Monday, March 16, 2009

ကံ ကံ၏အကျိုး ( ၃၀ )

( မီးဘေးမှ လွတ်ကင်းသူ )

လွန်ခဲ့သော ၁၉၈၅-ခုနှစ်က ဖြစ်ပါသည်၊ ကျွန်တော်တို့သည် ရွှေတိဂုံစေတီတော်ကြီး သိန်း ၃၂၀-ဖိုး ရွှေပြားသင်္ကန်း ကပ်လှူပွဲအတွက် တရက်စီ အလှူခံကြရပါသည်၊ ကျွန်တော်သည် ကုသိုလ်လိုချင်သော ဆန္ဒဖြင့် အသင်းအဖွဲ့ ၂၀-နီးပါးတွင် ပါဝင်အလှူခံခဲ့ပါသည်။ တရက်လျှင် အလှူငွေပေါင်း ရှစ်သောင်းကျပ်အထိ ရခဲ့ဖူးပါသည်၊ ဘယ်အသင်းမှာမှလည်း ကျွန်တော့အသိမိတ်ဆွေ မရှိခဲ့ပါ။

တနေ့တွင် နေကုန်နေခန်းအလှူခံပြီး ညနေပိုင်း နေအိမ်သို့ ပြန်လာခဲ့သည်၊ လမ်းထိပ်အ၀င်ဝတွင် ရပ်ကွက်မှလူများ ယောက်ယက်ခတ်နေသည်ကို တွေ့မြင်ရပါသည်၊ စိုးရိမ်တကြီးနှင့် မေးကြည့်ရာ ကျွန်တော်နေထိုင်ရာလမ်းတွင် ဓာတ်ဆီသိုလှောင်သည့် အိမ်မှစ၍ မီးလောင်နေသည်-ဟု သိရပါသည်။ မီးငြိမ်းသတ်ပြီး ပြန်လာတဲ့သူကပြန်၊ ၀င်ကြည့်တဲ့လူကကြည့်နှင့် ရှုပ်ယှက်ခတ်နေပါသည်၊ ကျွန်တော်လည်း အပြေးအလွှား သွားကြည့်ရာတွင် မီးလောင်သောအိမ်မှာ ကျွန်တော့အိမ်နှင့် တအိမ်သာ ခြားပါသည်။

ကျွန်တော်၏ဇနီးမှာလည်း ကောင်းစွာမကျန်းမာ၊ သားသမီးတွေကလည်း ကျောင်းသွားနေသောအချိန် ဖြစ်ပါသည်။ အရပ်ကူပါ လူဝိုင်းပါနှင့် အများအကူအညီ တောင်းခံခဲ့ရသည်ဟု ဆိုပါသည်၊ ကျွန်တော်၏နေအိမ်မှာ ပျဉ်ထောင် ပျဉ်ခင်း သွပ်မိုး ခြေတံမြင့်ဖြစ်သောကြောင့် အပေါ်ထပ်မှ ပစ္စည်းများ အောက်သို့ပြောင်းရွှေ့ရန် ခက်ခဲပါသည်၊ သို့သော် ပစ္စည်းများအားလုံးသည် အောက်သို့ အကုန်အစင် ရောက်နေပါသည်၊ ကျွန်တော့အိမ်သာ မီးထဲပါသွားပါက ဘုရားပေါ်မှအပြန်တွင် ပြာပုံကိုသာ တွေ့ရမည်ဖြစ်သည်၊ လောင်လည်းလောင်ကျွမ်းနိုင်သော အခြေအနေဖြစ်သည်၊ ဓာတ်ဆီသိုလှောင်ခန်း မရောက်မီ အရပ်က ၀ိုင်းဝန်းငြိမ်းသတ်နိုင်၍သာ တရပ်ကွက်လုံး ပြာမကျခြင်း ဖြစ်သည်။

ထိုနေ့က ၀ါတွင်းလပြည့်နေ့ဖြစ်၍ ကိုးပါးသီလ ယူပြီး ဘုရားပေါ်တွင် အလှူခံနေခဲ့သည်၊ စေတနာ့ဝန်ထမ်း အလှူခံဆောင်ရွက်ခဲ့သည့် စေတနာအကျိုးနှင့် သီလ၏တန်းခိုးတော်ကြောင့် မီးဘေးမှ ကင်းဝေးခဲ့ရသည်-ဟု ယုံကြည်မိပါသည်။

( ချစ်ကြွယ် )
********************************************************************************

( ဘုရားငွေစား ၀မ်းသွားသူတွေ )

အောက်ပိုင်းဒေသ ရွာကြီးတရွာတွင် ထိုရွာရှိ စေတီတော်ကြီး ထီးတင်စဉ်ကဖြစ်ပါသည်၊ အကျိုးဆောင်အဖွဲ့များ နှစ်ဖွဲ့ခွဲ၍ အလှူခံထွက်ကြပါသည်၊ ဤတွင် အဖွဲ့တဖွဲ့က ရရှိငွေကို အတိအကျအပ်သော်လည်း ကျန်တဖွဲ့က ရရှိငွေ၏ ထက်ဝက်ကိုသာ အပ်ပါသည်၊ ကျန်ငွေကို အဖွဲ့တွင်ပါသူများ ခွဲေ၀၀ယ်ခြမ်းစားသုံးကြပါသည်။

ထိုနေ့ ညနေပိုင်းမှာပင် ဘုရားငွေစားသူတိုင်း ၀မ်းသွားကြပါသည်၊ ဆေးစား ဆေးသောက် ဆေးရုံရောက်နှင့် ဒုက္ခတွေ့ကြပါသည်၊ အချို့ဆိုလျှင် အသက်ဆုံးသည်အထိ ဖြစ်ခဲ့ကြပါသည်၊ ရွာရှိဘုန်းတော်ကြီးများကို ပင့်၍ အန္တရာယ်ကင်း ပရိတ်ရွတ်ကာ ရောဂါဘယကို တားဆီးကြပါသည်၊ နောက်ပိုင်းမှ တဖြည်းဖြည်း သက်သာ ပျောက်ကင်းကာ ကျန်းမာလာကြပါသည်၊ ထိုလူအားလုံး မဟုတ်မမှန်သည်ကို လုပ်မိသဖြင့် ဘေးဒဏ်သင့်သည်မှာ ထင်ရှားနေပါ၏၊ တရွာလုံးကလည်း ဤကဲ့သို့ပင် ထင်မြင်ယုံကြည်ကာ ပြောဆိုနေကြပါသည်၊ ထိုဘုရားငွေကို စားခဲ့သူများသည် ကျောင်းကိုလည်း မသွားဝံ့၊ ဘုရားကိုလည်း မဖူးရဲ ဖြစ်နေကြပါသည်။

ဤကဲ့သို့ပင် မြေလတ်ပိုင်း မြို့ကြီးတမြို့တွင် ဘုရားငွေကို စားကြသူများအကြောင်းကို သတင်းစာ၌ ဖတ်ရှုခဲ့ရဖူးပါသည်၊ ထိုသူများသည် ယနေ့အထိ အချုပ်ထောင်အတွင်းမှ လွတ်ဦးမည်မထင်သေးပါ၊ ဘုရားငွေကို စားသူများသည်ပစ္စုပ္ပန်၌လည်း မကောင်းသော ဘေးဆိုးရန်ဆိုး၊ အနာရောဂါအမျိုးမျိုးတို့ ကျရောက်ခံစားကြရပါသည်၊ သေသည်၏အခြားမဲ့ သံသရာအဆက်ဆက်၌ကား ထိုထက်ကြောက်မက်ဖွယ်ရာပင် ခံကြရပေလိမ့်မည်။

( စေတနာလှိုင်-ရေစကြို )

( မြတ်မင်္ဂလာ ၁၉၉၃-ခု စက်တင်ဘာလ )

No comments: