Tuesday, March 10, 2009

ဘာသာရေး ပြဿနာ ( ၂၉ )

( ဘဒ္ဒန္တ တိလောကသာရ ဖြေသည် )

( မေး ) ( တဆယ့်လေးချက် ဓမ္မစက် )
တဆယ့်လေးချက် ဓမ္မစက်အရ ဓမ္မစက် တဆယ့်လေးပါးကို အမည်ဖြင့် ဖော်ပြပေးစေလိုပါသည်။
( ညိုညိုသီ-ကမ္ဘောဇလမ်း ဗဟန်း )

( ဖြေ )
တရားတော်အရမှာ ဗောဓိပ္ကခိယတရား ၃၇-ပါးပင် ဖြစ်ပါသည်၊
ဗောဓိပက္ခိယတရား ၃၇-ပါးကို တရားကိုယ်ကောက်၍ တူရာပေါင်းလျှင် အောက်ပါတရား ၁၄-ပါးသာ ရပါသည်။
၁။ ၀ိတက်၊
၂။ ပဿဒ္ဓိ၊
၃။ ပီတိ၊
၎။ ဥပေက္ခာ၊
၅။ ဆန္ဒ၊
၆။ စိတ္တ၊
၇။ သမ္မာဝါစာ၊
၈။ သမ္မာကမ္မန္တ၊
၉။ သမ္မာအာဇီဝ၊
( ၄င်းကိုးပါးမှာ သူ့အမည်နှင့်တူ တဌာနစီသာ ဖြစ်၏ )

၁၀။ သဒ္ဓါ၊ ( ၄င်းမှာ နှစ်ဌာန၌ ဖြစ်၏ )
၁၁။ ဧကဂ္ဂတာ၊ ( ၄င်းမှာ လေးဌာန၌ ဖြစ်၏ )
၁၂။ ပညာ၊ ( ၄င်းမှာ ငါးဌာန၌ ဖြစ်၏ )
၁၃။ သတိ၊ ( ၄င်းမှာ ရှစ်ဌာန၌ ဖြစ်၏ )
၁၄။ ၀ီရိယ၊ ( ၄င်းမှာ ကိုးဌာန၌ ဖြစ်၏ )

ဤ ၁၄-ပါးသည်ပင် တဆယ့်လေးချက် ဓမ္မစက်-ဟူ၍ ဆရာတို့ ဆိုတော်မူကြပါသည်။
********************************************************************************

( မေး ) ( စရိုက်ခြောက်ပါးနှင့် ကမ္မဋ္ဌာန်း )
စရိုက်ခြောက်ပါးနှင့် ယင်းစရိုက်ရှိသူ၏ အမူအကျင့်၊
ယင်းနှင့် သင့်လျော်ရာ ကမ္မဋ္ဌာန်းများကို ဖော်ပြပေးပါရန် လျှောက်ထားပါသည်ဘုရား၊
( ဦးသောသ်းစိန်-ကျောင်းအုပ်၊ အခြေခံပညာ မူလတန်းကျောင်း၊ ကြခတ်ရပ်၊ ပန်းတောင်းမြို့နယ် )

( ဖြေ )
၁။ ရာဂစရိုက်၊ ၂။ ဒေါသစရိုက်၊ ၃။ မောဟစရိုက်၊ ၄။ သဒ္ဓါစရိုက်၊ ၅။ ဗုဒ္ဓိစရိုက်၊ ၆။ ၀ိတက်စရိုက်၊
ဟူ၍ ခြောက်မျိုးရှိသည်။
စရိုက်ဟူသည် ပုဂ္ဂိုလ်၏ လွန်ကဲသော အကျင့် အလေ့ အမူ ဖြစ်သည်။

၁။ ရာဂစရိုက် ရှိသူ၌-လှပမှုကို မြတ်နိုးခြင်း၊ ရှာမှီးခြင်း၊ ပိုင်ဆိုင်လိုခြင်း စသော အမူအကျင့်များ။
၂။ ဒေါသစရိုက် ရှိသူ၌-ကြမ်းတမ်းခြင်း၊ ခက်ထန်ခြင်း။
၃။ မောဟစရိုက် ရှိသူ၌-ထိုင်းမှိုင်းခြင်း၊ မေ့လျော့ခြင်း။
၎။ သဒ္ဓါစရိုက် ရှိသူ၌-ဘုရားတရားကြည်ညိုခြင်း။
၅။ ဗုဒ္ဓိ (ပညာ) စရိုက် ရှိသူ၌-ပညာကိုရှာမှီးခြင်း၊ သိလိုခြင်း၊ မှတ်သားခြင်းနှင့်
၆။ ၀ိတက်စရိုက် ရှိသူ၌-ကြံစည်ခြင်း၊ တွေးတောခြင်း၊ စသည်များ လွန်ကဲနေတတ်ပါသည်။

စရိုက်သည် တမျိုးစီလည်း ရှိတတ်ပြီး နှစ်မျိုး သုံးမျိုးလည်း ရော၍နေတတ်သည်။
ထို့ကြောင့် စရိုက်မှာ ခြောက်ပါးသာ ရှိသော်လည်း စရိုက်အားလျော်စွာ ပုဂ္ဂိုလ် ၆၃-မျိုးပြားကြောင်း ကျမ်းဂန်များတွင် ဖော်ပြထားပါသည်။
စရိုက်နှင့်လျော်သော ကမ္မဋ္ဌာန်းကိုလည်း သမထကမ္မဋ္ဌာန်း ၄၀-နှင့် စရိုက်ခြောက်ပါးကို တွဲ၍ ကျီးသဲလေးထပ်ဆရာတော် ဘုရားကြီးက မနောပူရဏီတွင်-

အသုဘနှင့်၊ ကာယဂတာ၊ ဆယ့်တဖြာ၊ ရာဂကြီးသူအား။
အပ္ပမညာ၊ နီလာဒိက၊ ဤရှစ်ဝ၊ ဒေါသကြီးဖို့ထား။
အာနာပါန၊ ဤတ၀၊ မောဟ ၀ိတက်များ။
ဗုဒ္ဓ ဓမ္မ၊ သံဃ,သီ,စာ၊ ဒေ၀တာ၊ သဒ္ဓါထက်သူအား။
ဥပသမာ၊ မရဏာနှင့်၊ သညာ ၀၀တ္ထာန်၊ ဤလေးတန်၊ ဉာဏ်ခံကြီးသူအား။
စရိုက်ဝေငှ၊ သုံးဆယ်မျှ၊ သေသခပ်သိမ်းအား။
ဟု စပ်ဆိုဖော်ပြထားပါသည်။ လေ့လာပွားများ၍ အသိတရား တိုးတက်ပါစေသတည်း။
*********************************************************************************

( မေး ) ( အမွေးအရေအတွက် လည်လှီးခံရချက် )
ဆရာတော်ဘုရား၊ ဟိုရှေးရှေးက မိန်းမတဦးသည် မွေးထားသော ဆိတ်တကောင်အား ဟင်းအလို့ငှါ လည်လှီးသတ်ခဲ့မိ၍ နောက်ဘ၀တွင် ငရဲ၌ ကျခံရသည်၊ ထို့နောက် ဆိတ်အမွေး အရေအတွက်နှင့်အမျှ ဘ၀ပေါင်းများစွာ လည်လှီးသတ်ခံရသည်ဟု ဆိုပါသည်၊ မိမိကျူးလွန်မှု တခုအတွက် တူသောအကျိုးပေးခြင်း မဟုတ်ဘဲ အဘယ်ကြောင့် ဘ၀ပေါင်းများစွာ ခံရကြောင်း၊ တပည့်တော်မ နားမလည်နိုင်ပါ၍ ရှင်းလင်းဖြေကြားတော်မူရန် အသနားခံအပ်ပါသည် ဘုရား။
( ဒေါ်လှနွယ်-မူအုပ်၊ ကမ်းတောင်းကြီးရွာ၊ မြေပုံမြို့နယ် )

( ဖြေ ) ကုသိုလ်ကောင်းမှု ပြုရာ၌ဖြစ်စေ၊ အကုသိုလ် မကောင်းမှု ပြုရာ၌ဖြစ်စေ၊ ပြုမူလုပ်ဆောင်မှုထက်
ယင်းကို ဖြစ်စေသည့် စေတနာ အကြီးအသေးအလိုက် အကျိုးပေးမှုလည်း အကြီးအသေး ဖြစ်နိုင်ပေသည်။

ကုသိုလ်မှု၌ အလှူဝတ္ထု နည်းသော်လည်း စေတနာ အထူးထက်သန်က အကျိုးပေးမှုအင်အား ကြီးမားနိုင်သည်။
နှမ်းစေ့ပမာဏမျှသော ကုသိုလ်ကောင်းမှုသည် ဉာဏ်နှင့်ယှဉ်၍ စေတနာအားကောင်းပါက မြင်းမိုရ်တောင်တမျှ အကျိုးပေးကြောင်း အင်္ဂုတ္တရနိကာယ်တွင် ဟောတော်မူသည်။

အကုသိုလ်တွင်လည်း ထို့အတူပင် ဖြစ်သည်၊ ဆိတ်ကိုသတ်စဉ်က ထက်ထက်သန်သန် လွန်လွန်ကဲကဲ ရဲရဲဝံ့ဝံ့ ဒိဋ္ဌိဂတသမ္ပယုတ် အသင်္ခါရိက စေတနာဖြင့် သတ်ဖြတ်ခဲ့လျှင် ထူးထူးခြားခြားပင် မကောင်းကျိုးကို ပေးပေလိမ့်မည်။

ငရဲဟူသော ပဋိသန္ဓေကျိုးမှာ အကျိုးရင်းဖြစ်၍ ဆိတ်အမွေး အရေအတွက်အတိုင်း ဘ၀များစွာ လည်အဖြတ်ခံရခြင်း ပ၀တ္တိအကျိုးမှာ အကျိုးဆက်အဖြစ် ခံရခြင်းဖြစ်ပါသည်။
အချုပ်မှာ ကမ္မ၀ိပါကော အစိန္တိယော ( ကံ၏အကျိုးကို မကြံစည်အပ် ဟူ၍ ) ဖြစ်သဖြင့်
ကောင်းမှု မကောင်းမှုကံ၏ အကျိုးပေးမှုကို ယုံမှား မရှိသင့်ကြောင်း ဖြေကြားလိုပါသည်။
********************************************************************************

( မေး ) ( သတ္တာဝါသ ဘုံကိုးဝနှင့် ၀ိညာဏဋ္ဌိတိ ခုနစ်ပါး )
အရှင်ဘုရား၊ အမျှဝေ လင်္ကာ ဘုံသုံးဆယ့်တစ် စသောအပိုဒ်ပါ သတ္တာဝါသ ဘုံကိုးဝနှင့် ၀ိညာဏဋ္ဌိတိ တည်ရှိခုနစ်ပါး-ဆိုသည်ကို အဓိပ္ပါယ်သိလိုပါသည်၊ ရှင်းလင်းပေးတော်မူပါရန် လျှောက်ထားပါသည်ဘုရား။
( ဦးနေ၀င်း-ကျောက်တန်းရွာ၊ ပဲခူးမြို့နယ် )

( ဖြေ )
လွယ်ကူစွာမှတ်သားနိုင်ရန် ၀ိညာဏဋ္ဌိတိ ခုနစ်ပါးမှစ၍ ဖြေကြားပါမည်၊
၎င်းမှာ ပဋိသန္ဓေ၀ိညာဉ်၏ တည်ရာခုနစ်ပါး ဖြစ်သည်။
၁။ လူ့ပြည်၊ နတ်ပြည် ခြောက်ထပ်၊ ဤခုနစ်ရပ်သည် သတ္တ၀ါတို့၏ ကိုယ်သဏ္ဍာန်လည်း အထူးထူး၊ ပဋိသန္ဓေလည်း အထူးထူးရှိ၍ နာနတ္တကာယ နာနတ္တသညီ မည်၏။

၂။ ပထမဈာန်သုံးဘုံ၊ အပါယ်လေးဘုံ၊ ဤခုနစ်ဘုံသည် သတ္တ၀ါတို့ ကိုယ်သဏ္ဍာန်ကား အထူးထူး၊
ပဋိသန္ဓေကား ပထမဈာန်သုံးဘုံ၌ ပထမဈာန် ၀ိပါက်စိတ်၊
အပါယ်လေးဘုံ၌ အကုသလ၀ိပါက် သန္တီရဏစိတ် တခုစီသာဖြစ်၍ နာနတ္တကာယ ဧကတ္တသညီ မည်၏။

၃။ ဒုတိယဈာန် သုံးဘုံသည် သတ္တ၀ါတို့၏ ကိုယ်သဏ္ဍာန် အရောင်အ၀ါကား တူ၏၊
ဒုတိယဈာန် ၀ိပါက်၊ တတိယဈာန် ၀ိပါက် ပဋိသန္ဓေ ထူးခြား၍ ဧကတ္တကာယ နာနတ္တသညီ မည်၏။

၎။ တတိယဈာန်သုံးဘုံ , ဝေဟပ္ဇိုလ်ဘုံ, သုဒ္ဓါဝါသ ငါးဘုံတို့သည် သတ္တ၀ါတို့ ကိုယ်သဏ္ဍာန်လည်း တူသည်၊
ပဋိသန္ဓေလည်း စတုကနည်းအားဖြင့် စတုတ္ထဈာန် ၀ိပါက်စိတ်တပါးသာဖြစ်၍ ဧကတ္တကာယ ဧကတ္တသညီ မည်၏။

၅။ အာကာသာနဉ္စာယတန။
၆။ ၀ိညာဏဉ္စာယတန။
၇။ အာကိဉ္စညာယတန
ဤအရူပ သုံးဘုံသည် သညာတပါးစီဖြစ်၍ တဘုံစီယူလျှင် ၀ိညာဏဋ္ဌိတိ ခုနစ်ပါး ဖြစ်သည်။

ယင်းတွင် သညာရှိသည်လည်း မဟုတ်၊ မရှိသည်လည်း မဟုတ်သော နေ၀သညာနာသညာဘုံနှင့်
လုံးဝသညာ (စိတ်) မရှိသော အသညသတ်ဘုံကို မထည့်ဘဲ ထားရသည်။

သတ္တာဝါသ ဘုံကိုးဝ ယူရာ၌ကား
နေ၀သညာနာသညာဘုံကို တရပ်၊
အသညသတ်ဘုံကို တရပ် ထည့်၍ ကိုးပါးယူရသည်။
ဤသို့ သတ္တာဝါသ ဘုံကိုးဝနှင့် ၀ိညာဏဋ္ဌိတိ ခုနစ်ပါးကို မှတ်သားသင့်ပါသည်။

ယင်းနှင့်ပတ်သက်၍ ရှေးဆောင်ပုဒ်လင်္ကာမှာ-
လူ့ပြည်နှင့်နတ်၊ သတ်လျှင်နာနာ၊ ပထမာဈာန်၊ လေးတန်ပါယ်ခွင်၊ သတ်လျှင် နာဧ၊ ဒွေဈာန် နှစ်ရပ်၊ ဧ နာဟတ်၊ အသညသတ်ပြည်၊ အသညီ၊ ကြွင်းပြည် န၀ါ၊ ဧဧသာ၊ အရူပါမှ၊ ဘုံလေးဝ၊ သတ္တ၀ါသာ၊ ဘုံကိုးရွာ။
ဟူ၍ ဖြစ်ပါသည်။

( မြတ်မင်္ဂလာ ၁၉၉၃-ခု ဖေဖော်ဝါရီလ )

No comments: