Tuesday, March 17, 2009

ကံ ကံ၏အကျိုး ( ၃၁ )

( မျက်စိကွယ်သွားသူ )
ကျွန်တော်တို့ ရွာတွင် လယ်သမားကြီးတယောက် ရှိသည်၊ သူ့တွင် လယ် ၁၀-ဧကခန့်နှင့် နွားနှစ်ရှဉ်း ရှိပြီး အတော်အသင့် ချမ်းသာသောသူ ဖြစ်ပါသည်။

သို့သော် သူသည် စေတနာနည်းသူ ဖြစ်ပါသည်၊ မိမိပိုင်နွားများအပေါ် သနားညှာတာခြင်း ကင်းမဲ့ပါသည်၊ နွားများကို အစားအစာ ကျွေးမွေးရာတွင် စေတနာမရှိပါ၊ ဖြစ်သလိုကျွေးမွေးပါသည်။

တနေ့သောအခါ အနက်ရောင်ရှိသော နွားတကောင်ကို လှည်းတိုက်ရာတွင် အဆင်မပြေသဖြင့် ရိုက်နက်ဆုံးမပါသည်၊ သူရိုက်သည့်ဒဏ်ရာကြောင့် မျက်စိတဖက်မှာ တိမ်လိုက်လာကာ ကုမရသည့်အဆုံး မျက်စိကွယ်သွားပါသည်။ အလုပ်လုပ်ကိုင်ရာတွင် အဆင်မပြေသည့်အတွက် နောက်ဆုံး ထိုနွားကို သားသတ်သမားများလက်သို့ ရောင်းချလိုက်ပါသည်။

ထိုနွားကိုရောင်းချပြီး ငါးလခန့်ကြာသောအခါ သူသည် ထိခိုက်ဒဏ်ရာမရှိဘဲ မျက်စိမှ မျက်ရည်များကျ၍ ယားယံပြီး မျက်စိနာလာပါသည်၊ သူ၏အိမ်သားများက ဆေးမြီးတို မြန်မာဆရာများနှင့် ကောင်းနိုးရာရာ ကုသကြပါသည်။

မထူးခြားသောကြောင့် မော်လမြိုင် ရန်ကုန်မြို့ကြီးများတွင် မျက်စိရောဂါ အထူးကု ဆရာဝန်များနှင့် ကုသပါသော်လည်း မကောင်းတော့ပါ၊ ငွေလည်းအတော်ကုန်ခန်းသွားပါသည်၊ လယ်ယာလုပ်ငန်းကိုလည်း မလုပ်ကိုင်နိုင်တော့ပါ။ နောက်ဆုံးတွင် မျက်စိနှစ်လုံးလုံး လုံးဝ ကွယ်သွားပါသည်။

ကျေးဇူးရှင်ဖြစ်သော မိမိနွားကို ရိုက်နှက်မိ၍ နွားမျက်စိကွယ်သလို သူလည်း မျက်စိကွယ်သွားသည်-ဟု ကျွန်တော် ထင်မြင် ယူဆမိပါသည်။

( ရဲထွန်းကျော်-မြိတ် )
********************************************************************************

( ကောင်းမှုပြု ကောင်းကျိုးရ )

ကျွန်တော်တို့ရွာတွင် အသက် ၄၅-နှစ်ရှိ ကိုဝင်းတင် ဆိုသူ လူပျိုကြီးတဦးရှိသည်၊ ညီ ညီမများမှာ အားလုံး အိမ်ထောင်ပြုသွားကြပြီး ဖြစ်သည်၊ သူကမူ အိမ်ထောင် မပြုဘဲ လယ်ယာလုပ်ကိုင်ပြီး အသက် ၇၀-ကျော် အရွယ်ရှိ မိအို ဖအိုတို့ကို ပြုစုစောင့်ရှောက်နေသည်။ မိဘနှစ်ပါး၏ ဆုံးမသွန်သင်မှုကို နာခံမှတ်သားသည်၊ ဆရာသမားများကိုလည်း ရိုသေလေးစား ကိုင်းရှိုင်းသည်၊ သီတင်းနေ့များတွင် ဥပုသ်မှန်မှန်စောင့်သည်၊ ရပ်ရေး ရွာရေး ဘာသာရေး လုပ်ငန်းများတွင်လည်း ပါဝင်ကူညီဆောင်ရွက်သည်၊ စိတ်နှလုံးကောင်းသူ ဖြစ်သည်။

တညတွင် ကိုဝင်းတင်သည် မီးဖိုဆောင်တံခါးကို မပိတ်မိဘဲ အိပ်ပျော်သွားသဖြင့် သူခိုး ခိုးယူခြင်း ခံလိုက်ရသည်၊ ရွှေ ငွေ ပစ္စည်းများ ပါသွားသည်၊ သူခိုးခိုးခံရပြီး သုံးရက်အကြာ ည ၁၂-နာရီခွဲခန့် အချိ်န်တွင် ကိုဝင်းတင်သည် အပေါ့စွန့်ရန် လက်နှိပ်ဓာတ်မီးထိုး၍ အောက်သို့ဆင်းရာ အိမ်လှေကားရင်း၌ အ၀တ်ထုပ် တထုပ်ကို တွေ့ရသည်၊ ထိုအထုပ်ကို ဖြေကြည့်ရာ သူခိုးခိုးယူသွားသော သူ၏ပစ္စည်းများ ဖြစ်နေပြီး အားလုံးတခုမကျန် ပြည့်ပြည့်စုံစုံ ပါရှိနေသည်ကို အံ့သြစွာ တွေ့လိုက်ရသည်။

ထိုအဖြစ်အပျက်ကို ရပ်ရွာရှိ ကလေးလူကြီးများက ပြောဆိုနေကြသည်မှာ ဒီလူ အတော်ကုသိုလ်ထူးတဲ့ လူပဲ၊ အေး-ကုသိုလ်ထူးတာလည်း မပြောနဲ့၊ မိဘကို လုပ်ကျွေး၊ ဆရာသမား လူကြီးတွေကို ရိုသေ၊ ဥပုသ်သီလ မှန်မှန်စောင့် စတဲ့ သူပြုတဲ့ ကောင်းမှုကုသိုလ်ကံတွေက သူ့ကိုပြန်ပြီး အကျိုးပေးတာပဲ-ဟူ၍ ဖြစ်ပါသည်။

( ထီးချိုင့်-မောင်ကံဦး )

( မြတ်မင်္ဂလာ ၁၉၉၃-ခု အောက်တိုဘာလ )

No comments: