ယေ ကေစိ အကုသလာ ဓမ္မာ၊ သဗ္ဗေ တေ အဓောဘာဂံ ဂမနီယာ ။
ယေ ကေစိ ကုသလာ ဓမ္မာ ၊ သဗ္ဗေ တေ ဥပရိဘာဂံ ဂမနီယာ ။
မူလပဏ္ဏာသပါဠိတော် သလ္လေခသုတ်တွင် ဟောတော်မူခဲ့သော ဒေသနာတော်တခု ဖြစ်၏၊
အဓိပ္ပါယ်ကား အလုံးစုံသော အကုသိုလ်တရားတို့သည် အောက်သို့ စုန်မျောသက်ဆင်းစေတတ်၏။
အလုံးစုံသော ကုသိုလ်တရားတို့သည် အထက်သို့ ဆန်တက် မြင့်မားစေတတ်ကုန်၏။
ကြုံတောင့်ကြုံခဲ ရနေကြသော ဘ၀ကောင်းတွင် ဤတရားများကို စွမ်းအားရှိသလောက် လိုက်နာကျင့်သုံးနေကြသူ အများအပြား ရှိပါ၏၊ သို့ရှိလင့်ကစား မေ့မေ့လျော့လျော့ ရှိနေပြီး လစ်ဟင်းနေကြမည်ကို စိုးရိမ်တော်မူသော လယ်တီဆရာတော်ဘုရားကြီးသည် အနယ်နယ်အရပ်ရပ်သို့ လှည့်လည်တရားဟောစဉ် ပထမလက်ဦး တရားပွဲတွင် ဤတရားကို ဟောကြားတော်မူလေ့ရှိသည်-ဟု မှတ်သားရဖူးပါသည်။ ဆရာတော်ကြီးသည် ထင်ရှားသိသာစေရန်အတွက် ဧကာဒသနိပါတ် ဓမ္မဒေ၀ဇာတ်တော်ကို ရှင်းလင်းဟောကြားလေ့ရှိပါသည်။
ဤနေရာတွင် ထိုဇာတ်တော်၏ လိုရင်းအတိုချုပ်ကို ဖော်ပြရသော် ဘုရားအလောင်းတော်သည် တချိန်က ဓမ္မဒေ၀မည်သော သူတော်ကောင်းနတ်သား ဖြစ်တော်မူ၏၊ ဇမ္ဗူဒီပါကျွန်းကို လှည့်လည်၍ ကုသိုလ်ကောင်းမှုများ ပြုလုပ်ရန် တိုက်တွန်းဟောကြားတော်မူလေ့ရှိ၏။
ဒေ၀ဒတ်အလောင်းသည်လည်း အဓမ္မဒေ၀ မည်သော နတ်ဆိုးဖြစ်နေပြီး မကောင်းမှုများ ပြုလုပ်ရန် ပြောဟောတိုက်တွန်းနေ၏။
တနေ့သောအခါ နတ်နှစ်ပါး လမ်းခရီးတွင် ရင်ဆိုင်တွေ့ဆုံကြ၏၊ ထိုနေရာတွင် တပါးနှင့်တပါး အပြန်အလှန် ပြောဆိုပုံများသည် အလွန်မှတ်သားဖွယ် ကောင်းလှသည်၊ အကျယ်ကို ဧကာဒသနိပါတ်၊ ဓမ္မဒေ၀ဇာတ်ကို ဖတ်ပါ-ဟုသာ ညွှန်ပြရပါတော့မည်။ နောက်ဆုံးတွင် အဓမ္မနတ်သားသည် နတ်ရထားပေါ်မှ မြေပြင်သို့လိမ့်ကျပြီး မြေမျိုခံရပေတော့သည်။
ဗုဒ္ဓဘာသာအများစု သိပြီးဖြစ်သော ကောင်းမှု မကောင်းမှုများကို မျက်ခြည်မပြတ်ကြစေရန်နှင့် ကောင်းကျိုးချမ်းသာ ဧကန်ပေးနိုင်သော အဆန်တရားများကို ပွားများနိုင်ကြပါစေ-ဟူသော စေတနာဖြင့် နှိုးဆော် သတိပေးလိုက်ရပါသည်။
Subscribe to:
Post Comments (Atom)
No comments:
Post a Comment