Wednesday, March 4, 2009

ဘာသာရေး ပြဿနာ ( ၂၆ )

( ဘဒ္ဒန္တတိလောကသာရ ဖြေသည် )

( မေး ) ( ပုတီးစိပ်ခြင်းနှင့် တရားထိုင်ခြင်း )
ပုတီးစိပ်ရာတွင် အချို့က စကားပြောရင်း လမ်းလျှောက်ရင်း အိပ်ရင်း စိပ်ကြ၍
အချို့က ဘုရားရှေ့တွင် စနစ်တကျထိုင်၍ စိပ်ကြပါသည်၊ ဘယ်အရာက မှန်ပါသလဲဘုရား။
ဘယ်လိုနှလုံးသွင်းပြီး စိပ်သင့်ပါသလဲဘုရား၊
ဥပုသ်နေ့တွေမှာ ၀င်လေ ထွက်လေမှတ်ပြီး တရားထိုင်ခြင်းနှင့် ပုတီးစိပ်ခြင်းမှာ ဘယ်အရာကို ပြုလုပ်သင့်ပါသလဲဘုရား။
( မစန်းစန်းနွယ်-ရေနံချောင်းကျေးရွာ၊ မအူပင်မြို့နယ် )

( ဖြေ )
ပုတီးစိပ်ခြင်းမှာ စိတ်ကို ထိန်းချုပ်၍ သမာဓိရအောင် လုပ်သောအလုပ်ဖြစ်ရာ စိတ်တည်ငြိမ်ပြီး သမာဓိရနိုင်သော ဣရိယာပုထ်ဖြင့်သာ ပြုလုပ်သင့်ပါသည်။
ထိုင်၍စိပ်ခြင်း၊ လျောင်း၍စိပ်ခြင်းတို့က ပို၍ သမာဓိရစရာရှိပြီး ဘုရားရှေ့တွင် ထိုင်ကာ ဘုရားအာရုံဖြင့် စိပ်ခြင်းက ပို၍ ကောင်းမွန်ဖွယ် ရှိပါသည်။
ပုတီးစိပ်သည် ဆိုရာ၌ အများအားဖြင့် မြတ်စွာဘုရား၏ ဂုဏ်တော်ကို အာရုံပြု၍ စိပ်ရသဖြင့် မိမိနှုတ်တက်ရ၍
ကျေပွန် ပွန်းတီးလျက်ရှိသော ဂုဏ်တော်ကိုးပါးကို အာရုံယူ နှလုံးသွင်း၍ စိပ်ခြင်းသာ အကောင်းဆုံးဖြစ်ပါသည်။

တရားမှတ်ခြင်းနှင့် ပုတီးစိပ်ခြင်းတွင် ပုတီးစိပ်ခြင်းမှာ သမထဘာဝနာ၌ အကျုံးဝင်၍ တရားမှတ်ခြင်းမှာ ၀ိပဿနာ ဘာဝနာ၌ အကျုံးဝင်ပါသည်၊ ထို့ကြောင့် ထိုနှစ်မျိုးတွင် တရားမှတ်ခြင်းက ပို၍ အဆင့်မြင့်သဖြင့် ပြုလုပ်သင့်ပါသည်။
********************************************************************************

( မေး ) ( စကြစေတီနှင့် ကုသိုလ် အကုသိုလ် )
၁။ စကြ၀တေးမင်းကို စေတီတည်ထား ကိုးကွယ်ကြသည်ဆိုသည်မှာ ဟုတ်ပါသလား၊ ဘာကြောင့်ပါလဲဘုရား။
၂။ အကုသိုလ်တရားများကို မလွှဲမရှောင်သာ၍ ကျူးလွန်ြီ့းနောက် ကုသိုလ်တရားများကို ပြုလုပ်ခြင်းကြောင့်
အကုသိုလ်တရားများ ပပျောက်ပါသလား၊ အဟောသိကံ ဖြစ်ပါသလား ဘုရား။
( မင်းမင်းထွန်း-သုံးဆယ် )

( ဖြေ )
၁။ လောကတွင် စေတီထိုက်သူ သုံးဦးမှာ ဘုရား၊ ရဟန္တာနှင့် စကြ၀တေးမင်း-ဟု ဆိုပါသည်။
ဘုရား ရဟန္တာတို့၏ ဓာတ်တော်များကို စေတီတည်၍ ကိုးကွယ်က လူနတ်နိဗ္ဗာန် သုံးတန်သော ချမ်းသာကို ရနိုင်ပြီး စကြ၀တေးမင်း၏ အရိုးဓာတ်တို့ကို စေတီတည်၍ ကိုးကွယ်က လူချမ်းသာ နတ်ချမ်းသာ နှစ်မျိုးကို ရနိုင်ကြောင်း အင်္ဂုတ္တရ ဒုကနိပါက အဋ္ဌကထာတွင် ဆိုပါသည်။

စကြ၀တေးမင်းသည် လောကရှိ မင်းကျင့်တရားများ အပြင် စက္က၀တ္တိဓမ္မတို့နှင့် ပြည့်စုံလျက် လူ့လောကအား ငါးပါးသီလမြဲအောင် အမြဲမပြတ် ဟောပြောပြသသူ ဖြစ်သည်။ ဘုရားသာသနာမရှိသော ခေတ်ကာလတွင် လူသားတို့အား မနုဿ-ဒေ၀ သမ္ပတ္တိတို့ကို ဖြစ်စေ၍ အလွန်တရာ ကျေးဇူးကြီးလှသဖြင့် ၄င်းအား စေတီတည်၍ ကိုးကွယ်ထိုက်ခြင်း ဖြစ်ပါသည်။

၂။ အကုသိုလ်တရားများကို ပြုလုပ်က မကောင်းမှု အကျိုးကို ပေးမည်သာ ဖြစ်သည်။
မိမိက ကုသိုလ်ကောင်းမှုတို့ကို ပြုလုပ်မှုများ၍ ကုသိုလ်အကျိုးများ ဆက်ကာဆက်ကာ ပေးနေလျှင် အကုသိုလ်အကျိုးသည် ကြားမ၀င်သာ၍ အကျိုးမပေးဘဲ ငုပ်နေတတ်သည်။

ကုသိုလ်ကျိုး အားနည်းလာက ကြားဝင်၍ အကျိုးပေးပေလိမ့်မည်၊ မဂ်ကုသိုလ်ဖြစ်၍ နိဗ္ဗာန်ဝင်သည့်တိုင်အောင် အကုသိုလ်က အကျိုးမပေးသာလျှင်ကား အဟောသိကံ ဖြစ်သွားနိုင်ပါသည်။
အင်္ဂုလိမာလ၏ လူပေါင်းများစွာ သတ်ခဲ့သော အကုသိုလ်ကံသည် ရဟန္တာဖြစ်သွား၍ ပဋိသန္ဓေကျိုး မပေးနိုင်သော်လည်း ပ၀တ္တိ၌ ခဲမှန်၍ ထိပ်ပေါက် ခေါင်းကွဲ ဖြစ်ရသေးသည်အထိ ပ၀တ္တိ၌ အကျိုးပေးသေးသည်ကို သတိပြုပါ။
********************************************************************************

( မေး ) ( ရှစ်ပါးသီလနှင့် တီဗွီ ဗွီဒီယို )
အရှင်ဘုရား သီလဆောက်တည်ရာ၌ ရှစ်ပါးသီလ၊ ကိုးပါးသီလ၊ ဆယ်ပါးသီလများတွင် ကခြင်း၊ သီခြင်း၊ တီးမှုတ်ခြင်းနှင့် ကြည့်ရှု နားထောင်ခြင်းတို့မှ ရှောင်ကြဉ်ပါမည်-ဟု ဆိုပါသည်၊
သီလဆောက်တည်ထားသော ဥပုသ်သည်သည် ယခုခေတ် တီဗွီ၊ ဗွီဒီယိုများ ကြည့်ရှုပါက ဆောက်တည်ထားသောသီလ ကျိုးပေါက်ခြင်း ရှိ-မရှိ သိလိုပါသည်ဘုရား။
( ချိုအေး-မြို့မရပ်၊ အထက်မင်းလှ )

( ဖြေ )
ရှစ်ပါး ကိုးပါး ဆယ်ပါးသီလ ဆောက်တည်ထားသူသည် ကခြင်း၊ သီခြင်း၊ တီးမှုတ်ခြင်းတို့နှင့် ယင်းတို့အား ကြည့်ရှုနားထောင်ခြင်းတို့ကို လုံးဝရှောင်ကြဉ်ရသည်၊
အနည်းဆုံး မျောက်ကခြင်း၊ ဥဒေါင်းကခြင်း စသည်မျိုးကိုပင် ကြည့်ရှုနားထောင်ခြင်း မပြုရသဖြင့် ရေဒီယိုမှ လာသော သီချင်းသံများ၊ တီဗွီ ဗွီဒီယိုတို့မှ ပြသသော ကခြင်း၊ သီဆိုခြင်း၊ တီးမှုတ်ခြင်းများကို ကြည့်ရှုနားထောင်မှု မပြုရသည်မှာ ထင်ရှားပါသည်။

ဥပုသ်စောင့်သုံးခြင်းမှာ လောကရေးရာများဖြစ်သော ကာမဂုဏ်မှုကိစ္စတို့မှ အနားပေးကာ အရိယာပုဂ္ဂိုလ်တို့ကို တုပနည်းယူလျက် ဗုဒ္ဓဘာသာတို့၏ အနှစ်သာရ သီလတရားတို့ဖြင့် မိမိ၏စိတ်နှလုံးကို ထုံမွှမ်းပြီးလျှင် ဘာဝနာစခန်းသို့ တက်လှမ်းအားထုတ်ရန် ကြိုးစားနေခြင်းမျိုးသာဖြစ်၍ လူ့လောကဆိုင်ရာ ကာမဂုဏ်အားပေးသော အပျော်အရွှင်မျိုးတို့ကို ဖယ်ရှားနိုင်ရန်သာ အားထုတ်ရပါမည်၊

ထို့ကြောင့် ဥပုသ်သီလ စောင့်သုံးသောနေ့တို့တွင် ဇနီးမောင်နှံခွဲခြား၍ အိပ်စက်ခြင်း၊ ညစာဟူသမျှ ရှောင်ကြဉ်ခြင်း၊ အဆိုပါ ကခုန်သီဆိုမှုတို့ကို မျက်နှာလွှဲခြင်းနှင့် ကုတင်မွေ့ရာ ထည်ဝါခမ်းနားသော အသုံးအဆောင်တို့ကို ရှောင်ရှားခြင်းပြုလျက် ပုတီးစိပ် ဂုဏ်တော်ပွားများခြင်း၊ မေတ္တာပို့ခြင်း၊ ၀ိပဿနာတရား ပွားများခြင်း စသော ကုသိုလ်ကောင်းမှုတို့ဖြင့် တနေ့တာကို ကုန်ဆုံးစေသင့်ပါသည်။
*********************************************************************************

( မေး ) ( ဒေ၀ဒတ်နှင့် ဣဒ္ဓိပါဒ် တန်ခိုး )
ဇာတ်တော်များမှာ အမျိုးသမီးတို့ အာရုံကြောင့် ဈာန်ရရသေ့များ ဈာန်လျှောရကြောင်း မကြာမကြာ ဖတ်ရှုရပါသည်၊ သိုပသော် မြတ်စွာဘုရားအား အမျိုးမျိုးရန်လုပ်၍ သတ်ဖြတ်ရန်အထိ ကြံစည်ခဲ့သည့် ဒေ၀ဒတ်မှာ ဈာန် ဣဒ္ဓိပါဒ်တန်ခိုးများ ရရှိသည်ဆိုသည်မှာ ဖြစ်နိုင်ပါရဲ့လား ဘုရား။
( ဦးခင်မောင်ကြီး-ရွှေသူဌေးကုန်း၊ ချောက်မြို့ )

( ဖြေ )
မြတ်စွာဘုရား ဘုရားဖြစ်တော်မူပြီး ၀ါတော်တ၀ါ ရပြီးနောက် ကပိလ၀တ်ပြည်သို့ ကြွရောက်၍ ပြန်လည်ကြွသွားသည့်အခါတွင် ဒေ၀ဒတ်သည် ဘဒ္ဒိယ သာကီဝင်မင်း၊ အနုရုဒ္ဓါမင်းသား၊ အာနန္ဒာမင်းသား၊ ဘဂုမင်းသား၊ ကိမိလမင်းသား၊ ဆတ္တာသည် ဥပါလိတို့နှင့် အတူ ဘုရားနောက်သို့ လိုက်သွားပြီး ရဟန်းပြုခဲ့ပါသည်၊ ထိုအချိန်က မြတ်စွာဘုရားအား ရန်ငြိုးလည်းမဖွဲ့သေး၊ ရန်လည်းမလုပ်သေး၊ သဒ္ဓါတရားအပြည့်အ၀ ရှိနေပါသေးသည်၊ ထို့ကြောင့် ရဟန်းတရားကို အားထုတ်၍ လောကီဈာန်တန်ခိုး ဣဒ္ဓိပါဒ်တို့ကို ရခဲ့ပါသည်။ နောက်အတန်ကြာမှ အလိုဆိုးနှိပ်စက်၍ အဇာတသတ်ကို ချဉ်းကပ်ကာ လာဘ်များကြောင်းကို ရှာကြံလျက် မြတ်စွာဘုရားအား ရန်ပြုသဖြင့် ရရှိသော ဈာန်တန်ခိုးများ ကွယ်ပျောက်သွားရပါသည်၊ ထို့ကြောင့် ဒေ၀ဒတ်၏ ဈာန်တန်ခိုးများမှာ အလိုဆိုးမနှိပ်သက်မီ စိတ်ကောင်းရှိစဉ်က ရရှိခြင်း ဖြစ်သဖြင့် ဖြစ်နိုင်ပါသည်။
********************************************************************************

( မေး ) ( တထောင့်ငါးရာ ကိလေသာ )
ငါးရာ့နှစ်ဆယ် ရှစ်သွယ် မေတ္တာနှင့်၊ တထောင့်ငါးရာ ကိလေသာ ဆိုသည်ကို မကြာမကြာ ကြားနေရပါသည်၊
ငါးရာ့နှစ်ဆယ် ရှစ်သွယ် မေတ္တာကို မေတ္တာပို့ဆိုင်ရာ စာအုပ်များတွင် တွေ့ရ၊ ဖတ်ရှုမှတ်သား ရပါသည်၊
တထောင့်ငါးရာ ကိလေသာ တွက်နည်းကို အတွေ့ရ နည်းပါသဖြင့် ရှင်းလင်းဖော်ပြပေးစေလိုပါသည် ဘုရား။
( ကိုဟန်ဝင်း-၆-လမ်း၊ (ခ)ရပ်ကွက် အင်းစိန်မြို့သစ် )

( ဖြေ )
တထောင့်ငါးရာ ကိလေသာ-ဟူသည်မှာ
စိတ်တခုယုတ် ၉၀-ကို ၀ိညာဏက္ခန္ဓာအရ ၁-ခုသာယူ၍
စေတသိက် ၅၂-ပါးနှင့်ပေါင်းသော် နာမ်တရား ၅၃-ပါးဖြစ်သည်။
ရုပ် ၂၈-တွင်လည်း နိပ္ဖန္နရုပ် ၁၈-ပါးနှင့် လက္ခဏရုပ် ၄-ပါးကိုယူကာ နာမ်ရုပ်တရား ၇၅-ပါးရသည်၊
၎င်း ၇၅-ပါးကို အဇ္ဈတ္တ ဗဟိဒ္ဓ သန္တာန် ၂-ပါးနှင့် မြှောက်သော် ၁၅၀-ရ၏။
ထို ၁၅၀-ကို လောဘ၊ ဒေါသ၊ မောဟ၊ မာန၊ ဒိဋ္ဌိ၊ ၀ိစိကိစ္ဆာ၊ ထိန၊ ဥဒ္ဓစ္စ၊ အဟိရိက၊ အနောတ္တပ္ပ-ဟူသော ကိလေသာ ၁၀-ပါးနှင့် မြှောက်သော် တထောင့်ငါးရာ ကိလေသာ ဖြစ်ပါသည်။

ထို့ကြောင့် ( ခုနစ်ဆယ့်ငါး၊ နာမ်ရုပ်ထားမှ၊ နှစ်ပါးဆယ်ထွေ၊ မြှောက်ပွားရေသော်၊ ကိလေသာစက်၊ သုံးထောင်ဝက် ) ဟူ၍ ကိုးခန်းပျို့၌ စပ်ဆိုထားပေသည်။
********************************************************************************

( မေး ) ( အကုသိုလ်ပြု၍ လှူဒါန်းခြင်း )
အခြားသူ မပေးသော ပန်းကလေးများကို ခိုးယူ၍ ဘုရားတင်ခြင်း၊
သူများပစ္စည်းကို မရိုးမသား ခိုးဝှက်၍ လှူဒါန်းခြင်း၊ ပြုလုပ်ပါက မည်သည့်အကျိုးတရားများ
ရရှိနိုင်ပါသလဲ ဘုရား။
( ဦးခင်ဧ၊ စံရွေးကျေးရွာ၊ သာယာဝတီမြို့နယ် )

( ဖြေ )
အကုသိုလ်ပြု၍ လှူဒါန်းရာ၌ အကုသိုလ်၏ အကျိုးကတခြား၊ လှူဒါန်းသော ဒါန အကျိုးကား တခြား၊
အကျိုးပေးပါသည်။
ဓမ္မပဒလာ ပုတိဂတ္တတိဿမထေရ် ၀တ္ထုကို ထောက်၍ သိသင့်ပါသည်။
၎င်းဝတ္ထု၌ ပူတိဂတ္တတိဿမထေရ် အလောင်းသည် မုဆိုးဘ၀က ငှက်များကို ဖမ်း၍ ရောင်းလည်းရောင်း၊
စားလည်းစားသည်၊ ရောင်း၍မကုန်သော ငှက်များကို အတောင်နှင့်ခြေများကို ချိုး၍ လှောင်ထားပြီး ရက်ရှည်သတ်၍ စားသည်။ တနေ့တွင် ထိုငှက်သားဖြင့် ရဟန္တာပုဂ္ဂိုလ်အား ဆွမ်းလှူ၍ ဤကောင်းမှုကြောင့် အရှင်ဘုရားတို့ သိအပ်သော တရားကို သိရပါလို၏-ဟု ဆုတောင်းခဲ့၏။

ထို့ကြောင့် ဤဘုရားလက်ထက်၌ ပူတိဂတ္တတိဿ မထေရ်ဖြစ်လာ၍ ငှက်တို့ကို အတောင် ခြေထောက်များကို ချိုး၍ သတ်ခဲ့သော မကောင်းမှုကြောင့် အနာကြီးများပေါက်၍ အရိုးများ ကျိုးရခြင်း၊ ယင်းငှက်သားဟင်းဖြင့် ဆွမ်းလှူ ဆုတောင်းခဲ့ခြင်းကြောင့် အရဟတ္တဖိုလ်ပေါက် ရဟန္တာအဖြစ်သို့ ရောက်ရခြင်း အကျိုးတို့ကို ခံစားရရှိပါသည်။

( မြတ်မင်္ဂလာ ၁၉၉၂-ခု မေလ )

No comments: