Thursday, March 26, 2009

ရတနာသုံးပါး ကျေးဇူး

ရုပ်ပိုင်းဆိုင်ရာ အဘက်ဘက်မှ တိုးတက်နေသောခေတ်ကြီးတွင် တကမ္ဘာလုံး နေ့စဉ် ဖြစ်ပျက်နေသမျှကို နေ့ချင်း ညချင်း တွေ့မြင်သိရှိနေရသည်၊ ရေဒီယို ရုပ်သံ သတင်းစာတို့တွင် အမြဲမြင်တွေ့နေရသော အရေးအရာများမှာ လောဘ ဒေါသ မောဟ အခြေခံသော နယ်မြေလုစစ်ပွဲ၊ အာဏာလုစစ်ပွဲ၊ လူမျိုးစုစစ်ပွဲ၊ စီးပွားကုန်သွယ်ရေး နယ်ချဲ့စစ်ပွဲများနှင့် ရေဘေး၊ မီးဘေး၊ ငလျင်ဘေး၊ လေမုန်တိုင်းဘေး၊ အစာရေစာ ခေါင်းပါးခြင်းဘေးများသာ အများအပြား ပါဝင်နေသည်။

ထိုမျှ ဆိုးဆိုးရွားရွား ဖြစ်ပွားနေသော ကမ္ဘာကြီးတွင် မြန်မာနိုင်ငံသည် အထိုက်အလျောက် အေးချမ်းသာယာလျက်ရှိသည်၊ အခြားတိုင်းပြည်များတွင် ဖြစ်ပွားနေသော ဘေးဒုက္ခများနှင့် နှိုင်းစာလျှင် မြန်မာနိုင်ငံ၏ တည်ငြိမ်အေးချမ်းမှု အခြေအနေသည် အထိုက်အလျောက် ထင်ရှားပေသည်၊ ယင်းအဖြစ်ကို အရင်းအမြစ် စိစစ်ပါက ဗုဒ္ဓဘာသာ အများစုပါဝင်သော မြန်မာနိုင်ငံတော်သည်-
ဗုဒ္ဓေါ လောကေ သမုပ္ပန္နော ဟိတာယ သဗ္ဗပါဏိနံ။
ဓမ္မော လောကေ သမုပ္ပန္နော သုခါယ သဗ္ဗပါဏိနံ။
သံဃော လောကေ သမုပ္ပန္နော ပုညာယ သဗ္ဗပါဏိနံ။ ၏ဟူသော ဒေသနာတော်ကို မမှိတ်မသုန် ယုံကြည်စွာ လိုက်နာကျင့်သုံးနေကြသောကြောင့် ဖြစ်သည်ကို အထင်အရှား တွေ့မြင်ရပေသည်။

ဘုရားရှင် ပွင့်တော်မူလာခြင်းသည် အလုံးစုံသော သတ္တ၀ါတို့၏ အကျိုးစီးပွားအလို့ငှါ ဖြစ်၏။
ဓမ္မတရားတော် ဖြစ်ပေါ်လာခြင်းသည် အလုံးစုံသော သတ္တ၀ါတို့၏ ချမ်းသာရေးအတွက် ဖြစ်၏။
သံဃာတော် ပေါ်ပေါက်လာခြင်းသည် အလုံးစုံသော သတ္တ၀ါတို့၏ ကောင်းမှုအလို့ငှါ ဖြစ်၏။

ယခုအခါ ထေရ၀ါဒဗုဒ္ဓသာသနာ ပြန့်ပွားလာသည်နှင့်အမျှ ကမ္ဘာအရပ်ရပ်တွင် ဗြဟ္မစိုရ်တရား ကြီးထွားတည်မြဲလျက် အေးချမ်းသာယာလာလိမ့်မည်ဟု မျှော်လင့် ၀မ်းမြောက်ရပေသည်။
ရတနာမြတ်သုံးပါး၏ ကျေးဇူးသည် ကြီးမားလှပါသည်၊ ရတနာမြတ်သုံးပါး၏ ကျေးဇူးကို ကမ္ဘာသူ ကမ္ဘာသားများ ခံစားနိုင်ကြပါစေ။

No comments: