Monday, March 2, 2009

ဘာသာရေး ပြဿနာ ( ၂၅ )

( ဘဒ္ဒန္တ တိလောကသာရ ဖြေသည် )

( မေး ) ( မာရ်နတ် )
ဘုရားလက်ထက်က မာရ်နတ် ယခုတိုင် ရှိနေပါသေးသလား၊ ယင်းသည် မည်သည့်အကျိုးကို မျှော်ကိုး၍ မြတ်စွာဘုရားကို အမြန် ပရိနိဗ္ဗာန် စံဝင်စေလိုပါသနည်း၊
အရိမေတ္တေယျဘုရား လက်ထက်တွင်လည်း မာရ်နတ် နှောင့်ယှက်နေဦးမှာလား၊ ၄င်းမာရ်နတ်သည် ဤဘုရားလက်ထက် မာရ်နတ်ပင် ဖြစ်မည်လား၊ မာရ်နတ်အသစ်လား သိလိုပါသည်။
( ဦးဘဆိုင်-အင်းစိန် )

( ဖြေ )
မာရ်နတ်အပါအ၀င် ၀သ၀တ္တီနတ်တို့၏ သက်တမ်းသည် လူတို့ အရေအတွက်အားဖြင့် နှစ်ပေါင်း ကုဋေ ၉၀၆-သန်း ရှည်သည်၊ ၄င်းတို့အနေဖြင့် ဘုရားပွင့်ပြီးသည်မှာ နာရီပိုင်းခန့်သာ ရှိသေးသည်ဟု ဆိုရမည်၊ မာရ်နတ်သည် ဘုရားပွင့်ပြီး နှစ် ၂၀၀-ကျော် အသောကမင်း လက်ထက်တွင်ပင် ထင်ထင်ရှားရှား လာရောက်နှောင့်ယှက်သေးကြောင်း၊ ရှင်ဥပဂုတ် ကြွရောက်နှိမ်နင်းကြောင်း စာဟောင်းရှိပါသည်။

ထို့ကြောင့် ယခုအချိန်မှာလည်း ရှိနေသေးမည်ဟု ဆိုစရာပင်၊ မာရ်နတ်က မြတ်စွာဘုရားကို ပရိနိဗ္ဗာန်စံဝင်စေလိုသည်မှာ မြတ်စွာဘုရားရှိနေလျှင် လူများ နိဗ္ဗာန်တရားရရှိကြ၍ သူ့ဆိုင်ရာနယ်ပယ်မှ လွတ်မြောက်သွားမှာ စိုးရိမ်သည်၊ မာရ်နတ်သည် ကာမ ၁၁-ဘုံတွင် အမြင့်ဆုံးဘုံတွင် နေသူ၊ ၄င်းဘုံတစိတ်တဒေသကို စိုးပိုင်သူဖြစ်၍ လူများ ကာမနယ်၌သာ မွေ့လျော်နေစေချင်သည်။ ဈာန်ရ၍ ရူပ-အရူပ ဗြဟ္မာဘုံသို့ပင် မသွားစေချင်ပေ၊ ထို့ကြောင့် နိဗ္ဗာန်ဆုတောင်း၍ ကုသိုလ်ပြုသူ၊ ဈာန်မဂ်ဖိုလ်ရရန် သမထ ၀ိပဿနာ ပွားများသူများကို နှောင့်ယှက်တတ်သည်။

အရိမေတ္တေယျ မြတ်စွာဘုရားလက်ထက်တွင်လည်း မာရ်နတ်ဟူ၍ ရှိဦးမည်ပင်၊ ဤဘဒ္ဒကပ်ဦး ကကုသန် မြတ်စွာဘုရားလက်ထက်တွင် ဤယခုမာရ်နတ်၏ ဘကြီး ဒူသီမာရ်နတ်ဟူ၍ ရှိကြောင်း စာလာရှိသည်၊ အရိမေတ္တေယျဘုရား လက်ထက်၌လည်း ဤမာရ်နတ်၏အနွယ် မာရ်နတ်တဦး ဖြစ်လာနိုင်စရာ အကြောင်းရှိပေသည်၊ အန္တရကပ် တကပ်မျှ ကွာခြားနေသေး၍ ဤလက်ရှိ မာရ်နတ်ကား ထိုအချိန်တွင် မရှိနိုင်တော့ပါ။
********************************************************************************

( မေး ) ( ဘုရားရှိခိုးနှင့် အိမ်စောင့်နတ် )
သမ္ဗုဒ္ဓေ ဘုရားရှိခိုးဂါထာကို အိမ်အတွင်း၌ နှစ်ခေါက်ထက်ပို၍ မရွတ်ဆိုရ၊ ပိုရွတ်လျှင် အိမ်စောင့်နတ် မခံနိုင်-ဟု ဆိုသည်မှာ မှန်ပါသလား၊ ဖြေရှင်းတော်မူပေးပါဘုရား။
( ခင်ချောစု-အလုံ )

( ဖြေ )
ဂုဏ်တော်ကျေးဇူးတော်နှင့်စပ်သော မည်သည့်ဘုရားရှိခိုး ဂါထာတော်၊ ပရိတ်တော်၊ တရားတော်သံကို မဆို နတ်သူတော်ကောင်း၊ နတ်ကောင်း နတ်မြတ်တို့ နှစ်သက်မြတ်နိုး ရိုကျိုးနာယူ ကြည်ဖြူ လက်ခံလေ့ရှိပါသည်။
သူတော်ကောင်းပုဂ္ဂိုလ်တို့ နေထိုင်သော အိမ်ဂေဟာတို့တွင်လည်း နတ်ကောင်း နတ်မြတ်များသာ စောင့်ရှောက် နေထိုင်လေ့ရှိတတ်ကြပါသည်၊

ဘုရားရှိခိုးခြင်း၊ ပရိတ်တော် တရားတော်များကို ရွတ်ဆိုခြင်း၊ မိမိပြုသော ဒါန သီလ ဘာဝနာတို့ကို နတ်တို့အား အမျှဝေခြင်း၊ မေတ္တာပို့ခြင်းတို့ကို အခါမလပ် ပြုလုပ်ကြခြင်းကိုသာ နတ်ကောင်းနတ်မြတ်တို့က အလိုရှိကြောင်း၊ ယင်းတရားသံ၊ အမျှဝေသံ စသည်တို့ကို နေ့ညမပြတ် ကြားလိုသိလို၊ သာဓုခေါ်လိုကြကြောင်း ဗုဒ္ဓကျမ်းစာများ၌ အဆိုရှိပါသည်။ ထို့ကြောင့် အိမ်စောင့်နတ် မခံနိုင်၍ မရွတ်ဆိုရ-ဟူသော စကား မမှန်ဟု ယုံမှတ်စေလိုပါသည်။
*********************************************************************************

( မေး ) ( မိန်းမဘ၀ဖြင့် နိဗ္ဗာန်၇-မရ )
နိဗ္ဗာန်မျက်မှောက်ပြုရန် ( မဂ်ဖိုလ်အဆင့်တခုခုရာက်ရန်) ယခု မိန်းမဘ၀မှ ဘ၀သစ်မဖြစ်ပဲ မိန်းမဘ၀ဖြင့်ပင် ကြိုးစား၍ ရောက်နိုင်ပါသလား၊ သို့မဟုတ် နောက်ဘ၀တွင် ယောက်ျားဘ၀သို့ ရောက်ပြီးမှ ရနိုင်ပါသလား၊ ဖြေကြားတော်မူပ်ရန်။
( မစန်းစန်းမြ-သုံးဆယ်မြို့ )

( ဖြေ )
မြတ်စွာဘုရား လက်ထက်တော်ကလည်း မိန်းမဘ၀ဖြင့် မဂ်တရား ဖိုလ်တရားများ ရရှိကြသည့် ရဟန္တာထေရီမယ်များ မြောက်မြားစွာရှိပါသည်၊
ခေမာမိဖုရားကြီးဆိုလျှင် လူဝတ်ဖြင့် အရဟတ္တဖိုလ်ရ၍ နေ့ချင်းပင် ဘိက္ခုနီအဖြစ် ကူးပြောင်းရသည်၊
မြတ်စွာဘုရား တရားတော်မှာ ပါရမီပြည့်ဝခဲ့သူသာ ဖြစ်က ကျား-မ မရွေး မဂ်ဖိုလ်ရနိုင်ပါသည်။

မြတ်စွာဘုရား သက်တော်ထင်ရှား ရှိသကဲ့သို့ပင် ဤယခုခေတ်ကာလ၌လည်း မဂ်ဖိုလ်ရရေး အကျင့်တရားများ
( ဗောဓိပက္ခိယတရား ၃၇-ပါးနှင့် ကျင့်ကြံအားထုတ်နည်း သတိပဋ္ဌာန်တရားများ ) ထင်ရှားရှိနေသဖြင့် ယောက်ျား မိန်းမ မဟူ မည်သူမဆို ကြိုးစားအားထုတ်က မျက်မှောက်ဘ၀မှာပင် မဂ်ဖိုလ်ရရန် အကြောင်း ရှိပါသည်၊

ဤခေတ်တွင် မည်သူ မည်သို့ တရားရရှိသွားသည်-ဟု ပြောရန်ကား မလွယ်ပါ၊ မြတ်စွာဘုရားလက်ထက်တော်က ရဟန္တာထေရီမယ်ကြီးများသည် ပရိနိဗ္ဗာန် စံဝင်ခါနီးတွင် မြတ်စွာဘုရားအား လျှောက်ထားကြသဖြင့် ယင်းတို့၏ မဂ်တရားဖိုလ်တရား ရရှိပုံများကို အပဒါန်ကျမ်းတွင် မှတ်တမ်းတင်နိုင်ခဲ့လေသည်။

ဤခေတ်၌မူ မဂ်ဖိုလ်ရသူ ကိုယ်တိုင်ကလည်း မိမိရရှိပါသည်-ဟု ထုတ်ဖော်ပြောဆိုခြင်း မပြု၊
ဆရာသမား စသည်တို့ကလည်း ထုတ်ဖော်၍ မပြောသဖြင့် မည်သူ ( မည်သည့် ယောက်ျား၊ မိန်းမ ) မည်သည့် မဂ်ဖိုလ်ကို ရပါသည်ဟု မသိရခြင်း ဖြစ်ပါသည်။ ထို့ကြောင့် မိန်းမဘ၀ဖြင့်ပင် ပါရမီလည်းရှိ၊ ကြိုးစားအားထုတ်မှုလည်း ရှိလျှင် ဤဘ၀မှာပင် နိဗ္ဗာန် မျက်မှောက်ပြုနိုင်ကြောင်း ဖြေကြားအပ်ပါသည်။
********************************************************************************

( မေး ) ( ဘုရားလှူစရာ ပန်းမာလာ )
မြတ်စွာဘုရားအား ကပ်လှူရန် ဘယ်လိုပန်းများ အကောင်းဆုံးဖြစ်ပါသလဲ အရှင်ဘုရား။
( မသင်းသင်းအောင်-ဂန့်ဂေါမြို့ )

( ဖြေ )
ဘုရားပန်းရွေးချယ်ရာတွင် ပထမ မွှေးကြိုင်၊ လှပ၊ လတ်ဆတ်-ဟူသော အင်္ဂါသုံးပါးညီသည့်ပန်းကို ရွေးရပါသည်၊

ဒုတိယ-လှပ၊ လတ်ဆတ်သော အင်္ဂါနှစ်ပါးနှင့်ညီသည့် ပန်းကို ရွေးရပါသည်။
မရနိုင်မှ လတ်ဆတ်သော ပန်း၊ သို့မဟုတ် သစ်ညွှန့် သစ်ကိုင်းကိုဖြစ်စေ လှူဒါန်းနိုင်ပါသည်။
မည်သည့်ပန်းမျှ မရနိုင်လျှင် ဘုရားအိုးတွင် နီးရာသစ်ပင် ပန်းပင်မှ အခက်၊ အညွှန့် ချိုး၍ လှူဒါန်းရန် ရှေးက ရဟန္တာ-ဟု ကျော်ကြားသော ဘုန်းတော်ကြီး ဦးသီလ စသည်တို့ နည်းပေးဟောပြောလေ့ရှိကြောင်း မှတ်သားရပါသည်။

အရေးကြီးသည်ကား ဘုရားပန်းအိုး၌ ပန်းမညှိုးအောင် ကြံစည်လှူဒါန်း၍ သဒ္ဓါပန်းခိုင် မြိုင်ဆိုင်နေကြရန် ကြိုးစားကြစေလိုကြောင်း ဖြေကြားလိုပါသည်။
*********************************************************************************

( မေး ) ( မြေနုတ်ခြင်း )
သိမ်နုတ် ကမ္မ၀ါစာကို လူဒါယကာ ဒါယိကာမတို့ နေထိုင်ရာမြေနေရာများ၊ အိမ်ဆောက်မည့် မြေနေရာများ၌ သံဃာတော်များကဖတ်ရွတ်၍ မြေနုတ်ပေးထိုက်ပါသလား၊ ဖတ်ရွတ်၍ မည်သို့ အကျိုးရှိပါသနည်း၊ ဖြေကြားပေးတော်မူပါဘုရား။
( ဦးဘ၀င်း-မြို့မရပ်၊ ခန္တီးမြို့ )

( ဖြေ )
ဤမြေနုတ်ခြင်းကိစ္စ၌ ရည်ရွယ်ချက် နှစ်ခုရှိရာ ပထမရည်ရွယ်ချက်မှာ မြန်မာနိုင်ငံတွင် ဗုဒ္ဓသာသနာသက် နှစ်ပေါင်းအတန်ကြာရှည်ခဲ့ပြီးဖြစ်၍ သိမ်များလည်း နေရာအနှံ့အပြား၌ သမုတ်ခဲ့ဖူးပေမည်။ အချို့သိမ်များမှာ ပျောက်ပျက်သွား၍ မြေအောက်၌ နစ်မြုပ်သွားကြပေလိမ့်မည်။ မည်မျှပင် မြေအောက် တောချုံတို့ အောက်၌ နစ်မြုပ်ပျောက်ကွယ်၍ နေစေကာမူ သံဃာတော်အရှင်မြတ်တို့ မြတ်စွာဘုရား၏ အာဏာဒေသနာတော်အရ ကမ္မ၀ါစာဖြင့် သမုတ်ထားခဲ့သဖြင့် ပျက်ပြား၍မသွား သိမ်၏အာနိသင် ရှိနေမြဲ ဖြစ်သည်။

သိမ်သည် လူတို့နှင့်မအပ်စပ်၊ သိမ်မြေ၌ နေထိုင်မိလျှင် ကြီးပွားတိုးတက်မှု မရှိ-ဟု ရှေးက ယူဆကြသဖြင့် သိမ်ဖြစ်ခဲ့ဖူးသော် ပျက်ပြယ်ရန် သိမ်နုတ်ကမ္မ၀ါစာဖြင့် သံဃာတော်တို့က နုတ်ကြခြင်းဖြစ်သည်။

ဒုတိယရည်ရွယ်ချက်မှာ သင်းချိုင်းမြေ ဟူသော မြေပုပ်၊ မြေဘုတ်ဘီလူးစသည်ရှိသော မြေကြမ်း ဖြစ်နေခဲ့သော် ယင်းမြေပုပ်၊ မြေကြမ်းအဖြစ်မှ ပျောက်ပျက်သန့်စင်သွားရန် သိမ်နုတ်ကမ္မ၀ါစာဖြင့်ဖြစ်စေ၊ အန္တရာယ်ကင်း ကမ္မ၀ါစာဖြင့်ဖြစ်စေ ဖတ်ရွတ် သန့်စင်စေခြင်း ဖြစ်ပါသည်။

ထို့ကြောင့် အချို့ ပြည့်ပြည့်စုံစုံ ပြုလုပ်ကြသူတို့သည် အရပ်ရှစ်မျက်နှာတို့၌ ပရိတ်သဲအိုး၊ အုတ်ခဲ ကျောက်တုံး စသည်များကို နိမိတ်ကြား၍ မြှုပ်နှံခြင်း၊ စည်းချဂါထာများကို ရွတ်ခြင်းတို့ ကို ပြုလုပ်ကြသည်။ မည်သည့်ရည်ရွယ်ချက်ဖြင့် ပြုလုပ်သည်ဖြစ်စေ ကမ္မ၀ါစာ ဖတ်ကြရသည်ဖြစ်၍ သံဃာဂိုဏ်းပြည့်ရန် ၄-ပါး ၅-ပါးအောက် မလျော့နည်းစေရန် သတိပြုအပ်ပါသည်။
********************************************************************************

( မေး ) ( ဆွမ်းတော်မတင်မီ စားခြင်း )
မြတ်စွာဘုရားအား ဆက်ကပ်ရန် ရည်စူးထားသော သစ်သီးဆွမ်းတို့ကို စားလျှင် မည်သည့်ကံ ထိုက်ပါသနည်း။
( မောင်ရွှေပြည်စိုး-ပန်းတနော် )

( ဖြေ )
လွန်ခဲ့သော ၉၂-ကမ္ဘာထက်၌ ပွင့်တော်မူသော ဖုဿမြတ်စွာဘုရား လက်ထက်က မြတ်စွာဘုရားအား ဆက်ကပ်ရန် စီမံထားသော ဆွမ်းဟင်း၊ သစ်သီးစသည်များကို ဦးဦးဖျားဖျား စားသောက်ကြသူများ သေပြီးသည့်နောက် ပြိတ္တာဖြစ်ကြရာ ဤကမ္ဘာအထိ မကျွတ်လွတ်ကြပေ။

ဂေါတမမြတ်စွာဘုရား လက်ထက်၌ ဗိမ္ဗိသာရမင်းကြီး ဆွမ်းလှူဒါန်း၍ အမျှဝေမှ ကျွတ်လွတ်ကြရကြောင်း တိရောကုဋ္ဋသုတ်၌ ပါရှိသည်။ ထို့ကြောင့် ဆွမ်းတော်တင်ရန် ရည်စူးထားသော ဆွမ်း၊ သစ်သီး စသည်တို့ကို ဦးဦးဖျားဖျား မစား မသောက်ရန် သတိပြကြရမည်၊ ဆွမ်းတော်စွန့်ပြီးမှ စားသောက်ကြလျှင် ဗုဒ္ဓဝေယျာဝစ္စ ပြုသူတို့အဖို့ အပြစ်မရှိပါ။
*********************************************************************************

( မေး ) ရဟန်းသံဃာထံမှ ခံယူခြင်းနှင့် ရပ်ပြစ်လွတ်ရေး )
အရှင်ဘုရား၊ ရဟန်းသံဃာတို့ ပေးကမ်းသော လက်ဆောင်ကို တပည့်တော်တို့ ခံယူထိုက်ပါသလား၊ ထို့ပြင် ရပ်ပြစ်ရှစ်ပါး လွတ်ကင်းအောင် မည်ကဲ့သို့ ကျင့်ကြံနေထိုင်ရပါမည်နည်း ဖြေကြားတော်မူပါရန်။
( စန္ဒာဝင်း-ရွှေဘိုမြို့ )

( ဖြေ )
ရဟန်းသံဃာတော်တို့သည် စားသောက်ပြီးသော ဆွမ်းကြွင်း ဆွမ်းကျန်များနှင့် မသုံးလိုသော ပစ္စည်းများကို ကျောင်းသား၊ ကပ္ပိယ၊ အရံစောင့်နှင့် ဝေယျာဝစ္စုပြုသူများ၊ ထို့ပြင် အလုပ်အကျွေးခံ မိဘများအားသာ ပေးထိုက်ပါသည်။

အထူး စစ်မြေမှလာသောမင်း၊ အချိန်မတော် ရောက်လာသော ခိုးသားဓားပြ၊ ခရီးသွား စသည်တို့အားလည်း ပေးနိုင်ပါသည်၊ ယင်းကို ထောက်၍ လက်ဆောင်ပစ္စည်းဟူသည်ကိုမူ မပေးအပ်၊ ထို့ကြောင့် ခံယူသူကလည်း မခံယူထိုက်-ဟု ဆိုရပါမည်၊ ရှေးသူတော်ကောင်း ပုဂ္ဂိုလ်များသည် ရဟန်းတော်များထံမှ ပစ္စည်းများကို ခံယူလေ့မရှိ၊ ကျောင်းစရှောင်-ဟူ၍ပင် စကားရှိပါသည်။

ဤခေတ် မြန်မာနိုင်ငံတော်၌ ဗုဒ္ဓသာသနာတော်မြတ်ကြီးနှင့် တွေ့ကြုံ၍ မြင်ကြားသွားလာ ကောင်းစွာလူစဉ်မီသူအဖို့ ရပ်ပြစ်ရှစ်ပါး လွတ်နေပြီဖြစ်သည်၊ ဤကဲ့သို့ ရပ်ပြစ်ရှစ်ပါး အစဉ်လွတ်ကင်းနိုင်ရန် ဗုဒ္ဓဘာသာ သမ္မာနွယ်ဝင် သူတော်စင်များ ဖြစ်ကြပြီး သရဏဂုံသုံးပါးနှင့် ငါးပါးသီလကို ကျိုးပေါက်ပြောက်ကြား မရှိအောင် စောင့်ရှောက်ထိန်းသိမ်းရန် အထူးလိုအပ်ပါသည်။
*********************************************************************************

( မေး ) ( တိဟိတ်ပုဂ္ဂိုလ်-ဒွိဟိတ်ပုဂ္ဂိုလ် )
၁။ ၀ိပဿနာတရား အားထုတ်ရာတွင် တိဟိတ် ပုဂ္ဂိုလ်များသာ ယခုဘ၀၌ တမဂ်တဖိုလ်ရနိုင်၍ ဒွိဟိတ်ပုဂ္ဂိုလ်များမှာ ယခုဘ၀တွင် တမဂ်တဖိုလ် မရနိုင်-ဟု ဆိုသည်မှာ ဟုတ်ပါသလားဘုရား။

၂။ ဒွိဟိတ်ပုဂ္ဂိုလ် တိဟိတ်ပုဂ္ဂိုလ် ဆိုသည်မှာ မည်ကဲ့သို့သော ပုဂ္ဂိုလ်မျိုးကို ခေါ်ဆိုပါသနည်း။

၃။ မိမိကိုယ်ကို ဒွိဟိတ်ပုဂ္ဂိုလ်ဖြစ်မည်၊ တိဟိတ်ပုဂ္ဂိုလ်ဖြစ်မည်ဟု မည်ကဲ့သို့ ခွဲခြားသိရှိနိုင်ပါမည်နည်း။
( မစန္ဒာအုံး-အုံးဓာတ်ပုံတိုက်၊ ဘုန်းကြီးလမ်း-ရန်ကုန်မြို့ )

( ဖြေ )
မေးခွန်းသုံးခုကို ပေါင်း၍ ဖြေဆိုလိုက်ပါသည်။
လူတိုင်းအဖို့ အကုသိုလ်ဖြစ်မှု၊ ကုသိုလ်ဖြစ်မှုနှင့် သက်ဆိုင်သော အကြောင်းစိတ် (ဟေတု-ဟိတ်) ၆-မျိုး ရှိပါသည်။
၎င်းမှာ-လောဘ၊ ဒေါသ၊ မောဟ၊ အလောဘ၊ အဒေါသ၊ အမောဟ တို့ဖြစ်သည်။
ဝိပဿနာတရား အားထုတ်မှု ဆိုင်ရာ၌ ကုသိုလ်ဟိတ် သုံးမျိုးဖြစ်သည့် အလောဘ၊ အဒေါသ၊ အမောဟတို့ကိုသာ ယူပါသည်။

မြန်မာလို လောဘနည်းပါး သဒ္ဓါပွားမှု၊ မေတ္တာတရား ပွားများမှုနှင့် ပညာကြီးမှုတို့ ဖြစ်ပေသည်၊
ဤသုံးမျိုးနှင့် ပြည့်စုံမှသာ တရားအားထုတ်၍ တမဂ်တဖိုလ် ရနိုင်သည်၊

ဤသုံးမျိုးတွင် အမောဟ ပညာ ကင်းမဲ့နေလျှင် အလောဘ၊ အဒေါသ၊ ဟိတ်နှစ်မျိုးသာရှိသော ဒွိဟိတ်ပုဂ္ဂိုလ်ဖြစ်၍ မဂ်ဖိုလ်ရနိုင်စွမ်း မရှိပါ၊
အမောဟဟိတ် မပါသဖြင့် ပညာသင်၍ မရခြင်း၊ အလွန်ဉာဏ်ပညာ ခေါင်းပါးခြင်း၊ အကောင်းအဆိုး ခွဲခြား၍ သိနိုင်စွမ်း မရှိခြင်း စသော အချက်များကိုကြည့်၍ ဒွိဟိတ်ပုဂ္ဂိုလ် ဖြစ်နိုင်-မဖြစ်နိုင် မှန်းဆ သိသာပါလိမ့်မည်။

ဤခေတ်တွင် ပညာသင်၍ တတ်မြောက်ခြင်း၊ ဉာဏ်ကောင်းခြင်း၊ လောကီလောကုတ္တရာ ဗဟုသုတ အဖြာဖြာတို့၌ အကင်းပါးခြင်း စသည်တို့မှာ အများအားဖြင့် ပြည့်စုံလျက် ရှိနေ၍ တိဟိတ်ပုဂ္ဂိုလ်ဖြစ်နိုင်သူ များပြားပါသည်။
ထို့ကြောင့် အလျင်အမြန် တရားအသိအလင်း မပေါက်သဖြင့် လုံ့လကိုလျှော့ကာ ငါ-ဒွိဟိတ် ပုဂ္ဂိုလ်ပဲ၊
သည်ဘ၀ မဂ်တရား၊ ဖိုလ်တရား ရနိုင်မည် မဟုတ်ပါဘူး-ဟု မယူဆလိုပါ။ ဉာဏ်ပညာ အသင့်အတင့် ရှိသူတိုင်း တရားအမြင်ပေါက်အောင် ကြိုးစားအားထုတ်သင့်ကြောင်း ဖြေဆိုရပေသည်။

( မြတ်မင်္ဂလာ ၁၉၉၂-ခု မတ်လ )

No comments: