Tuesday, April 21, 2009

ကံ ကံ၏အကျိုး ( ၄၉ )

( သည်းခံခြင်းသည် မင်္ဂလာ )

နယ်ချဲ့ဗြိတိသျှတို့ အုပ်စိုးချိန်က ဖြစ်သည်၊ လွတ်လပ်ရေးကို အလိုရှိနေကြသော မြန်မာနိုင်ငံသားတို့ကို အင်္ဂလိပ် အစိုးရက ဒိုင်အာခီ အုပ်ချုပ်ရေးသာ ပေးလိုသည်၊ ထိုအုပ်ချုပ်ရေးကို အထက်တန်း အစိုးရအရာရှိများနှင့် ငွေကြေးချမ်းသာသော သူဋ္ဌေးများသာ အလိုရှိသည်။ ဆင်းရဲသား အများကမူ ကိုယ်ပိုင်အုပ်ချုပ်ရေးဖြစ်သော ဟုမ်းမရူးကိုသာ လက်ခံချင်ကြသည်။

မော်လမြိုင်မြို့မှ ၀ံသာနုစိတ်ဓာတ် ပြင်းထန်သူ ဦးချစ်လှိုင်က ဟုမ်းမရူးအသင်းကို စတင်ဖွဲ့လိုက်သည်။ ထို့ကြောင့် ဒိုင်အာခီနှင့် ဟုမ်းမရူးအသင်း အဖွဲ့နှစ်ခု ကွဲကြသည်။ အခြားမြို့များထက် မြိတ်မြို့၌ ထိုနှစ်သင်းသည် ပို၍ ပြင်းထန်ပြီး ဆွေမျိုးရင်းချာ အချင်းချင်းပင် တဦးနှင့်တဦး မခေါ်မပြောနိုင် ရန်သူကဲ့သို့ ရှိကြသည်။

လူထုကွဲသကဲ့သို့ ဘုန်းတော်ကြီးကျောင်းများလည်း ဒကာများဘက် လိုက်ပြီး ကွဲကြရပြန်သည်။ ယခင်က ကျောင်းဝင်းအကျယ်ကြီးထဲ၌ ကျောင်းကြီး နှစ်ဆောင်ပြိုင် ဆောက်ထားကြရာ ယခုကဲ့သို့ အသင်းအဖွဲ့များ ကွဲသောအခါ ဒိုင်အာခီကျောင်းက အားကောင်းလျှင် ဟုမ်းမရူးကျောင်းကို နှင်ထုတ်လေ့ရှိသည်။ အနှင်ခံရသော ကျောင်းအဖို့ ချက်ချင်း ပြောင်းရန် မြေမရှိ။ ထို့ကြောင့် မြေအသစ် ရှာကြရသည်။

ဤကဲ့သို့သောအချိန်တွင် မြိတ်မြို့မှ ဟုမ်မရူးအသင်းဥက္ကဋ္ဌ ဦးရိုး-ကို အားကိုးကြရသည်။ ဦးရိုးသည် မြိတ်မြို့ ထားဝယ်စုရပ်၌ ပန်းတိမ်ဆရာဘ၀မှ (သူလေးစား ကိုးကွယ်သောဆရာတော်က ဆေးကျမ်းများ ပေးကမ်းပြီး မြန်မာသမားတော်ဖြစ်အောင် တိုက်တွန်းသောကြောင့်) သမားတော် ဖြစ်လာသူ ဖြစ်သည်။ နေ့စဉ်ပင် သံဃာတော်များ၊ သီလရှင်များနှင့် ဆင်းရဲသား၊ ဆွေမျိုး၊ မိတ်ဆွေများကို အခလွတ် စေတနာသမားတော်အဖြစ် ကုသိုလ်ပြု ဆေးကုပေးနေသူဖြစ်သည်။ သီတင်းဝါလ ကျွတ်ချိန်၌ ကျေးဇူးသိတတ်သူများက နိုင်သမျှ ကန်တော့ကြသော ပစ္စည်းများဖြင့်သာ ရောင့်ရဲလျက် နေထိုင်လေ့ရှိသည်။

သူသည် ဗုဒ္ဓစာပေကျမ်းဂန်များကို အသင့်အတင့် တတ်သိနားလည်သည်။ ရှေးခေတ်က အသုဘအိမ်များ၌ အသုဘချပြီးလျှင် မိတ်ဆွေနှင့် ဆွေမျိုးများက အသုဘအိမ်သို့ လာကြလေ့ရှိသည်။ ထိုခေတ်က ဖဲဝိုင်းမရှိသောကြောင့် ညပိုင်း၌ ဦးရိုးက တရားဓမ္မများကို သူနားလည်သမျှ ဟောပြောလေ့ရှိသည်။

အရပ်ထဲ၌ သူ့အား ကြည်ညိုလေးစားကြသည်။ ရတနာသုံးပါးကို ကြည်ညိုသဒ္ဓါတရား ပွားသည့်အတိုင်း ကထိန်ခင်းလျှင် ဆင်းရဲသားများလည်း ကုသိုလ်ပါဝင်နိုင်အောင် စုဘူးများလုပ်ပြီး အလှူခံ၍ ငွေစုပေးသည်။ ကထိန်ခင်းသောအခါ မမျှော်လင့်ဘဲ ငွေများစွာ ရရှိသည်။ ဆင်းရဲသား၊ ဆွေမျိုး၊ မိတ်သင်္ဂဟများလည်း ၀မ်းမြောက်ဝမ်းသာ အလှူပါဝင်နိုင်ကြသဖြင့် သူ့ကို အားကိုး၍ ကျေးဇူးတင်ကြသည်။ ရပ်ရွာ၌ ကူညီစရာရှိလျှင်လည်း မဆိုင်းမတွ ကူညီတတ်သည်။ ကိစ္စတရပ်ရပ်ပေါ်၍ ဆုံးဖြတ်စရာရှိလျှင် ကျေနပ်အောင် ဆုံးဖြတ်ပေးတတ်သည်။ ရပ်ကွက်၌ အားလုံး ရိုသေ လေးစား ခံရသည်။ သူ၏ ဖြောင့်မတ် တည်ကြည်ခြင်း၊ စိတ်နှလုံး နူးညံ့ကောင်းမွန်ခြင်း၊ သဒ္ဓါတရားကောင်းခြင်းကြောင့် သူ့ကို သိသူ များကြသည်။ ဤသို့လျှင် မြိတ်မြို့၌ ဟုမ်မရူးအသင်း ဖွဲ့သောအခါ သူ့ကို ဥက္ကဋ္ဌ မြှောက်ကြသည်။

ဦးရိုးတို့ ကိုးကွယ်သော ဆရာတော်၏ ကျောင်းမှာ ဟုမ်းမရူးကျောင်းဖြစ်သောကြောင့် ဒိုင်အာခီတပည့်များက သူတို့အား တ၀င်းတည်း မထားလို။ ကျောင်းနှင့်အတူပြောင်းရွှေ့ပေးရန် ပြောကြသည်။ ထို့ကြောင့် ဦးရိုးသည် မြိတ်ဒိစတြိတ်အရေးပိုင်ထံသို့ အကျိုးအကြောင်း ပြောပြပြီး ကျောင်းဆောက်ရန် နေရာအသစ်တောင်းခံသည်။ အရေးပိုင်ကလည်း အလွယ်တကူ မြေနေရာကို ပေးလိုက်သည်။ ယင်းနေရာကို ဒိုင်အာခီများကလည်း သူတို့အလိုရှိနေကြသဖြင့် အရေးပိုင်ထံ လျှောက်ထားကြသည်။ ဟုမ်းမရူးကျောင်းအတွက် ပေးလိုက်ပြီး ဖြစ်ကြောင်း ပြောပြသည်။ သူတို့မရတော့ပေ။

ထိုနေ့မှစ၍ ဦးရိုးကို ဒိုင်အာခီများက မကျေနပ်ကြ။ အခွင့်ကောင်းရအောင် အရေးပိုင်ထံ ၀င်လျှောက်ရသလားဟု အပြစ်တင်ကြသည်။ မနာလို ရှိကြသည်။ ထိုခေတ်က မြိတ်မြို့တွင် မော်တော်ကားများ မရှိသေး၊ လန်ချားများသာ ရှိသည်။ ဦးရိုးသည် နံနက်ပိုင်း ဆေးကုပြီး ညနေ ၄-နာရီအချိန်တွင် အိမ်မှဘုရားသို့ သွားလေ့ရှိသည်။ ဘုရားပန်းများမှာ အုန်းလက်ကြောများဖြင့် သီထားသောကြောင့် ပန်းသီများကိုင်၍ သွားရသည်။ လမ်းတလျှောက် ဘုရားဖူးသူ များသဖြင့် အိမ်တချို့က ဘုရားသွားသူများအား ဘုရားပန်းသီများ ထွက်ပေးလေ့ရှိကြသည်။

ဦးရိုးသည် ပန်းများနှင့် ဖယောင်းတိုင်များကို ဘုရား သိမ် အသီးသီး၌၀င်၍ ဆက်ကပ်ပူဇော်ပြီးမှ နောက်ဆုံး သူ၏မိခင် ပူဇော်ထားသော ဘုရားရှိရာသိမ်သို့ ၀င်၍ ရှိခိုးလေ့ရှိသည်။ ဤကဲ့သို့ ညနေတိုင်း မပျက်မကွက် ဦးရိုး ဘုရားသွားချိန်တွင် ထိုလမ်းမကြီးရှိ တိုက်အိမ်တလုံးတွင်နေသော သူဋ္ဌေးတဦးသည် တိုက်ရှေ့သို့ထွက်လာ ပြီးလျှင် ဟုမ်းမရူး ဥက္ကဋ္ဌကြီး လာပြီ၊ တန်ခိုးကြီးလို့ ချေးရေတိုက်ဖို့ ကောင်းတယ်ဟေ့-ဟူ၍ အသံကျယ်လောင်စွာ အော်ပြောလေ့ရှိသည်။

ဦးရိုးကား ဣနြေ္ဒမပျက်၊ မကြားယောင်ဆောင်ကာ သွားမြဲတိုင်း သွားလျက်ပင်။ သူ့အား ရန်သူဟူ၍ သဘောမထား၊ သည်းခံသည်။ နေ့စဉ် ဦးရိုးအား ဤကဲ့သို့ စော်ကားနေသဖြင့် အိမ်နားနီးချင်း မိတ်ဆွေများက ဦးရိုး၏ တူသားများအား သွားတိုင်ကြသည်။ လူငယ်များက ဒေါသ ထောင်းထောင်းထွက်၍ သူတို့ သွားရောက် ဆုံးမမည်ဟု ဦးရိုးအား လာပြောကြသည်။

ဦးရိုးက ရန်ရန်ချင်း မတုံ့နှင်းကြနဲ့၊ ငါ့မှာ ဘာမှမထိခိုက်၊ သူမောတဲ့အခါ တိတ်သွားလိမ့်မယ်-ဟု ဆုံးမထားလိုက်သည်။ လူငယ်များကား မကျေနပ်ကြ။ စိတ်ထဲ မခံချင် ဖြစ်ကြသည်။ ဤသို့ဖြစ်ရာမှ နှစ်ပတ်ခန့် ကြာသောအခါ သူဋ္ဌေးထွက်မလာသဖြင့် ဦးရိုးက အံ့အားသင့်မိသည်။ ထို့နောက် သူဋ္ဌေးကြီး ၀မ်းတွေသွားပြီး ရေကိုသာအငမ်းမရ တောင်းသောက်နေရကြောင်း၊ ဆရာဝန်တွေလည်း မကယ်နိုင်တော့ကြောင်း သတင်းကြားရသည်။

များမကြာမီ ထိုသူဋ္ဌေး အနိစ္စရောက်သွားကြောင်း သိရှိရသည်။ အစောကားခံရသူ ဒုက္ခမတွေ့။ စောကားသူသာ ဒုက္ခတွေ့သွားသည်။ သည်းခံခြင်းကား မင်္ဂလာပင်။

( ဒေါ်စောရင် )
*********************************************************************************

( ပဋ္ဌာန်းတရားဖြင့် ကုသခြင်း )

စာရေးသူသည် တနေ့တွင် ရွှေတောင်မြို့ ဂန္ဓာရုံဆရာတော်ကြီး ဘဒ္ဒန္တ အဂ္ဂ၀ံသ ( အဂ္ဂမဟာပဏ္ဍိတ ) ထံတော်သို့ ကန်တော့ဖူးမြော်ရန် ရောက်ရှိသွားပါသည်။ ဆရာတော်ကြီးက ကန်တော့ခံတော်မူ၍ ဆုများပေးပြီး စာရေးသူ၏ ကျန်းမာရေး အခြေအနေကို မေးမြန်းတော်မူသည်။ စာရေးသူက မိမိ၏ ကျန်းမာရေး ချွတ်ယွင်းချက်ကို လျှောက်ထားသည်။ ထိုအခါ ဆရာတော်ကြီးက ပဋ္ဌာန်းပစ္စယုဒ္ဒေသ ပါဠိတော်ကို ရွတ်ဖတ်ပူဇော်၍ မိမိရောဂါကို ကုသကြည့်ရန် တိုက်တွန်းပြောကြားသည်။ ထို့နောက် ရွတ်ဖတ်ပုံ ရွတ်ဖတ်နည်းပါ အမိန့်ရှိပါသည်။

စာရေးသူသည် ဆရာတော် အမိန့်ရှိလိုက်သည့် နေ့မှစ၍ နေ့စဉ် ပြုလုပ်နေကျဖြစ်သော ဘုရားရှိခိုး၊ ပရိတ်ရွတ်၊ မေတ္တာပို့ပါသည်။ ထို့နောက် ပဋ္ဌာန်းပစ္စယုဒ္ဒေသ ပါဠိတော်ကို အာရုံစူးစိုက်၍ လေးလေးနက်နက် ရွတ်ဖတ်ပူဇော် ပါသည်။ ၅-ရက်မြောက်သောနေ့တွင် ထူးခြားသော အိပ်မက်များ မြင်မက်ပါတော့သည်။

အိပ်မက်ထဲတွင် စာရေးသူ၏ ၀မ်းဗိုက်တွင်းမှ ဆံပင်ချည်ထွေး ၅-ထွေးသည် အတွဲလိုက် ထွက်ကျသည်ဟု မြင်မက်ပါသည်။ တဆက်တည်းမှာပင် ညာဘက်နားတွင်းမှ နဖာချေးများ အလိပ်လိုက်၊ အခွေလိုက် များစွာ ထွက်ကျသွားသည်ဟု မြင်မက်ပါသည်။

ထိုကဲ့သို့ အိပ်မက်မြင်မက်ပြီးသည့် နောက်ပိုင်းမှစ၍ ကျန်းမာရေး တစတစ ကောင်းမွန်လာပါတော့သည်။ ယခင်ကဆိုလျှင် စိတ်ထိခိုက်စရာ ပေါ်ပေါက်လာသည့် အခါမျိုးနှင့် ကြုံကြိုက်လာလျှင် ပုံလျက်သားကျပြီး သတိလက်လွတ် မလှုပ်နိုင် မရှားနိုင် ဖြစ်သွားသည်။ ရင်တွင်းမှလည်း မချိအောင် ဝေဒနာခံစားရတတ်ပါသည်။

ဤကဲ့သို့ ဝေဒနာဆိုးများ ၂-ကြိမ် ၃-ကြိမ် ဖြစ်ခဲ့ဖူးပါသည်။ ယခုနောက်ပိုင်းတွင် ဤလို ဝေဒနာမျိုး လုံးဝမဖြစ်တော့ပါ။ ရင်တုန်ခြင်း၊ မောပန်းခြင်း၊ အသက်ရှူမ၀ခြင်းတို့ပင် ပျောက်ကင်းသလောက် ဖြစ်ပါသည်။

စာရေးသူသည် နှလုံးအထူးကု ဆရာဝန်ကြီး ၂-ဦး၊ မြန်မာသမားတော်ကြီးများနှင့် နှစ်စဉ်ပြ၍ ကုသနေရသူ ဖြစ်ပါသည်။ ယခုမူ ဆရာတော်ညွှန်ကြားချက်အတိုင်း ယုံကြည်လေးနက်စွာ ကျင့်သုံး၍ ပဋ္ဌန်းတရားတော်ကြီးအား ပူဇော်ရသည့် အကျိုးကြောင့် စွဲကပ်နေသော ရောဂါဝေဒနာမှ ထမြောက် အောင်မြင်ခဲ့ရပါသည်။

ရောဂါဝေဒနာရှင်များ ကိုယ်၏ ဆင်းရဲခြင်း၊ စိတ်၏ ဆင်းရဲခြင်းမှ ကင်းဝေးကြပါစေရန်၊ ရောဂါပျောက်ကင်း ချမ်းသာခြင်းဖြင့် အောင်မြင်မှု ရယူကြပါစေရန် အတုယူ၍ လိုက်နာကျင့်သုံးကြစေလိုသော စေတနာရင်းဖြင့် တင်ပြလိုက်ရခြင်း ဖြစ်ပါသည်။

ရောဂါပျောက်ကင်း ချမ်းသာစေရေးအတွက် ပဋ္ဌာန်း ပစ္စယုဒ္ဒေသ ပါဠိတော်ကို ရွတ်ဖတ်ပူဇော်နည်းမှာ အောက်ပါအတိုင်း ဖြစ်ပါသည်။

ရှေးဦးစွာ မိမိတို့နေရာဌာနတွင် ကိုးကွယ်ပူဇော်ထားသော ရုပ်ပွားဆင်းတုတော်ရှေ့၌ မတ်မတ်ခြေစုံ ရပ်၍ လက်အုပ်ချီပြီးလျှင်-
၁။ နမော အနန္တနယ ဒေသကဿ သမ္မာသမ္ဗုဒ္ဓဿ-ဟု ၃-ခေါက် ရွတ်ပါ။
၂။ ဟေတုပစ္စယော-မှစ၍ အ၀ိဂတပစ္စယော အဆုံး ၂၄-ပစ္စည်း ပဋ္ဌာန်းပစ္စယုဒ္ဒေသ ပါဠိတော်ကို မိမိခန္ဓာကိုယ် ဆံဖျားမှ ခြေဖျားတိုင်အောင် အထက်မှ အောက်သို့ စိတ်ကညွတ်၍ ရွတ်ဖတ်ပါ။
၃။ တဖန် အောက်ခြေဖျားမှ အထက်ဆံဖျားတိုင် အောက်မှ အထက်သို့ စိတ်ကညွတ်၍ ရွတ်ဖတ်ပါ။
၎။ မိမိခန္ဓာကိုယ်ကို လက်ျာရစ် လှည့်၍ (စိတ်ဖြင့်) ရွတ်ဖတ်ပါ။
၅။ မိမိခန္ဓာကိုယ်ကို လက်ဝဲရစ် လှည့်၍ (စိတ်ဖြင့်) ရွတ်ဖတ်ပါ။
၆။ နောက်ဆုံး မြှောက်ချီထားသော လက်အုပ်ကို ဦးထိပ်ထက်တင်၍ မိမိရောဂါရှိရာ (နှလုံးသား) ကို စိတ်ကညွတ်၍ ရွတ်ဆိုရန် ဖြစ်ပါသည်။

မှတ်ချက်။ စာရေးသူမှာ နှလုံးသွေးကြောကျဉ်းသော ရောဂါရှင်ဖြစ်၍ နှလုံးသားကို စိတ်စိုက်၍ ရွတ်ဖတ်ခြင်း ဖြစ်သော်လည်း အခြားသော ဝေဒနာရှင်များမှာ မိမိတို့ ရောဂါရှိရာသို့ မှန်းဆ၍ ရွတ်ကြရန် ဖြစ်ပါသည်။

အမှန်မှာ မိမိခန္ဓာကိုယ် တခုလုံးအား အသည်းနှလုံးပါမကျန် ပဋ္ဌာန်းဒေသနာတော်ဖြင့် စည်းချ ကာကွယ်၍ ထုံမွှမ်းထားခြင်းပင် ဖြစ်ပါသည်။
အားလုံးသော ရောဂါဝေဒနာရှင်များ ပဋ္ဌာန်းတရားတော်ကြီးကို ရွတ်ဖတ်ပူဇော်ခြင်းဖြင့် ပျောက်ကင်း ချမ်းသာကြပါစေ။

( ရှင်ထွေး-ရွှေတောင် )

( မြတ်မင်္ဂလာ-၁၉၉၅-ခု နိုဝင်ဘာလ )

No comments: