Monday, April 20, 2009

ဘာသာရေး ပြဿနာ ( ၅၃ )

( ဘဒ္ဒန္တ တိလောကသာရ ဖြေသည် )

( မေး ) ( သောတာပန်နှင့် လူ့ဘ၀ )
ဤဘ၀တွင် သောတာပန်ဖြစ်ပြီး၍ စုတေခဲ့ပြီး နောက်ဘ၀တွင် လူ့ဘ၀တွင် ပြန်ရောက်နိုင်ပါသေးသလား၊ ယခင်ဘ၀တွင် မည်သည့်တရားမျှ မကျင့်ကြံရသေးမီ မိမိကိုယ်ကို သောတာပန်ဟု သိရှိနိုင်ပါသလား၊ နတ် ဗြဟ္မာ ဘ၀တွင် အရိယာအဖြစ် ကျင့်ကြံ၍ ရနိုင်ပါသလား၊ ဖြေကြားပေးတော်မူပါဘုရား။
( မသန်းရွှေ-မြို့သစ်ရပ်၊ စစ်ကိုင်းမြို့ )

( ဖြေ )
သောတာပန်ပုဂ္ဂိုလ်သည် အများဆုံး ၇-ဘ၀ ကာမဘုံတွင် ဖြစ်နိုင်ရာ လူ့ဘ၀တွင် ၃-ဘ၀ထက်မနည်း ဖြစ်နိုင်ခွင့် ရှိကြောင်း ဆိုပါသည်။ သောတာပတ္တိမဂ်ဖြင့် ဒိဋ္ဌိဂတသမ္ပယုတ် ၄-နှင့် ၀ိစိကိစ္ဆာ-ဟူသော အကြမ်းစား ကိလေသာတို့ကို ပယ်ခဲ့ပြီး ဖြစ်သည်၊ လူ့ဘ၀၌ ဖြစ်လျှင်လည်း ၄င်းဒိဋ္ဌိ၊ ၀ိစိကိစ္ဆာ တရားတို့ မဖြစ်ခဲ့သဖြင့် အလွန်ယဉ်ကျေးသိမ်မွေ့သည့် ဗုဒ္ဓသာဝက အရိယာဖြစ်နေ၍ သူကိုယ်တိုင် သောတာပန်ပုဂ္ဂိုလ်ဖြစ်ကြောင်း မသိနိုင်စရာ အကြောင်းမရှိပါ။

လူ့ပြည်က ကုသိုလ်ကောင်းမှုပြု၍ နတ်ပြည်၊ ဗြဟ္မာ့ပြည်သို့ ရောက်လျှင် ဘုရားလောင်းနတ်သားများ၊ သောတာပန်စသော အရိယာနတ်များက တရားဟော၍ ထိုနတ်သားများထံမှ တရားနာယူပြီး မဂ်ဖိုလ် ရနိုင်ကြ ပါသည်၊ နာမ်သာရှိသော အရူပဗြဟ္မာဘုံတွင် သောတာပတ္တိမဂ်မှတပါး အခြားမဂ်ဖိုလ် တရားများကို အားထုတ်၍ ရနိုင်ခွင့်ရှိကြောင်း အဘိဓမ္မာတွင် ဆိုပါသည်။
*********************************************************************************

( မေး ) ( ငါးပါးသီလ ခံယူပုံ )
ဆရာတော်ဘုရား၊ ငါးပါးသီလကို ခံယူဆောက်တည်ရာတွင် ဘုရားရှေ့၌ အာမဘန္တေခံပြီး ရွတ်ဆိုမှ ရပါသလားဘုရား။ ထိုသို့ အာမဘန္တေခံ၍ မရွတ်ဘဲ မိမိဘာသာ ငါးပါးသီလနှင့်အညီ လိုက်နာနေထိုင်လျှင်လဲ ရပါသလား၊ ရရှိသည့် အကျိုးကျေးဇူးများ မည်ကဲ့သို့ ခြားနားကြောင်း သိလိုပါသည်ဘုရား။
( မမင်းမင်းမြင့်သူ-ဗိုလ်တထောင် )

( ဖြေ )
အကုသိုလ်မှ ကြဉ်ခြင်း ၀ိရတီ ၃-ပါးရှိသည်၊
၁။ သမ္ပတ္တ၀ိရတီ-သိက္ခာပုဒ်ကို မဆောက်တည်ဘဲ ကြုံတွေ့သောအခါ ရှောင်ကြဉ်ခြင်း။
ဥပမာ-ငါးပါးသီလကို ခံယူထားသည်မဟုတ်၊ သို့သော် သွားရင်း လာရင်း မြွေဆိုး စသည်ကို တွေ့ရသော်လည်း မသတ်ဘဲ ရှောင်ကြဉ်သည်။

၂။ သမာဒါန၀ိရတီ- ငါးပါးသီလကို ခံယူထားသည်။
သို့ဖြစ်၍ မြွေဆိုးစသည်ကို မသတ်ဘဲ ရှောင်ကြဉ်သည်။

၃။ သမုစ္ဆေဒ၀ိရတီ-မဂ်တရား ဖိုလ်တရား ရရှိပြီးဖြစ်၍ သူ့အသက်သတ်မှု စသည်ကို လုံးဝရှောင်ကြဉ်သည်။

ဤ ၃-ပါးတွင် ပြဿနာရှင်၏ အမေး၌ ရှေ့ ၂-ပါးနှင့် သက်ဆိုင်ရာ သီလမခံယူဘဲ မိမိဘာသာ ငါးပါးသီလနှင့်အညီ လိုက်နာနေထိုင်ပါသည် ဆိုလျှင် သမ္ပတ္တ၀ိရတီ-သာဖြစ်၍ မိမိသဏ္ဍာန်၌
အမြဲ သီလ တည်နေခြင်း မရှိ၊ မသတ်ဘဲ ရှောင်၍ ကုသိုလ်အခိုက်အတန့် ရမှုလောက်သာဖြစ်သည်။

အမှတ် ၂-သမာဒါန၀ိရတီဖြစ်အောင် သီလခံယူဆောက်တည်ကာ အာမဘန္တေ-ဟု ၀န်ခံ၍နေလျှင် သတ်အပ်သောမြွေဆိုး စသည့် ၀တ္ထုကိုတွေ့၍ ရှောင်သည်ဖြစ်စေ၊ မတွေ့ဘဲ အိမ်မှာနေနေဆဲမှာ ဖြစ်စေ၊ ငါးပါးသီလ အမြဲတည်နေပါသည်။ ထို့ကြောင့် သီလဟူသည် နှုတ်မြွက်ခံယူ ဆောက်တည်ရပါသည်၊ သို့မှ သမာဒါန၀ိရတီဖြစ်၍ အမြဲနိစ္စသီလ တည်နေသူ ဖြစ်နိုင်ပါသည်။
*********************************************************************************

( မေး ) ( အဖျော်ရည် )
ရဟန်းတော်များသည် ရေနှင့် ဒန်ပူကို အကပ်မခံဘဲ သုံးဆောင်ကောင်းသည်ဟု သိရပါသည်၊ ဆီးဖျော်ရည် စသော ဖျော်ရည်များကို မကပ်ဘဲ သုံးဆောင်နိုင်ပါသလား၊ သာဓကသွင်း၍ ရှင်းလင်းဖြေကြားတော်မူပါဘုရား။
( ၀င်းနိုင်-တောင်ငူမြို့ )

( ဖြေ )
ဆီးဖျော်ရည် စသော အရည်တို့မှာ ရေမဟုတ်၊
ယာမကာလိက အဖျော်ရည်မျိုးထဲတွင် ပါဝင်၍ အကပ်ခံ၍ သုံးဆောင်ရရုံသာမက တနေ့မျှသာအပ်သော
အဖျော်ရှစ်မျိုး၏ အနုလောမမျိုး အ၀င်အပါ ဖြစ်သည်။

၎င်း၏ သာဓကမှာ
သပြေ, သရက်၊ မုဒရက်၊ ဖက်သက် သစ်မည်စည်။
တော, အိမ်, ငှက်ပျော၊ ကြာစွယ်နှော၊ မှတ်လောရှစ်ဖျော်ရည်။

ရှောက်မန်ကျည်းစ၊ နုလောမ၊ လျော်လှ အဖျော်ရည်။
ဆီး, သံပုရာ၊ ဥသျှစ်ပါ၊ ဖျော်ကာ သုံးနိုင်သည်။
ဟု-သုံးနိုင်သော ဖျော်ရည်များကို ဆိုသည်။

မသုံးနိုင်သော ဖျော်ရည်အဖြစ်
( ထန်း, အုန်း, နှစ်တွဲ၊ ပိန္နဲနှစ်စုံ၊ ဘူး, ဖရုံ၊ မှတ်တုံ သုံးသခွါး ) ဟု ဆိုပါသည်။
ပါဠိဖြင့် လိုပါမူ-ယာမကာလိကေသု ပန-စသည်ဖြင့် အကျယ်ပြသော ၀ိနယသင်္ဂဟ အဋ္ဌကထာ (၀ိသင်ဋ္ဌ-၉၉) တွင် ကြည့်နိုင်ပါသည်။
*********************************************************************************

( မေး ) ( တရားဟောပလ္လင်ကိစ္စ )
ဆရာတော်ဘုရား၊ တပည့်တော်၏ မိတ်ဆွေတဦးသည် ကမ္မဋ္ဌာန်းဌာနတခု၌ ခြေတွင် နယားရုပ်ပါသော
တရားဟောပလ္လင် လှူပါသည်။ ဆရာတော်တပါးက နယားရုပ်ပါသော ပလ္လင်တွင် တက်ထိုင်ပြီး တရားမချီးမြှင့်ကောင်း၊ တရားချီးမြှင့်လျှင် အာပတ်သင့်သည်ဟု ဟောပါသည်၊ ထိုစကား မှန်-မမှန် ရှင်းလင်းတော်မူပါဘုရား။
( ဦးလှအောင်-ကချင်ပြည်နယ် )

( ဖြေ )
ဥစ္စာသယန မဟာသယန-ဆိုင်ရာ၌ အခြေတွင် သားရဲရုပ် (နယားရုပ်-ခြင်္သေ့ရုပ်စသည်) ရှိသော ညောင်စောင်း၊ အင်းပျဉ်၊ ဓုတင်၊ ပလ္လင်တို့တွင် မအိပ်ကောင်း၊ မထိုင်ကောင်း စသည့် ဆုံးဖြတ်ချက်များ ၀ိနည်းအဋ္ဌကထာ ဋီကာ တို့တွင် များစွာ ပါရှိပါသည်။
လယ်တီဆရာတော် ဘုရားကြီးသည် မဟာသယန ဒီပနီဟူသော အမည်ဖြင့် ကျမ်းတစောင် ပြုစုထားခဲ့သေး သည်၊ ထိုကိစ္စမှာ လွန်စွာကျယ်ဝန်းသဖြင့် စုံလင်အောင် မတင်ပြနိုင်ပါ။ အမှန်အားဖြင့် ခုတင်၊ ညောင်စောင်း တို့တွင် အခြေ၌ အရုပ်ပါသော မဟာသယနများ၌ အိပ်စက်နေထိုင်ခြင်း ပြုသော်သာ အာပတ်သင့်ခြင်းဖြစ်သည်။

သို့သော်လည်း ဝေနေယျများစွာ ဒကာ ဒကာမ သာဝက ယောဂီအလီလီတို့အား ကမ္မဋ္ဌာန်းပြခြင်း၊ တရားဓမ္မ ဟောခြင်း စသည်တို့၌ကား အပြစ်မရှိနိုင်ပါ။ အရှင်အာနန္ဒာ အရှင်ကစ္စာယနတို့ ရွှေ ငွေ စိန် ကျောက် ထိန်ထိန်တောက်နေသော ရာဇပလ္လင်ပေါ်မှ ကောသလမင်းကြီး၊ ဥတေနမင်းကြီးတို့အား တရားဟောခြင်း၊ နိဂြောဓသာမဏေတို့ ၊ ပုဂံ ရှင်အရဟံတို့ ထိုက်တန်သော နေရာမှာ နေပါဆိုလျှင် ရာဇပလ္လင်ပေါ်သို့ တက်၍ထိုင်ကာ အသောကမင်းကြီး၊ အနောရထာမင်းကြီးတို့အား သာသနာပြုခြင်း တရားဟောခြင်းတို့ကို သာဓကမူနိုင်ပါသည်။
*********************************************************************************

( မေး ) ( လိပ်ပြာကောင်လား ၀ိညာဉ်လား )
ဆရာတော်ဘုရား အချို့စာအုပ်များတွင် တပည့်တော်ဖတ်ရသည်မှာ မိမိကိုယ်ခွဲဖြင့် သွားလိုရာသို့ သွားနိုင်ခြင်း၊ သတိမေ့မြောနေစဉ် မိမိကိုယ်ကိုမိမိ အပေါ်စီးမှ မြင်နေရပြီး အခြားသူများကိုလည်း မိမိခန္ဓာကိုယ်အနီး၌ မြင်နေရခြင်း စသည်တို့ ဖြစ်ပါသည်။ ဗုဒ္ဓဘာသာအရ ၀ိညာဉ်ခန္ဓာမရှိ၊ လိပ်ပြာကောင် မရှိ၊ ရုပ်သက်သက်၊ နာမ်သက်သက် မရှိ-ဟု ဆိုသဖြင့် ( အထက်ပါတို့ကို ) ဗုဒ္ဓဘာသာဝင် တဦးအနေဖြင့် မည်သို့ ဆင်ခြင်သုံးသပ် ရမည်ကို ဖြေကြားပေးပါဘုရား။
( နေထွန်းခိုင်-ပြည်မြို့ )

( ဖြေ )
လူသတ္တ၀ါတို့ သေခါနီးတွင် ကံ, ကမ္မနိမတ်, ဂတိနိမိတ်ဟူ၍ နိမိတ်သုံးမျိုး ထင်မြဲဖြစ်သည်။
ကျောင်းလှူဖူးသူဆိုလျှင် ကျောင်းလှူရန် ဖြစ်ပေါ်သော စေတနာ၊ သေခါနီးတွင် ပေါ်သည်။ ၄င်းမှာ ကံနိမိတ် ဖြစ်သည်။

ကျောင်းအဆောက်အအုံ လှူဒါန်းနေပုံ စသည်တို့မှာ ကမ္မနိမိတ် ဖြစ်သည်။
ထို့နောက် လားရမည့် ဂတိနိမိတ် ပေါ်သည်။

ဂတိနိမိတ်မှာ သွားလိုရာ သွားနေပုံ မိမိကိုယ်ကို၎င်း၊ အခြားသူများကို၎င်း မြင်ရပုံ၊
လားရောက်ရမည့် ဂတိသို့ သွားလာရပုံ၊ တွေ့ရှိရပုံများကို မြင်ရသည်။
သောဏရဟန္တာမြတ်၏ ဖခင် မုဆိုးကြီးကို သားရဟန္တာက ရဟန်းဝတ်ပေးထားသည်။
ထိုမုဆိုး တောထွက်ရဟန်းကြီး သေခါနီးတွင် တသက်လုံး မုဆိုးလုပ်လာခဲ့၍ ငရဲဂတိနိမိတ်များ ထင်သည်၊ ငရဲခွေးကြီးများ ၀ိုင်းလိုက်ကိုက်ခဲနေ၍ အော်ဟစ်နေသည်ကို သားရဟန္တာက သူ့ဖခင်ရဟန်းကြီး ငရဲဂတိနိမိတ် ထင်နေပြီဖြစ်ကြောင်း သိသည်။

ခုတင် ညောင်စောင်းနှင့်တကွ စေတီတော်ရှိရာသို့ ယူဆောင်လာစေပြီး သာမဏေတို့အား ပန်းများစွာစုဆောင်းစေ၍ ရဟန်းကြီးအား စေတီတော်ကို ပန်းပူဇော်လော့၊ ဘုရားရှိခိုးလော့-စသည့် ကုသိုလ်အာရုံသို့ ပြောင်းပေးလိုက်သည်။ ထိုအခါမှ ငရဲဂတိနိမိတ်များ ပျောက်ကာ ဒေ၀ဂတိနိမိတ်များ ဖြစ်သည့် နတ်ဗိမာန်၊ နတ်သမီး၊ နတ်သားများကို မြင်ရကြောင်း ပြောလေသည်။ ဂတိနိမိတ်ထင်ပြီး မကွယ်လွန်သေးဘဲ အတန်ကြာနေနိုင်သေးခြင်း၊ ငရဲနိမိတ်မှ သုဂတိနိမိတ်သို့ ပြောင်းလဲဖြစ်ပေါ်စေနိုင်ခြင်းတို့ကို စဉ်းစား၍ အသက်ဝိညာဉ် လိပ်ပြာကောင် ထွက်ဝင်နေသယောင်ကိစ္စမှာ ဂတိနိမိတ်ဖြစ်ကြောင်း မှတ်သားထားစေလိုပါသည်။
*********************************************************************************

( မေး ) ( သီလရှင် သီလပေး )
ဆရာတော်ဘုရား၊ ကိုးပါးသီလ စောင့်ထိန်းထားသော သီလရှင် ဆရာလေးများက ရှစ်ပါးသီလ ခံယူရန် တောင်းခံလာသည့် ဒကာ ဒကာမများကို သီလပေးကောင်းပါသလား ဘုရား။
( မင်းမင်း-ဒဂုံတောင်ပိုင်း ၂၁ )

( ဖြေ )
ဥပုသ်သီလ ( ရှစ်ပါးသီလ ) ခံယူဆောက်တည်သူတို့အဖို့
ဥပုသ်နေ့များတွင် နံနက်ပိုင်းတွင် ရဟန်းတော်များထံ၌ ဖြစ်စေ၊ ရဟန်းမိန်းမ (ဘိက္ခုနီ) တို့ထံမှာဖြစ်စေ သီလပေးနိုင်စွမ်းရှိသူ၊ သီလ၏လက္ခဏာ၌ သိကျွမ်းနားလည်သူ၊ လူယောက်ျား လူမိန်းမ ဥပါသကာ ဥပါသိကာတို့ထံမှာဖြစ်စေ ခံယူနိုင်သည်-ဟု အင်္ဂုတ္တိုရ်အဋ္ဌကထာတွင် ဖွင့်ဆိုသဖြင့် သီလကို မည်သူ့ထံမှာမဆို ခံယူနိုင်သည်။

သီလပေးမည့်သူ မရှိလျှင်လည်း ကိုယ့်အိမ်ရှိ ဘုရားခန်း၊ ဘုရားရှေ့တော်တွင် နှုတ်မြွက်ရွတ်ဆို၍ သီလခံယူနိုင်ပါသည်။ ဗုဒ္ဓဘာသာဝင် သူတော်ကောင်းတို့သည် ဥပုသ်နေ့များ၌ ကျောင်းသို့သွား၍ ဥပုသ်စောင့်ကြရာ အများစုံညီအောင် စောင့်ရ၍ နံနက် ၉-နာရီခန့်မှ သီလခံယူကြရသည်။

နံက်ပိုင်းတွင် သီလမရှိဘဲ လပ်ဟာနေသဖြင့် နံနက်အိပ်ရာထ မျက်နှာသစ်ပြီးစကတည်းက ဘုရားရှေ့တွင် မိမိဘာသာ သီလခံယူထားကြသည်၊ ကျောင်း၌ အများနှင့်လည်း အတူထပ်မံ ခံယူကြသေးသည်၊ ဘုရားလက်ထက်ကလည်း အနာထပိဏ်သူဋ္ဌေးကြီး စသည့် ဥပါသကာတို့သည် နံနက်စောစော အိမ်၌ မိမိဘာသာ သီလခံယူလေ့ရှိကြကြောင်း စာများတွင် တွေ့ရသည်။ ထို့ကြောင့် ဥပုသ်သီလကို မည်သူ့ထံတွင်မဆို ခံယူနိုင်ကြောင်း ဖြေကြားလိုက်ပါသည်။

( မြတ်မင်္ဂလာ ၁၉၉၅-ခု နိုဝင်ဘာလ )

No comments: