Tuesday, March 24, 2009

ကံ ကံ၏အကျိုး ( ၃၄ )

( ရေနွေးပူလောင် ကိုဖိုးထောင် )

တနေ့တွင် တဖက်ခြံမှ ခွေးတကောင်သည် သူ၏ကြက်ခြံမှ ကြက်နှစ်ကောင်ကို ကိုက်သတ်လိုက်သည်၊ သို့ဖြင့် ဖိုးထောင်သည် ထိုခွေးကိုသတ်ရန် အမြဲချောင်းမြောင်းနေခဲ့သည်။
တနေ့သောအခါ ဖိုးထောင်တို့အိမ်၌ ဘဲငန်းသားဟင်း ချက်ရန် ရေနွေးကြိုနေခိုက် မမျှော်လင့်ဘဲ ထိုခွေးရောက်လာသည်၊ ဤတွင် ဖိုးထောင်သည် ခွေးကို ရေနွေးပူအိုးဖြင့် လောင်းကာ လက်စားချေလိုက်တော့၏၊ ခွေးမှာ ဆောက်တည်ရာမရဘဲ ပြေးလွှားဝေဒနာခံစားရပြီး ၄-ရက်ခန့်အကြာ၌ သေဆုံးသွားတော့သည်။

များမကြာမီ ဖိုးထောင်၏ အရေပြားပေါ်တွင် အဖုကလေးများ ပေါက်ခဲ့ပြီး ပူလောင်သော ဝေဒနာကို ခံစားရတော့၏၊ ၂-လခန့် ကြာသောအခါ အဖုလေးများ နေရာတွင် အဖြူကွက်များ တကွက်ပြီးတကွက် ပေါ်လာတော့၏၊ တကိုယ်လုံး အဖြူကွက်များ အနှံ့ဖြစ်နေတော့၏၊ သမားတော်များနှင့် ပြသပါသော်လည်း မပျောက်ဘဲ ရှိတော့သည်။

ရပ်ရွာမှ လူကြီးများက ဖိုးထောင်တယောက် တိရစ္ဆာန်ကို ညှင်းပန်းမှုကြောင့် တူသောအကျိုးပေးခြင်းဟု ပြောစမှတ် ပြုကြလေသည်။

( ဖျာပုံ-ဇော်တ )
********************************************************************************

( ကျန်းမာ၍ ချမ်းသာလိုပါလျှင် )

စာရေးသူ လက်ရှိနေထိုင်ရာ ၀ဲလောင်ရွာ၏ ရွာဦးပိုင်းတွင် ဦးဉာဏ်ထွန်း+ဒေါ်တင်ရီတို့ ဇနီးမောင်နှံ နေထိုင်ကြသည်၊ သူတို့တွင် အသက် ၂၅-နှစ်ခန့်အရွယ် မခင်စန်းဦး ဆိုသည့် သမီးကလေးတဦးသာရှိပါသည်။
ဦးဉာဏ်ထွန်းသည် အငှါးဒရိုင်ဘာ လုပ်ခြင်းဖြင့် ဦးဆောင်ရှာဖွေခဲ့သည်၊ ဇနီးဖြစ်သူ ဒေါ်တင်ရီလည်း အလကားမနေဘဲ ဈေးတောင်း ခေါင်းပေါ်ရွက်ကာ တဖက်တလမ်းမှ ပါဝင်လုပ်ကိုင်ခဲ့သည်။

ဤသို့ မောင်တထမ်း မယ်တရွက် အလုပ်ကို ကြိုးစားလုပ်ကိုင်ခြင်း၊ ချွေတာစုဆောင်းခြင်း စားအိုးငယ်ခြင်းတို့ကြောင့် သူတို့ စီးပွားရေးမှာ ထူးကဲစွာ တက်လာခဲ့ပါသည်။
သို့သော် ထိုအချိန်က သူတို့နှစ်ဦးစလုံး ဒါနမှု၊ သီလမှုနှင့် ဘာဝနာမှုတို့အပေါ် မေ့လျော့ခဲ့ကြသည်၊
ကျန်းမာမှ ချမ်းသာမည်-ဟု ဆို၍ ကျန်းမာရေးကိုသာ အထူးဂရုပြု နေထိုင်ခဲ့ကြသည်။

ဤသို့ နေလာသည့်ကြားမှ တနေ့တွင် ဦးဉာဏ်ထွန်းသည် အသည်းရောင်အသားဝါ ရောဂါ ပြင်းထန်စွာ စွဲကပ်လာခဲ့သည်၊ နီးစပ်ရာ ဆရာဝန်ကြီးများ၊ မြန်မာသမားတော်ကြီးများနှင့် အမျိုးမျိုး ကုသခဲ့သော်လည်း မသက်သာ ဖြစ်နေသည်၊ ထိုအခါ ဇနီးဖြစ်သူ ဒေါ်တင်ရီသည် ကြံရာမရသည့်အဆုံး ခင်ပွန်းဖြစ်သူ၏ ဇာတာကို ဗေဒင်ဆရာကြီးတဦးထံ ပြသစစ်ဆေးကြည့်ခဲ့သည်၊ ဆရာကြီးက ရှားမီးကိန်းကျနေသည်ဆို၍ ယတြာချေသည့်အနေဖြင့် ဘုရားကိုးဆူ ဆွမ်းကပ်စေပါသည်။

ဇနီးဖြစ်သူ ဒေါ်တင်ရီသည် ချက်ချင်းပင် ခင်ပွန်းဖြစ်သူအတွက် ဘုရားကိုးဆူ ဆွမ်းကပ်ခဲ့သည်၊ ဆွမ်းကျွေးပြီး မကြာမီပင် ဦးဉာဏ်ထွန်း၏ ရောဂါဝေဒနာမှာ အံ့သြဖွယ်ရာ ပျောက်ကင်းသွားခဲ့သည်။
ထိုအချိန်မှစ၍ သူတို့နှစ်ဦးစလုံး ဘုရားရှင်ဂုဏ်ကျေးဇူးကို ကောင်းစွာသိရှိလာခဲ့သည်၊ ရတနာသုံးပါးကို အားထားယုံကြည်သည့်စိတ်ဖြင့် ညစဉ် ဘုရားရှိခိုးခြင်း၊ နေ့စဉ် ဆွမ်းအိုးတည်ခြင်း၊ ဥပုသ်နေ့တိုင်း သီလစောင့်ထိန်းခြင်းနှင့် စခန်းရက်များတွင် တရားထိုင်ခြင်းတို့ကိုပါ ပြုလုပ်ခဲ့ကြသည်။

ထို့အပြင် ၁၃၄၀-ခုနှစ် တပေါင်းလပြည့်ကျော် ၇-၈-ရက်များတွင် သူတို့၏ နှစ်ဖက်ရှိ တူကလေးများကို သာသနာ့ အမွေခံယူပေးခဲ့သည်၊ ၁၃၄၄-ခုနှစ် နတ်တော်လပြည့်ကျော် ၈-ရက်နေ့နံနက်တွင် တောင်သာမြို့ တိုက်သစ်ကျောင်းတွင် သီတင်းသုံး နေထိုင်လျက်ရှိသော သာမဏေ ရှင်ကောသိယအား ရဟန်းဘောင်သို့ သွတ်သွင်းချီးမြှောက်ခဲ့ပါသည်။

ထို့နောက် ၁၃၅၄-ခုနှစ် ၀ါခေါင်လပြည့်ကျော် ၈-ရက်နေ့တွင် ရွာဦးရှိ ပြည်လုံးချမ်းသာ စေတီတော်ကြီးအား ထီးတော် စိန်ဖူးတော် ငှက်မြတ်နားတော်နှင့် ထုံးသင်္ကန်းတော်တို့ကို အသစ်တဖန် လှူဒါန်းပူဇော်ခဲ့ကြသည်။
ထိုစေတီတော်မြတ်ကြီး၏ ဗုဒ္ဓပူဇနိယ ဘုရားပွဲတော်ကို နှစ်စဉ် ၀ါခေါင်လပြည့်ကျော် ၈-ရက်နေ့ရောက်တိုင်း စည်ကားသိုက်မြိုက်စွာ ကျင်းပခဲ့ရာ ပင့်သံဃာတော်ပေါင်း ၄၀-ခန့်ရှိသည်၊ ထိုသံဃာတော်အရှင်သူမြတ်တို့အား ၁၃၃၀-ခုနှစ်မှစ၍ သူတို့တဦးတည်း ဆက်တိုက် ဆွမ်းကျွေးလာခဲ့ရာ ယခုအခါ နှစ်ပေါင်း ၂၅-နှစ်ရှိပြီဖြစ်ပါသည်။

ဤသို့ အလှူရေစက် လက်နှင့်မကွာ လှူဒါန်းလာခဲ့သည့်အချိန်မှစ၍ သူတို့၏ ကျန်းမာရေးမှာ သိသိသာသာ တိုးတက်ကောင်းမွန်လာခဲ့သည်၊ စီးပွားရေးမှာလည်း ကိုယ်ပိုင် ကုန်တင်ကားကြီးတစီး ပိုင်ဆိုင်လာခဲ့သည်၊ ဦးဉာဏ်ထွန်းသည် ကိုယ်ပိုင်ကားကြီးကို ကိုယ်တိုင် မောင်းနှင်လျက် ဇနီးဖြစ်သူ ဒေါ်တင်ရီမှာ အိမ်တွင် ထန်းလျက်ပွဲရုံဖွင့်၍ လက်လီလက်ကား ရောင်းဝယ်ဖောက်ကားနေသည်၊ အားကျစရာပင် ဖြစ်ပါသည်။

ထို့ကြောင့် မြတ်မင်္ဂလာ စာဖတ်ပရိသတ်များ ယခုဘ၀မှာပင် ကျန်းမာ၍ ချမ်းသာလိုပါလျှင် ဦးဉာဏ်ထွန်း ဒေါ်တင်ရီတို့ ဇနီးမောင်နှံကို နမူနာယူ၍ ဒါနမှု သီလမှု ဘာဝနာမှုတို့ကို မနှေးအမြန် ကျင့်ကြံကြိုးကုတ် အားထုတ်နိုင်ကြစေရန် မေတ္တာရှေ့ထား ရေးသားဖော်ပြအပ်ပါသည်။

( ခင်မောင်တင်-၀ဲလောင် )

( မြတ်မင်္ဂလာ ၁၉၉၄-ခု ဇန်န၀ါရီလ )

No comments: