Wednesday, April 22, 2009

ဘုန်းတော်ကြီး ဦးသီလနှင့် ညွှတ်ကွင်း

၁၂၄၄-ခုနှစ်ခန့်တွင် ဘုန်းတော်ကြီး ဦးသီလသည် ရွှေကျင် ဆိတ်ကလေး တောကျောင်း၌ သီတင်းသုံးနေတော် မူသည်။ ထိုစဉ် ၀မ်းခနိမ်ရွာသို့ နံနက်စောစော ဆွမ်းခံကြွသွားရာ တောလမ်းအတွင်း ခြေတော်သည် ညွှတ်ကွင်းတခုတွင် မိသွားသည်၊ ထိုအခါ ဘုန်းတော်ကြီးသည် ထိုနေရာမှ မကြွဘဲ ရပ်တန့်နေသည်။ ညွှတ်ကွင်းရှင် မြင်သောအခါ အကြောက်လွန်၍ အနီးမကပ်ဘဲ ရှောင်တိမ်းနေ၏၊ အတန်ကြာ၍ တဖန် လာကြည့်သောအခါ၌လည်း ဘုန်းတော်ကြီးကို ရပ်တော်မူလျက်သာ တွေ့ရ၏။ ဤနည်းဖြင့် သုံးလေးကြိမ် လာကြည့်ပြီးလျှင် အလွန်ပူပန်စိုးရိမ်မိသဖြင့် အခြားသူတယောက်ကို အကျိုးအကြောင်း ပြောပြ၍ ညွှတ်ကွင်း သွားဖြုတ်ပေးပါ-ဟု တောင်းပန်၏။

ထိုသူလည်း လျင်မြန်စွာ သွား၍ ဖြုတ်သောအခါ ဘုန်းတော်ကြီးက
ဒါယကာ၊ သင်၏ ညွှတ်ကွင်းလား-ဟု မေး၏။
မဟုတ်ပါ-ဟု လျှောက်သော် သူတပါး၏ ညွှတ်ကွင်းကို မဖြုတ်နဲ့-ဟု ဆို၏။

ထိုသူလည်း ပြန်သွား၍ ညွှတ်ကွင်းရှင်အား ကိုယ်တိုင်သွားဖြုတ်ရန် ပြောသည်၊ ညွှတ်ကွင်းရှင်သည် မသွားဝံ့၊ မကြာမီ နေမွန်းတည့်လုနီးအချိန်သို့ ရောက်လာ၏။ အဖော်ဖြစ်သူက ညွှတ်ကွင်းရှင်အား ဘုန်းတော်ကြီးသည် ညွှတ်ကွင်းကို ကိုယ်တိုင်လည်း မဖြုတ်၊ ညွှတ်ကွင်းရှင် မဟုတ်သူကိုလည်း အဖြုတ်မခံ၊ မွန်းတည့်ချိန်လည်း နီးပြီ၊ ဆွမ်းမစားရ၍ ပျံတော်မူသွားလျှင် မင်း အ၀ီစိလောက်တော့ သေချာပြီ-ဟု သတိပေးသည်။

ဤတွင်မှ ညွှတ်ကွင်းရှင်သည် ဘုန်းတော်ကြီးထံ စွန့်စား၍ သွားသည်။ အနီးသို့ရောက်သောအခါ တပည့်တော် တောကြက်ထောင်တဲ့ ညွှတ်ကွင်းပါ၊ နောက် တသက်လုံး ဤအမှုကို ရှောင်ကြဉ်ပါတော့မယ်-ဟု ငိုယိုလျှောက်ထား၍ ညွှတ်ကွင်းကို ဖြုတ်သည်။ ညွှတ်ကွင်းအနီးရှိ တည်ကြက်နှင့် ညွှတ်ကွင်းကိုလည်း လှူလိုက်သည်။ ထိုအချိန်မှာ မွန်းတည့်ချိန် ရောက်နေပြီဖြစ်၍ ဘုန်းတော်ကြီးသည် ဆွမ်းမဘုဉ်းပေးရတော့ပေ။

ဘုန်းတော်ကြီး ဦးသီလသည် ရဟန္တာ-ဟု ကျော်စောခဲ့သော ရဟန်းမြတ်ကြီး ဖြစ်သည်။ ဒကာ-ဒကာမများက ဆရာတော်-ဟု ခေါ်သည်ကို လက်မခံပေ။ သည်လိုမခေါ်နဲ့ ငါဟာ မင်းဆရာမဟုတ်ဘူး-ဟု မိန့်တော်မူလေ့ရှိသည်။ ထို့ကြောင့် ဆရာတော် ဦးသီလ-ဟု မတွင်ဘဲ ဘုန်းတော်ကြီး ဦးသီလ-ဟု တွင်ပေသည်။

( ၀င်းဝင်းမြတ် )
( ညောင်လေးပင်တောရ ဆရာတော်ကြီး အဂ္ဂမဟာပဏ္ဍိတ ဦးအရိယ-ရေး
ဘုန်းတော်ကြီး ဦးသီလ ထေရုပ္ပတ္တိ-မှ )

No comments: