Thursday, March 26, 2009

ကံ ကံ၏အကျိုး ( ၃၇ )

( မပြေ သူ့ဝဋ်ကြွေး )

ကျွန်ုပ်တို့လမ်းရှိ အိမ်သားအားလုံး သားရေခွဖြင့် နေ့ညမရွေး အပစ်အခတ်ခံနေရသည်မှာ တလနီးပါးရှိခဲ့ပြီ ဖြစ်ပါသည်၊ အချို့အိမ်များ၌ မှန်ဗီရိုများ၊ မှန်ကောင်တာများ၊ တံခါးကပ်မှန်များ လောက်စာလုံးထိမှန်၍ ကွဲပျက်ခံကြရပါသည်၊ မည်သူက မည်သည့်နေရာမှ မည့်သည့်မကျေနပ်ချက်ကြောင့် ယခုကဲ့သို့ ရမ်းရမ်းကားကား ပစ်ခတ်နေမှန်း မသိနိုင်အောင်ဖြစ်နေ၏။ သားရေခွဖြင့် လျှောက်ပစ်နေခြင်းမှာ အချိန်ကန့်သတ်ချက်မရှိ၊ လူအလစ်ကိုကြည့်၍ ပစ်ခတ်နေသည်မှာ ထင်ရှားလှပါသည်။ အချို့အိမ်များကို
ည ၁၀-နာရီ၊ ည ၂-နာရီ၊ နံနက် ၄-နာရီ အချိန်များအထိ အပစ်ခံကြရ၏၊ နေ့လယ် နေ့ခင်း၌ ပိုဆိုး၏၊ ဟိုအိမ် သည်အိမ် အချိန်မရှိ အပစ်ခံရပါသည်။

ထိုသူကို စိတ္တဇ သားရေခွသမား-ဟု အမည်တပ်၍ ရနိုင်၏၊ ရပ်ကွက်တွင်းရှိ အိမ်သားများသည် အမြဲထိတ်လန့်နေရ၏၊ တရက်တွင် ရပ်ကွက်တွင်းရှိ အိမ်တအိမ်မှ သံဃာ့ဒါ ဆွမ်းကပ်၊ ပရိတ်တရားနာပွဲပြုလုပ်ပါသည်၊ ဆွမ်းကပ်ပွဲ၌ သံဃာတော် ၂၅-ပါးနှင့် ရပ်မိရပ်ဖ ၅၀-ယောက်ခန့်ကိုသာ ပင့်ဖိတ်၍ ဒါနပြုလုပ်ပါသည်။

သံဃာတော်များသည် ဆွမ်းကိစ္စပြီး၍ ပရိတ်တရားရွတ်ဖတ်၊ ရေစက်ချ တရားဟော၏၊ ထို့နောက် သံဃာတော်များ ပြန်ကြွတော်မူရန် အိမ်ပေါ်မှဆင်းကြွတော်မူကြသည်၊ ထိုအချိန်တွင် မည်သည့်နေရာက ပစ်လိုက်သည် မသိရသော လောက်စာလုံးတလုံးသည် ရှေ့ဆုံးမှ ဦးစွာကြွတော်မူသော ကန်ဦးကျောင်းဆရာတော်ကြီး၏ ခါးကိုထိမှန်ပါသည်၊ ဆရာတော်ကြီးသည် တရားရှင်ပီပီ နာကျင်သောနေရာကို အသာအယာပွတ်တော်မူ၍ နှုတ်တော်မှ-

ဝဋ်ကြွေးရှိလျှင် ဒီဘ၀ဒီမမျှသာ ခံစားမှုနှင့် ပြေကြပါစေ-ဟု တီးတိုးမိန့်တော်မူကာ ကြွတော်မူပါသည်။

ပရိတ်သတ်များသည် ပုထုဇဉ်များပီပီ ဒေါသဖြစ်ကာ တုတ်ဆွဲ၊ ဓားကိုင်ဖြင့် အနီးအနားပတ်ဝန်းကျင်၌ သားရေခွပစ်သူကို လိုက်ရှာကြ၏၊ မသင်္ကာသူဟူ၍ တဦးယောက်မျှ မမြင်ကြရပါ။

ထိုသို့ဖြစ်၍ ၄-ရက်ခန့် အကြာတွင် ကို------တယောက် အိမ်သာတက်ရင်း သားရေခွ၊ လောက်စာလုံးအိတ်လွယ်လျက် လေသင်ဓုန်းဖြတ်ကာ ကွယ်လွန်သွားပါတော့သည်၊ ထိုအခါကျမှ သားရေခွသမား လူရမ်းကားမှာ ကို-----ဖြစ်မှန်း သူ၏ဇနီးငိုသံကြားမှ တရပ်ကွက်လုံး သိရှိရပါတော့သည်။

ငိုကြွေးပုံမှာ-
သူများတကာကို အနှောက်အယှက်ပေးရမှ ထမင်းစားဝင်တဲ့သူကြီး -----ရေ၊ သန်းခေါင်၊ သန်းလွဲ အိမ်တကာကို သားရေခွနဲ့ လိုက်ပစ်တဲ့အကျိုးကို အခုကောင်းကောင်းကြီး ခံသွားရပြီ မဟုတ်လား-----ရဲ့။

( ထီးချိုင့်-ခွန်ကျော်နိုင် )

( မြတ်မင်္ဂလာ ၁၉၉၄-ခု ဇူလိုင်လ )

No comments: