ၏ လူသွားချောင်းကူးတံတား၊ ကျောင်းဆောက်လုပ်ခြင်းတို့၌ ပါဝင်ခဲ့သော ဝေယျာဝစ္စ ကုသိုလ်ကြောင့်သာ အသက်မသေခြင်းဖြစ်သည်-ဟု ထင်မိပါသည်။ မကောင်းမှုဟူသည် လောကငရဲ ကျသလို ဖြစ်တတ်ကြောင်း သံဝေဂယူမိပါသည်။
( မောင်ဝင်းစိုး )

No comments: