Sunday, March 1, 2009

ဘာသာရေး ပြဿနာ ( ၂၄ )

( ဘဒ္ဒန္တ တိလောကသာရ ဖြေသည် )

( မေး ) ( ၀ဋ်ကြွေးကျေအောင် )
ယခင်ဘ၀များက ၀ဋ်ကြွေးများ ပါရှိနေလျှင် ယင်းဝဋ်ကြွေးများ ကျေအောင် မြတ်စွာဘုရားထံ၌ မည်ကဲ့သို့ ပေးဆပ်ရမည်ကို အကျယ်တ၀င့် ရှင်းလင်းဖြေကြားပေးတော်မူပါဘုရား။
( မခိုင်-မရမ်းကုန်းမြို့နယ်၊ ရန်ကုန် )

( ဖြေ )
ဝဋ်ကြွေးဟူသည်မှာ မိမိပြုခဲ့သော မကောင်းမှုများမှ ငရဲစသော ပဋိသန္ဓေကျိုးပေးပြီးနောက် အကျိုးဆက်အနေဖြင့် ကျန်ရှိနေသော ကံကြွင်းဖြစ်သည်။
ထိုကံကြွင်းကြောင့် ဤဘ၀ ပ၀တ္တိအခါတွင် ခံစားရသော ဘေးဒုက္ခများပင် ဖြစ်သည်၊
ဥပမာ-သူတဦးတယောက်ကို ဓားဖြင့်ခုတ်သတ်ခဲ့၍ ငရဲ၌ ကျရောက် ခံစားရသည်၊
ငရဲမှလွတ်ကာ တိရစ္ဆာန် စသည်ဖြစ်ရာ ဓားခုတ်ခံရ၍ သေခြင်း၊ လူ့ဘ၀ရောက်သည့်တိုင်အောင် ဓားလက်နက်ဖြင့် ထိပါး၍ သေရခြင်း စသည်ဖြင့် ၀ဋ်ကြွေးများကို ခံစားရတတ်ပါသည်။

သူ့အသက်ကိုသတ်ရာ၌ အသတ်ခံရသူ မသေ၍ ကမ္မပထ မမြောက်သဖြင့် ငရဲ၌ မခံရသည့်တိုင်အောင် သေလောက်သည့်လက်နက် တမျိုးမျိုး ထိခိုက်ရှနာခြင်း-စသော ၀ဋ်ကြွေးများလည်း ရှိတတ်ပါသည်၊ ယင်းဝဋ်ကြွေးအန္တရာယ်မှ ကင်းလွတ်ရန်၊ သို့မဟုတ် သက်သာရန် မြတ်စွာဘုရားထံ၌ ပေးဆပ်ရန်မလို၊ ကုသိုလ်ကောင်းမှုများကို အဆက်မပြတ် ပြုလုပ်ရန်သာ လိုပါသည်၊

အကုသိုလ်အန္တရာယ်များ ကြားဖြတ် မ၀င်နိုင်ရန် သရဏဂုံသီလကို မပျက်အောင် ကျိုးပေါက်ပြောက်ကျား မရှိအောင် စောင့်ရှောက် ထိန်းသိမ်းခြင်း၊ အမြဲတမ်း ဘုရားရှိခိုး၍ ပရိတ်မေတ္တာ ဘာဝနာတို့ကို ပွားများ၍နေခြင်း၊ သမထ ၀ိပဿနာတို့ကို သင့်လျော်သလို အားထုတ်ခြင်း၊ ဒါနကုသိုလ်ကို သင့်လျော်သလို ပြုလုပ်ခြင်း၊ စသည်ဖြင့် ကုသိုလ်တရားဖြင့် ထုံမွမ်းနိုင်ရန်၊ ကုသိုလ်ကံ စေတနာ အားသေးမသွားရန် အရေးကြီးပါသည်၊

အဘယ့်ကြောင့်ဆိုသော် ၀ဋ်ကြွေးအန္တရာယ်တို့မှာ ကုသိုလ်ကံ အားနည်းချိန်တွင် ၀င်ရောက်တတ်သော ကြောင့်ပင် ဖြစ်ပါသည်။
********************************************************************************

( မေး ) ( အရိယာပုဂ္ဂိုလ်များ-ဟု သိနိုင်-မသိနိုင် )
အရှင်ဘုရား၊ သောတာပန်၊ သကဒါဂါမ်၊ အနာဂါမ်နှင့် ရဟန္တာပုဂ္ဂိုလ်များကို ဘယ်လိုသိနိုင်ပါသလဲ အရှင်ဘုရား ရှင်းပြပေးပါရန်။
( မချို-မုန်းမုန်းရှိန်-တွံတေး )

( ဖြေ )
သောတာပန်စသည်ကို မဆိုထားဘိ၊ ရဟန္တာပုဂ္ဂိုလ်များကိုပင် ဤပုဂ္ဂိုလ်သည် ရဟန္တာပုဂ္ဂိုလ်တည်း-ဟု သိရန် မလွယ်ကူ-ဟု ဆိုပါသည်၊ ရဟန္တာပုဂ္ဂိုလ်၏နောက်၌ တကောက်ကောက် လိုက်နေပါသော်လည်း ငါ၏ရှေ့မှ ကြွသွားသော ပုဂ္ဂိုလ်သည် ရဟန္တာပုဂ္ဂိုလ်ဖြစ်သည်-ဟု မသိနိုင်ကြောင်း၊ ကျမ်းဂန်များ၌ ပါရှိ၏။

အရိယာပုဂ္ဂိုလ်တို့သည် အလွန်လျှို့ဝှက်ကြသည်၊ ငါ သောတာပန်၊ ငါ ရဟန္တာ-ဟု နှုတ်မြွက် မပြောရုံသာမက သိသွားမည်ကိုပင် စိုးရိမ်ကြသည်၊ ရဟန်းတော်တို့ ၀ိနည်းတွင် ငါ သောတာပန်၊ ငါ ရဟန္တာ-ဟု ပြောလျှင် ပြောသည့်အတိုင်း ဟုတ်မှန်လျှင် အာပတ်သင့်သည်၊ လုံးဝမပြောရပေ၊ မဟုတ်မမှန်ပဲ ပြောလျှင်မူ ပါရာဇိက ကျလေတော့သည်။

ပုဂ္ဂိုလ်တပါးပါးအား အရိယာပုဂ္ဂိုလ်ဟု ထင်က အနီးကပ်လုပ်ကျွေး၍ ယင်းပုဂ္ဂိုလ်၏ ပြောမှု၊ ဆိုမှု၊ နေထိုင်ပြုမှု ကျင့်သုံးမှုတို့ကို အကဲခတ်၍ အရိယာပုဂ္ဂိုလ် ဟုတ်-မဟုတ် ဆုံးဖြတ်ကြရမည်။ အချို့သော ပုထုဇဉ် သီလ၀န္တ သိက္ခာကာမ အရှင်မြတ်များမှာ ရဟန္တာနှင့် ခွဲခြားရန်ခက်သည်၊

မိုးကြိုးကျခြင်း စသည်တို့ကြောင့် လန့်ဖျပ်မှု၊ မလန့်ဖျပ်မှုတို့ဖြင့် သိနိုင်သည်၊ ရဟန္တာပုဂ္ဂိုလ်များကား လန့်ဖျပ်ရွံ့ကြောက်မှု မရှိ-ဟု ဗုဒ္ဓစာပေတို့တွင် ဆိုထားပါသည်။
********************************************************************************

( မေး ) ( ကွမ်းတောင် ပန်းတောင် )
ရှင်ပြုပွဲ အလှူကြီးတွင် ရှင်လောင်းလှည့် (၀င်းလှည့်)ရာ၌ ကွမ်းတောင် ပန်းတောင် တို့သည် မည်သည့်အဓိပ္ပါယ်ဖြစ်၍ မည်သည့်အကြောင်းကြောင့် ပါဝင်ရကြောင်း ရှင်းပြစေလိုပါသည်ဘုရား။
( မဆွေ-အညာမြေ၊ မြစ်ငယ်-စက်ကွေ့ )

( ဖြေ )
ရှင်လောင်းလှည့်ခြင်းဟူသည်မှာ ယခုခေတ်တွင် အရပ်သားများဖြစ်သော်လည်း ရှေးရှေးရာဇ၀င်လာ မင်းညီမင်းသားများ ထွက်တော်မူသည့် အခမ်းအနားကို တုပ၍ ရှေ့ဝင်းနောက်ဝင်းတို့ဖြင့် ခင်းကျင်းလေ့ရှိပါသည်။

မင်းညီမင်းသားများ ထွက်တော်မူရာတွင် ကွမ်းတော် ရေတော်များကို အလိုရှိက အဆင်သင့်ဖြစ်စေရန် အခြွေအရံ အပျိုတော်များက အသင့်ကိုင်ဆောင်၍ လိုက်ရသည်၊ ကွမ်းခွက်၊ ပန်းတောင်း၊ တကောင်း၊ မြူတာ စသည့် မင်းခန်းဝင်အချို့ အသုံးအဆောင်များကို တုပ၍ ကွမ်းတောင်ကိုင်၊ ပန်းတောင်ကိုင် အမျိုးသမီးများက ရှင်လောင်းကိုခြံရံ၍ လိုက်ပါလျက် တခမ်းတနား ဆင်ယင်ခင်းကျင်း ဂုဏ်ပြုရခြင်းပင် ဖြစ်ဟန်တူပါသည်။

ယခုခေတ်တွင် ဒေ၀ါဝင်း၊ ရာဇာဝင်းဟူ၍ နှစ်မျိုးရှိရာ ရှင်လောင်းလှည့်ခြင်း စသည့် လူမှုကိစ္စများ၌ ရာဇာဝင်းလောက်သာ ခင်း၍ ဘုရားပင့်ခြင်းစသည့် သာသနာနှင့် ဆိုင်ရာတို့တွင် ဒေ၀ါဝင်းပါ နှစ်မျိုးလုံး ခင်းလေ့ရှိပါသည်၊ ထို့ပြင် ရှင်လောင်းလှည့်ရာ၌ ရွှေထီးမျှသာ ဆောင်းမိုးစေပြီး ဘုရားစသည်၌ ကနက္ကဒဏ်ထီး စသော ထီးဖြူများကို ဆောင်းမိုးစေရပါသည်၊ သတိပြုရန်ဖြစ်ပါသည်။
********************************************************************************

( မေး ) ( စေတီလေးမျိုး )
ဆရာတော်ဘုရား၊ လူ၊ နတ်၊ ဗြဟ္မာ သတ္တ၀ါတို့ အမြတ်တနိုး ကိုးကွယ်ပူဇော်ရာဌာနဖြစ်သော စေတီကို အချို့စာများတွင် ဓာတုစေတီ၊ ဓမ္မစေတီ၊ ဥဒ္ဒိဥစေတီ၊ ပရိဘောဂစေတီ ဟူ၍ လေးမျိုးလာရှိသည်၊
အချို့စာတွင် အထက်ပါလေးမျိုးအပြင် ပါဒစေတီဟူ၍ ငါးမျိုးဖော်ပြထားသည်ကို တွေ့ရပါသည်၊
မည်သည်က မှန်ကြောင်း ဖြေကြားပေးတော်မူပါဘုရား။
( ခင်ဇော်လွင်-ပန်တောင်း )

( ဖြေ )
စေတီကို ကာလိင်္ဂဗောဓိ ဇာတ်တွင် ဥဒ္ဒိဿစေတီ၊ သာရီရိကစေတီ၊ ပရိဘောဂစေတီ၊ ဟူ၍ သုံးမျိုး စတင်ဟောကြားခဲ့ပါသည်။
သာရီရိကစေတီမှာ မြတ်စွာဘုရား ပရိနိဗ္ဗာန်စံတော်မူပြီး ကိုယ်တော်မှဖြစ်သော ဓာတ်တော် မွေတော်များဖြစ်၍ ယင်းတို့ကို ဌာပနာပြီး ဓာတုစေတီတော်အဖြစ် ပူဇော်ကိုးကွယ်ကြသည်။

တရားဓမ္မက္ခန်များကို ဓမ္မစေတီခေါ်သည်၊
ဘုရား၏ပုံတော်ကို ရည်မှန်းခြင်း၊ ပုံတော်ထုလုပ် ကိုးကွယ်ခြင်းကို ဥဒ္ဒိဿစေတီ ခေါ်သည်။
သပိတ်တော် တောင်ဝှေးတော် ရေသနုပ်တော် စသည်များနှင့် ဗောဓိညောင်ပင် စသော အသုံးအဆောင်တော်များကို ပရိဘောဂစေတီ-ဟု ခေါ်ပါသည်။

ကာလိင်္ဂဇာတ်တွင် သုံးမျိုးသာ လာရှိသော်လည်း နောင်တွင် လေးမျိုးပူဇော်ခဲ့ကြပါသည်၊
ထို့နောက်တွင် ပူဇော်စရာအနေဖြင့် မြတ်စွာဘုရားက ထင်ရှား ပြတော်မူသော စက်လက္ခဏာတော်အပြည့်အစုံနှင့် ခြေတော်ရာကို ကိုးကွယ်ရာ တပါးပြု၍ ပါဒစေတီ-ဟု ထင်ရှားလာပါသည်။

ထိုခြေတော်ရာကို အကြောင်းပြု၍ မာဂဏ္ဍိယပုဏ္ဏားကြီး ဇနီးမောင်နှံ, သစ္စဗန္ဓထေရ် စသည်တို့ ရဟန္တာဖြစ်ကြသဖြင့် ပါဒစေတီမှာလည်း ကိုးကွယ်ရာ ဖြစ်ပေါ်လာခဲ့ပါသည်၊ ထို့ကြောင့် စေတီသုံးပါး၊ လေးပါး၊ ငါးပါး၊ အရာဌာနအားလျော်စွာ မှန်ကန်ပါကြောင်း ဖြေကြားလိုက်ပါသည်။
********************************************************************************

( မေး ) ( သောတာပန်နှင့် နောက်ဘုရား )
အရှင်ဘုရား၊ ယခုဘ၀တွင် သောတာပန်ဖြစ်အောင် အားထုတ်ပြီး သေလွန်၍ တုသိတာ (စသော) နတ်ပြည်တို့သို့ ရောက်ခဲ့သော် နောင်ပွင့်မည့် ဘုရားကို မီ-မမီ၊ ထိုသို့ဖြစ်အောင် မည်သို့ အားထုတ်ရမည်ကို လမ်းညွှန်ပေးပါ အရှင်ဘုရား။
( နော်ဝါးဝါး-သုဝဏ္ဏရွှေမြို့ )

( ဖြေ )
ယခုဘ၀တွင် သောတာပန်ဖြစ်၍ တုသိတာနတ်ပြည်သို့ ရောက်သည်ဆိုလျှင် တုသိတာနတ်တို့၏ သက်တမ်းမှာ လူတို့အရေအတွက်ဖြင့် နှစ်ပေါင်း ၅၇-ကုဋေ ၆-သန်းမျှသာဖြစ်သည်။

သောတာပန်သည် အလွန်ဆုံး ခုနစ်ဘ၀သာနေ၍ နိဗ္ဗာန်ကူးသွားတော့မည်ဖြစ်သည်။
နောက်ဘုရားပွင့်ရန်ကား ယခု နှစ်တရာတမ်းမှ ဆယ်နှစ်တမ်းအထိ ကျဆင်းသွားပြီး
ယင်းဆယ်နှစ်တမ်းမှ တဖြည်းဖြည်း သက်တမ်းတိုး၍ ရေတွက်ခြင်းငှါ မတတ်သာသော အသင်္ချေယျ အသက်ရှည်သည်အထိ တိုးတက်သွားရဦးမည်။

ထိုအသင်္ချေယျတမ်းမှ ကျဆင်းလာပြန်ပြီး အနှစ်တသိန်းတမ်းအရောက် ( သို့မဟုတ် နောက်ပေါ်ထွန်းမည့် အသင်္ချေယျကပ် တကပ် ) တွင် ယခု လူတို့ နောက်ဘုရားဟုဆိုသော အရိမေတ္တေယျ မြတ်စွာဘုရား ပွင့်ပါမည်။

ထို့ကြောင့် ခုနစ်ဘ၀သာနေ၍ နိဗ္ဗာန်ကူးမည့် သောတာပန်-နောက်ဘုရား မီနိုင်-မမီနိုင် စဉ်းစား ကြည့်နိုင်ပေလိမ့်မည်။
ထိုသို့ဖြစ်အောင်ဟူသည်မှာ သောတာပန်အဖြစ်ဖြင့် နောက်ဘုရားမီအောင်ဟု ဆိုလိုက မဖြစ်နိုင်ဟု ဆိုပါက ဤဘ၀တွင်ပင် သံယောဇဉ် အနှောင်အဖွဲ့များကို ဖြတ်တောက်ပယ်ခွါ၍ ၀ိပဿနာစခန်း ကြိုးပမ်းအားထုတ်ရန်သာ လိုပါသည်-ဟု လမ်းညွှန်လိုပါသည်။

( မြတ်မင်္ဂလာ ၁၉၉၂-ခု ဖေဖော်ဝါရီလ )

No comments: