Wednesday, March 25, 2009

ကံ ကံ၏အကျိုး ( ၃၆ )

( ကျေးဇူးတရားကြောင့် )

ကိုမြင့်ဆိုသူ လူပျိုးကြီးတယောက်သည် မန္တလေးတိုင်း စဉ်းကူးမြို့နယ် တောင်ဘက်ကျေးရွာတွင် နေထိုင်လျက်ရှိသည်၊ မိခင်အိုကြီး ဒေါ်သောင်းရင်ကို လုပ်ကိုင်ကျွေးမွေး စောင့်ရှောက်လျက် ရှိသည်၊ သူသည် လူရိုး လူအေးဖြစ်သည်၊ သဘောထားပြည့်ဝသည်၊ ဘုရားကို ရိုသေကိုင်းရှိုင်း၏၊ လိမ္မာယဉ်ကျေးပြီး သိမ်မွေ့စွာ နေထိုင်တတ်သည်၊ သူတပါးအပေါ် စေတနာထားသည်၊ ကြီးသူကို ရိုသေ၊ ရွယ်တူကို လေးစား၊ ငယ်သူကို သနားတတ်သည်။

ကိုမြင့်သည် တောင်သူအလုက်ဖြင့် အသက်မွေးဝမ်းကျောင်းပြုရင်း မိခင်အိုကြီးကို လုပ်ကိုင်ကျွေးမွေး ပြုစုစောင့်ရှောက် နေရသည့်အတွက် ၀မ်းသာမဆုံး ဖြစ်နေ၏၊ တနေ့တွင် မြေပဲခင်းရှိ ပေါင်းပင်များကို ရှင်းလင်းသုတ်သင်ရန်အတွက် တောင်ဘက်ရွာမှ မြေပဲခင်းရှိရာသို့ ရောက်ရှိခဲ့သည်၊ ရောက်ရောက်ချင်း ပေါင်းပင် မြက်ပင်များကို ရှင်းလင်းပါသည်၊ ထိုသို့ အလုပ်လုပ်နေဆဲမှာပင် မြေပဲခင်းထဲက မြွေပွေးကိ်ုက်ခံလိုက်ရပါသည်၊ သိသိချင်း အော်ဟစ်ကာ လဲကျသွားသည်၊ သူ၏အော်သံကြောင့် အနီးပတ်ဝန်းကျင်ရှိလူများ အားလုံး အပြေးရောက်ရှိလာကြပါသည်၊ ကိုမြင့်သည် မျက်လုံးများပြာဝေပြီး စကားမပြောနိုင်တော့ပါ၊ ကိုမြင့်၏စိတ်ထဲမှ ငါတော့ အကောင်ကိုက်ခံရပြီ၊ ငါ မသေနိုင်ပါဘူး၊ သေလည်း ငါ့မိခင်အတွက် သေရကျိုးနပ်တယ်-ဟု မိမိကိုယ်ကို အားပေးစကား ပြောနေပါသည်၊ အနီးပတ်ဝန်းကျင်မှ လူများက ဆေးရုံသို့ပို့ပေးကြသည်၊ ဆေးရံသို့ ရောက်သောအခါ ဘုရားကိုတမ်းတရင်း မိခင်အိုကြီးကို တမ်းတရင်းဖြင့် သတိလစ်ပြီး မေ့မြောသွားပါသည်၊ သို့သော်လည်း ဆရာဝန်များ၏ စေတနာအပြည့်အ၀နှင့် ဂရုစိုက်ကြိုးစားပြီး ကုသမှုကြောင့် ကိုမြင့်မှာ အသက်ဘေးမှ လွတ်မြောက်ခဲ့ရပါသည်။

၁၉၈၆-ခုနှစ်အတွင်းကလည်း ဘေးအန္တရာယ်နှင့် ကြုံတွေ့ခဲ့ရပါသေးသည်၊ ရွှေထွက်ရာဒေသဖြစ်သော မန္တလေးတိုင်း စဥ့်ကူးမြို့နယ် နွယ်ရုံကျေးရွာ၏ မြောက်ဘက်နားရှိ လသာစခန်း ဆယ်ပြာဘေစခန်း ကျီးတောက်ပေါက်စခန်း ရုံးကင်ချပ်စခန်းများတွင် ရွှေတွင်းသွားတူစဉ်က ဖြစ်သည်၊ မိုးရာသီအချိန်ဖြစ်၍ အင်းများပျိုကျတတ်ပါသည်၊ ကိုမြင့် ဆင်းပြီးတူးသည့် အင်းမှာ စတုရန်းပုံလေးထောင့်ဖြစ်သည်၊ ၂-တောင်ပတ်လည်ကျယ်သည်၊ အတောင် ၂၀-နီးပါးခန့် နက်ပါသည်၊ ကိုမြင့်သည် အင်းထဲသို့ဆင်းပြီး ကျောက်ဖြုန်းများကို သံတူးရွင်း ပေါက်ပြား ချွန်းများဖြင့် တူးဆွနေစဉ် မြေကြီးတွေ အက်ကွဲလာပြီး အင်းကြီးပျက်စီးသွားပါသည်၊ မြေကြီးများအားလုံး ကိုမြင့်အပေါ် ဖိမိသည်၊ ကိုမြင့်သည် တွင်းထဲမှာ ဒူးတုပ်ပြီး လက်နှစ်ဖက်ကို နဖူးနှင့်ထောက်ထားရသည်၊ မြေကျင်းပေါ်က လူတွေရဲ့ ပြောသံဆိုသံတွေ ကြားရသည်၊ သို့သော် ပြန်မပြောနိုင်တော့ပါ၊ ဖိထားသည့်မြေကြီး ကျောက်စရစ် ကျောက်ခဲများ ဒဏ်ကြောင့် နာကျင်စွာ ခံစားနေရရှာသည်။

ကိုမြင့်သည် ဘယ်လိုပင်ခံစားနေရသော်လည်း ပထမကြုံခဲ့ရသည့် မြွေပွေးအန္တရာယ် တွေ့စဉ်ကလိုပင် ဘုရားကို တမ်းတ၊ မိခင်အိုကြီးကို တမ်းတပြီးသာ နေရရှာသည်၊ မြေစပိသည့်အချိန်လောက်အထိ ကျင်းထဲမှာပင် နေရပါသည်။

နောက်မှ လုပ်ကိုင်ဖက်ဖြစ်သော ကိုချစ်မဲဆိုသူ လူပျိုကြီးက ဦးဆောင်ပြီး တူးဖော်ကြပါသည်။ နောက်ဆုံး တူးဖော်အောင်မြင်ကြ၍ ကိုမြင့်သည် အသက်ဘေးမှ ဒုတိယအကြိမ် လွတ်မြောက်ပြီး ဆေးရုံသို့ ရောက်ရှိသွားပါသည်။

ကိုမြင့်နေကောင်းသောအခါ သူ၏အဖျစ်အပျက်ကိုမေးကြည့်ရင်း ဘာကြောင့် အသက်အန္တရာယ်က လွတ်တာလည်းမေးရာ ကျွန်တော်ဟာ ရတနာသုံးပါးကို ဆည်းကပ်တယ်၊ မိခင်အိုကြီးကို လုပ်ကျွေးတယ်၊ မိခင်ရဲ့စကားကို မြေ၀ယ်မကျ နားထောင်တယ်၊ လူသားအားလုံးအပေါ်လည်း စေတနာ မေတ္တာထားတယ်၊ အဲဒီမေတ္တာ စေတနာတွေက ချက်ချင်းအကျိုးပေးတယ်လို့ ထင်တာပဲ-ဟု ဖြေကြားပါသည်၊

ထို့ကြောင့် ကိုမြင့်ကဲ့သို့ ရတနာသုံးပါး ဆည်းကပ်ပြီး မိဘတို့အား ပြုစုလုပ်ကျွေးလျက် သက်ရှိသတ္တ၀ါအားလုံးအပေါ် မေတ္တာတရားပွားများနိုင်ကြစေရန် အဖြစ်မှန်ကို တင်ပြအပ်ပါသည်။

( အောင်ကျော်သက်-မန္တလေး )
********************************************************************************

( ( ရက်စက်သူ၏ ကံ )

လွန်ခဲ့သော ၂-နှစ်ခန့်က ဖြစ်ပါသည်၊ ကျွန်မတို့ ညီအမနှစ်ယောက်သည် တောင်တွင်းကြီး တောင်ပြင်ရပ်သို့ အလည်သွားခဲ့ပါသည်၊ ကျွန်မတို့ သွားလည်သောအိမ်တွင် ကိုသောင်း+မသန်းဝင်း ဆိုသော လင်မယားနှစ်ယောက်ရှိပြီး သူတို့တွင် သားသမီးနှစ်ယောက် ရှိပါသည်၊ ယောက်ျားဖြစ်သူမှာ စိတ်ကောင်းရှိသလောက် မိန်းမဖြစ်သူသည် ရက်စက်ယုတ်မာသူဖြစ်သည်၊ သူတို့သည် အစိုးရ၀န်ထမ်းများ ဖြစ်ကြသည့်အတွက် မအားလပ်ကြပါ၊ ထိုအခါ မိန်းမဘက်မှ ဆွေမျိုးနီးစပ်တော်သော ဘုတ်ဆုံဆိုသည့် ၁၀-နှစ်အရွယ် ကောင်မလေးတယောက်ကို ကျောင်းထားပေးမည်ဆိုကာ ခေါ်ယူမွေးစားခဲ့ပါသည်။

ဘုတ်ဆုံသည် ရုပ်ဆိုးသူဖြစ်သော်လည်း စိတ်ကောင်းအလွန်ရှိသူလေး ဖြစ်သည်၊ ကျောင်းထားပေးမည်ဆိုသော်လည်း ကျောင်းမနေရဘဲ အိမ်ရှိအလုပ်များကို မနားမနေလုပ်ကိုင်ရသည့်ပြင် ကလေးနှစ်ယောက်၏ ကိစ္စအ၀၀၊ ဘုရားဝေယျာဝစ္စများကိုပါ တာဝန်ယူရသည်၊ ညကျလျှင် မသန်းဝင်းကို နှိပ်တန်နှိပ်၊ နင်းတန်နင်း နှင့် ၀တ်ကြီးဝတ်ငယ် ပြုစုရသည်မှာ အရွယ်နှင့်မမျှအောင်ပင် ဖြစ်ပါသည်။

ထိုသို့ ပြုစုသည့်ကြားမှပင် စိတ်မထင်လျှင် မထင်သလို ဆဲရေးတိုင်းထွာကာ ရိုက်နှက်ညှဉ်းပန်းသည်မှာ လမ်းမလျှောက်နိုင်သည်အထိပင် ဖြစ်သည်၊ အိမ်ရှင်၏ ကလေးနှစ်ယောက်ကလည်း ရိုက်နှက်ဆဲဆိုတတ်ကြသေးသည်၊ အစာကိုလည်း ၀အောင် မကျွေး။ ဆွမ်းတော်စင်မှ စွန့်ပြီးမှသာ မနက်စာ ကျွေးပါသည်၊ ထမင်းသိုး ဟင်းသိုးများကိုလည်း ဘယ်တော့မှ လွင့်မပစ်ဘဲ ကျွေးသဖြင့် ကလေးမလေးမှာ ကြောက်ကြောက်နှင့် စားနေရပါသည်၊ အခြားသရေစာများကို ဘေးအိမ်များမှ သနားလို့ကျွေးမှသာ စားရပါသည်၊ ဘုတ်ဆုံလေးမှာ ဧည့်သည်လာသမျှ ညည်းညူတိုင်တန်းရှာသည်၊ ဤသည်ကို ယောက်ျားဖြစ်သူ ကိုသောင်းသည် လုံးဝမသိရှာပေ၊ ကလေးမလေးကိုလည်း မသန်းဝင်းက ကြိမ်းမောင်းထားသဖြင့် မတိုင်ရဲပေ၊ ဤမျှ ညှဉ်းပန်းနှိပ်စက်မှုဒဏ်ကြောင့် ကောင်မလေးမှာ ထိုအိမ်မှ ထွက်ပြေးသွားပါသည်။

တနှစ်ခန့်ကြာသောအခါ မသန်းဝင်းသည် သူတပါးကို ရက်စက်စွာ နှိပ်စက်သဖြင့် အချိန်မဆိုင်းဘဲ စေတနာကံ၏ အကျိုးကို တန်ပြန်ခံရသည်။

တတိယမြောက် သူ့ရင်သွေး ရတနာကို ဖွားမြင်ရာ မဖွားမြင်နိုင်ဘဲ အခက်အခဲအမျိုးမျိုး ကြုံတွေ့ခံရပြီး ရင်သွေးလေးမှာလည်း အသက်မရှင်ဘဲ သေဆုံးသွားခဲ့လေသည်၊ ထိုရင်သွေးလေး သေဆုံးသွားပြီးနောက် မကြာမီတွင် မသန်းဝင်မှာ အနာများပေါက်ပြီး ဖျား၍ အိပ်ရာထဲတွင် လဲလေသည်၊ ဖျားနာရာမှ နာတာရှည် လေးဘက်နာ ဖြစ်လာသည်၊ ခြေတွေ လက်တွေ မသယ်နိုင်ဘဲ ရှိလေသည်၊ ဆရာအမျိုးမျိုးနှင့် ကုသော်လည်း သက်သာမှု မရှိသည့်အပြင် ရောဂါဒေ၀နာ ပို၍သာ ဆိုးဝါးလာလေသည်၊ မသန်းဝင်းသည် နာကျင်လွန်းသဖြင့် အော်ဟစ်ညည်းတွားရာ ဘေးအိမ်မှ လူများပင် နာမခံနိုင်အောင် ဖြစ်ရသည်၊ လူမသေဘဲ ခြေတွေ လက်တွေ မလှုပ်နိုင်၊ မရှားနိုင်ဘဲ ဖြစ်နေသည်ကို တွေ့မြင်ရပါသည်။

ဤသို့ ဘုတ်ဆုံဆိုသည့် ကလေးမလေးကို ကြင်နာမှုကင်းကာ ရက်စက်ပြုမူသည့်ဒဏ်ကို မျက်မှောက်မှာပင် ဆိုးဝါးစွာ ခံစားနေရသည့်အဖြစ်မှာ လက်တွေ့သာဓက တရပ်ပင်ဖြစ်ပါသည်။

( မရှင်နှောင်းမြတ်-တောင်တွင်းကြီး )

( မြတ်မင်္ဂလာ ၁၉၉၄-ခု ဧပြီလ )

No comments: