Monday, April 13, 2009

သံသရာခရီးသည် ၇-ဦး

ကမ္ဘာပေါ်ရှိ လှုပ်လှုပ်ရွရွ မြင်တွေ့နေရသော သတ္တ၀ါအားလုံးနှင့် မမြင်မတွေ့ရသော သတ္တ၀ါအားလုံးတို့သည် သံသရာခရီးသည်များ ဖြစ်ကြပါသည်၊ သံသရာဆိုသည်မှာ ခန္ဓာ, အာယတန, ဓာတ်တို့ မပြတ်မလပ် မရပ်မနားဘဲ ဖြစ်ပျက်နေသော ဘ၀အစဉ်ကိုခေါ်သည်။

ထိုဘ၀အစဉ်သည် အဝေးကြီးတွင်ရှိနေသည်မဟုတ် အများအားဖြင့် သတ္တ၀ါတို့၏ မျက်စိ,နား, နှာ, လျှာ, ကိုယ်, စိတ် တည်းဟူသော ခြောက်ဒွါရမှာ တရစပ် အထပ်ထပ် ဖြစ်ပျက်နေသော သဘောတရားများပင် ဖြစ်သည်။

ကျွန်ုပ်တို့ ဗုဒ္ဓဘာသာများအနေဖြင့် အဓိကရည်ရွယ်ချက်သည် သံသရာမှ လွတ်မြောက်ရေးပင်ဖြစ်၏၊ ထိုလွတ်မြောက်ရေးအတွက် မြတ်ဗုဒ္ဓသည် ၄၅-၀ါပတ်လုံး မနေမနား နည်းအမျိုးမျိုးပြပြီး လမ်းညွှန်တော်မူခဲ့၏၊ မြတ်ဗုဒ္ဓချမှတ်ခဲ့သော လမ်းစဉ်များအနက် မိမိစရိုက်အားလျှော်သော နည်းလမ်းကို စွဲစွဲမြဲမြဲ လိုက်နာကျင့်သုံးရန်သာ လိုပါသည်၊

ရှေးဦးစွာ မိမိသည် သံသရာခရီးသည် ၇-မျိုးတွင် မည်သည့်အမျိုးတွင် ပါဝင်သည်ကို သိထားရန်လိုပါသည်၊ ထို ၇-မျိုးကို စိစစ်ကြည့်ကြပါစို့၊ အင်္ဂုတ္တိုရ်နှင့် ပုဂ္ဂလပညတ် ပါဠိတော်တို့တွင် ပြဆိုချက်အရ သံသရာခရီးသည် ၇-မျိုးဆိုသည်မှာ-

၁။ ငုပ်ပြီး မြုပ်သွားသောသူ ( ဒုဂ္ဂတိဘုံသားများ )
၂။ ပေါ်ပြီး မြုပ်သွားသောသူ ( ပုထုဇဉ်များ )
၃။ ပေါ်ပြီး တည်နေနိုင်သောသူ ( ကလျာဏပုထုဇဉ်များ )
၎။ ပေါ်ပြီး မော်ကြည့်နိုင်သောသူ ( သောတာပန်များ )
၅။ ပေါ်ပြီး ကူးခတ်သွားသောသူ ( သကဒါဂါမ်များ )
၆။ ကူးပြီး ထောက်မိသောနေရာ ရောက်နေသူ ( အနာဂါမ်များ )
၇။ ထောက်မိပြီး ကမ်းတဘက်သို့ လှမ်းတက်သွားသောသူ ( ရဟန္တာများ )

ဤစာရင်းကိုကြည့်လျှင် မိမိသည် အဘယ်အမျိုးအစားတွင် ပါဝင်သည်ကို ရိပ်စားမိပါလိမ့်မည်။

မိမိသည် ၁-အမျိုးအစား=ငရဲ, တိရစ္ဆာန်, ပြိတ္တာ, အသူရကာယ် အပါယ်လေးဘုံ ဒုဂ္ဂတိဘုံသား မဟုတ်သည်မှာ သေချာပါ၏။

၆-၇ အမျိုးတွင် မပါဝင်သည်မှာလည်း သေချာပါသည်။
ကျန်လေးမျိုးတွင် ပါဝင်သည်ဆိုပါစို့၊ အသေအချာစိစစ်လျှင် သောတာပန်နှင့် သကဒါဂါမ် နည်းပါးပါလိမ့်မည်၊ ပုထုဇဉ်နှင့် ကလျာဏပုထုဇဉ်များသာ များပါလိမ့်မည်။

မိမိတို့ရောက်ရှိနေသော အဆင့်မှ အထက်အဆင့်သို့ တက်လှမ်းရန် ကြိုးစားရန် လိုပါသည်၊ ယခုရရှိနေသော ဘ၀ကောင်း၊ သာသနာတော် ထွန်းတောက်နေသော အချိန်ကောင်းကို အရအမိ အခွင့်အရေးယူရန် အရေးကြီးပါ၏။
ခွင့်သာတုန်းမှ မရုန်းချင်လျှင် အရှုံးနင့်ပြင် ရှိသေးလေလိမ့်လား-ဟူသော သတိပေးစကားကို သတိပြုရပါမည်၊ ထို့ကြောင့် သံသရာခရီးတလျှောက်တွင် ချမ်းသာလွယ်ကူစွာ သွားလာနိုင်ရေးအတွက် ဒါနကို နည်းလမ်းမှန်စွာ ပြုလုပ်၍၊ အထူးအရေးကြီးသော ကိုယ်ကျင့်သီလကိုလည်း အနည်းငယ်မျှ အတိမ်းအစောင်း မခံဘဲ၊ ၀ိပဿနာ ဘာဝနာကို စွဲစွဲမြဲမြဲ အားထုတ်ကာ သံသရာခရီးသည်ဘ၀မှ လွတ်မြောက်ရန် ကြိုးစားနိုင်ကြပါစေ။

No comments: