Thursday, March 12, 2009

ကံ ကံ၏အကျိုး ( ၂၉ )

( စေတနာအကျိုး ပဒေသာတိုး )

စာရေးသူတို့၏ ထန်းပင်များကို ထန်းခဖြင့် တက်သည့် ဦးရီးနှင့် ဒေါ်သန်းစိန်တို့တွင် သားသမီး ငါးယောက်ရှိသည်၊ အကြီးဆုံးသားမှာ ဖခင်နှင့်အတူ ထန်းတက်နိုင်သည်၊ အလတ်သမီးလေးသည် ဖခင်နှင့် အကိုတို့တက်သည့် မြူအိုး လိုက်ကောက်ရသည်၊ မိခင်သည် ရသမျှ ထန်းရည်ချိုများအားလုံး ထန်းလျက်ကျိုရသည်၊ ကျန်ကလေး သုံးယောက်မှာ လူမမည်လေးများသာ ဖြစ်သည်။

ထန်းသမားတို့၏ဘ၀ သားသမီးတို့ကို ကျောင်းမထားနိုင်သော်လည်း မိခင် ဖခင်တို့၏ သွန်သင်ဆုံးမမှုကြောင့် ကလေးများမှာ ဂါရ၀တရားရှိသည်၊ အပြောအဆို အနေအထိုင် အသွားအလာ စေတနာနှင့် သဒ္ဓါတရားကောင်းသည်၊ ဘုရားရှိခိုး မေတ္တာပို့ အမျှဝေနှင့် ဂုဏ်တော် ဂါထာတော်များကို အရွယ်နှင့်အညီ နှုတ်တက်သင်ပေးထားသည်။

ဦးရီးတို့ မိသားစုသည် ထန်းပင်တက်စားရသော်လည်း စေတနာ သဒ္ဓါတရားမှာ ရက်ရောလှသည်၊ ထန်းတဲသည် ရွာနှင့် တမိုင်ခန့် ဝေးသည်၊ အနီးပတ်ဝန်းကျင်တွင် ဘ၀တူထန်းသမားများ အများအပြားရှိသည်၊ သို့သော် တတောလုံးတွင် ဦးရီးတို့မှာ ထန်းလျက်အထွက်ဆုံးဖြစ်သည်။

ဦးရီးတို့ သားအဖသည် ထန်းတက်နေစဉ် ထန်းပင်ပေါ်မှကြည့်၍ မြင်မြင်သမျှ လူအပေါင်းအား ဇွတ်ခေါ်သည်၊ ထန်းရည်ချိုတိုက်ခြင်း၊ ထန်းလျက်ကျွေးခြင်းတို့ နေ့စဉ်ပြုလုပ်သည်၊ ဇနီးဖြစ်သူ ဒေါ်သန်းစိန်ကလည်း ထန်းတဲအနီးရှိ ယာထွန်သူ၊ မြက်ရိတ်သူ၊ ပဲကောက်သူ၊ ၀ါကောက်သူ စသည်တို့အား ထန်းရည်ချို၊ ထန်းလျက်တို့ဖြင့် နိစ္စဘတ်ကုသိုလ်ယူသည်၊ ဤသို့ အယုတ်အလတ် အမြတ်မရွေး စေတနာသန့်သန့်ဖြင့် နေ့စဉ် တိုက်ကျွေးနေသည်။

ထန်းသည် ပဒေသာပင်ဖြစ်၍ စေတနာပေါ် မူတည်သည်ဟု ရှေးလူကြီးတို့ ဆိုသည့်အတိုင်း ဦးရီးတို့ ထန်းပင်များသည် တကယ့်ပဒေသာပင်များ ဖြစ်နေပါသည်၊ ဤသို့ဖြင့် ဦးရီးတို့ စီးပွားရေးမှာ တနေ့တခြား တိုးပွားလာခဲ့သည်။ ယခုအခါ ထန်းပိုင်၊ မြေပိုင်၊ သိုး၊ ဆိတ်၊ နွား တို့နှင့် အတူ ငွေပိုငွေလျှံပါ အတော်အသင့် စုမိလာခဲ့၍ တရွာလုံးက ချီးမွမ်းသာဓုခေါ်ကြသည်။

( ခင်မောင်တင်-၀ဲလောင် )
********************************************************************************

( ဘုန်းကြီးကျောင်းကို ခံပေါက်သူများ )

ပုသိမ်၊ မုံရွာ ကားလမ်းအနီးရှိ ရွာကလေးတရွာတွင် ကျွန်တော်သည် အသက် ၃၂-နှစ်ထိ နေထိုင်ခဲ့ပါသည်၊ ထိုရွာ၏ အနောက်ဘက်ကျောင်းတွင် ငယ်ဖြူဆရာတော်တပါး သီတင်းသုံးတော်မူလေသည်။

ဆရာတော်ကြီး အသက်အရွယ် ကြီးရင့်ပြီး ပျံလွန်တော်မူသောအခါ ဆရာတော်ကြီးနှင့်အတူ သတင်းသုံး နေထိုင်တော်မူသော ငယ်ဖြူရဟန်းတပါးက ကျောင်းထိုင်လေသည်၊ ထိုရဟန်းသည် စာပေကျမ်းဂန် သိပ်မတတ်သောကြောင့် ထိုကျောင်း၏ ဝေယျာဝစ္စ အားလုံးတို့ကို ဦးဆောင်၍ လှူဒါန်းလုပ်ကိုင်ပေးနေသော လူကြီးများက ဘီအေဘွဲ့နှင့် ( ဓမ္မာစရိယ ) ဘွဲ့ရ ဘုန်းတော်ကြီးတပါးကို ရှာဖွေပင့်ဆောင်လာသည်၊ ထိုကျောင်းတွင် ကျောင်းထိုင်အဖြစ် သတင်းသုံးတော်မူစေလေသည်။

ထိုအခါ ဆရာတော်ကြီး မရှိသည့်နောက်ပိုင်း ကျောင်းထိုင်နေခဲ့သော ထိုရဟန်းသည် နောက်ရောက်လာသော ဆရာတော်နှင့် မသင့်မမြတ်ဖြစ်လေသည်၊ ဤသို့ သံဃာတော် အချင်းချင်း မသင့်မြတ်နေကြသည်ကို သင့်မြတ်အောင် မဆောင်ရွက်ကြဘဲ နောက်ရောက်လာသော ဆရာတော်ကို မကျေနပ်သူများက အရင်ရဟန်းကို ထိုကျောင်းနှင့် မနီးမဝေး တနေရာတွင် ၀ါးကျောင်း ဆောက်လုပ်ပေးပြီး သီတင်းသုံး နေထိုင်စေသည်။ ဤသို့ဖြင့် နောက်ပင့်လာသော ဆရာတော်ဘက်မှ လူတစု၊ အရင်ရဟန်းဘက်မှ လူတစု ဖြစ်သွားကြတော့သည်။ ထို့နောက် ထိုကျောင်းကို သူရထိုက်သည်၊ ငါ ရထိုက်သည်နှင့် အငြင်းပွား၍ နောက်ဆုံး တရားရုံးတွင် ရင်ဆိုင်ကြလေတော့သည်။

ထိုစဉ် မူလကျောင်းမှ ဒကာ ဒကာမများနှင့် နောက်ရောက် ဆရာတော်တို့ တိုင်ပင်ပြီး ထိုကျောင်းကြီးရှိ မီးစက်ကြီးကို အသုံးမလိုတော့၍ ရောင်းချပစ်လိုက်ကြသည်။ ထိုအခါ အရင်ရဟန်းဘက်မှ လူစုသည် ဟိုအရင်လက်ထက် ပစ္စည်းကို ရောင်းစားရမလား-ဟု လူစု၍ ည(၉)နာရီလောက်တွင် ထိုကျောင်းကြီးအား ၀ိုင်း၍ ခဲနှင့်ပေါက်ကြလေတော့သည်၊ ခဲကောက်ပေးသူက ပေး၊ ပေါက်သူက ပေါက်၊ ဆဲသူက ဆဲ၊ ဘယ်သူမှ တားမရအောင် ပွက်ပွက်ညံနေကြတော့သည်။ ဆွမ်းစားကျောင်းထဲတွင် ကျိန်းစက်နေသော သာမဏေငယ်များကလည်း တော်ကြပါတော့၊ ဒီမှာ အိုးတွေ သပိတ်တွေ၊ ပန်းကန်တွေ ကွဲကုန်ပါပြီ-ဟု ပြောဆို တားမြစ်သည်၊ ခဲနှင့်ပေါက်သော အဖွဲ့ထဲတွင် ပါရှိသော အမျိုးသမီးတဦးက အိုးတွေ ပန်းကန်တွေ ကွဲကုန်ရင် ခွေးစခွက်နဲ့ ထည့်စားပါလား-ဟု ဆဲဆို ပြောလိုက်သည်ကို ကျွန်တော် နားဆတ်ဆတ် ကြားရပါသည်။

များမကြာသော အချိန်တွင်ပင် ခဲပေါက်ရာ၌ ပါဝင်ဦးဆောင်သော လူကြီးငါးဦးအနက် နှစ်ဦးသည် မကျန်းမမာဖြစ်ပြီး ရှေ့ဆင့်နောက်ဆင့် သွေးအန်၍ သေဆုံးသွားလေသည်၊ မကြာခင် နောက်တဦးမှာလည်း လေဖြတ်၍ သေဆုံးသွားပြန်သည်၊ ထို့ပြင် အခြားတဦးမှာလည်း မကျန်းမမာဖြစ်၍ ဆေးရုံတင်ရသည်၊ ဆေးရုံမှ အိမ်ပြန်ရောက်သောအခါ သွေးအန်၍ သေပြန်သည်၊ သာမဏေများကို ခွေးစားခွက်နဲ့ ထည့်စား-ဟု ဆဲဆိုခဲ့သော အမျိုးသမီးမှာလည်း မွဲသွားလေသည်၊ သားသမီးများ၏ အိမ်ပေါ်မှာပင် မနေရဘဲ လူတထိုင်လောက်ရှိသော အိမ်အောက်၌ အိပ်နေရပြီး ပန်းကန်စုတ်နှင့် ထည့်စားနေရသည်မှာ ယနေ့တိုင်ဖြစ်၏။

နောက်ဆုံး ကျန်တယောက်သည်လည်း မကျန်းမမာဖြစ်လာပြန်သည်၊ အသည်းအသန် မမာသောအချိန်တွင် ငါ့အား ဆရာတော်ဘုရားဆီ ပို့ပေးစမ်းပါ-ဟု ပြောလေသည်၊ သူ့အိမ်သားများကလည်း ဆရာတော်ဆီ အရောက်ပို့ပေးကြသည်၊ ဆရာတော်ရှေ့ ရောက်သောအခါ ဦးချရှိခိုးလျက် ဆရာတော်ဘုရား၊ တပည့်တော် ပြောဆိုပြစ်မှားမိတဲ့ အပြစ်တွေကို ခွင့်လွှတ်ပါ-ဟု တောင်းပန်လေသည်။ ဆရာတော်ကလည်း ခွင့်လွှတ်ပါတယ်၊ ဒကာကြီး စိတ်ချမ်းချမ်းသာသာနဲ့ ကျန်းမာအောင်သာနေပါ-အစရှိသည့် ဆုံးမသြ၀ါဒများပေးသည်။ အိမ်ပြန်ရောက်ပြီး ရက်များမကြာမီမှာပင် သေဆုံးသွားလေတော့သည်။

နောက်ဆုံးတွင် ကျောင်းခွဲထောင်သော ငယ်ဖြူရဟန်း သီတင်းသုံးနေသည့် ၀ါကျောင်းမှာ နွေရာသီတွင် မီစတင်လောင်ကျွမ်း၍ ရွာမှ အိမ်ခြေ (၅၀၀)ခန့်ပါ မီးလောင်ကျွမ်းခြင်း ခံရလေသည်၊ မီးလောင်ခံရသော အိမ်များထဲတွင် နှစ်ဖက် အပြိုင်အဆိုင် ရန်လုပ်ကြသူများ၏ အိမ်များ အများဆုံး ပါဝင်ပေသည်။ မကောင်းမှု အကုသိုလ်ကံတရားသည် အလွန်ကြောက်စရာကောင်းလှသည်ဟု ကျွန်တော် သံဝေဂ ယူမိပါသည်။

( ခင်မောင်ကျော် )

( မြတ်မင်္ဂလာ ၁၉၉၃-ခု ဧပြီလ )

No comments: