Sunday, March 8, 2009

ကြီးမားခိုင်မာသော နှောင်ကြိုးများ

သာဝတ္ထိမြို့တွင်းသို့ ဆွမ်းခံဝင်လာကြသော ရဟန်းတော်တို့သည် လမ်းတွင် လုယက်မှု၊ ဖောက်ထွင်းမှု၊ လူသတ်မှုတို့ဖြင့် ဖမ်းထားသော တရားခံများကို သံခြေချင်းခတ်ခြင်း၊ လက်ပြန်ကြိုးတုပ်ခြင်း၊ ထိတ်တုံးခတ်ခြင်း စသော အချုပ်အနှောင် အမျိုးမျိုးတို့ဖြင့် ခေါ်ဆောင်လာသည်ကို တွေ့မြင်ခဲ့ကြ၏။

ဇေတ၀န်ကျောင်းတော်သို့ ပြန်ရောက်သောအခါ တရားသဘင်၌ ထိုရာဇ၀တ်သားများ အကြောင်းကို မြတ်စွာဘုရားအား လျှောက်ထားပြီးလျှင် အရှင်ဘုရား၊ ဤအနှောင်အဖွဲ့တို့ထက် ခိုင်မြဲသော နှောင်ဖွဲ့မှုများ ရှိပါသေးသလော-ဟု မေးမြန်းကြ၏။

ဘုရားရှင်က ရဟန်းတို့၊ သင်တို့မြင်ခဲ့သော အနှောင်အဖွဲ့သည် ဘာမျှ မဟုတ်သေး၊ အစားတဏှာ၊ အ၀တ်တဏှာ၊ ပစ္စည်းဥစ္စာတဏှာ၊ သားသမီးဇနီးခင်ပွန်းတဏှာ များသည်သာ လက်ထိတ် ခြေချင်း သံကြိုးတို့ထက် အဆရာထောင်ပို၍ နှောင်ဖွဲ့ကြ၏-ဟု မိန့်တော်မူကာ အောက်ပါဂါထာတို့ကို ဟောကြားတော်မူလေသည်။

( ပါဠိဂါထာ )
န တံ ဒဠှံ ဗန္ဓနမာဟု ဓီရာ ၊ ယဒါယသံ ဒါရုဇပဗ္ဗဇဉ္စ ။
သာရတ္တရတ္တာ မဏိကုဏ္ဍလေသု ၊ ပုတ္တေသု ဒါရေသု စ ယာ အပေက္ခာ ။
ဧတံ ဒဠှံ ဗန္ဓနမာဟု ဓီရာ ၊ သြဟာရိနံ သိထိလံ ဒုပ္ပမုဉ္စံ ။
ဧတမ္ပိ ဆေတွာန ပရိဗ္ဗဇန္တိ ၊ အနပေက္ခိနော ကာမသုခံ ပဟာယ ။

( မြန်မာပြန် )
သံဖြင့်ပြုလုပ်သော လက်ထိတ်၊ သံခြေချင်း၊ သစ်သားဖြင့်ပြုလုပ်သော ထိတ်တုံး၊ မြက်လျှော်ဖြင့် ပြုလုပ်သော ကြိုး-စသော အနှောင်အဖွဲ့တို့ကို ခိုင်မြဲသော အနှောင်အဖွဲ့ဟူ၍ ပညာရှိတို့ မဆိုကုန်။

ပတ္တမြား နားတောင်း စသော ရတနာတို့၌၄င်း၊ သားသမီး မယား စသော သူတို့၌၄င်း၊ လွန်စွာနှစ်သက်တတ်သော တဏှာကိုသာ ခိုင်မြဲသော အနှောင်အဖွဲ့ဟု ပညာရှိတို့ ဆိုကုန်၏။

ယုတ်နိမ့်ရာဘ၀သို့ ဆောင်ယူတတ်သော ဤအနှောင်အဖွဲ့တို့သည် ဖွဲ့မှန်းမသိ ဖွဲ့ထားသဖြင့် လျော့ရဲဟန်ရှိသော်လည်း လွတ်မြောက်ရန် ခဲယဉ်းလှ၏၊ ပညာရှိတို့သည် ဤအနှောင်အဖွဲ့တို့ကို ဖြတ်တောက်ကာ ကာမချမ်းသာကို ပယ်စွန့်လျက် တောထွက် ကျင့်ဆောင်ကြကုန်၏။

( ဆောင်ပုဒ် )
သစ်သားထိတ်တုံး၊ သံလုံးခြေချင်း၊ ကြိုးသွင်းတုပ်ချည်၊ နှောင်ဖွဲ့သည်ကို၊ ခိုင်ပြီမြဲစွ၊ ကျပ်တည်းလှဟု၊ ပဏ္ဍိတများ၊ မဆိုငြားတည့်။
နားဆွဲပုတီး၊ စိန်ဘီးပတ္တမြား၊ ရတနာများနှင့်၊ သားသမီးထွန်း၊ ခင်ပွန်းဇနီး၊ ချစ်မငြီးသာ၊ ခိုင်စွာပိတ်လှောင်၊ နှောင်အဖွဲ့စစ်၊ အမှန်ဖြစ်၏။
ကျစ်လျစ်ဖွဲ့ချည်၊ တုပ်နှောင်သည်ကို၊ ခိုင်ချည်မမြဲ၊ လျော့ရဲရဲဟု၊ အလွဲယူထား၊ အထင်မှားသည်၊ ပယ်ရှားဖို့ရန်၊ မလွယ်ပြန်တည့်။
မှန်စွာမြင်သိ၊ ပညာရှိကား၊ မှားသည့်ကာမ၊ စွန့်ခွါကြလျက်၊ တောထွက်ကျင့်ကာ၊ အားထုတ်ပါ၏။

( တဏှာဝဂ်၊ ဗန္ဓနာဂါရ၀တ္ထု )

No comments: