Friday, April 10, 2009

ဝေးသော်လည်း နီးပါသည်

အနာထပိဏ်သူဋ္ဌေး၏သမီး စူဠသုဘဒ္ဒါသည် ဥဂ္ဂမြို့မှ သူဋ္ဌေးသားနှင့် လက်ထပ်ထိမ်းမြား၏၊
ထို့နောက် လင်ယောက်ျားအိမ်သို့ လိုက်နေရ၏၊ ယောက်ျားသည် တိတ္ထိများကို ကိုးကွယ်သူဖြစ်သည်၊
သူ၏အိမ်၌ မင်္ဂလာပွဲ ကျင်းပသောအခါ အ၀တ်မ၀တ်သော တိတ္ထိဆရာကြီးများကို ဖိတ်ခေါ်ကျွေးမွေး၏၊ ယောက္ခမများက စူဠသုဘဒ္ဒါအား ရှိခိုးရန်ခေါ်၏၊ စူဠသုဘဒ္ဒါသည် တိတ္ထိများကို ကြည့်ရန်ရှက်သဖြင့် အနားမလေပေ၊ ထို့နောက် ယောက္ခမများအား မြတ်ဗုဒ္ဓဂုဏ်တော်များကို ပြောပြသည်၊
အိမ်သို့ ပင့်ဖိတ်ခွင့်ပြုသဖြင့် စူဠသုဘဒ္ဒါသည် ဇေတ၀န်ကျောင်းတော်ရှိရာဘက်သို့ မျက်နှာမူ၍
အရှင်ဘုရား၊ မနက်ဖန် သံဃာတော်များနှင့်တကွ ဆွမ်းဘုဉ်းပေးရန် ကြွတော်မူပါ၊ ဤပန်းဖြင့် ပူဇော်ပင့်ဖိတ်ပါသည်-ဟု အဓိဋ္ဌာန်ပြု၍ မြတ်လေးပန်းရှစ်ဆုပ်ကို ကောင်းကင်သို့ လွှင့်တင်လိုက်၏။

ပန်းများသည် ဘုရားရှင်အထံ ရောက်သွားပြီး တရားပလ္လင်အထက်ဝယ် ပန်းမျက်နှာကြက်ဖြစ်၍ တည်၏၊ ထိုအချိန်တွင် အနာထပိဏ်သူဋ္ဌေးက နက်ဖြန် သူ၏အိမ်သို့ ဆွမ်းစားကြွပါ-ဟု လာပင့်ရာ ဘုရားရှင်က ဥဂ္ဂမြို့မှ စူဠသုဘဒ္ဒါ၏ ဖိတ်ကြားချက်ကို လက်ခံပြီးကြောင်း မိန့်ကြား၏၊
အနာထပိဏ်သူဋ္ဌေးက အရှင်ဘုရား စူဠသုဘဒ္ဒါသည် ဤအရပ်မှ ယူဇနာ တရာ့နှစ်ဆယ် ဝေးသောအရပ်၌ နေသည်မဟုတ်ပါလော-ဟု လျှောက်ထားသည်၊ ဒါယကာ သူတော်ကောင်းတို့သည် ဝေးသောအရပ်၌ နေသော်လည်း မျက်မှောက်အနီး၌ တည်သကဲ့သို့ ထင်ရှားရှိကုန်၏-ဟု မိန့်တော်မူပြီး အောက်ပါဂါထာကို ဟောတော်မူသည်။

နောက်နေ့တွင် နတ်သိကြားတို့၏ အကူအညီဖြင့် ဘုရားရှင်နှင့်တကွ သံဃာတော်များ ကြွရောက်၍ တရားဟောသည်၊ ဥဂ္ဂသူဋ္ဌေး ဇနီးမောင်နှံနှင့်တကွ ပရိသတ်အပေါင်းသည် သောတာပန်စသည် ဖြစ်ကြလေသည်။

( ပါဠိဂါထာ )
ဒူရေ သန္တော ပကာသေန္တိ ၊ ဟိမ၀န္တောဝ ပဗ္ဗတော ။
အသန္တေတ္ထ န ဒိဿန္တိ ၊ ရတ္တိံ ခိတ္တာ ယထာ သရာ ။

( မြန်မာပြန် )
ဟိမ၀န္တာတောင်သည် ဝေးသောအရပ်၌ တည်သော်လည်း ထင်ရှားသကဲ့သို့
သူတော်ကောင်းတို့သည် အဝေး၌ပင် နေသော်လည်း ထင်ရှားကုန်၏။
ညဥ့်အခါပစ်လိုက်သော မြားသည် မထင်ရှားကုန်သကဲ့သို့
သူယုတ်မာတို့သည် အနီး၌ ရှိနေကြကုန်သော်လည်း မထင်ရှားကုန်။

( ဆောင်ပုဒ် )
ဟိမ၀န္တာ၊ တောင်သေလာသည်၊ ဝေးကွာတည်ငြား၊ လွန်ထင်ရှားသို့၊
တရားခညောင်း၊ သူတော်ကောင်းသည်၊ ထောင်သောင်းယူဇနာ၊ ဝေးကွာနေငြား၊ လွန်ထင်ရှား၏၊
လေးပါးအင်္ဂါ၊ ပြည့်စုံလာသည့်၊ ညဥ့်ခါမှောင်မိုက်၊ ပစ်လွှတ်လိုက်မြား၊ မထင်ရှားသို့၊
တရားတိမ်းစောင်း၊ မကောင်းယုတ်မာ၊ သူတို့မှာကား၊ လွန်စွာနီးနား၊ ရှိနေငြားလည်း၊ မထင်ရှားပါ၊ ဝေးသည်သာတည်း။

( ပကိဏ္ဏက၀ဂ်၊ စူဠသုဘဒ္ဒါဝတ္ထု )

No comments: