Sunday, March 8, 2009

ဘာသာရေး ပြဿနာ ( ၂၈ )

( ဘဒ္ဒန္တ တိလောကသာရ ဖြေသည် )

( မေး ) ( ဂုဏ်တော်စသည် ရွတ်ဆိုခြင်း )
ဆရာတော်ဘုရား၊ ဘုရားရှိခိုးဂါထာတော်၊ ဂုဏ်တော်၊ ပရိတ်တော်၊ ပဋ္ဌာန်းတရားတော်များကို အိပ်ရာ၌ လျောင်းစက်ရင်း၊ လမ်းသွားရင်း၊ အိမ်သာတက်ရင်း၊ ရွတ်ဆို၍ ရပါသလား။
အသံမထွက်ဘဲ စိတ်ထဲက ရွတ်ဆို၍ကော ရပါသလား၊
ထို့အတူ ပုတီးကောစိပ်၍ ရပါသလား၊
အချိန်မရ၍ အိမ်မှ သီလမယူဖြစ်ဘဲ လမ်းသွားရင်း သီလယူ၍ကော ရပါသလား ဘုရား၊
( ဒေါ်ခင်ဝင်းကြည်-ချစ်ကြည်ရေး စာရေးတန်း-ချောက်မြို့ )
( ဦးကံထွန်း-တံခွန်တိုင်ရွာအနောက်စု၊ နတ်တလင်းမြို့ )
( ဖြိုး-ဒါးကရွာ၊ ပုသိမ်အရှေ့မြို့နယ် )
( ဦးထွေး-အမှတ် ၃-ပေါက်ခေါင်းမြို့ )
မစန်းစန်းညွန့်-သံဖြူဇရပ်မြို့ )

( ဖြေ )
မြတ်စွာဘုရား၏ တရားတော်ကို အားထုတ်ရာ၌ မဟာသတိပဋ္ဌာနသုတ်တော်တွင်
အဘိက္ကန္တေ ပဋိက္ကန္တေ သမ္ပဇာနကာရီ ဟောတိ၊
အာလောကိတေ ၀ိလောကိတေ သမ္ပဇာနကာရီ ဟောတိ၊
သမိဉ္ဇိတေ ပသာရိတေ သမ္ပဇာနကာရီ ဟောတိ၊
သင်္ဃာဋိပတ္တစီဝရဓာရဏေ သမ္ပဇာနကာရီ ဟောတိ၊
အသိတေ ပီတေ ခါယိတေ သာယိတေ သမ္ပဇာနကာရီ ဟောတိ၊
ဥစ္စာရပဿာဝကမ္မေ သမ္ပဇာနကာရီ ဟောတိ၊ စသည်ဖြင့် ဟောထားတော်မူချက်အရ တရားတော်ကို ကြည်ညိုသောစိတ် ရိုသေသောစိတ်ဖြင့် ပွားများပါက သွားဆဲ လာဆဲ စားဆဲ သောက်ဆဲ ထိုင်ဆဲ အိပ်ဆဲသာမက ကျင်ကြီးကျင်ငယ် သွားလာဆဲမှာပင် အားထုတ်နိုင်ကြောင်း သိရသဖြင့် ဘုရားရှိခိုးခြင်းကို အခြေအနေအရ အသံထွက်၍ဖြစ်စေ၊ အသံမထွက်ဘဲ တိုးတိုးတိတ်တိတ် ရွတ်ဆိုပွားများ၍ဖြစ်စေ နေရာမရွေး ပြုလုပ်နိုင်ပါသည်။

သင်္ဘောနစ်နေစဉ်မှာပင် သရဏဂုံနှင့် ငါးပါးသီလကို ခံယူစေသော ဘုရားလောင်း သင်္ဘောသူကြီးဇာတ်ကို ထောက်၍ ငါးပါးသီလကို လမ်းသွားရင်းလည်း ခံယူနိုင်ကြောင်း သိသာပါသည်။ မည်သို့ပင်ဖြစ်စေ မိမိ၏ ယောနိသောမနသိကာရ မှန်ကန်ကောင်းမွန်သော စိတ်ထား စေတနာသာ ပဓာနဖြစ်ကြောင်း ဖြေဆိုအပ်ပါသည်။
********************************************************************************

( မေး ) ( ဘုန်းကံ )
ဆရာတော်အရှင်ဘုရား၊ တပည့်တော် ငယ်စဉ် သိတတ်သောအရွယ်မှစ၍ ယခုအရွယ်အထိ ဘုန်းကံဟူသော စကားကို ကြားသိခဲ့ရပါသည်၊ ဘုန်း နှင့် ကံ သည် အတူတူပင်ဖြစ်ပါသလားဘုရား၊
ဘုန်းကံနိမ့်ခြင်း မြင့်ခြင်းဟူ၍ ရှိပါသလား။
တံတားအောက်စသည့် ညစ်ညမ်းနိမ့်ပါးသည့် အောက်သို့ လျှိုးခြင်း ၀င်ခြင်းတို့ကြောင့် ဘုန်းနိမ့်တတ်သည်
ဆိုသည်မှာလည်း ဟုတ်ပါသလားဘုရား။
( ခင်မောင်ဆွေ-ဈေးအတွင်း၊ ထီးချိုင့်မြို့ )

( ဖြေ )
မြန်မာလို ဘုန်းကံ-ဟူ၍ တွဲခေါ်သည့်အားလျော်စွာ ပါဠိဘာသာအားဖြင့် ပုညကမ္မ-ဖြစ်၍ ပြုလုပ်သော ကုသိုလ်ကောင်းမှု-ကိုပင် ဘုန်းကံ-ဟု ခေါ်ပါသည်။

သတ္တာနံ ခန္ဓသန္တာနံပုဏာတိ သောဓေတီတိ ပုဏံ-ဟု ပရိတ်ဋီကာက ဆိုသည်၊
သတ္တ၀ါတို့၏ ခန္ဓာအစဉ်ကို သုတ်သင်တတ်၍ ပုဏ၊ ၀ါ-ပုည-ဟုဆိုသဖြင့် ယင်းပုည ခေါ်သော ကောင်းမှုကုသိုလ်ကံသည် အကျိုးပေး၍ ကောင်းကျိုးချမ်းသာများ ဖြစ်ပေါ်နေခြင်းကိုပင် ဘုန်းကံ ဘုန်းရှိသည်၊ ဘုန်းကြီးသည်ဟု ဆိုကြသည်၊ ထို့ကြောင့် ဘုန်းကံသည် မိမိပြုလုပ်သောကုသိုလ် အကျိုးပေးခြင်းသာ ဖြစ်၍ လမ်း တံတားအောက် ၀င်ခြင်း၊ အိမ်အောက်ထပ်မှာ နေခြင်း၊ မြေအောက်မြေတွင်းမှ ရေစသည်တို့ကို သုံးဆောင်ခြင်းကြောင့် နိမ့်ခြင်း၊ ပျက်ပြားခြင်း ဖြစ်နိုင်စရာ မရှိပါ။

သို့သော် ကုသိုလ်ကံ ပုည-သည် အကျိုးပေးရာ မျက်မှောက်ကောင်းမှု မကောင်းမှုများ၌လည်း အနည်းအများ အမှီပြုသေးသဖြင့် ရှေးကုသိုလ်ကံကောင်း၍ အကျိုးပေးချင်သော်လည်း မိမိက မကောင်းမှု ဒုစရိုက်များကိုသာ ပြုလုပ်နေလျှင် အကျိုးပေး ဖွံ့ဖြိုးလိမ့်မည်မဟုတ်ပါ၊ ထိုအရာကိုသာ ဘုန်းနိမ့်သည်ဟု ဆိုလိုက ဆိုနိုင်ပါသည်၊ ယခုခေတ် လမ်းများအထက်၌ တံတားများရှိ၍ ထိုလမ်းများ၌ သွားလာ၍ ဘုန်းနိမ့်ကြရမည်ဆိုလျှင် အိမ်မှ ဘယ်မျှမထွက်ဘဲ နေရတော့မလို ဖြစ်နေပါသည်၊ ထိုအယူစွဲကို ဖျောက်ပယ်သင့်လှပါသည်။
********************************************************************************

( မေး ) ( ဥပ နှင့် ပရမတ္ထ ပါရမီ )
ဆရာတော်ဘုရား၊ သမ္မာသမ္ဗုဒ္ဓဆုမှ ပကတိသာဝကဆု အထိ အလောင်းတော်ကြီးများက ပါရမီ ၁၀-ပါးကို ဖြည့်ကျင့်ရသည်၊ ထိုပါရမီသည် ပါရမီ ၁၀-ပါး၊ ဥပပါရမီ ၁၀-ပါး၊ ပရမတ္ထပါရမီ ၁၀-ပါး ဤသို့ အပြား ၃၀-ရှိသည်ဟု မှတ်သားရပါသည်ဘုရား၊
ယင်းတွင် ဥပပါရမီနှင့် ပရမတ္ထပါရမီတို့၏ အဓိပ္ပါယ်နှင့် ဖြည့်ကျင့်အားထုတ်ပုံကို သိလိုပါ၍ ဖြေကြားပေးတော်မူပါရန် လျှောက်ထားပါသည်ဘုရား။
( ကျော်ထွန်း-ည/၇၆ ဒေစီလမ်း တောင်ကြီးမြို့ )

( ဖြေ )
မဟာဗုဒ္ဓ၀င် ပထမတွဲ ပထမပိုင်း အနုဒီပနီ ( ကာ ) ၌
ထိုပါရမီ ၁၀-ပါးတို့တွင် တပါးတပါးလျှင် ပါရမီ၊ ဥပပါရမီ၊ ပရမတ္ထပါရမီ ဟူ၍
( ဥပမာ-ဒါန-၌ ၁-ဒါနပါရမီ၊ ၂-ဒါနဥပပါရမီ၊ ၃-ဒါနပရမတ္ထပါရမီ-ဟူ၍ သုံးပါး။ သီလစသည်တို့၌ ထို့အတူ )
သုံးပါးစီ သုံးပါးစီ ပြားသောကြောင့် ပါရမီအကျယ် သုံးဆယ်ဖြစ်သည်။

ဤသုံးပါးတို့အတွက် ရှေးဦးစွာ
၁။ သားမယား ရွှေငွေစသော အသုံးအဆောင်ဝတ္ထု။
၂။ မိမိ၏ လက်ခြေစသော အင်္ဂါကြီးငယ်နှင့်
၃။ အသက် - ဤသုံးပါးကို မှတ်သားပြီးလျှင်

ဒါနအတွက်
၁။ အသုံးအဆောင်ဝတ္ထုကို စွန့်လှူသည်ကား ဒါနပါရမီ။
၂။ အင်္ဂါကြီးငယ်ကို စွန့်လှူသည်ကား ဒါနဥပပါရမီ။
၃။ အသက်ကို စွန့်လှူသည်ကား ဒါနပရမတ္ထပါရမီ-ဟု မှတ်အပ်၏။

ထို့အတူ အသုံးအဆောင် ၀တ္ထုဟူသောအကြောင်း၊
အင်္ဂါကြီးငယ်ဟူသော အကြောင်း၊
အသက်ဟူသော အကြောင်းကြောင့် မလွန်ကျူးဘဲ သီလကို ထိန်းသိမ်း စောင့်ခြင်းမျိုးကို သီလပါရမီ၊ သီလဥပပါရမီ၊ သီလပရမတ္ထ ပါရမီ-ဟု အစဉ်အတိုင်း မှတ်ယူအပ်၏။
ကြွင်းသော ပါရမီ ၈-ပါးတို့၌လည်း ဤနည်းကို မှီး၍ သိရာ၏။

(က) သက်မဲ့သက်ရှိ ၊ ဗာဟိရက ၊ စွန့်နိုင်က ၊ မူလပါရမီ ။
(ခ) အင်္ဂါကြီးငယ် ၊ အသွယ်သွယ်ကို ၊ မတွယ်စိတ်မှ ၊ စွန့်နိုင်က ၊ ဥပပါရမီ ။
(ဂ) အသက်ဇီဝ ၊ စွန့်နိုင်က ၊ ပရမတ္ထပါရမီ ။
(ဃ) ပါရမီဆယ်ပါး ၊ အကျယ်ပွား ၊ အပြားသုံးဆယ် မည် ။
ဟု ရှင်းလင်းဖော်ပြထားလေသည်။
*********************************************************************************

( မေး ) ( ငရဲပြည်နှင့် ငရဲထိန်း )
ငရဲပြည်တွင် ငရဲထိန်းများက ဆီပူအိုးကြီးများနှင့် ငရဲခံရသူများအား ဒဏ်ခတ်နေခြင်းကို ဘုရားတန်ဆောင်း ပန်ချီကားများတွင် တွေ့ရပါသည်၊ ငရဲပြည်တွင် ဤပုံများအတိုင်း ငရဲခံရမည်-ဟု မြတ်စွာဘုရား ဟောတော်မူခဲ့ပါသလား၊ ငရဲခံရသူများအား ငရဲထိန်းများက ညှဉ်းဆဲသတ်ဖြတ်ရာတွင် ပါဏာတိပါတကံ ထိုက်မထိုက်နှင့် ဘ၀အဆက်ဆက်က မိဘတော်စပ်ခဲ့သူများ ပါရှိပါကပဉ္စာနန္တရိယကံ ထိုက်မထိုက် သိလိုပါသည်ဘုရား။
( မျိုးဇော်အောင်-အင်းစိန်မြို့နယ် )

( ဖြေ ) ငရဲသူ ငရဲသားများ ငရဲ၌ အမျိုးမျိုးခံရပုံတို့ကို နိမိဇာတက ( နေမိဇာတ် )၊ ဒေ၀ဒူသုတ်၊ အင်္ဂုတ္တရ တိကနိပါတ စသည်တို့၌ ပါရှိပါသည်။ ပါဠိတော်များဖြစ်၍ ဘုရားဟောဟုပင် မှတ်သားရပါသည်၊ ယင်းပါဠိတော်များ၌ပင် တမေနံ ဘိက္ခဝေ နိရယပါလာ နာနာဗာဟာသု ဂဟေတွာ၊ နိရယပါလာ ပဉ္စ၀ိဓဗန္ဓနံ နာမ ကမ္မကရဏံ ကရောန္တိ-စသည် ဟောတော်မူချက်များရှိ၍ ငရဲထိန်းများ ရှိသည်မှာလည်း ထင်ရှားပါသည်၊ ယင်းငရဲထိန်းတို့သည် နိရယ သံဝတ္တနိက ကမ္မတော ဟိ အညေနေ၀ကမ္မုနာ တေ နိဗ္ဗတ္တန္တိ။ ရက္ခသဇာတိကတ္တာ- ဟု အင်္ဂုတ္တရအဋ္ဌကထာ ဒေ၀ဒူတသုတ် အဖွင့်တို့တွင် ဆိုသည်။

အချို့က ငရဲထိန်းဟူသည် မရှိ၊ စက်ယန္တယား ရုပ်များကဲ့သို့ ငရဲသူ ငရဲသားတို့၏ အကုသိုလ်ကံအရ နှိပ်စက်ရန် ဖြစ်နေကြကြောင်း ဆိုသော်လည်း အမှန်မှာ ငရဲထိန်းသတ္တ၀ါများမှာ ဘီလူး ရက္ခိုသ် အမျိုးဇာတိများဖြစ်၍ ငရဲ၌ သွားရောက်ဖြစ်စေသော ကံကြောင့် ငရဲတွင် ငရဲထိန်းဖြစ်၍ ငရဲသူ ငရဲသားများအား နှိပ်စက်နေကြကြောင်း ဖွင့်ဆိုထားသည်ကို တွေ့ရသည်။

ဤသို့ ငရဲထိန်းတို့သည် ဘီလူး ရက္ခိုသ် သတ္တ၀ါများဖြစ်ကလည်း ငရဲသူ ငရဲသားတို့အား နှိပ်စက်သတ်ဖြတ်မှုကြောင့် အကုသိုလ်ဖြစ်စရာလည်း ရှိကြောင်း သိသာ၏။
သို့သော် မိဘသတ်သည့် အနန္တရိယကံဟူသည်မှာ လက်ရှိဘ၀ အမိအဖတို့ကို သတ်မှသာ ဖြစ်နိုင်၍ မိဘမရှိ ဥပပတ်ဖြစ်ကြသော ငရဲထိန်းတို့ အနေဖြင့် ယင်းအနန္တရိယကံ ဖြစ်စရာရှိမည် မဟုတ်ကြောင်း တွေးခေါ်ယူဆနိုင်ပါသည်။

( မြတ်မင်္ဂလာ ၁၉၉၃-ခု ဇန်န၀ါရီလ )

No comments: