စိတ်သည် မကောင်းမှု၌ မွေ့လျော်တတ်သည်-ဟု ဗုဒ္ဓမြတ်စွာ ဟောကြားတော်မူခဲ့သည်။
အမှုမဲ့ အမှတ်မဲ့ စဉ်းစားလျှင် သတ်မည်, ခိုးမည်, စသော စိတ်ယုတ်စိတ်ယိုင်းများ မထားသဖြင့် မိမိသည်ကား မကောင်းမှုအကုသိုလ်မှ ကင်းသည်-ဟု ထင်မှတ်ရန်ရှိသည်။
သို့သော် ပိသုဏ, ဖရုသ, သမ္ဖပ္ပလာပ, အဘိဇ္ဈာ, ဗျာပါဒ စသော နှုတ်မှု စိတ်မှုတို့သည်လည်း ဒုစရိုက်တွင် အပါအ၀င်ဖြစ်ရာ ထိုသိမ်မွေ့သော ( ဖြစ်ရန် လွယ်ကူသော ) မကောင်းမှုများကိုလည်း မဖြစ်ပွားစေရန် သတိတရား ထားရမည် ဖြစ်ပါသည်။
ထို့ကြောင့် တနေ့တာအဖို့တွင် တတ်နိုင်သလောက် အရိယဓမ္မသီလ လုံခြုံစေရန် အိပ်ရာထ မျက်နှာသစ်ချိန်မှစ၍ ကုသိုလ်တရား ပွားများရန် နှိုးဆော်လိုက်ပါသည်။ မင်္ဂလာနှင့် မျက်နှာသစ်ခြင်းဖြင့် တနေ့တာကို စတင်လိုက်ပါက တနေ့လုံး စိတ်သန့်ရှင်းလျက် မျက်နှာကြည်လင်ပြီး တွေ့မြင်ရသော လူတကာကို စိတ်ရွှင်လန်း ကြည်နူးစေပါလိမ့်မည်။
နံနက်အိပ်ရာထတွင် ရေကြည်ရေအေးတခွက် ခပ်ယူပြီးနောက် ဤသို့ဆောင်ရွက်ရန် ဖြစ်ပါသည်။
၁။ ဤမျက်နှာသစ်ရေကို ကိလေသာအပူခပ်သိမ်း ကင်းငြိမ်းတော်မူပြီးသော သဗ္ဗညုတဉာဏ်တော်ရှင်
ဗုဒ္ဓမြတ်စွာအား ကပ်လှူပါ၏။( ဒါနလည်းမြောက်၊ ဗုဒ္ဓါနုဿတိ ဘာဝနာလည်း ဖြစ်ပါ၏ )။
၂။ ဤကြည်လင်သန့်ရှင်းသော ရေကဲ့သို့ သတ္တ၀ါများ ကြည်လင်သန့်ရှင်း ချမ်းသာအေးငြိမ်းကြပါစေ။
( မေတ္တာ ဘာဝနာ )။
၃။ ဤခန္ဓာကိုယ်ကြီးသည် တကိုယ်လုံး ရွံရှာစက်ဆုပ်ဖွယ်ပါတကား။ ယခုပင် မျက်ဝတ် အာရည် စသည်များကို ဆေးကြောသန့်စင်နေရပါတကား။ ( အသုဘ ဘာဝနာ )။
၎။ ယနေ့ တရက်တော့ စခဲ့ပြီ၊ ဤနေ့မှာပင် တချိန်ချိန်တွင် အကြောင်းတခုခုဖြင့် သေနိုင်သည်။ ကုသိုလ်ကောင်းမှုသာ အားကိုးရာ ရှိပါတကား။ ( မရဏာနုဿတိ ဘာဝနာ )။
ခုဒ္ဒသိက္ခာတွင် ဤတရား ၄-ပါးကို စတုရာရက္ခအမည်ဖြင့် အမြဲကျင့်သုံး နှလုံးသွင်းရမည့်တရား-ဟု ညွှန်ပြထားပါသည်။ ကျင့်သုံးနိုင်ကြပါစေ။
Subscribe to:
Post Comments (Atom)
No comments:
Post a Comment