Saturday, February 21, 2009

ကံ ကံ၏အကျိုး ( ၂၀ )

( ရေကုသိုလ် )

လွိုင်ကော်မြို့ ပန်ကန်းကျေးရွာအုပ်စုတွင် အလွန်ဆင်းရဲလှသော ဦးဖိုးမြနှင့် ဒေါ်စိန်တို့ မိသားစု နေထိုင်ကြသည်။ သူတို့မိသားစုသည် တနေ့လုပ်မှ တနေ့စားရသည်၊ သူတို့တွင် မိသားစု ၅-ဦးရှိသည်၊ သား ၃-ဦး၊ သမီး ၂-ဦး ဖြစ်သည်။

ဦးဖိုးမြသည် အိမ်စဉ်လှည့်လည်ကာ ရေထမ်းရောင်း၍ ဇနီးဖြစ်သူက အိမ်တွင် မောင်းဆုံတလုံး၌ ဆန်မှုန့်ထောင်းသောလုပ်ငန်းဖြင့် မိသားစုစားဝတ်နေရေးကို ဖြေရှင်းနေရရှာသည်၊ ထိုမိသားစုသည် ဆင်းရဲသော်လည်း စိတ်ထားဖြူစင်ကြသည်။

ဦးဖိုးမြ ရေထမ်းရောင်းသော အိမ်များက ဦးဖိုးမြကို ရေဖိုးငွေ ပေးသည်လည်းရှိသည်၊ အချို့ မပေးဘဲ နေသည်လည်းရှိသည်၊ သို့သော် ဦးဖိုးမြသည် ရေဖိုးငွေများကို အတင်းအဓမ္မ မတောင်း၊ ရေအလှူပေးရသည်ဟု သဘောထားလေသည်၊ ဦးဖိုးမြတို့ ဇနီးမောင်နှံသည် ညနေပိုင်း အလုပ်သိမ်းချိန်၌ ရွာဦးဘုန်းတော်ကြီးကျောင်းသို့ သွားကာ တံမြက်လှည်းခြင်း၊ သောက်ရေအိုးများ ရေဖြည့်ခြင်းတို့ကို နေ့စဉ် ၀တ်မပျက်ခဲ့ပေ၊ ဥပုသ်နေ့များတွင်လည်း ဆွမ်းချိုင့်ဆွဲကာ ဇနီးမောင်နှံနှစ်ဦး ဥပုသ်သီလ ဆောက်တည်ကြသည်။

တခါတရံ အိမ်၌စားဝတ်နေရေး မပြေလည်သော်လည်း မိမိတို့နေ့စဉ် ပြုလုပ်နေကျ ရွာဦးကျောင်း၌ ရေလှူခြင်း အလုပ်များကိုတော့ ၀တ်မပျက်ခဲ့ပေ၊ ထိုကုသိုလ်ဒါနမျိုးကို ဦးဖိုးမြတို့ ဇနီးမောင်နှံ ၈-နှစ်တိုင်တိုင် ပြုလုပ်လာခဲ့ကြသည်။

တနေ့ ဦးဖိုးမြတယောက် ရေထမ်းရောင်းရသောငွေဖြင့် ထီလက်မှတ်တစောင် ထိုးခဲ့ရာ ၅၀၀၀-ဆု ပေါက်ခဲ့ပါသည်။ အရင်းစစ်တော့ အမြစ်မြေက ဆိုသကဲ့သို့ ဦးဖိုးမြတို့ မိသားစုသည် စိတ်ထားဖြူစင်ခြင်း၊ ရွာဦးဘုန်းတော်ကြီး ကျောင်းများသို့ နေ့စဉ်သွားရောက်၍ တံမြက်လှည်းခြင်းနှင့် ရေအလှူဒါန ပြုလုပ်ခြင်း၊ ဥပုသ်သီလ ဆောက်တည်ခြင်း စသော ကုသိုလ်ကောင်းမှုတို့ကြောင့် ယခုကဲ့သို့ ထီပေါက်ခြင်းဖြစ်သည်-ဟု ယူဆနေကြပါသည်။

ယခုအခါ ဦးဖိုးမြနှင့် ဒေါ်စိန်တို့ မိသားစုသည် ကိုယ်ပိုင် အမှုန့်ကြိတ်စက် တလုံးဖြင့် စီးပွားဖြစ်ထွန်းနေပြီ ဖြစ်ပါသည်။ ( လွန်ခဲ့သော ၈-နှစ်ခန့်က တကယ့်ဖြစ်ရပ်မှန် ဖြစ်ပါသည်။)

( မောင်ချစ်ကြည်-ကန္ဒရ၀တီ )
********************************************************************************

( မေတ္တာရောင်ပြန် )

ကျွန်မသည် ပညာရေးဌာနမှ ၀န်ထမ်းတဦးဖြစ်ပါသည်၊ မိသားစု၏ စားဝတ်နေရေး သားသမီးများ၏ ပညာရေးအတွက် အထောက်အကူ ရရှိရန် နွေရာသီကျောင်းပိတ်ရက်များတွင် ဈေးရောင်းလေ့ရှိပါသည်။ ဈေးရောင်းရာတွင် မြို့မှအထည်များကို ၀ယ်၍ ကျွန်မနေထိုင်သော ဒေသနှင့် ၅-မိုင် ၆-မိုင်ခန့် ဝေးသော ကျေးရွာများသို့ စက်ဘီးဖြင့် သွား၍ ရောင်းချခြင်း ဖြစ်သည်။

ထိုကျေးရွာ၌ နွေရာသီ သီးနှံပေါ်ချိန်ဖြစ်သောကြောင့်၎င်း၊ အလှူအတန်းနှင့် မင်္ဂလာဆောင်များလည်း ရှိသောကြောင့်၎င်း၊ ကျွန်မ၏အထည်များ ရက်အနည်းငယ်ဖြင့် ကုန်သွားပါသည်၊ အထည်များကို လက်ငင်းပေး၍ ၀ယ်သူများ ရှိသလို ဆေးရောင်းပြီးမှ မြေပဲရောင်းပြီးမှ ယူပါဟု ပြောသူများလည်း ရှိပါသည်။

အထည်ဝယ်သူ အားလုံးပင် အထည်ဖိုးများကို အလွယ်တကူ ပေးကြသော်လည်း ဒေါ်----ဟူသော အမျိုးသမီး ကြီးကား ကျွန်မအခေါက်ခေါက် အခါခါ သွား၍တောင်းသော်လည်း မရပါ၊ ရွာမှ လူအချို့ကလည်း ဒီမိန်းမကြီးက အရမ်း လက်ခက်တာပဲ၊ ဆရာမကတော့ ဒုက္ခပဲ-ဟု တယောက်တပေါက် ပြောဆိုကြပါသည်၊ သူတို့ပြောစကားအရ ကျွန်မလည်း စိတ်တိုလာမိပါသည်။

မှတ်မှတ်ရရပင် ဖြစ်ပါသည်၊ တနေ့သော နံနက်တွင် ကျွန်မဒေါပွပွဖြင့် ဒေါ်ကြီး ဘာဖြစ်ပါစေ၊ ညာဖြစ်ပါစေ၊ စသည်ဖြင့် စကားလုံးကြမ်းကြမ်းများကို ပြောဆိုကာ ဒေါ်ကြီးထံ ကြွေးတောင်းရန် စက်ဘီးဖြင့် ထွက်လာခဲ့သည်၊ သူဈေးရောင်းသောဆိုင်သို့ ရောက်သောအခါ အဒေါ်ကြီးက ခပ်တည်တည်ဖြင့်ပင် မပေးနိုင်ကြောင်း ပြောပါသည်၊ ကျွန်မလည်း စကားဆက်မပြောဘဲ ပြန်လာခဲ့ပါသည်။

တပန်ခန့်ကြာသောအခါ ကျွန်မထပ်သွားရန် တွေးမိပါသည်၊ သွားမည့်နံနက်တွင် ကျွန်မဘုရားရှိခိုးပြီး ငါးပါးသီလခံယူပါသည်၊ ထို့နောက် ဒေါ်ကြီး ကျန်းမာပါစေ၊ ဈေးရောင်းကောင်းပါစေ၊ အားလုံးအဆင်ပြေပါစေ-ဟု ဒေါ်ကြီးကို စိတ်ကမှန်းပြီး မေတ္တာပို့ပါသည်၊ လမ်းတလျှောက်လုံးလည်း ကြွေးများ အဆင်ပြေပါစေ-ဟု ဆုတောင်းမိပါသည်။

သူ့ထံသို့ ကျွန်မရောက်သောအခါ ကျွန်မပင် မတောင်းရသေးဘဲ အထည်ဖိုးများကို အလွယ်တကူပင် ထုတ်ပေးပါသည်၊ နောက်နောင်လည်း လာရောင်းဖို့ ပြောပါသည်၊ ကျွန်မလည်း အလိုက်သင့်ပင် ပြန်ပြောခဲ့ပါသည်၊ မည်သို့ပင်ဖြစ်စေ အဒေါ်ကြီးထံမှ ကျွန်မအထည်ဖိုးများကို ရရှိခဲ့ပါသည်။

မေတ္တာပေးလျှင် မေတ္တာပြန်ရတတ်ကြောင်း ကျွန်မသိခဲ့ရပါသည်၊ ဤသည်ကား မေတ္တာရောင်ပြန်ပင် ဖြစ်သည်-ဟု ကျွန်မ ယုံကြည် ယူဆမိပါသည်။

( မချို-ကနောင် )

( မြတ်မင်္ဂလာ ၂၀၀၁-နိုဝင်ဘာလ )

No comments: