Sunday, March 8, 2009

ကံ ကံ၏အကျိုး ( ၂၇ )

( တူသောအကျိုး )

ရန်ကုန်နှင့်ပြည် အကြားရှိ မြို့တမြို့တွင် မလှတင်-ခေါ် အသက် ၅၀-အရွယ် အမျိုးသမီးကြီးတယောက် ရှိသည်၊ မလှတင်သည် အမည်နှင့်လိုက်အောင် ရုပ်ရည်လှပသလို စိတ်ထားလည်း လှပသူတယောက် ဖြစ်သည်၊ သူ၏မိဘများသည် ကြက်များကိုသတ်၍ အသက်မွေးဝမ်းကျောင်းနေကြသူများ ဖြစ်သည်။

မလှတင်တွင် အမကြီးနှစ်ယောက်ရှိသည်၊ ယင်းအမကြီးများသည် ကိုယ်တိုင် ကြက်ကို လည်လိမ်သတ်၍ ရောင်းချကြလေသည်၊ မလှတင်ကမူ ဤသို့ပြုလုပ်၍ အသက်မမွေးလို၊ အသက်ကလည်း ငယ်၊ မိဘနှစ်ပါးနှင့် အမကြီးများကိုလည်း မပြောရဲသဖြင့် စိတ်မကောင်းစွာ နေရရှာလေသည်။

တနေ့သ၌ မလှတင်အား သူ၏အမကြီးများက ကြက်သတ်နည်းကို လက်တွေ့ပြသ၍ ကြက်များကို အသတ်ခိုင်းကြလေသည်၊ သို့သော် မလှတင်သည် အခြားအလုပ်ဆို ဘာခိုင်းခိုင်း လုပ်မည်ဖြစ်ကြောင်း ကြက်သတ်ရမည်ကိုမူ မပြုလို-ဟု ငြင်းရှာလေသည်။

မလှတင်ကို ကြက်သတ်ရန် ခိုင်းမရသဖြင့် အမကြီးများသည် မကျေမနပ်ဖြစ်ကြသည်၊ အမျိုးမျိုးပြောဆို ဆူပူကြလေသည်။ မလှတင်သည် အမကြီးများ၏ ဆူပူခြင်းကို တလုံးတပါဒမျှ ပြန်မပြော၊ ထိုနေ့မှစ၍ ကြက်သားဟင်းသာမက မည်သည့်အသားမျှ မစားတော့သည်မှာ ယနေ့ အသက် ၅၀-ကျော်သည့်တိုင်အောင် ဖြစ်ပါသည်။

သို့အတွက်ကြောင့် ထင်ပါသည်၊ မလှတင်မှာ အသားအရေ ၀ါဝင်း၍ ကျန်းမာရေး အထူးကောင်းမွန်သည်၊ သားသမီးများနှင့် ပျော်ရွှ့င်စွာ နေထိုင်လျက်ရှိသည်။

မလှတင်၏ အမကြီးများသည်ကား အသက်အရွယ် ငယ်ငယ်နှင့်ပင် ရှေ့ဆက်နောက်ဆက် ဆိုသလို လည်ပင်းကြီးရောဂါစွဲ၍ ကွယ်လွန်ခဲ့ကြရှာသည်။ ကြက်များကို လည်လိမ်၍ သတ်ခဲ့သော အကုသိုလ်ကံ အကျိုးကား နောက်ဘ၀ပင် မစောင့်၊ ယခုဘ၀မှာပင် မလှတင်၏အမကြီးများသည် ခံသွားကြရှာသည်၊
တနည်းအားဖြင့်လည်း တူသောအကျိုးပေးဟု ဆိုရမည်သာ ဖြစ်ပါတော့သည်။

( မောင်နန္ဒာ-မန္တလေး )

( မြတ်မင်္ဂလာ ၁၉၉၃-ခု ဇန်န၀ါရီလ )

No comments: