မြတ်စွာဘုရားသည် ဝေဠုဝန်ကျောင်းတော်တွင် သီတင်းသုံးတော်မူစဉ် တနေ့၌ ရာဇဂြိုဟ်မြို့တွင်းသို့ သာဝကရှစ်ကျိပ်နှင့်အတူ ရဟန်းတော်ငါးရာ ခြံရံလျက် ဆွမ်းခံကြွတော်မူ၏။ ထိုစဉ် မုန့်အပြည့်ထည့်ထားသော တောင်းများကိုထမ်းလျက် ဥယျာဉ်သို့ ပျော်ပွဲစားသွားကြမည့် သူငယ်ငါးရာတို့နှင့် လမ်းတွင် ဆုံမိ၏။ သူငယ်တို့သည် ဘုရားကိုရှိခိုး အရိုအသေပြုပြီး သွားမြဲဆက်သွားကြသည်၊ ပါလာသောမုန့်ကို မလှူကြပေ၊
ဘုရားရှင်က ရဟန်းတို့ သစ်ပင်ရိပ်တွင် နားကြစို့၊ သူငယ်များ၏မုန့်ကို စားပြီးမှ ဆက်လက်သွားကြမည်၊ မုန့်ရှင်ဖြစ်သော ရဟန်းသည် နောက်တွင်လာနေပြီ-ဟု မိန့်ကြားတော်မူ၏၊ ရဟန်းတော်တို့သည် အဓိပ္ပါယ်ကို နားမလည်နိုင်ကြပေ၊ ဘုရားရှင်နှင့်အတူ သစ်ပင်ရိပ်တွင် နားနေကြစဉ် မကြာမီ အရှင်မဟာကဿပ ရောက်လာ၏၊
သူငယ်တို့သည် အရှင်မဟာကဿပအား ချဉ်းကပ်၍ မုန့်များလှူကြ၊ အရှင်ကဿပ-က ဘုရားရှင်နှင့်တကွ ရဟန်းတော်များအား ဆက်ကပ်ရန် ညွှန်ကြားရာ သူငယ်များက လိုက်နာကပ်လှူကြ၏၊ ပြီးသော် သောက်ရေ စသည် ကပ်လှူကြသေးသည်၊ ရဟန်းတော်များက သူငယ်တို့သည် ဘုရားရှင်အား မကပ်လှူဘဲ အရှင်မဟာကဿပကိုသာ မျက်နှာလိုက်၍ လှူဒါန်းသည်-ဟု ကဲ့ရဲ့ကြရာ ဘုရားရှင်က ရဟန်းတို့စကားကို ငြင်းပယ်တော်မူပြီးလျှင် ရဟန်းတို့ ငါ၏သားတော် ကဿပကဲ့သို့ ကျင့်သောရဟန်းကို လူရောနတ်ပါ ချစ်မြတ်နိုးကြသည်-ဟု မိန့်ကြားကာ အောက်ပါဂါထာကို ဟောတော်မူ၏။
( ပါဠိဂါထာ )
သီလဒဿန သမ္ပန္နံ ၊ ဓမ္မဋ္ဌံ သစ္စဝေဒိနံ ။
အတ္တနော ကမ္မ ကုဗ္ဗာနံ ၊ တံ ဇနော ကုရုတေ ပိယံ ။
( မြန်မာပြန် )
သီလနှင့်လည်း ပြည့်စုံ၊ ဉာဏ်အမြင်နှင့်လည်း ပြည့်စုံ၊ တရား၌တည်၍ အမှန်ကိုလည်း ပြောဆိုတတ်၊ မိမိပြုအပ်သည့် ကျင့်ဝတ်နှင့်လည်း ပြည့်စုံသောသူကို လူအပေါင်းသည် ချစ်မြတ်နိုး၏။
( ဆောင်ပုဒ် )
သီလဉာဏ်မြင်၊ ပြည့်စုံလင်၍၊ ဖြူစင်မွန်မြတ်၊ တရားဓာတ်ကို၊ ရလတ်တဖန်၊ အမှန်ပြောတတ်၊ ကိုယ်ပြုအပ်သည့်၊ သုံးရပ်သိက္ခာ၊ ဖြည့်ကျင့်လာတတ်၊ ပုဂ္ဂိုလ်မြတ်ကို၊ လူနတ်မျိုးမျိုး၊ ချစ်မြတ်နိုး၏။
( ပိယ၀ဂ်-ပဉ္စသတဒါရက၀တ္ထု )
Subscribe to:
Post Comments (Atom)
No comments:
Post a Comment