Friday, March 27, 2009

ဘာသာရေး ပြဿနာ ( ၄၁ )

( ဘဒ္ဒန္တတိလောကသာရ ဖြေသည် )

( မေး ) ( ဘုရားလောင်းကွဲပြားပုံ စသည် )
ဆရာတော် အရှင်သူမြတ်ဘုရား
၁။ ပညာဓိက သဒ္ဓါဓိက ၀ီရိယာဓိက ဘုရားလောင်း ၃-မျိုး ကွဲပြားရခြင်းအကြောင်း
၂။ ဘုရားလောင်းများ၏ နောက်ဆုံးဘ၀တွင် အဖေတူ အမေတူ ညီအကိုမောင်နှမ ရှိ-မရှိ
၃။ မြတ်စွာဘုရားသည် ပါဠိဘာသာဖြင့် တရားဟောသည်-ဟု သိရပါသည်၊ သို့သော် မာဓဂဘာသာကို ပြောဆိုသူများတွင် မြတ်စွာဘုရားလည်း ပါနေကြောင်း သိရပါသဖြင့် ရှင်းလင်းပါရန်
ဤပြဿနာများကို ဖြေကြားပါရန် တောင်းပန်အပ်ပါသည်။
( ဦးသန်းညွှန့်-ဗိုလ်စိန်မှန်ရပ်ကွက်၊ ဗဟန်း )

( ဖြေ )
၁။ ဘုရားလောင်း နိယတဗျာဒိတ် ခံယူစဉ်က ဉာဏ်အထက်မြက်ဆုံးဖြစ်လျှင် ပညာဓိက
အလတ်ဖြစ်လျှင် သဒ္ဓါဓိက
အနုံ့ဖြစ်လျှင် ၀ီရိယာဓိက ဘုရားဖြစ်ကြောင်း ဆိုပါသည်။

ဥပမာ-ထိုစဉ်က ဂါထာတပုဒ်ကို ကြားနာရရုံနှင့် မဂ်ဖိုလ်ရနိုင်လောက်သော ဉာဏ်ရှိလျှင် ပညာဓိက ဘုရားလောင်းဖြစ်၍ -
ဂါထာတပုဒ်ကို အဓိပ္ပါယ်ရှင်းပြမှ မဂ်ဖိုလ်ရလောက်လျှင် သဒ္ဓါဓိက
ဂါထာတပုဒ်ကို လေ့လာကျင့်သုံးပြီးမှ မဂ်ဖိုလ်ရလောက်လျှင် ၀ီရိယာဓိက ဖြစ်ကြောင်း ဆိုပါသည်။
ပညာဓိက ဖြစ်ရပါလို၏-ဟု အထူး ဆုမတောင်းရပါ။

၂။ ဘုရားလောင်းတို့၏ မယ်တော်သည် တတိယအရွယ်ရောက်မှ ဘုရားလောင်းကို ဖွားရမြဲဓမ္မတာ ရှိပါသည်။
ဖွားမြင်ပြီးနောက်လည်း ၇-ရက်ကြာလျှင် စုတေမြဲဖြစ်၏၊
ထို့ကြောင့် အမိတူ ညီအကို မောင်နှမ မရှိနိုင်ပါ။

၃။ မာဂဓဘာသာကိုပင် မြတ်စွာဘုရား၏ တရားတော်အစဉ် တည်ရာ (ပိဋကတ်တော်တည်ရာ) ဖြစ်သဖြင့် ပါဠိဟု ခေါ်ဝေါ်သည်၊ ထို့ကြောင့် ပါဠိနှင့် မာဂဓ ကွဲပြားမှုမရှိပါ။
********************************************************************************

( မေး ) ( အသုဘပို့ )
ကွယ်လွန်သောသူ၏ အလောင်းကို သင်္ချိုင်းသို့ သယ်ယူထမ်းဆောင် ချပို့သူ လူပုဂ္ဂိုလ်တို့ အဘယ်ကဲ့သို့ ကုသိုလ်အကျိုးတရားများကို ရရှိနိုင်ပါသနည်း၊ သာဓကများဖြင့် ရှင်းလင်းဖြေကြားပေးပါဘုရား။

( ဖြေ )
အသုဘအလောင်းကို သုသာန်သင်္ချိုင်းသို့ ပို့ဆောင်ရာ၌ အသုဘရှုဟူသည်နှင့်အညီ မိမိခန္ဓာကိုယ် အပါအ၀င် မည်သည့်ခန္ဓာမဆို အသုဘဖြစ်ပုံကို နှလုံးသွင်းလျက် ထိုအသုဘကို အိမ်တွင်း၊ ရွာတွင်း၊ မြို့နယ်တွင်းမှ ထုတ်ဆောင်ရှင်းလင်း၍ သန့်ရှင်းအောင် ပြုလုပ်ရသည်ဟု သဘောထားလျှင် ကုသိုလ်ထူးစွာ ဖွံ့ဖြိုးကြီးကျယ်လှသည်၊

ပဉ္စ၀ဂ္ဂီတို့နောက် တရားထူးရသော ယသ သတို့သားနှင့် သူငယ်ချင်း ၅၅-ဦးတို့ ဦးဦးဖျားဖျား ဧဟိဘိက္ခု ရဟန္တာပုဂ္ဂိုလ်များ ဖြစ်ရသည်မှာ ရှေးဘ၀က ဇရပ်တွင် သေနေသော ခရီးသွားတဦး၏ ပုပ်စပြုနေသော အလောင်းကို စိတ်တူ၊ သဘောတူ၊ သုသာန်သင်္ချိုင်းသို့ ပို့ဆောင်ခဲ့ရသော ကုသိုလ်ကြောင့်ပင် ဖြစ်လေသည်၊ ထို့ကြောင့် လူမှုရေးအရ မလွဲသာ၍ အသုဘပို့ဆောင်ရသည့်တိုင်အောင် ကုသိုလ်ဖြစ်အောင် ယောနိသောမနသိကာရ ထားရှိသင့်သည်ဟု ဖြေကြားလိုပေသည်။
*********************************************************************************

( မေး ) ( အမျှဝေတိုင်း ရ-မရ )
အရှင်ဘုရား၊ ကုသိုလ်ကောင်းမှုပြုတိုင်း အမျှဝေကြခြင်းသည် ဗုဒ္ဓဘာသာဝင်တို့၏ ဓလေ့ထုံးစံ ဖြစ်ကြသည့်အတိုင်း မိမိပြုသော ကုသိုလ်ကောင်းမှုကို တဦးတယောက်အား အမျှပေးဝေရာ ထိုအမျှပေးဝေခံရသော သူ၌ ကုသိုလ်အကျိုး ခံစားခွင့် ဧကန် ရှိနိုင်ပါမည်လား၊ ရှင်းလင်းဖြေကြားတော်မူပါရန်။
( ကျော်မင်းနိုင်-ဆည်မြောင်းဦးစီးဌာနရုံး၊ မင်းပြားမြို့ )

( ဖြေ )
ကုသိုလ်ကောင်းမှုပြု၍ အမျှပေးဝေခြင်းသည် ပတ္တိဒါနပုညကိရိယာဝတ္ထုဖြစ်၍ ကုသိုလ်ရှင်အား လက်ရှိပြုနေသော ကုသိုလ်အပြင် ကုသိုလ်တမျိုး တိုးပါသည်၊
တစုံတယောက်အား ၀ါ-ကွယ်လွန်သူ မိဘဆွေမျိုးတို့အား အမျှဝေရာ၊ ထိုအမျှပေးဝေခံရသောပုဂ္ဂိုလ်က သာဓုခေါ်နိုင်မှသာ အကျိုးခံစားခွင့် ရှိပါသည်။
သက်ရှိပုဂ္ဂိုလ်ဖြစ်ကလည်း အမျှဝေသော ကုသိုလ်ရှင်အပေါ်၌ ဣဿမစ္ဆရိယ ငြူစူဝန်တိုမှု ကင်းရှင်းစွာ ၀မ်းမြောက်ဝမ်းသာ သာဓုခေါ်မှသာ အကျိုးခံစားခွင့် ဧကန်ရှိနိုင်ကြောင်း ဆိုပါသည်။
********************************************************************************

( မေး ) ( ပဋိသမ္ဘိဒါခေတ်အကြောင်း )
ဆရာတော်ဘုရား၊ အနာဂတ၀င်ကျမ်း၌ သာသနာခေတ် ကွယ်ခြင်းကြီး ငါးရပ်တွင် ဘုရားပရိနိဗ္ဗာန်စံပြီး
နှစ် ၁၀၀၀-အတွင်း ပဋိသမ္ဘိဒါခေတ် ကွယ်မည်ဟု ပါရှိပါသည်၊
ပဋိသမ္ဘိဒါဆိုသည်မှာ မဂ်ဖိုလ်လေးပါးနှင့် ပြည့်စုံသော ရဟန္တာသူမြတ်များဟု ထင်မြင်မိပါသည်၊ ထိုအချိန်တွင် ရဟန္တာများ ကွယ်ပြီဟု ဆိုနိုင်ပါသလားဘုရား။
( မြသွေးခိုင်-သဲအင်းယောဂီ )

( ဖြေ )
ပဋိသမ္ဘိဒါလေးပါး ဆိုသည်မှာ မဂ်ဖိုလ်လေးပါးကို မဆိုလို။
၁။ အတ္ထ ပဋိသမ္ဘိဒါ-အနက်အဓိပ္ပါယ် အကျိုးတရားကို သိသောဉာဏ်
၂။ ဓမ္မ ပဋိသမ္ဘိဒါ-ပါဠိဓမ္မအကြောင်းကို သိသောဉာဏ်
၃။ နိရုတ္တိ ပဋိသမ္ဘိဒါ-သဒ္ဒါကို သိသောဉာဏ်
၎။ ပဋိဘာန ပဋိသမ္ဘိဒါ-နက်နဲစွာထိုးထွင်း၍ သိတတ်သောဉာဏ်-ဟူ၍ ဖြစ်သဖြင့်
ထိုဉာဏ်လေးပါးနှင့် ပြည့်စုံသော ရဟန္တာပုဂ္ဂိုလ်များ အဆင့်အမြင့်ဆုံး၊ ပညာအထက်မြက်ဆုံး ရဟန္တာမျိုးပင် ဖြစ်သည်။ ထိုရဟန္တာမျိုးမှာ မြတ်စွာဘုရား ပရိနိဗ္ဗာန်စံပြီး အနှစ် ၁၀၀၀-အတွင်းမှာသာ ရှိ၍ ထိုနောက်၌ ပဋိသမ္ဘိဒါပတ္တ ရဟန္တာ မရှိတော့ဘဲ ဆဠာဘိည-အဘိညာဉ် ၆-ပါးနှင့်ပြည့်စုံသော ရဟန္တာမျိုး၊
သုက္ခ၀ိပဿက-ဈာန်မရသော ရဟန္တာမျိုးများသာရှိမည်-ဟု ဆိုလိုပါသည်။
*******************************************************************************

( မြတ်မင်္ဂလာ ၁၉၉၄-ခု စက်တင်ဘာလ )

No comments: