Thursday, March 26, 2009

ကံ ကံ၏အကျိုး ( ၃၈ )

( သူ့ အသက် )

ဦးဖိုးမောင်သည် ရွာသာကုန်း ရွာသားဖြစ်သည်၊ အနေအထိုင် အစားအသောက် ကြမ်းတမ်းသူဖြစ်သည်၊ သူ၏မိန်းမ မလှကြည်မှာ အေးဆေးတည်ငြိမ်၍ ဘုရားတရား ရိုသေသူတဦးဖြစ်သည်၊ တနေ့တွင် မိန်းမဖြစ်သူက ကိုဖိုးမောင် ကျွန်မ အိပ်မက်တွေမကောင်းဘူး၊ အိပ်မက်ထဲမှာ ရှင့်ကို မြွေကြီးတကောင်လိုက်လို့ ရှင်ပြေးနေရတယ်လို့ ကျွန်မအိပ်မက်မက်တယ်၊ ရှင် သွားတာ လာတာ သတိထားသွားနော်။

အမလေး၊ မလှကြည်ရာ အပိုစကားတွေ ပြောမနေစမ်းနဲ့၊ အိပ်မက်နဲ့ အပြင်နဲ့ ပြောင်းပြန်စီပါကွာ၊ မင်းမလဲ ပေါက်ပေါက်ရှာရှာ မက်တတ်တယ်-ဟု ပြန်ပြောလေသည်။

ကဲ မလှကြည် ငါ-လယ်ထဲကိုဆင်းမယ်၊ ငါကို နေ့လယ်ထမင်းလာပို့-ဟု ပြောပြီးသည်နှင့် နွားနှစ်ကောင်ကို ဆွဲကာ လယ်ထဲသို့ ထွက်သွားလေသည်၊ ဦးဖိုးမောင်၏ လယ်သည် သူ့အိမ်နှင့် မနီးမဝေး ဖြစ်သည်၊ လယ်ထဲသို့အရောက် ကန်ဘောင်ရိုးပေါ်တွင် မြွေတကောင်ဖြတ်သွားသည်ကို မြင်လိုက်သဖြင့် အနီးရှိ ၀ါးရင်းတုတ်နှင့် ခေါင်းကို ရိုက်ချလိုက်သည်၊ တချက်တည်းနဲ့ပင် မြွေသည် မလှုပ်တော့၊ ကြည့်လိုက်သောအခါ သူ၏ လက်ကောက်ဝတ်လောက် ရှိသည့် မြွေဟောက်ကြီး ဖြစ်နေလေသည်။

ဦးဖိုးမောင်၏ မျက်နှာမှာ ချက်ချင်း ၀င်းလက်သွားသည်၊ မြွေကို ခါးပိုက်ထဲထည့်ကာ မိန်းမဟင်းချက်အမီ ပြန်ပို့လေသည်၊ လမ်းတွင် ဗိုက်မှ စစ်ကနဲ စစ်ကနဲ-ပုရွက်ဆိတ် ကိုက်သလို နာနေသည်၊ သူ၏စိတ်ထဲတွင်လည်း သိပ်အလေးမထားမိ၊ အိမ်တံခါးဝသို့ ရောက်သော် မလှကြည်-ဟုခေါ်ကာ ဗိုက်ကိုလက်ဖြင့် အုပ်လျက် လဲကျသွားလေသည်၊ သူ့ယောက်ျား ခေါ်သံကြား၍ မလှကြည် အိမ်နောက်ဖေးမှ ပြေးထွက်လာကာ ကြည့်လိုက်သောအခါ ဦးဖိုးမောင် အသက်မရှိတော့၊ အိမ်နီးနားချင်းများက လာရောက်ကြည့်ကြသည်၊ အိမ်နီးချင်းများက တယောက်တပေါက်နှင့် ကျတ်ဖမ်းတာ၊ ပိုးထိတာ-ဟု ပြောနေကြသည်၊ ဦးဖိုးမောင်တို့ အိမ်ဘေးမှ ကိုစံမြက-

ဟာ-ကိုဖိုးမောင် ခါးပုံထဲမှာ လှုပ်စိ လှုပ်စိနဲ့ ဘာလေးတွေလည်း မသိဘူး-ဟု ပြောလိုက်ကာ အနီးတွင်ရှိသော တုတ်နှင့် ခါးပုံစကို ထိုးဖြေလိုက်ရာ မြွေပေါက်ကလေးများ ထွက်လာသည်၊ ကိုဖိုးမောင်၏ ဗိုက်တွင် နီနီအကွက် လေးငါးကွက်နှင့် သွေးစို့နေသည်။

ကိုဖိုးမောင် ရိုက်သတ်လိုက်သော မြွေမှာ အကောင်ပေါက်တော့မည့် မြွေဟောက်မကြီးပေတည်း၊ သူတပါးအသက်ကို သတ်မိသောကြောင့် မိမိလည်း အကုသိုလ်ဖိစီးမှုကို ပြန်လည်ခံစားရခြင်း ဖြစ်သည်။

အလွန်ကြောက်မက်ဖွယ် ကောင်းလှပေသည်၊ (ဖြစ်ရပ်မှန်)။

( ခိုင်ခိုင်ဝင်း-လေးမြေ )
********************************************************************************

( ၀စီကံ မြန်ပါဘိ )

ကျွန်တော်တို့ ရွာကလေးသည် ညောင်ပင်သာရွာဆိုသည့်အတိုင်း သာသာယာယာရှိပါသည်၊ ရွာ၏ပတ်လည်တွင် ဘုန်းတော်ကျောင်း ၄-ကျောင်းရှိသည်၊ ထို့ပြင် ရွာနှင့်မနီးမဝေးတွင် ၃-ကျောင်းရှိသေးသည်၊ အလှူအတန်း တရားပွဲ တရားထိုင် ဓမ္မတေးသံများ အစဉ်တစိုက် အခါမလပ် ကြားနာရသည်၊ ရတနာသုံးပါးကို မမေ့မလျော့နိုင်အောင် ဗြောသံ ကြေးစည်သံ ခေါင်းလောင်းထိုးသံများက အမြဲနှိုးဆော်သလို ဖြစ်နေပါသည်။

တနေ့ ကျွန်တော်၏ အိမ်အနီးနေ ဒေါ်စန်းရီ၏သား ရက်လည်ဆွမ်းသွပ်ရက် ဖြစ်သည်၊ ဒေါ်စန်းရီမှာ မုဆိုးမလည်း ဖြစ်၊ တဦးတည်းသော သားလေး ကွယ်လွန်သွားခဲ့သဖြင့် ပူဆွေးသောက လောင်မြိုက်နေသောကြောင့် ကျွန်တော်အပါအ၀င် ရပ်ကွက်သူ ရပ်ကွက်သားများ ၀ိုင်းဝန်းလုပ်ကိုင် ပေးကြသည်၊ သို့သော် ဒေါ်စန်းရီ၏ ညီမ သူဋ္ဌေးမကြီး ဒေါ်စန်းရှင်က နေရာတကာတွင် မောက်မာသော လေသံဖြင့် ပြောဆိုခိုင်းစေသောကြာင့် ၀ိုင်းဝန်းလုပ်နေသူ အချို့ ပြန်ပြေးကြသည်။

ဘုန်းကြီးကျောင်း တကျောင်းလျှင် ကျောင်းထိုင်ဆရာတော်နှင့် နောက်လိုက်တပါးစီ ပင့်ထားသည်၊ ရဟန်းသံဃာများကို အရုဏ်ဆွမ်း ကပ်မည်ဖြစ်သောကြောင့် နံနက် ၅-နာရီတွင် ရဟန်းသံဃာများ ကြွလာကြသည်။

ရဟန်းသံဃာများကို ကာယကံရှင် ဒေါ်စန်းရီ၏ ညီမ ဒေါ်စန်းရှင်က ဘာအလိုမကျသည်မသိ၊ မျက်နှာကြီးပုပ်ကာ နှုတ်ခမ်းစူလာသည်၊ ရဟန်းသံဃာများ ဆွမ်းစားနေသည့် စားပွဲအနီးသို့ ကပ်ကာ ကျောင်းထိုင်ဘုန်းကြီးတွေလည်း တပါးမှ မပါပါလား၊ ကိုယ်တော်တို့ ပြန်ရင် လျှောက်လိုက်စမ်းပါ၊ ကျောင်းထိုင်ဘုန်းကြီးတွေ ခြေကျိုး လက်ကျိုးနေသလားလို့-ဟု ပြောလိုက်ရာ ရဟန်းရှင်လူများ စိတ်မကောင်း ဖြစ်ကြရသည်၊ အချို့သော ရဟန်းများမှာ ဆွမ်းကိုပင် ပြီးစီးအောင် ဘုဉ်းမပေးတော့၊ မ၀ တ၀နှင့်ပင် ဖြတ်လိုက်ပုံရသည်။

အသုဘကိစ္စပြီးနောက် ၁၀-ရက်ခန့်အကြာ ဒေါ်စန်းရှင်နှင့် ခင်ပွန်း ဦးစိုးမြင့်-တို့ မန္တလေးရှိ နာမည်ကြီး ကျောင်းတကျောင်းသို့ တနှစ်စာ ဆွမ်းအလှူငွေ ကပ်လှူရင်း ပြင်ဦးလွင်မြို့သို့ အလည်သွားကြသည်၊ ထိုလမ်းခရီးတွင် ယာဉ်တိုက်မှု ဖြစ်ပွားခဲ့သည်၊ ဒေါ်စန်းရှင် ပွဲချင်းပြီး ကွယ်လွန်သွားသည်၊ ခင်ပွန်း ဦးစိုးမြင့်မှာ ခြေတချောင်း ကျိုးသွားပြီး လက်တဖက် ဖြတ်ပစ်လိုက်ရသည်၊ ကျန်ခရီးအတူသွားများမှာ ပွန်းပဲ့ဒဏ်ရာလောက်သာ ရရှိခဲ့သည်ဟု သိရပါသည်။

ဒေါ်စန်းရှင်တယောက် ၀စီကံ ထိုက်ပြီ-ဟု ဒေါ်စန်းရီ-၏ သားရက်လည်ဆွမ်း ကပ်သူများက မှတ်ချက်တူညီစွာ ချလိုက်ကြပါသည်။

တဆင့်စကား တဆင့် ဖြစ်ရပ်မှန် ကြားလိုက်ရသူ အများကလည်း-
ဝစီကံ ထိုက်တာပဲပေါ့၊ ၀စီကံများ တယ်ကြောက်စရာကောင်းပါလားနော်-တဲ့ ။
( အမည်မှန်များကို ပြောင်းလဲထားပါသည် )

( ဦးသာသန-သုတေသီ၊ တောင်ငူ-သပြေစမ်း )

( မြတ်မင်္ဂလာ ၁၉၉၄-ခု သြဂုတ်လ )

No comments: