Tuesday, March 24, 2009

ကံ ကံ၏အကျိုး ( ၃၅ )

( မေတ္တာအကျိုး )

ကျွန်မသည် အမရပူရမြို့နယ် ခရေတောကျေးရွာ ( အ-မ-က ) မှ အလယ်တန်းပြ ဆရာမတဦး ဖြစ်ပါသည်။
ကျွန်မသည် မေတ္တသုတ်ပရိတ်တော်ကို အမြဲရွတ်ဖတ် ပွားများလေ့ ရှိပါသည်၊
ထို့ပြင် ဗုဒ္ဓဂုဏော အနန္တော၊
ဓမ္မဂုဏော အနန္တော၊
သံဃဂုဏော အနန္တော၊
မာတာပိတုဂုဏော အနန္တော၊
အာစရိယဂုဏော အနန္တော-ဟူ၍လည်း
အနန္တောအနန္တ ငါးဖြာကို ရည်မှန်းပူဇော်လေ့ ရှိပါသည်၊
ဘုရားဂုဏ်တော်ဖြစ်သော အရဟံ-ကိုလည်း ၁၉-ကြိမ် ရွတ်ဆိုပါသည်၊
ထို့နောက် သတ္တ၀ါအပေါင်း ကိုယ်စိတ်နှစ်ဖြာ ကျန်းမာ၍ ချမ်းသာကြပါစေ-ဟု ၃-ကြိမ် မေတ္တာပို့ပါသည်။

ကျွန်မသည် ယင်းတို့ကို နေ့စဉ်အလေးအနက်ထား၍ ရွတ်ဖတ်ပွားများပါသည်၊ ကျောင်း၌ အားလပ်သည့်အချိန်တိုင်း ရွတ်ဖတ်ပွားများပါသည်၊ ကျွန်မသည် အရဟံ ၁၉-ကြိမ် ရွတ်ဆိုသည့်အခါ မြတ်စွာဘုရားထံ လေးလေးနက်နက် အာရုံပြုထားပါသည်၊ ဤအကျိုးကျေးဇူးတို့ကြောင့် ကျွန်မသည် မြွေအန္တရာယ်မှ ၂-ကြိမ် လွတ်မြောက်ခဲ့ရပါသည်။

မကြာမီကမူ ကလေးငယ်တဦး၏ အသက်ကို ကယ်တင်နိုင်ခဲ့ပါသည်၊
ကျွန်မတို့ကျောင်းနှင့် ရွာကြားတွင် ပေ ၈၀-ခန့်ကျယ်သော ချောင်းတခုရှိပါသည်၊ ချောင်းကူးတံတားသည် ရှေးခေတ်က ဆောက်လုပ်ခဲ့သော တံတားဖြစ်၍ ယိုယွင်းနေပါသည်၊ ထို့ကြောင့် ချောင်းရေပြည့်ချိန်တွင် ကျောင်းဆင်းချိန်၌ အထူးဂရုစိုက်ရပါသည်၊ ကျောင်းအုပ်ဆရာကြီးနှင့် မူလတန်းပြ ဆရာတဦး ပြောင်းရွှေ့သွားသဖြင့် ကျောင်း၌ ဆရာအင်အား နည်းနေပါသည်၊ ကျွန်မနှင့် ပညာရေးလုပ်သား ၂-ဦးသာရှိပါသည်။

ရေကျနေချိန် ကျောင်းဖွင့်သည့်တရက်၌ တံတားပေါ်မှ ၀ုန်း-ဟူသောအသံကို ကျွန်မ ထူးခြားစွာ ကြားလိုက်သဖြင့် ကျောင်းပေါ်မှ ကျွန်မလှမ်းကြည့်လိုက်ပါသည်၊ ထိုအချိန်တွင် ကလေးတယောက် ရေထဲတွင် ယက်ကန်ယက်ကန်ဖြစ်နေသည်ကို တွေ့လိုက်ရပါသည်၊ ချက်ချင်းပင် ကျွန်မသည် ပညာရေးလုပ်သားနှင့် ကလေးများအား လှမ်းအော်ကာ ချောင်းဆီသို့ ပြေးသွားကြပါသည်၊ ပညာရေးလုပ်သားနှင့် ကျောင်းသားကြီး နှစ်ယောက်သည် ချောင်းထဲသို့ ခုန်ချကာ အမြန်ကူး၍ ကလေးကို ဆယ်ယူခဲ့ကြပါသည်၊ ကျွန်မသည် ယခုကျောင်း၌ လုပ်သက် ၇-နှစ်ကျော်ရှိခဲ့ပါသည်၊ ဤအဖြစ်အပျက်မျိုးကို ယခုတကြိမ်သာ တွေ့ကြုံခဲ့ရပါသည်။

လိမ့်ကျသည့်ကလေးသည် ကျောင်းတက်နေသူမဟုတ်ပါ၊ ကျောင်းသို့ အပျော်လိုက်လာသော ကလေးဖြစ်ပါသည်၊ ၄-နှစ်သားအရွယ်ဖြစ်၍ ရေမကူးတတ်သေးပါ၊ အမြင့်တခုမှ ရေထဲသို့လိမ့်ကျလျှင် ရေထဲသို့ မြုပ်သွားပြီးမှ ပြန်ပေါ်လာတတ်ပါသည်၊ ယခုကလေးမှာ မြုပ်သွားပြီးမှ ပြန်ပေါ်လာခြင်းမဟုတ်ပါ၊ ရေပေါ်မှာပင် ယက်ကန်ယက်ကန် ဖြစ်နေပြီး သူ့ကုပ်ပေါ်ဝဲနေသည့် ဆံပင်များသာ ရေစိုခဲ့ပါသည်၊ လိမ့်ကျသည့်နေရာသည် ချောင်း၏အလယ်တည့်တည့် ရေအနက်ဆုံးနေရာ ဖြစ်ပါသည်၊ ရေကျစ ချောင်းလုံးရေပြည့်ချိန်ဖြစ်၍ ရေအနက်မှာ ၀ါးတပြန်သာသာ ရှိပါသည်၊

အကယ်၍ ကလေး၏အသက် တစုံတခုဖြစ်ခဲ့ပါလျှင် အသက်ဆုံးရှုံးရုံတင်မကပါ ဆရာမ၏ တာဝန် ပေါ့ဆမှုကြောင့် ဟူသော အပြစ်တင်မှုကို ကျွန်မ မလွဲမသွေ ခံရမည်ဖြစ်ပါသည်၊ ယခုမူ မေတ္တာတန်ခိုး ဂုဏ်တော်တန်ခိုးကြောင့် ကလေးလိမ့်ကျသွားသည်ကို ကျွန်မသိရှိကာ အချိန်မီ ကလေး၏အသက်ကို ကယ်နိုင်ခဲ့ပါသည်၊ ကျရောက်လာသော အန္တရာယ်အပေါင်းသည်လည်း မေတ္တာဖြင့် ပပျောက်ခဲ့ရပါတော့သည်။

( လွင်လွင်ဦး )
********************************************************************************

( ၀ဋ်လည်သူ )

စာရေးသူ ၇-နှစ်သမီးအရွယ်တွင် အသက် ၇၀-ကျော် အဘွားတယောက် အိမ်သို့ မကြာခဏ ရောက်လာတတ်ပါသည်၊ ထူးခြားသည်မှာ အဘွား၏ လက်ချောင်းအားလုံးရှိ လက်ဆစ်ဖျားကလေးများသည် ရှေ့သို့ငိုက်ပြီး ကျိုးနေကြပါသည်။

ကျွန်မသည် အဘွား၏ လက်ချောင်းကလေးများကို မြင်သည့်အခါ အဘွားလက်ချောင်းကလေးများနှင့်တူအောင် မိမိလက်ဆစ်ကလေးများကို အားစိုက်ချိုးပြီး အဘွား၊ အဘွား ဒီမှာကြည့်ပါဦး အဘွားလက်ချောင်းနှင့် တူတယ် မဟုတ်လား-ဟု လုပ်ပြပါသည်၊ ထိုအခါ အဘွားက ငါ့မြေးလေး လုပ်မပြကောင်းဘူး၊ ၀ဋ်လည်တတ်တယ်၊ နောက် လုပ်မပြနဲ့-ဟု ဆုံးမပါသည်၊ ကလေးဘ၀အရွယ် ၀ဋ်လည်တတ်သည်ဟု ပြောသည်ကို ကျွန်မ မသိနားမလည်ပါ၊ ထို့ကြောင့် ကျွန်မက ၀ဋ်လည်ပါစေ-ဟု အဘွားကို ပြန်ပြောပြီး ပြက်ရယ်ပြုလုပ်ပါသည်။

ထိုအခါ အဘွားက ငါ့မြေးလေး ငါ့လို လက်ကလေးတွေ မကျိုးပါစေနဲ့၊ ၀ဋ်လည်တာကို မသိနားမလည်လို့ လုပ်ပြတာပဲ၊ အဘွားခွင့်လွှတ်ပါတယ်-ဟု တိုးတိုးလေးပြောလေ့ ရှိပါသည်။

ကျွန်မအသက် ၄၀-ကျော်မှ စပြီးလက်ဆစ်ကလေးများ ရောင်ခြင်း၊ နာခြင်း၊ မကြာခဏ ဖြစ်လာပါသည်၊ ယခုအသက် ၅၄-နှစ်တွင် ကျွန်မ၏လက်ချောင်းကလေးများ ကော့နေပြီး လက်ဖျားကလေးများ ကျိုးနေပါသည်၊ ဤကဲ့သို့ ကျွန်မ၏ သေးသွယ် နုနယ်သော လက်ချောင်းကလေးများ ကော့နေခြင်း၊ ကျိုးနေရခြင်းသည် အဘွား၏ ဆုံးမစကားကို နားမထောင်ခဲ့သည့်အတွက် ၀ဋ်လည်သည်-ဟု ကျွန်မ ယုံကြည်မိပါသည်။

( ဒေါ်သန်းနွယ်-ကြံခင်းမြို့ )

( မြတ်မင်္ဂလာ ၁၉၉၄-ခု ဖေဖော်ဝါရီလ )

No comments: