Wednesday, March 25, 2009

ဓမ္မဂီတ ကျူးရင့်သူ

ဝိသာခါသည် ခုနစ်နှစ်အရွယ်ကပင် သောတာပန်ဖြစ်ခဲ့၏၊ အရွယ်ရောက်သည့်အခါ ပုဏ္ဏ၀ဍ္ဎန သတို့သားနှင့် ထိမ်းမြားသည်၊ မြတ်စွာဘုရားသခင် သာဝတ္ထိပြည်၌ သီတင်းသုံးတော်မူသောအခါ ၀ိသာခါသည် ၂၇-ကုဋေသော ဥစ္စာတို့ဖြင့် ပုဗ္ဗာရုံကျောင်းတော်ကြီးကို ဆောက်လုပ်လှူဒါန်းခဲ့သည်၊ ကျောင်းရေစက်ချပွဲတွင် ၀ိသာခါသည် သားသမီးမြေးမြစ်များခြံရံလျက် ယခုအခါ ငါသည် တောင့်တတိုင်း ပြည့်စုံပြီး၊ ဆွမ်းသင်္ကန်းဆေးတို့ကို စိတ်တိုင်းကျ လှူခဲ့ရပြီ၊

တထပ်တထပ်၌ တိုက်ခန်း ငါးရာစီပါသော နှစ်ထပ်တိုက်ကျောင်းကြီးကိုလည်း ဆောက်လုပ်လှူဒါန်းရပြီး ကျောင်းတော်ကြီး၏ ပတ်ဝန်းကျင်တွင် ကမ္မဋ္ဌာန်းကျောင်းငယ် ငါးရာကိုလည်း ဆောက်လုပ်လှူဒါန်းရပြီး ဒါနကုသိုလ် သရဖူဆောင်း၍ ကောင်းမှုအထွတ်ရောက်ခဲ့ပြီ-ဟု အားရကျေနပ်ကာ ကျောင်းတော်ကိုလှည့်ပတ်၍ သာယာနာပျော်ဖွယ်သောအသံဖြင့် ၀မ်းမြောက်ဝမ်းသာ သီဆိုလျက် ဥဒါန်းကျူးရင့်လေသည်။

ထိုအသံကို ကြားရသော ရဟန်းများက အံ့အားသင့်ကာ ကျောင်းအမကြီးသည် သူ့မြေးမြစ်တွေ တစုတဝေးကြီးခြံရံလျက် ကျောင်းပတ်လည်လျှောက်ပြီး သီချင်းဆိုနေသည်၊ ရူးသွပ်သွားလေပြီလား-ဟု ပြောဆိုနေကြ၏၊ ဘုရားရှင်သိတော်မူသောအခါ ငါ၏သမီး ၀ိသာခါသည် သီချင်းဆိုခြင်းမဟုတ်၊ ကောင်းမှုကုသိုလ်များအတွက် ၀မ်းမြောက်ပီတိဖြစ်လျက် ဥဒါန်းကျူးရင့်ခြင်းသာဖြစ်သည်-ဟု မိန့်တော်မူကာ အောက်ပါဂါထာကို ဟောတော်မူသည်။

( ပါဠိဂါထာ )
ယထာပိ ပုပ္ဖရာသိမှာ ၊ ကယိရာ မာလာဂုဏေ ဗဟူ ။
ဧ၀ံ ဇာတေန မစ္စေန ၊ ကတ္တဗ္ဗံ ကုသလံ ဗဟုံ ။

( မြန်မာပြန် )
လိမ္မာသော ပန်းသည်သည် အထူးထူးအပြားပြား များစွာသော ပန်းပွင့်အပေါင်းမှ ပန်းကုံးများစွာကို ပြုရာသကဲ့သို့ လိမ္မာသောသူသည် ဥစ္စာတည်းဟူသောပန်း၊ သဒ္ဓါတရားတည်းဟူသောပန်းအစုမှ ကျောင်း သင်္ကန်း ဆွမ်း ဆေး စသော များစွာသောကုသိုလ်ကောင်းမှု တည်းဟူသော ပန်းကုံးတို့ကို ပြုရာ၏။

( ဆောင်ပုဒ် )
ပန်းမျိုးစုံပြီး၊ ပန်းပုံကြီးမှ၊ ရွေးပြီးစီရီ၊ ပန်းကုံးသီသို့၊
လူ့ပြည်မွေးသေ၊ လူတတွေလည်း၊ များထွေဥစ္စာ၊
သဒ္ဓါပန်းစုံ၊ ပန်းအပုံမှ၊ ဒါနကောင်းမှု၊ ကုသိုလ်စုကို၊
ရှေးရှုကြိုက်ရာ၊ ပြုလုပ်ရာ၏။

( ပုပ္ဇ၀ဂ်-၀ိသာခါဝတ္ထု )

No comments: