Tuesday, March 3, 2009

ကံ ကံ၏အကျိုး ( ၂၄ )

( ကိုမဲတူ၏ ကံကြမ္မာ )

ကျွန်တော်တို့ ဖြူးမြို့နယ် ( +++ ) ရွာတွင် ကိုမဲတူ ဆိုသူ တဦးရှိသည်၊ ကိုမဲတူသည် ရွာမြောက်ပိုင်းထိပ် ဖြူးချောင်း၏ နံဘေးတွင် မြေစိုက်အိမ်ကလေး ဆောက်၍ နေထိုင်သူတဦး ဖြစ်သည်၊ ၄င်းတွင် ဇနီး မယ်ဖော့ဆိုသူ ရှိသည်၊ ၄င်းတို့တွင် သားသမီးတယောက်မှ မထွန်းကားပေ။

ကိုမဲတူ၏ လုပ်ငန်းသည် အကုသိုလ်အလုပ်ဖြစ်သော ငှက်ထောင်ခြင်း၊ ငှက်ဖမ်းခြင်းဖြင့် အသက်မွေးသူဖြစ်သည်၊ နေ့အခါတွင် ကိုမဲတူသည် နွားမြည်း၊ မြင်းမြည်းများနှင့် ပြုလုပ်ထားသော ညွတ်ကွင်းများဖြင့် ဆက်ရက်(ဇယက်)၊ ချိုး၊ ဗျိုင်း၊ ခါ-စသော ငှက်များကို ဖမ်းယူသည်၊ ညအခါတွင် အိပ်တန်းဝင်နေသော အသိုက်များ၊ သစ်ခေါင်းများကို တက်နှိုက်၍ ငှက်များကို ဖမ်းယူလေ့ရှိသည်။

ထူးခြားသည်မှာ ကိုမဲတူသည် ညအခါ ငှက်ဖမ်းသည့်အခါ ငှက်မရသည့်နေ့ဟူ၍ မရှိခဲ့ပေ၊ ညနေ နေ၀င်ရီတရော နွားရိုင်းသွင်းချိန်တွင် မည်သည့်ငှက်သည် မည်သည့်အပင်တွင် အိပ်သည်၊ ကောင်ရေအားဖြင့် ဘယ်နှစ်ကောင် စသည်ဖြင့် လိုက်လံကြည့်ရှု မှတ်သားလေ့ရှိသောကြောင့် ဖြစ်သည်၊ ငှက်မုဆိုးလောကတွင် ကိုမဲတူကို ယှဉ်ပြိုင်နိုင်သူ မရှိဟု ထင်သည်၊ ဇနီးသည် မယ်ဖော့ကလည်း ကိုမဲတူနှင့် လိုက်ဖက်ပါပေသည်၊ ရသမျှ ငှက်များကို အမွေးနုတ်၊ အချို့ ကင်၊ အချို့ ကြော်၍ ရွာရိုး လျှောက်ရောင်းသည်။

တနေ့တွင် ကိုမဲတူသည် ရွာအရှေ့ပိုင်း ဘကြီးဖြိုးအိမ်ရှေ့ရှိ ကုက္ကိုပင် သစ်ခေါင်းထဲ ဆက်ရက်(ဇယက်)ခြောက်ကောင် ၀င်သွားသည်ကို မှတ်သားထားသည်၊ ညရှစ်နာရီတွင် လုပ်ငန်း စသည်၊ ကိုမဲတူသည် ဖော်ပြပါ ကုက္ကိုပင်ကြီးပေါ် တက်၍ သစ်ခေါင်းထဲသို့ လက်နှိုက်ဖမ်းလိုက်သည်၊ ထိုစဉ် သစ်ခေါင်းထဲဝင်နေသော မြွေဟောက်က လက်ကို ကိုက်လိုက်သည်။ ကိုမဲတူသည် အလန့်တကြားဖြစ်ကာ မျက်လုံးများ ပြာဝေပြီး လက်ကို ဆွဲအနုတ် ခြေနင်းထားသော သစ်ကိုင်းက ဖျောင်းကနဲ ကျိုး၍ လိမ့်ကျလေသည်။
လူရော မြွေဟောက်ပါ ရော၍ ကျသဖြင့် အော်သံနှင့်အတူ အောက်ကျသံက ဟိန်းသွားသည်။

အနီးအပါးရှိ ဘကြီးဖြိုးတို့က ကိုမဲတူကို ထမ်း၍ ရွာ-ဆေးပေးခန်းသို့ ပို့ရာ လမ်းတ၀က်တွင် အသက်ထွက်သွားလေသည်။

ကိုမဲတူတယောက် အိပ်တန်းဝင်နေသော ငှက်ကလေးများ၏ အသက်ပေါင်းများစွာကို နေ့စဉ်ရက်ဆက် ဖမ်းယူ သတ်ဖြတ်ခဲ့သော အကုသိုလ် အကျိုးပင်တည်း။
( မြပုရစ်ဖူး-ဇေယျဝတီ )

( မြတ်မင်္ဂလာ ၁၉၉၂-ခု မတ်လ )

No comments: