Tuesday, March 24, 2009

ဘာသာရေး ပြဿနာ ( ၃၇ )

( ဘဒ္ဒန္တ တိလောကသာရ ဖြေသည် )

( မေး ) ( ဆံပင်ကို လှူခြင်း )
ဆရာတော်ဘုရား၊ အမျိုးသမီးများ ဆံပင်ကို ဘုရားလှူခြင်းကြောင့် မည်သို့အကျိုးရသည်ကို သိလိုပါသည်ဘုရား၊
ထို့ပြင် ငယ်ရွယ်စဉ် လှူခြင်း၊ အရွယ်ကြီးမှ လှူခြင်းနှင့် ကျန်ရစ်သူများအား မှာကြား၍ သေခါမှလှူခြင်းတို့ မည်သို့ ကွားခြားပါသလဲဘုရား။
( တင်တင်မိုး-က-ပ-စ ကမ္ဘာအေး )

( ဖြေ )
ဆံပင်ကို လှူခြင်းဟု ဆိုရာ၌ ဆံပင်ကိုဖြတ်၍ ဘုရား၌ ဆွဲချိတ်လှူဒါန်းခြင်းလော၊ ဆံပင်ကိုဖြတ်၍ ရောင်းကာ ရလာသောငွေဖြင့် တစုံတရာ လှူဒါန်းခြင်းလော-ဟု စိစစ်ဖွယ် ရှိသည်၊
ဆံပင်ကိုဖြတ်၍ ဆွဲချိတ်လှူဒါန်းခြင်းမှာအကျိုးမများပါ။
စေတနာအလျောက် ဆုတောင်း၍ ရနိုင်စရာ ရှိသော်လည်း အလှူခံ (ဌာန) ၌ အကျိုးရှိဖို့လည်း လိုပါသည်။
ဆံပင်ကိုဖြတ်ရောင်း၍ ရသောငွေကြေးဖြင့် လိုအပ်ရာရာကို လှူခြင်းက ပို၍ အကျိုးရှိနိုင်ပါသည်။

ဘုရားလက်ထက်က ဥဇ္ဇေနီပြည်ရှိ ဆံပင်အလွတ်ကောင်းသော အမျိုးသမီးသည် သူ့ဆံပင်ကို လိုချင်သူက ငွေတထောင်ပေးသော်လည်း မရောင်းခဲ့၊ တနေ့ ရဟန္တာအရှင်မြတ်များ ဆွမ်းခံချိန်၌ ဆွမ်းမရသည်ကို တွေ့ရ၍ သူ့ဆံပင်အားလုံးကို ဖြတ်ရောင်းရာ ငွေ ၈ိ/သာရသည်၊ ထိုငွေဖြင့် ဆွမ်းဝယ်၍ ရဟန္တာများအား လှူဒါန်းသည်၊ ရဟန္တာအရှင်မြတ်များ ဆွမ်းစားပြီး အနုမောဒနာပြုစဉ် စေတနာအလျောက် သူ့ဆံပင်အားလုံး နဂိုအတိုင်း ပြန်ဖြစ်သွားသည်။

ဥဇ္ဇေနီဘုရင်သိ၍ ခေါ်ယူပြီး မိဖုရားမြောက်ရသည်အထိ ဒိဋ္ဌဓမ္မ အကျိုးပေးကာ တမလွန်၌လည်း ကောင်းရာသုဂတိဘ၀၌ ဖြစ်ရကြောင်း ၀တ္ထုရှိပါသည်။ ထို့ကြောင့် ဆံပင်ကို လှူရာ၌ ဆံပင်အတိုင်း ဘုရားရှေ့ စသည်၌ ချိတ်ဆွဲ လှူဒါန်းခြင်းကို ဆင်ခြင်သင့်ပါသည်။

အရွယ်အားလျော်စွာ လှူဒါန်းခြင်းမှာ စေတနာ ပေါ်ပေါက်ချိန် အတိုင်းအတာအရ ဖြစ်၍ ဆိုဖွယ်မရှိပါ၊
သေမှ လှူရစ်ပါ-ဟု မှာကြား၍ လှူဒါန်းမှုမှာလည်း အကျိုးများဖွယ် မရှိဟု ထင်ပါသည်။
********************************************************************************

( မေး ) ( ၀ိဇ္ဇာစရဏသမ္ပန္န )
ဆရာတော်ဘုရား၊ ဘုရားဂုဏ်တော် ကိုးပါးတွင်ပါသော ၀ိဇ္ဇာစရဏ သမ္ပန္နဂုဏ်တော် အဓိပ္ပါယ်မှာ
ဝိဇ္ဇာ-အသိဉာဏ်၊ စရဏ-အသိဉာဏ် ဖြစ်ရန် အကျင့်တရားဖြစ်၍ စရဏ-က ပထမ၊ ၀ိဇ္ဇာက-က ဒုတိယ၊
စရဏ၀ိဇ္ဇာသမ္ပန္န-ဟု ဆိုသင့်လျက် အဘယ်ကြောင့် ဤသို့ ၀ိဇ္ဇာစရဏသမ္ပန္န-ဟု ဆိုရပါသနည်းဘုရား။
( မောင်ဉာဏ်မြင့်-ကန္နီ )

( ဖြေ )
သဘောတရားအားဖြင့် စရဏ အကျင့်က ရှေ့၊ စရဏအကျင့်ကြောင့် သိအပ်သော ၀ိဇ္ဇာက နောက် ဖြစ်သော်လည်း အမည်ကိုမှည့်ခေါ်ရာ၌ သဒ္ဒါနည်း ဒွန်သမာသ်တွဲစပ်ပြုလုပ်၍ မှည့်ခေါ်ခြင်းဖြစ်ရာ ဒွန်သမာသ်တွဲစပ်ရာတွင် အက္ခရာ အနည်းအများ လိုက်၍ အက္ခရာနည်းသော ၀ိဇ္ဇာပုဒ်ကို ရှေ့က ထားပြီး အက္ခရာများသော စရဏပုဒ်ကို နောက်ကထား၍ ၀ိဇ္ဇာစရဏသမ္ပန္န-ဟု တွဲစပ်မှည့်ခေါ်ရပါသည်။
*********************************************************************************

( မေး ) ( ပရိတ်တော်နှင့် အမနုဿများ )
အရှင်ဘုရား၊ ပရိတ်တော်များကို ရွတ်ဖတ်၍၄င်း၊ ပဗ္ဗာဇနိယ ကမ္မ၀ါစာ ဖတ်၍၄င်း၊ အမနုဿပေတများ ဝေးရာသို့ ထွက်ပြေးခြင်း၊ ကျွတ်တမ်းဝင်ခြင်းတို့မှာ ၄င်းတို့က ပါဠိဘာသာကို နားလည်ကြလို့ပါလား၊ ဤသိုပ နှင်ထုတ်၍ ထွက်ပြေးကြခြင်းအတွက် နှင်ထုတ်သူတို့မှာ အပြစ်ရှိပါသလားဘုရား။
( မောင်တင်ကိုလွင်-အမှတ် ၃-ရပ်ကွက်၊ ရမ်းဗြဲ ) ( ကျော်ထူးနိုင်-ကွင်းတောင်ရပ်၊ ကျောက်တံခါး )

( ဖြေ )
ပရိတ်တော်များ ပဗ္ဗာဇနိယကမ္မ၀ါစာ စသည်များကို သံဃာတော်များက ပုဒ်ပါဌ်အက္ခရာ ဒီဃရသ ဂရုလဟု စသည် မှန်ကန်စွာ ရွတ်ဖတ်လျှင် ပရိတ်တော်၏ တန်ခိုး၊ ကမ္မ၀ါစာ၏ အစွမ်းသတ္တိကြောင့် အမနုဿ ပေတ ယက္ခ ရက္ခသ မကောင်းဆိုးဝါးများ ထွက်ပြေးကြရခြင်း၊ အန္တရာယ်မပြုနိုင်ကြခြင်း ဖြစ်ရသည်၊
၎င်းတို့က ပရိတ်တော် ကမ္မ၀ါစာတို့၏ အဓိပ္ပါယ်ကို နားလည်ခြင်း၊ နားမလည်ခြင်းမှာ ပဓာနမဟုတ်ပါ၊
၎င်းတို့မှာ လူတို့အား အန္တရာယ် အနှောက်အယှက်ပြုကြသူများဖြစ်၍ နှင်ထုတ်ခြင်းအတွက် အပြစ်ရှိစရာ မမြင်ပါ၊
လူတို့၏ချမ်းသာရေးအတွက် ဆောင်ရွက်ပြုလုပ်ရခြင်းသာ ဖြစ်၍ ကုသိုလ်ဖြစ်စရာသာ ရှိပါသည်။
********************************************************************************

( မေး ) ( ခေါင်းလောင်း )
ဆရာတော်ဘုရား၊ မင်းကွန်းခေါင်းလောင်းကြီးသည် ကမ္ဘာတွင် တတိယ အကြီးဆုံး ခေါင်းလောင်းကြီး-ဟု သိရပါသည်။
ကမ္ဘာ ပထမနှင့် ဒုတိယ ခေါင်းလောင်းများ ဘယ်မှာရှိ၍ ဘယ်မျှကြီးမားသည်ကိုလည်း ဘယ်တုန်းကစ၍ ခေါင်းလောင်းများ သွန်းခဲ့ရှိခဲ့သည်ကို၎င်း သိလိုပါသည်ဘုရား။
( မောင်သောင်းမြင့်-အ-ထ-က မလှိုင်မြို့ )

( ဖြေ )
ကမ္ဘာ့အကြီးဆုံး ခေါင်းလောင်းမှာ ရုရှားနိုင်ငံ မော်စကိုမြို့မှ ဇာကိုလိုကော ခေါင်းလောင်းကြီးဖြစ်၍ တန်ချိန် ၂၀၀-ကျော်ရှိပြီး အမြင့် ၁၉-ပေ ၃-လက်မရှိသည်။

ဒုတိယအကြီးဆုံး ခေါင်းလောင်းမှာလည်း ရုရှားနိုင်ငံ မော်စကိုမှာပင် ရှိသည်၊ တန်ချိန် ၁၂၈-တန် ရှိသည်ဟု ဆိုသည်၊ သို့သော် ယင်းခေါင်းလောင်း နှစ်လုံးစလုံးပင် ကွဲပဲ့ပျက်စီးနေကြသည်။

မင်းကွန်းခေါင်းလောင်းကြီးကား အကောင်းပကတိ အနေဖြင့် ကမ္ဘာတွင် အကြီးဆုံးခေါင်းလောင်းဟုပင် ဆိုနိုင်ပါသည်။
အမြင့် ၁၂-ပေ ရှိ၍ မြန်မာကြေးချိန် ၅+၅ လုံး ( ၅၅၅၅၅ ) ဖြစ်ပြီး တန်ချိန် ၉၀၅၂-ရှိသည်ဟု ဆိုပေသည်။

ခေါင်းလောင်းသမိုင်းအရ လွန်ခဲ့သည့် နှစ်လေးထောင်လောက်က စ၍ အဦးဆုံး ခေါင်းလောင်းကို တရုတ်ပြည်တွင် သွန်းခဲ့သည်ဟု ဆိုသော်လည်း သေချာသော အထောက်အထား မရှိဟု ဆိုပါ၏။
မြန်မာမှာ သရေခေတ္တရာခေတ်ကပင် ခေါင်းလောင်းများ ရှိခဲ့သည်၊ သို့သော် ကျောက်စာတို့တွင် သက္ကရာဇ် ၅၉၈ ( ပုဂံကျစွာမင်း လက်ထက် ) မင်းမတ် ဉာဏပိစည်း ကောင်းမှု၊ ရှင်ပင်ဗောဓိဘုရား ကျောက်စာကြောင်းရေ ၉-တွင် ခေါင်လောင်ကြိယ် အပိသာ ၁၆၀-ပိသာခွယ်ဧအ်၊ သွန်ဧအ် ( ခေါင်းလောင်း ကြေးအပိဿာ ၁၆၀-ပိဿာခွဲ၏၊ သွန်း၏ )-ဟု ပါရှိ၍ ကြေးပိဿာ ၁၆၀-ကျော် ခေါင်းလောင်းသွန်းကြောင်း အဦးဆုံး တွေ့ရပါသည်။
********************************************************************************

( မေး ) ( အရှင်လတ်လတ် မြေမျိုခံရသူများနှင့် နတ်ပြည်ရောက်သူများ )
ဆရာတော်ဘုရား၊ ဘုရားလက်ထက်က မြေမျိုခံရသူနှင့် လူသားစင်စစ်က နတ်ပြည်ရောက်သော ပုဂ္ဂိုလ်များ၏ အကြောင်းရင်းများကို ဖြေကြားရှင်းလင်းပေးစေလိုပါသည် ဘုရား။
( မောင်တင့်လွင်-အောင်နန်းရပ်၊ မိုးကုတ်မြို့ )

( ဖြေ )
ဘုရားလက်ထက်က မြေမျိုခံရသူတို့မှာ-
၁။ ယောက္ခမတော် သုပ္ပဗုဒ္ဓမင်း
၂။ ယောက်ဖတော် ဒေ၀ဒတ်
၃။ စိဉ္စမာန၀ိကာ ပရိဗိုဇ်မ
၎။ ဥပ္ပလ၀ဏ်ထေရီမကို ကျူးလွန်သော နန္ဒလုလင် တို့ ဖြစ်ကြ၏။

သုပ္ပဗုဒ္ဓမင်း စသည်တို့ကား မြတ်စွာဘုရားအား အကျိုးမဲ့ ပြစ်မှား စွပ်စွဲကြ၍ ဖြစ်ပါသည်။

လူသားစင်စစ်က နတ်ပြည်ရောက်ကြသူ လေးဦးကား-
၁။ ဘုရားလောင်း ဂုတ္တိလ စောင်းသမား
၂။ ဘုရားလောင်း သာဓိနမင်း
၃။ ဘုရားလောင်း နေမိမင်းကြီး
၎။ ဘုရားလောင်း မန္ဓာတုစကြာမင်းတို့ ဖြစ်ကြပါသည်။

ရှေ့ ၃-ဦးမှာ တပည့်သားဖြစ်ဖူးသော နတ်အများက ကြည်ညို၍ သိကြားမင်းအား ပင့်ဆောင်ပေးရန် လျှောက်ထား၍ သိကြားမင်းက ပင့်ဆောင်ပေးခြင်း ဖြစ်သည်။

မန္ဓာတု စကြာမင်းကား စကြာရတနာဖြင့် စည်းစိမ်ခံစားရန် ကိုယ်တိုင်သွားခြင်းဖြစ်ကြောင်း
ဆိုင်ရာ ဇာတ်တော်များအရ သိရပါသည်။

( မြတ်မင်္ဂလာ ၁၉၉၄-ခု ဖေဖော်ဝါရီလ )

No comments: