Wednesday, March 11, 2009

ကံ ကံ၏အကျိုး ( ၂၈ )

( ထီပေါက်သူ )

ဝါးခယ်မမြို့ ဘုရားလမ်းနေ ( ရွှေလက်ရုံး ဆံသ ) -ပိုင်ရှင် ဦးအုန်းဟန်သည် တိရစ္ဆာန်များကို ကြင်နာသနားတတ်သူဖြစ်၏၊ တိရစ္ဆာန်များအား တတ်နိုင်သမျှ အစဉ်ကျွေးမွေးနေသူဖြစ်သည်။

တနေ့ ထိုစေတနာရှင် ဦးအုန်းဟန်နှင့် ကျွန်တော် ဆုံဖြစ်ခဲ့ကြသည်၊ သူ့အကြောင်းကို မေးမြန်းကြည့်သောအခါ ဦးအုန်းဟန်က ဤသို့ ပြောပြသည်၊ ကျွန်တော် ဒီဆံသအလုပ် မလုပ်ခင်က တွဲဆွဲသင်္ဘောလေးနှစ်စင်း လုပ်ခဲ့ဖူးသေးတယ်၊ ကံမလိုက်ချင်တော့ ရှုံးလို့ ပြန်ရောင်းလိုက်ရတယ်၊ အဲသည်တုန်းက ငယ်သေးတယ်၊ ကျွန်တော်လည်း စိတ်ညစ်ညစ်နဲ့ ၀ါးခယ်မမြို့ ကမ်းနားလမ်းမှာ ရှိတဲ့ ပြန်ကြားရေး စာကြည့်တိုက် ရောက်သွားခဲ့တယ်၊ ဟိုတုန်းကတည်းက စာဖတ်တော့ ၀ါသနာပါခဲ့တယ်ခင်ဗျ၊ စာဖတ်မယ်ဆိုပြီး သွားခဲ့တာပေါ့။

အဲသည်မှာ ကံအားလျော်စွာ စာတအုပ် သွားတွေခဲ့တယ်၊ ဒါနနည်းခဲ့လို့ မွဲရတဲ့အကြောင်းတွေ ဖြစ်နေတယ်ခင်ဗျ၊ ဒါနဲ့ ကျွန်တော်လည်း ငါ့မှာ ဒါနအလုပ်၊ သီလအလုပ်၊ ဘာဝနာအလုပ် ဘာတခုမှ မလုပ်ရသေးပါလားလို့ နောင်တရလာခဲ့တယ်။

အဲသည်က အပြန်မှာပါပဲ ကျွန်တော် ဘာသာရေးအလုပ် အားလုံး လုပ်တော့တာပဲဗျို့၊ သိသာတာကတော့ အထင်အရှားပါပဲ၊ ကျွန်တော် သီလဆောက်တည်တယ်၊ တရားရှုမှတ်တယ်၊ သတ္တ၀ါတွေကို မေတ္တာ ကရုဏာ ရှေ့ထားပြီး မရှိ-ရှိတာနဲ့ ကျွေးမွေးစောင့်ရှောက်တယ်၊ ဒီအကျိုးဆက်တွေကြောင့်ပဲ သမ၀ါယမက လက်ဆောင်ပေးလိုက်တဲ့ ထီတရွက်က သိန်းထီ ထပေါက်ခဲ့တယ်၊ အခုဆိုရင် အငှားဆံသလုပ်သားဘ၀က ဆိုင်ပိုင်ရှင်ဖြစ်လာတာကိုပဲ ကြည့်ပါတော့ ဆရာလေးရယ်။

ကျွန်တော်သည် တက်ကြွစွာ ပြောပြနေသော ရွှေလက်ရုံး ဆံသပိုင်ရှင် ဦးအုန်းဟန်ကို ကြည့်ကာ ကျေနပ်အားရ ပီတိဖြစ်မိနေပါသည်။

( ကျော်မိုးလွင်-၀ါးခယ်မ )
*********************************************************************************

( မြင့်ဦးနောင်တ )

ကန်သာယာရွာကလေးသည် မြို့နှင့် သုံးမိုင်သာကွာဝေးသော ရွာကလေးဖြစ်သည်၊ ကန်သာယာရွာတွင် သောက်ရေကန် သုံးကန် ရှိပါသည်၊ ကန်များ ရေနောက်လာသဖြင့် ရွာသားများ စုပေါင်းကာ ဒိုက်ဖတ်၊ ရေမှော်များကို ဖယ်ရှားသန့်စင်ခဲ့ပါသည်။ ကြည်လင်လာသော ကန်ရေကို ရွာသားတို့က တန်ဖိုးထား သုံးစွဲကြသည်၊ ရေကန်တွင်းသို့ ကျွဲ၊ နွား၊ တိရစ္ဆာန်များ ၀င်ရောက်ခြင်း မရှိရန် ထိန်းသိမ်း စောင့်ရှောက်ကြသည်။

သို့ရာတွင် ရွာ၏ အနောက်ပိုင်းတွင်နေသော အရက်သမား မြင့်ဦးသည် အရက်သောက်ပြီး ပြန်လာတိုင်း ရွာလယ်ပိုင်း ကန်တွင် ခြေ၀င်ဆေးလေ့ရှိသည်၊ ကြမ်းတမ်းစွာ ဆဲဆိုတတ်သဖြင့် မည်သူမျှ မပြောဝံ့ပေ၊ လာရောက်ပြောဆို တားမြစ်သူရှိပါက အရွဲ့တိုက်ပြီး ကန်ဘောင်ပေါ်မှာပင် ရေချိုးချတတ်ပါသည်။

တနေ့တွင် မြင့်ဦး၏ ဘယ်ဘက်ခြေမျက်စိတွင် အနာများ ပေါက်လာသည်၊ အနာများ တဖြည်းဖြည်း ပြည်တည်လာသည်၊ ပြည်တရွှဲရွှဲနှင့် အပုပ်နံ့ပင် ထွက်လာသည်၊ လမ်းမလျှောက်နိုင်တော့ပေ၊ အိပ်ရာတွင်လဲကာ ဝေဒနာကို ခံစားနေရသည်၊ ဤသို့ ဖြစ်ရခြင်းမှာ သောက်ရေကန်တွင် ခြေ၀င်ဆေးသောကြောင့် ဖြစ်ကြောင်းကို တရွာလုံးသာမက မြင့်ဦးပါ သိမြင်လာပါတော့သည်။

ထို့နောက် ရွာမှလူများ စုရုံး၍ မြင့်ဦးကို မြို့ဆေးရုံပို့ပေးပါသည်၊ တလခန့်ကြာသောအခါ မြင့်ဦး ရွာသို့ ပြန်လာသည်၊ အနာများ ပျောက်သွားပြီဖြစ်သော်လည်း ဘယ်ခြေမှာ မသန်တော့ပေ၊ ထော့နဲ့ ထော့နဲ့သာ လျှောက်နိုင်သည်။

ဆေးရုံမှ ပြန်လာပြီး မြင့်ဦးသည် အရက်မသောက်တော့ပါ၊ ရပ်ရွာ လူမှုရေးကိစ္စများတွင် ရှေ့ဆုံးမှ ပါဝင်တတ်လာသည်၊ ဥပုသ်နေ့များတွင် သီလစောင့်တတ်လာပါသည်၊ အချိန်မီ နောင်တ ရလာသော မြင့်ဦးနှင့်အတူ ကန်သာယာ ရွာကလေးမှာလည်း ပို၍ သာယာလှပလာပါသည်။

( ငုငယ်ငယ်ငြိမ်း-ရွှေပြည်သာ )

( မြတ်မင်္ဂလာ ၁၉၉၃-ခု မတ်လ )

No comments: