Tuesday, April 7, 2009

ဘာသာရေး ပြဿနာ ( ၄၈ )

( ဘဒ္ဒန္တ တိလောကသာရ ဖြေသည် )

( မေး ) ( ဂတိငါးပါးနှင့် အမျှဝေမှု )
လူတဦးတယောက် ဘ၀တပါးသို့ ပြောင်းသွားသည့်အခါ ဂတိငါးပါးရှိသည့်အနက် ပေတဂတိရောက်မှ ကောင်းမှုကုသိုလ်၏ အဖို့ဘာဂကို အမျှပေးဝေ၍ ရရှိပြီး အခြားဂတိသို့ရောက်လျှင် အမျှပေးဝေ၍ မရဟု သိရပါသည် ဘုရား၊ အမျှဝေစာတမ်း ဆိုသည့်အခါမှာမူ သုံးဆယ့်တဘုံအတွင်းမှာရှိသော သတ္တ၀ါတို့အား အမျှပေးဝေပါ၏-ဟု ဆိုပါသည်၊
ပေတဂတိမှတပါး သုံးဆယ့်တဘုံသားများလည်း အမျှရနိုင်သည်ဟု သက်ရောက်နေပါသည်၊ စကားနှစ်ရပ် ဆန့်ကျင်နေပါသဖြင့် အဆင်ချောအောင် ဖြေကြားပေးတော်မူပါဘုရား။
( စောဖော့ထူး-ကရင်ပြည်နယ် )

( ဖြေ )
သတ္တ၀ါတဦး (လူတဦးတယောက်) ကွယ်လွန်သည့်အခါ ၄င်းအားရည်ညွန်း၍ လှူဒါန်း အမျှဝေရာ၌ ကွယ်လွန်သူ ပေတဂတိ (ပရဒတ္တူပ ဇီဝိတပေတဘ၀) သို့ ရောက်နေမှသာ အမျှဝေသည်ကို သာဓုခေါ်နိုင်၍ အလှူအဖို့ကို ရနိုင်သည်မှာ မှန်ပါသည်၊ သို့သော် အမျှဝေခြင်း ( ပတ္တိဒါနကုသိုလ် ) ကို မည်သူမဆို သာဓုခေါ်ခြင်း (ပတ္တာနုမောဒန ကုသိုလ်) ဖြင့် ထပ်တူ ရနိုင်ပါသည်။

ဥပမာ-ကွယ်လွန်သူအတွက် ဆွမ်းသွတ်၍ အမျှဝေရာ ကွယ်လွန်သူမှာ သာဓုမခေါ်နိုင်သောဂတိ (နိရယဂတိစသည်) သို့ ရောက်နေ၍ သာဓုမခေါ်နိုင်သဖြင့် ကုသိုလ်အဖို့ကို မရနိုင်ပါ၊
သို့သော်လည်း သာဓုခေါ်နိုင်သော လူနတ်များ အမျှဝေသံကြား၍ သာဓုခေါ်လျှင် ကုသိုလ်အဖို့ကို ရပါသည်၊ ထို့ကြောင့် ကြားကြားသမျှ အမျှ အမျှ အမျှ ယူတော်မူကြပါကုန်-ဟု ဆိုပါသည်၊

ကြေးစည်ခေါင်းလောင်း ထိုး၍လည်း အဝေးမှကြားသိ၍ သာဓုခေါ်နိုင်ရန် အမျှဝေကြရပါသည်၊ အမျှဝေခြင်းမှာ ဘ၀တပါးသို့ ပြောင်းသွားသူ တဦးအတွက်သာ မဟုတ်၊ သုံးဆယ့်တဘုံ၌ ရှိသမျှ ကြားသမျှ သတ္တ၀ါမှန်သမျှအား ရည်ရွယ်ကြောင်း မှတ်သားသင့်ပါသည်။
*********************************************************************************

( မေး ) ( ကာမေသုမိစ္ဆာစာရ နှင့် အမျိုးသမီး )
အရှင်ဘုရား၊ အမျိုးသမီးမများ ကာမေသုမိစ္ဆာစာရကံထိုက်လျှင် ငရဲတွင် မည်သို့ ခံစားရပါသလဲဘုရား၊ နောက်ဘ၀တွင် မည်သို့ဖြစ်သည်ကို သိလိုပါသည်ဘုရား၊ ဇာတ်နိပါတ်တော်များနှင့် ဥပမာပေး၍ ဖြေကြားတော်မူပါဘုရား။
( ဇော်လင်းထွန်း-ရန်ကုန် )

( ဖြေ )
ကာမေသုမိစ္ဆာစာရကံကြောင့် အမျိုးသမီးများ ငရဲခံရပုံကို နေမိဇာတ် ( ဇာတကဋ္ဌကထာ ၆-၁၄၂ ) ၌ ပါဠိဘာသာဖြင့် ရှိသည်၊ ယင်းကို ဦးသြဘာသက နေမိဇာတ်တော်ကြီး ၀တ္ထုတွင် နတ်၏ ရထားမှူးဖြစ်သော မာတလိနတ်သား၊ ကြောက်မက်ဖွယ်ရှိသော ဤငရဲ၌လည်း တကွဲတပြားပင် ယောက်ျားတယောက်မျှ မခံရ၊

ဤမိန်းမအများတို့သည် နွားသတ်ရာအရပ်တို့၌ ခေါင်းပြတ်၍ သွေးလိမ်းကျံသော နွားတို့ကဲ့သို့
အချို့သော် ကိုယ်လည်း အပြတ်ပြတ် အပိုင်းပိုင်း၊ အချို့လည်း အယွင်းယွင်း၊ အပေါက်ပေါက်၊ ခါးအောက်ကိုယ်အနေလည်း သံမြေထဲသို့ မြှုပ်သိပ်လျက် ခြေထိတ်ခတ်သောအတူ၊ ပူပြင်းကျင်နာ ဝေဒနာအဟုန်တို့ကြောင့် လက်စုံထိပ်ပြင်တင်ထား၍ ဟစ်အော်ကာ ကိုးကွယ်ရာမသိ ရှိစဉ်တုန်းတွင်ပင် တောင်လုံး၊ ကမ်းလုံးလိမ့်သကဲ့သို့ သိမ့်သိမ့်သဲသဲ ရဲရဲတောက်သော သံလုံးကြီးများစွာ လေးဖြာသောအရပ်က အထပ်ထပ် အဖန်ဖန် အလှည်းခံရ၍ သံမြေပြင်သို့ လိမ့်လာတတ်သဖြင့် ခြောက်တပ်သော မုန်ညင်းစေ့ကို မွှေနင်း၍ ကြိတ်သကဲ့သို့ အစိတ်စိတ်အမှုန့်မှုန့် ကြေရှာကြပါပြီ။

မသေဘဲတဖန် ရှင်ပြန်တုံတလဲလဲ ခံမြဲကို မစွန့်ရ၊ ထိုမိန်းမ ငရဲသူအပေါင်းတို့၌ မကောင်းသော ဒုက္ခဝေဒနာ ပြင်းစွာလှ၏တကား-ဟု အမြင်ကို မိန့်ကြား၍
အဘယ်ကြောင့် ဤသို့ ငရဲခံနေရသနည်းဟု နေမိမင်းကြီးက မေး၍ မာတလိ နတ်သားက ဤမိန်းမတို့သည် လူ့ဘ၀က မိမိလင်မှတပါး အခြားယောက်ျားတို့နှင့် မှားယွင်းသော အကျင့်ကို ကျင့်မိခြင်းကြောင့် ဤသို့ ငရဲခံနေရကြောင်း လျှောက်ထားသည်၊ ထိုငရဲ၌ နှစ်ပေါင်း သိန်းပေါင်းများစွာ ငရဲခံရ၍ ငရဲမှလွတ်သော် အရေပြားမရှိ၊ အသားအတိ သွေးသံရဲရဲကိုယ်ဖြင့် ပြိတ္တာမများဖြစ်၍ ဆူးတောထဲတွင်နေရပုံ၊ မှက်ခြင်ရဲတို့ ကိုက်ခဲ၍ လွန်ကဲပြင်းပြစွာ ဒုက္ခခံရပုံ စသည် ရှိသေးသည်၊ ထိုထိုစာများ အထူးအားဖြင့် နရသာသနကျမ်း၊ သံဝေဂ၀တ္ထု ဒီပနီနှင့် ပေတ၀တ္ထု စသည်တို့ကို ရှာဖွေ ဖတ်ရှုနိုင်ပါသေးသည်။
*********************************************************************************

( မေး ) ( အလှူ ရေစက်ချခြင်း )
ဆရာတော်ဘုရား၊ အလှူပြုလုပ်ပြီး ရေစက်မချနိုင်ပါက ထိုအလှူအတွက် အထမြောက်သည်ဟု ဆိုနိုင်ပါရဲ့လားဘုရား၊ ကုသိုလ်အပြည့်အ၀ ရပါမည်လားဘုရား၊ အခြားတယောက်က ကိုယ်စား ရေစက်ချပေးခြင်းပြုလုပ်၍ ရပါမည်လားဘုရား၊ ဖြေကြားတော်မူပါရန် လျှောက်ထားပါသည်ဘုရား။
( ဒေါ်သန်းဆွေ-စမ်းချောင်း၊ ရန်ကုန် )

( ဖြေ )
ရေစက်ချခြင်းမှာ ဆုတောင်းခြင်း၊ အမျှဝေခြင်းသာဖြစ်သည်၊ ဒါနမှုပြုရာ၌ အလှူဝတ္ထုသည် အလှူရှင်၏ လက်မှ အလှူခံပုဂ္ဂိုလ်၏ လက်သို့ ရောက်လျှင်ပင် အလှူအထမြောက်ခဲ့ပြီဖြစ်ပါသည်၊ သို့သော် နိဗ္ဗာန်ကိုဆုတောင်း၍ ဒါနပြုမှသာလျှင် မိမိ၏ဒါနသည် ပါရမီဒါနဖြစ်နိုင်သဖြင့် အနည်းဆုံး-ဣဒံ မေ ပုညံ နိဗ္ဗာနဿ ပစ္စယော ဟောတု-ဟူ၍ ဆုတောင်းလျက် အမျှဝေမှသာလျှင် ပတ္တိဒါနဖြစ်နိုင်သဖြင့် အနည်းဆုံး ဣဒံ မေ ပုညဘာဂံ သဗ္ဗသတ္တာနံ ဒေမ-ဟူ၍ အမျှဝေလျက် ဒါနအလှူကို အဆုံးသတ်ကြစမြဲ ဖြစ်ပါသည်၊ ဆုတောင်းခြင်း။ အမျှဝေခြင်းတို့မှာ ကိုယ်တိုင်ပြုလုပ်ရမည့် ကိစ္စများဖြစ်၍ အခြားတယောက်အား ကိုယ်စားပြုလုပ်စေခြင်းမှာ အဆင်ပြေလှပါ။
*********************************************************************************

( မေး ) ( ဒုလ္လဘရဟန်း ပြုရာတွင် )
ဆရာတော်ဘုရား ပြည့်သူ့ဝန်ထမ်းများ ဒုလ္လဘရဟန်း ပြုကြရာတွင်-
၁။ ပင်စင်လစာရှိသည့် ၀န်ထမ်းများ ရဟန်းပြုခြင်း။
၂။ ရဟန်းပြုရန် ခွင့်အမျိုးမျိုး ရယူ၍ ရဟန်းပြုခြင်း။
၃။ အခြားအကြောင်းပြု၍ ခွင့်ယူရပြီး ရဟန်းပြုခြင်း။
၎။ အထက်တာဝန်ရှိသူ အကြီးအကဲမှ ရဟန်းဝတ်ချိန်များကို တာဝန်ချိန်အဖြစ် သတ်မှတ်ပေး၍ ရဟန်းဝတ်စေခြင်း- များတွင် ၀ိနည်းတော်အရ မည့်သည့်ရဟန်းပြုခြင်းသည် ထိုက်၍၊ မည်သည့်ရဟန်းပြုခြင်းသည် မထိုက်ကြောင်း ရှင်းလင်းဖြေကြားပါရန် လျှောက်ထားပါသည်ဘုရား။
( ဦးသစ်လွင်-ဒဂုံမြို့သစ်မြောက်ပိုင်း )

( ဖြေ )
ရဟန်းခံရာ၌ ရဟန်းလောင်းအား မေးစစ်ရာတွင်-
မင်းခစားယောက်ျား မဟုတ်ဘဲ ရှိပါ၏လော-ဟူသော အချက်တချက်ပါ၏၊ ယင်းမှာ အချို့မင်းခစား ယောက်ျားတို့သည် မည်သည့်ခွင့်မျှမယူဘဲ ကျောင်းသို့လာရောက်၍ ရဟန်းခံကြ၏။ ရဟန်းဘ၀ဖြင့် တရား အားထုတ်ကြ၏၊ ထိုအချိန်မှာပင် တာဝန်မှထွက်ခွါလာသူ၊ တာဝန်ရှိလျက် လစ်ထွက်လာသူ-ဟူ၍ မင်းမိန့်ဖြင့် ၄င်းရဟန်းတို့အား ဖမ်းဆီးခေါ်ဆောင်သွားမှုမျိုး ဘုရားလက်ထက်၌ ဖြစ်ပေါ်ဖူး၍ ဤသို့မေးစိစစ်ပြီး မင်းခစားမဟုတ်၊ ဟုတ်သော်လည်း တာဝန်ခံမှ အခွင့်ခံ ထွက်လာသူ ဖြစ်မှသာလျှင် ရဟန်းဝတ်ပေးကြပါသည်။ ရဟန်းခံပေးကြပါသည်၊

ပြဿနာရှင် တင်ပြထားသော အချက်လေးချက်လုံးကပင် တာဝန်မှလွတ်၍ ငြိစွန်းမှုကင်းသဖြင့် ရဟန်းခံနိုင်ခွင့်ရှိကြောင်း ရဟန်းပြုထိုက်ကြောင်း ဖြေကြားပါသည်။
*********************************************************************************

( မေး ) ( မြင်းခေါင်းဖမျက် )
ဆရာတော်ဘုရား၊ ရှေးက ခေါ်ဝေါ်သော ဝေါဟာရအချို့ကို နားမလည်ပါ၍ ရှင်းပြစေလိုပါသည်၊
မြတ်စွာဘုရား၏ လက္ခဏာတော်များကို ဆိုရာ၌ ဧဏိမည်သော သား၏ မြင်းခေါင်းကဲ့သို့ မြင်းခေါင်းတော်၊
မြင့်သော ဖမျက်တော်-ဟုဆိုရာ မြင်းခေါင်း-ဖမျက် ဆိုသည်မှာ မည်သည့်အင်္ဂါ အစိတ်အပိုင်းများ ဖြစ်ပါသလဲဘုရား။
( နုနုခင်-ကရင်ပြည်နယ် )

( ဖြေ )
မြင်းခေါင်း-ဟူသည်မှာ ယခု ခြေသလုံးဟူသော အစိတ်အပိုင်းကို ဆိုပါသည်၊
ရဟန်းတော်များသည် သလုံးမြင်းခေါင်းနှင့် ရင်း၍ ဆွမ်းခံစားခြင်း-ဟု အသုံးတွင်ကျယ်စွာ သုံးနှုန်းလျက်ရှိသည်။

ဖမျက်-ဟူသည်မှာ ဖနောင့်၏အထက် ခြေမျက်စိခေါ်သော အင်္ဂါအစိတ်အပိုင်း ဖြစ်သည်၊
မြန်မာအဘိဓာန်တွင် ဖမျက်၊ န၊ ဖနောင့်အထက် ခြေမျက်စိနှစ်ခု ၀န်းကျင်နေရာ-ဟု ဖော်ပြထားသည်ကို တွေ့နိုင်ပါသည်။

( မြတ်မင်္ဂလာ ၁၉၉၅-ခု မေလ )

No comments: