Tuesday, February 10, 2009

ဘာသာရေး ပြဿနာ ( ၁၆ )

( ဘဒ္ဒန္တ တိလောကသာရ ဖြေသည် )

( မေး ) ( ဒုစရိုက်နှင့် ကံသုံးပါး )
၁။ ဒုစရိုက် ၁၀-ပါးတွင် မည့်သည့်ဒုစရိုက်သည် ငရဲကျခြင်းကို ဖြစ်စေ၍ မည်သည့်ဒုစရိုက်သည် ၀ဋ်လိုက်ခြင်းကို ဖြစ်စေပါသနည်း။

၂။ သြကာသကန်တော့ခန်းတွင် ကာယကံ ၀စီကံ မနောကံ ---ထိုအပြစ်တို့မှ ပျောက်ပါစေခြင်း-ဟု ပါရှိရာ ၄င်းကံသုံးပါးတို့မှာ ရှိခိုးကန်တော့ရုံဖြင့် ပျောက်ကင်းပါသလား ဖြေကြားပြတော်မူပါဘုရား။
( ရဲအောင်-ဆင်ရေကန်လမ်း၊ အလုံမြို့နယ် )

( ဖြေ )
၁။ ငရဲကျခြင်းဟူသည် ပဋိသန္ဓေအကျိုးဖြစ်၍ ၀ဋ်လိုက်ခြင်းဟူသည်မှာ ပ၀တ္တိအကျိုး ဖြစ်သည်။
ဒုစရိုက် ၁၀-ပါးလုံးပင် ပဋိသန္ဓေကျိုး ပ၀တ္တိကျိုး နှစ်မျိုးလုံးကိုပင် အကြောင်းအားလျော်စွာ ဖြစ်စေနိုင်သည်။

၂။ သြကာသကန်တော့ခန်းလာ ကာယကံ ၀စီကံ မနောကံ တို့မှာ ဒုစရိုက် ၁၀-ပါးလာ ကံ ၃-ပါးကို ဆိုလိုသည်မဟုတ်ပါ။
ရတနာသုံးပါး မိဘ ဆရာသမား စသည်တို့အား ကာယကံဖြင့် ကျူးလွန်မှု၊ ၀စီကံဖြင့် ပြောဆိုမှု၊ မနောကံဖြင့် ပြစ်မှားမှုများကိုသာ ဆိုပါသည်။
၎င်းတို့မှာ ရှိခိုးကန်တော့ခြင်းဖြင့် ပျောက်ကင်းနိုင်သော ကံများဖြစ်၍ ဒုစရိုက်လာ ကံ ၃-ပါးတို့ကား ရှိခိုးကန်တော့၍ ပျောက်နိုင်သောကံများ မဟုတ်ပါ။
ထို့ကြောင့် ကာယကံ ၀စီကံ မနောကံဟု နာမည်ခြင်းတူသော်လည်း တသီးတခြားစီဖြစ်ကြောင်း ခွဲခြားသတ်မှတ်ထားရပါမည်။
*********************************************************************************

( မေး ) ( နှစ်ကျိပ်ရှစ်ဆူနှင့် ဘုရားခုနစ်ဆူ )
အရှင်ဘုရား၊ ဂင်္ဂါဝါဠု သဲစုမက ပွင့်တော်မူကြသော ဘုရားရှင်တွေထဲမှ အဘယ်ကြောင့် နှစ်ကျိပ်ရှစ်ဆူ-ဟူ၍၄င်း၊
ခုနစ်ဆူ-ဟူ၍၄င်း အထူးဝိသေသပြု၍ ထုတ်နုတ်ဆိုထားကြောင်းကို ဖြေကြားပေးတော်မူပါဘုရား။
( မောင်သန်းနိုင်-ရတနာ ၊ ဉာဏ်ကွဲရပ်-ပြင်ဦးလွင် )

( ဖြေ )
မြတ်စွာဘုရားတို့သည် ဂင်္ဂါဝါဠု သဲစုမက ပွင့်တော်မူပြီး ဖြစ်ကြသော်လည်း ဂေါတမမြတ်စွာဘုရား နိယတဗျာဒိတ် ရတော်မူရာဖြစ်သည့် လေးအသင်္ချေနှင့် ကမ္ဘာတသိန်းအတွင်း ပွင့်တော်မူသည့် မြတ်စွာဘုရားမှာ မိမိ ( ဂေါတမမြတ်စွာဘုရား ) အထိ နှစ်ကျိပ်ရှစ်ဆူမျှသာ ရှိသဖြင့် ဗုဒ္ဓ၀င်တွင် ယင်းနှစ်ကျိပ်ရှစ်ဆူကို သီးခြားဟောတော်မူခဲ့ပါသည်။

ဘုရား ခုနစ်ဆူအကြောင်းကား-
ဒီဃနိကာယ၊ မဟာဝဂ္ဂ၊ မဟာပဒါနသုတ်၌ နိဂုံးအဖြစ် သုဒ္ဓါဝါသ ခရီးစဉ်ကို ဟောရာ ထိုသုဒ္ဓါဝါသဘုံများသို့ မြတ်စွာဘုရား ကြွတော်မူစဉ် ၀ိပဿီ-စသော ဘုရားခုနစ်ဆူတို့၏ တပည့်သာဝက ဗြဟ္မာများက ထိုဘုရားအသီးသီးတို့၏ အကြောင်းကိုသာ မေးလျှောက်သည်။
မြတ်စွာဘုရားကလည်း ၄င်းတို့မေးလျှောက်ရာ ဘုရားခုနစ်ဆူ၏ အကြောင်းကိုသာ ဟောတော်မူလေသည်။
( ဒီ-၃၊ ၄၂ )

ထိုသို့ ဘုရားခုနစ်ဆူ၏ ရှေးအဖြစ်ကိုသာ ဟောသော မဟာပဒါနသုတ္တန်အရပင်
နောင်အခါ ဘုရားခုနစ်ဆူရှိခိုးသောအလေ့ ဖြစ်လာ၏။
ယင်းကိုစွဲ၍ အာဋာနာဋိယသုတ်၌ ဝေဿ၀ဏ် နတ်မင်းကြီးက ဘုရားခုနစ်ဆူ ရှိခိုးပုံ၊
ခန္ဓသုတ်၌ နမော သတ္တန္နံ သမ္မာသမ္ဗုဒ္ဓါနံ-ဟု ဘုရားခုနစ်ဆူ ရှိခိုးပုံတို့ အစဉ်အလာ ဖြစ်လာပါသည်။

တနည်းအားဖြင့်လည်း နတ်ဗြဟ္မာတို့၏ သက်တမ်းအရ ဤဘုရားခုနစ်ဆူအထိသာ သိမီနိုင်ကြ၍
မိမိတို့ သိမီသော ဘုရားခုနစ်ဆူ ဘုရားရှိခိုးမှာ တွင်ကျယ်၍ နေသည်-ဟု ဆိုင်နိုင်ပါသည်။
*********************************************************************************

( မေး ) ( သင်္ကြန်ရက်နှင့် သိကြားမင်း )
ဆရာတော်ဘုရား၊ နတ်ပြည်မှာ တရက်, လူ့သက်တမ်း တရာ-ဟု စာပေကျမ်းဂန်များမှာ ဖတ်ရှုရပါသည်၊
ဆရာတော်ကြီးများ ဟောသည်ကိုလည်း နာကြားရဖူးပါသည်။ ထို့ကြောင့် သင်္ကြန် ၃-၄ ရက်အတွင်း သိကြားမင်း လူ့ပြည်သို့ ဆင်းသည် ဟူသည်မှာ မဖြစ်နိုင်-ဟု မှန်းဆမိပါသည်၊ ယင်းအချက်ကို ဖြေရှင်းပေးတော်မုပါဘုရား။
( ဦးတင့်ဆွေ-စံပြ ဖဆပလ၊ မင်္ဂလာတောင်ညွှန့် )

( ဖြေ )
သင်္ကြန်အခါ၌ သိကြားမင်း ဆင်းသည်-ဟူသော ဝေါဟာရမှာ ကလေးသူငယ်တို့ စကားသဖွယ် သေးသိမ်နုန့်နဲ့သော ဝေါဟာရသာဖြစ်သည်။

တနှစ်ကုန်ဆုံး၍ မိန်ရာသီမှ မိဿရာသီတို့ ပြောင်းခြင်းကို သင်္ကန္တ-သင်္ကြန်-ဟု ခေါ်ဆိုခြင်းဖြစ်သည်။

တနင်္ဂနွေဂြိုဟ် ပြောင်းခြင်းဖြစ်၍လည်း သိကြားမင်းမဟုတ်၊ တနင်္ဂနွေဂြိုဟ်မင်းဟူ၍ တင်စားပြောဆိုက ပြောဆိုနိုင်စရာ ရှိပါသည်။
တနှစ်ကုန်ဆုံးရက်သို့ ကျရောက်သဖြင့် သင်္ကြန်ကျခြင်း-ဟု ခေါ်ဆိုကာ တနှစ်ကုန်ဆုံးသော်လည်း နှစ်မကူးသေးဘဲ ရက်ကြွင်း ( နှစ်ရက်, လေးနာရီ, လေးမိနစ်, လေးဆယ်စက္ကန့် ) ကျန်နေသေး၍ ယင်းကို အကြတ်ရက်-ဟု သတ်မှတ်ကြသည်။
ရက်ကြွင်းကုန်၍ နှစ်သစ်သို့ တက်ရောက်ကူးပြောင်းသွားသည်ကို အတက်နေ့-ဟု သတ်မှတ်ခေါ်ဝေါ်ကြသည်။
ယင်းကို ကလေးများက သိကြားမင်း ဆင်းသည် တက်သည်-ဟု လွယ်လွယ်ခေါ်ခြင်းသာ ဖြစ်သည်။

အမှန်အားဖြင့် ဤသင်္ကြန်ကိစ္စတို့မှာ ဗုဒ္ဓဘာသာရေးဆိုင်ရာ ကိစ္စများ မဟုတ်သော်လည်း လူမျိုး ယဉ်ကျေးမှုနှင့် နှစ်သစ်ကူးခြင်းဆိုင်ရာများဖြစ်၍၄င်း၊ ဤသင်္ကြန်ကာလတွင် ဒါနပြုခြင်း, သီလစောင့်ခြင်း, ဘာဝနာပွားခြင်း စသော ဘာသာရေးကိစ္စများကို တွင်တွင်ကျယ်ကျယ် လုပ်ဆောင်ကြလေ့ရှိသဖြင့်၎င်း ဤတွင် ဘာသာရေးပြဿနာတရပ်အနေဖြင့် လေးလေးစားစား ဖြေဆိုလိုက်ပါသည်။
********************************************************************************

( မေး ) ( လူ့အသွင်ဖြင့် ရဟန္တာဖြစ်သူများ )
အရှင်ဘုရား၊ လူ့အသွင်ဖြင့် ရဟန္တာဖြစ်သွားသော ပုဂ္ဂိုလ် ၅-ဦး ရှိသည်-ဟု ကြားဖူးပါသည်၊ ၄င်းပုဂ္ဂိုလ်များ အကြောင်းကို သိလိုပါသည်၊ မည်သည့်ကျမ်းစာအုပ်များတွင် ရှာကြည့်ရမည်ကို ညွှန်ကြားပေးတော်မူပါဘုရား။
( ဦးကျင်စိန် )

( ဖြေ )
လူ့အသွင်ဖြင့် ရဟန္တာဖြစ်သူများမှာ-
၁။ သုဒ္ဓေါဒန မင်းကြီး။
၂။ ဥဂ္ဂသေန။
၃။ သန္တတိ အမတ်ကြီး။
၎။ ဒါရုစိရိယ ပရိဗိုလ်။
၅။ ၀ီတသောက လုလင်-ဟူ၍ ဖြစ်ပါသည်။

၎င်း ၅-ဦးတွင်
၁။ သုဒ္ဓေါဒန မင်းကြီးအကြောင်းကို ဗုဒ္ဓ၀င်တွင် ကြည့်နိုင်ပါသည်။
၂။ ၃။ ၄။ တို့၏အကြောင်းကို ဓမ္မပဒ၀တ္ထုတွင် ကြည့်နိုင်ပါသည်။
၅။ ၀ီတသောက လုလင်အကြောင်းမှာ အမည်မျှသာ တွေ့ရသည်။

( မြတ်မင်္ဂလာ ၁၉၉၂-ခု အောက်တိုဘာလ )

No comments: