Thursday, April 16, 2009

ဘာသာရေး ပြဿနာ ( ၅၂ )

( ဘဒ္ဒန္တ တိလောကသာရ ဖြေသည် )

( မေး ) ( ကျိုး, ပေါက်, ပြောက်, ကျား )
အရှင်ဘုရား၊ တပည့်တော်တို့ သီလခံယူရာ၌ မကျိုး, မပေါက်, မပြောက်, မကျားရအောင် အထူးသတိထား၍ စောင့်ရှောက်ကြပါကုန်လော့-ဟု သတိပေးကြပါသည်၊ ထိုသီလ ကျိုး, ပေါက်, ပြောက်, ကျား၏ အဓိပ္ပါယ်ကို ရှင်းလင်း မိန့်ကြားတော်မူပါဘုရား။
( ဦးထွန်းရွှေ-သထုံ )

( ဖြေ )
ကျိုး၊ ပေါက်၊ ပြောက်၊ ကျားကို ပါဠိလို ခဏ္ဍံ၊ ဆိဒ္ဒံ၊ သဗလံ၊ ကမ္မာသံ-ဟု ဆိုပါသည်။
( ၀ိသုဒ္ဓိမဂ် ၁-၄၈ )တွင် ယင်းအဓိပ္ပါယ်များကို အကျယ်ရှင်းပြထားပါသည်၊
ရှစ်ပါးသီလ ဆိုကြပါစို့ အစသီလ ပါဏာတိပါတ ဖြစ်စေ၊ အဆုံးသီလ ဥစ္စာသယန မဟာသယန ဖြစ်စေ၊ သိက္ခာပုဒ် တပါးပါး ပျက်သွားက တုတ်တောင်ဝှေးတွင် အဖျားပိုင်းက၄င်း၊ အဆုံးပိုင်းက၄င်း၊ ကျိုးသွားသကဲ့သို့ ဖြစ်၍ ကျိုးသည်-ဟု ဆိုပါသည်။

အလယ်မှ သိက္ခာပုဒ်တပါး ပျက်သွားက ( ဥပမာ-အဒိန္နာဒါန )။
ဝတ်ထားသောပုဆိုး၌ အပေါက်တပေါက် ပေါက်သွားသကဲ့သို့ဖြစ်၍ ပေါက်သည်ဟု ဆိုပါသည်။

အလယ်မှပင် တပါးကျော်၊ နှစ်ပါးကျော် နှစ်ခု၊ သုံးခု ( ဥပမာ-အဒိန္နာဒါန၊ မုသာဝါဒ၊ ၀ိကာလဘောဇန ) ပျက်သွားလျှင် နွားမပြောက်၏ ခန္ဓာကိုယ်မှ အပြောက်ပြောက်များကဲ့သို့ဖြစ်၍ ပြောက်သည်ဟု ဆိုပါသည်။

အလယ်မှ နှစ်ပါးစီ သုံးပါးစီ ဆက်တိုက် ( ဥပမာ-အဒိန္နာဒါန-ကာမေသုမိစ္ဆာစာရ။
သုရာမေရယ-၀ိကာလဘောဇန ) ပျက်လျှင် ကျား၏ ခန္ဓာကိုယ်၌ အစင်းကြောင်းကြီးပမာ ဖြစ်၍ ကျားသည်ဟု ဆိုပါသည်။

ဤသို့လျှင် ကျိုး၊ ပေါက်၊ ပြောက်၊ ကျား၏ အဓိပ္ပါယ်ကို မှတ်သား၍ သီလကို မကျိုး၊ မပေါက်၊ မပြောက်၊ မကျားအောင်၊ ၀ါ-တပါးမှ ညှိုးနွမ်းကျိုးပျက်ခြင်း မရှိအောင် စောင့်ရှောက်ရန် သတိပြုရပါမည်။
*********************************************************************************

( မေး ) ( ကိုးပါးသီလ ၀ိဝါဒ )
ကျမ်းဂန်များ၌ လူတို့ ခံယူဆောက်တည်အပ်သော သီလသည် ငါးပါးသီလ၊ ရှစ်ပါးသီလ၊ ဆယ်ပါးသီလသာ ရှိသည်ဟု သိရပါသည် အရှင်ဘုရား၊ ယခု ကိုးပါးသီလဟု ထင်ရှားလျက် ရှိပါသည်၊ န၀င်္ဂုပေါသထသုတ်တော်၌ ကိုးခုမြောက် မေတ္တာသဟဂတေန စေတသာ-စသော အဆုံးအင်္ဂါကို ခံယူဆောက်တည်ရမည်မဟုတ်၊ ပွားများရမည်ဟုသာ ဆိုပါသည်၊ ထို့ကြောင့် တပည့်တော်တို့ မှတ်သားနိုင်အောင် ရှင်းလင်းဖြေကြားတော်မူပါ ဘုရား။
( ဖေမောင်တင်-အောင်သိဒ္ဓိ၊ သမိုင်း )

( ဖြေ )
ဤန၀င်္ဂ ဥပုသ်သည် ( ရဟန်းတို့ အင်္ဂါကိုးပါးနှင့် ပြည့်စုံသည်ဖြစ်၍ ကျင့်သုံးအပ်သော ဥပုသ်သည် ကြီးမြတ်သော အကျိုးရှိ၏) -စသည်ဖြင့် အင်္ဂုတ္တရနိကာယ န၀ကနိပါတ်၌ လာ၏၊ အဋ္ဌကထာ၌လည်း ဝေနေယျတို့ အလိုဆန္ဒ၏ အစွမ်းဖြင့် မေတ္တာဘာဝနာကိုထည့်၍ အင်္ဂါကိုးပါးနှင့် ပြည့်စုံသည်ဟူ၍ ဟောတော်မူ၏ ဟူ၍လာသည်။

ထိုမေတ္တာဘာဝနာကို အသီးအခြား ဆောက်တည်ရခြင်းမရှိ၊ ထိုမေတ္တာဘာဝနာကို တခုသော အစိတ်အင်္ဂါပြု၍ ဝေနေယျတို့ အလိုဆန္ဒ၏အစွမ်းဖြင့် န၀င်္ဂဥပုသ်ဟူ၍ ဟောတော်မူသကဲ့သို့ ဗုဒ္ဓါနုဿတိ စသည်တို့တွင်လည်း တပါးပါးကို အစိတ်အင်္ဂါပြု၍ ဗုဒ္ဓါနုဿတိဖြင့် မှတ်သားအပ်သော န၀င်္ဂဥပုသ် စသည်ကိုလည်း ဆိုသင့်၏။

ထိုကိုပင် ရည်ရွယ်၍ အဋ္ဌကထာ၌ ဝေနေယျတို့ အလိုဆန္ဒ၏ အစွမ်းဖြင့် မေတ္တာဘာဝနာကိုထည့်၍-ဟု မိန့်ဆို၏၊ မေတ္တာသည် အဗျာပါဒ မနောကံ ဖြစ်သည့် ၀ိရတီမဟုတ်သော (စေတသိက) သီလတည်း။ ထို့ကြောင့် ဆောက်တည်ခြင်းကို မပြုမူ၍လည်း မေတ္တာဘာဝနာဖြင့် တန်ဆာဆင်အပ်သော ဥပုသ်ကို န၀င်္ဂဥပုသ်ဟူ၍ ဆိုသင့်သည်သာဟု မှတ်အပ်၏။ အကယ်၍ ရိုသေလေးစားခြင်းငှါ အလေးအမြတ်ပြုအပ်သောသူ၏ အထံ၌ နှုတ်ဖြင့် ၀န်ခံလိုသည်ဖြစ်အံ့ (သဗ္ဗသတ္တေသု ယထာဗလံ မေတ္တာသဟဂတေန စေတသာ ဖရိတွာ ၀ိဟရာမိ) -အလုံးသောသတ္တ၀ါတို့၌ အစွမ်းသတ္တိအားလျော်စွာ မေတ္တာနှင့်တကွ ဖြစ်သောစိတ်ဖြင့် ဖြန့်၍နေပါအံ့-ဟုဆိုလျှင် အပြစ်တစုံတရာမရှိ၊ စင်စစ်သော်ကား ချီးမွမ်းသင့်သည်သာတည်း။
(အဘယာရာမ ဆရာတော်ဘုရားကြီး၏ အဆုံးအဖြတ်မှ လိုရင်းကောက်နုတ် ဖော်ပြချက်)
*********************************************************************************

( မေး ) ( အခြားစကြာဝဠာနှင့် မြတ်စွာဘုရား )
၁။ ဤစကြာဝဠာမှတပါး အခြားစကြာဝဠာတွင် ဘုရားရှင်များ မပွင့်ဟူ၍ ကြားသိရဖူးပါသည်၊ ကျမ်းအထောက်အထား သိလိုပါသည်ဘုရား။

၂။ ဂေါတမဘုရားရှင်သည် အခြားစကြာဝဠာသို့ ကြွရောက်၍ တရာဟောတော်မူခြင်း ရှိ-မရှိနှင့် ရှိလျှင် ကျမ်းစာအထောက်အထား သိလိုပါသည်ဘုရား။
( ကိုတင်အေး-စစ်တွေမြို့နယ် )

( ဖြေ )
၁။ ဤစကြာဝဠာမှတပါး အခြားမည်သည့် စကြ၀ဠာတွင်မှ ဘုရားမပွင့်ပါ။
ထိုအကြောင်းကို ၀ိဘင်းပါဠိတော် (အဘိ ၂၊ ၃၄၉) ၄င်းအဖွင့် သမ္မောအဋ္ဌကထာ (အဘိ-ဋ္ဌ ၂၊၄၁၈) တို့နှင့်
မိလိန္ဒပဥှာ ပါဠိတော် ( ဥှ-၁၁၊၂၃)တို့တွင် ပါဠိအထောက်အထားများ အကျယ်သိနိုင်ပါသည်။

၂။ အခြားစကြ၀ဠာသို့ ဂေါတမမြတ်စွာဘုရား ကြွ၍ တရားဟောတော်မူလေ့ရှိကြောင်း၊ သို့သော် အကျွတ်တရားကား မရနိုင်၊ ၀ါသနာမျှသာဖြစ်၍ နောင်ဘ၀တွင် ဤစကြ၀ဠာ၌ဖြစ်၍ အကျွတ်တရား ရနိုင်ကြောင်း စာများတွင် ဆိုပါသည်၊
၎င်းအကြောင်းအရာများကို ဒီဃနိကာယ် မဟာဝဂ္ဂပါဠိ (ဒီ ၂၊ ၉၂) ၄င်းအဖွင့် (ဒီ-ဋ္ဌ ၂၊ ၁၅၀)။
မူလပဏ္ဏာသပါဠိ (မ ၁၊ ၁၀၄) ၄င်းအဖွင့် (မ ၂၊ ၁-၃၃၉)။
အင်္ဂုတ္တရပါဠိ (အံ ၃၊ ၁၂၇) ၄င်းအဖွင့် (အံ-ဋ္ဌ ၃၊ ၂၄၆) တို့၌ ကြည့်ရှုပါ။
********************************************************************************

( မေး ) ( သံတွဲနှင့် စက်တော်ရာ )
၁။ မြန်မာနိုင်ငံ ရခိုင်ပြည်နယ် တောင်ပိုင်း ယခင်အခေါ် ဒွါရာဝတီ၊ ယခု သံတွဲမြို့သည် ဃဋပဏ္ဍိတဇာတ်တော်လာ ဒွါရာဝတီ ဟုတ်-မဟုတ်

၂။ မြန်မာနိုင်ငံ မင်းဘူးနယ်တွင်ရှိသော စက်တော်ရာနှစ်ဆူသည် သစ္စဗန္ဓ မုဆိုးတောင်းပန်၍ ချပေးသော ဗုဒ္ဓစက်တော်ရာများ ဟုတ်-မဟုတ် ဖြေကြားပေးပါရန် တောင်းပန်ပါသည်ဘုရား။
( အေးဖေ-သံတွဲ )

( ဖြေ )
၁။ သူ့ရန်သူကြံ၊ မိုးသို့ပျံ၊ နာမံ ဘယ်မြို့ ဘယ်ကြောင့်နည်း-ဟူသော စွယ်စုံကျော်ထင် ပုစ္ဆာကို ကျီးသဲလေးထပ် ဆရာတော် ဖြေဆိုရာတွင် ဃဋပဏ္ဍိတဇာတ်ကို ဖော်ပြ၍ ယခု သံတွဲမြို့ပင်ဖြစ်ကြောင်း ဖြေဆိုထားပါသည်။

၂။ စက်တော်ရာနှစ်ဆူနှင့် ပတ်သက်၍ မြန်မာ့သာသနာဝင်ကျမ်းများ၊ ရာဇ၀င်ကျမ်းများ၊ သမိုင်းကျမ်းများတွင် မင်းဘူးနယ်ရှိ မန်းစက်တော်ရာကိုပင် အညီအညွတ် ပြဆိုထား၍ မြန်မာလူမျိုးများစွာပင် ထိုအတိုင်း မှတ်ယူထားကြပါသည်။
သို့သော် သုတေသနကျမ်းများတွင်မူ တိုင်းအမည် အပရန္တ၊ သို့မဟုတ်-သုနာပရန္တတိုင်း၊ ရှေးမြို့တော်ဟောင်းအမည် သုပ္ပါရက၊
ရှေးအရံမြို့အမည် ၀ါဏိဇဂါမ၊
တည်ရာဌာနကား နမ္ပဒါမြစ်နှင့် ပစ္ဆိမဃာဋ် တောင်အတွင်း ဘုံဘေမြို့မြောက် ထာနာ (သာန) စီရင်စုနှင့်
သုရထ (စုရတ်) စီရင်စုနယ်ပယ်များ၌ တည်သည်-ဟု (ဗုဒ္ဓသာသန ပထ၀ီဝင်ကျမ်း၌) ဆိုလေသည်။
*********************************************************************************

( မေး ) ( သီလတပါးပါး ပျက်ခဲ့သော် )
အရှင်ဘုရား၊ ငါးပါးသီလနှင့် အခြားသီလများ ဆောက်တည်ရာတွင် သီလတပါးပါး ပျက်ခဲ့သော် ယင်းသီလတပါးသာလျှင် ပျက်ပါသလား၊ သို့မဟုတ် အားလုံး ပျက်ပါသလား သိလိုပါသည်ဘုရား။
( ဦးစောထွန်း-ဇီဇ၀ါရပ်-ကျိုက္ခမီ )

( ဖြေ )
ငါးပါးသီလ၊ ရှစ်ပါးသီလ တို့ကို ခံယူရာ၌ တပါးစီမခံယူဘဲ ပေါင်း၍ ( ပဉ္စသီလံ သမာဒိယာမိ-
အဋ္ဌင်္ဂသီလံ သမာဒိယာမိ-) ဟူ၍ တပေါင်းတည်း ခံယူဆောက်တည်လျှင် သိက္ခာပုဒ်တပါး ပျက်ပြားခဲ့သည်ရှိသော် အားလုံးပင် ပျက်ကုန်တော့သည်။
အဘယ်ကြောင့်ဆိုသော် ဆောက်တည်ခြင်း မပြားသောကြောင့်ပင်။

သို့သော် ထိုသို့ တပါးကို လွန်ကျူး၍ အကုန်လုံးပင် ပျက်သော်လည်း လွန်ကျူးရာသိက္ခာပုဒ် တပါးသာလျှင် ကမ္မပထသို့ရောက်၍ ကံထိုက်၏။ တခြားသိက္ခာပုဒ်များ ကံမထိုက်ဟု မှတ်သင့်သည်၊

ဥပမာ-
ငါးပါးသီလကို တပေါင်းတည်း ဆောက်တည်ထားပြီး သူ့အသက်ကို သတ်မိရာ၌ ငါးပါးလုံးပျက်သော်လည်း ပါဏာတိပါတသာ ကမ္မပထ မြောက်၍ အသက်သတ်မှုအတွက်သာ ငရဲကြီးနိုင်၏။
ကျန်လေးပါး ကမ္မပထ မမြောက်။( ခုဒ္ဒကပါဌ ၁၊ ၁၉ ) ထို့ကြောင့် ငါးပါးသီလဖြစ်စေ၊ ရှစ်ပါးသီလဖြစ်စေ၊ ယခုခေတ် အသုံးအတိုင်း တပါးစီဆို၍ ခံယူဆောက်တည်ခြင်းသာ အကောင်းဆုံး ဖြစ်ပါသည်။
*********************************************************************************

( မေး ) ( သွားရောဂါရှင်တို့အတွက် )
ဆရာတော်ဘုရား၊ မြတ်မင်္ဂလာစာစောင်တွင် မျက်စိရောဂါရှင်တို့ ဘုရားရှိခိုးရန် စက္ခုတော်ငါးပါး ဘုရားရှိခိုး ဂါထာ၊ နားရောဂါရှင်တို့ ဘုရားရှိခိုးရန် ဒိဗ္ဗသောတ အဘိညာဉ် ရှိခိုးဂါထာများကို ချီးမြှင့်ထားပါသည်၊
တပည့်တော်မသည် သွားရောဂါကို အမြဲခံစားနေရ၍ သွားတော်လေးဆယ် ရှိခိုးသောဂါထာတပုဒ် ဤစာစောင်မှ ဖော်ပြချီးမြှင့်ပေးတော်မူပါ ဆရာတော်ဘုရား။
( မဇင်သူ-မော်လမြိုင်၊ မစန်းစန်းဝင်း-တနင်္သာရီတိုင်း )

( ဖြေ )
ရှေးဆရာကြီးတို့ ပြုစုထားသော သွားတော်လေးဆယ် ဘုရားရှိခိုး ဂါထာကို ဖော်ပြလိုက်ပါသည်။
နံနက်အိပ်ရာထနှင့် ည အိပ်ရာဝင် တခေါက်စီ ဘုရားရှိခိုးပါ။

သတိ ဂတိ ဓီတိမန္တံ ၊ သန္တံ ဒန္တံ သုခါဝဟံ ။
စတ္တာလီသ သမဒန္တံ ၊ ဗုဒ္ဓံ ၀န္ဒာမိ သာဒရံ ။

သတိ ဂတိ ဓီတိမန္တံ-သတိမြဲအင်၊ ဉာဏ်ထူးလျင်၍၊ ကြည်လင်စွာဘိ၊ တည်ကြည်သော သမာဓိတော်လည်း ရှိတော်မူထသော၊
သန္တံ-ငြိမ်သက်အေးချမ်း၊ စိတ်ဝမ်းကြည်လင်တော်မူသော၊
ဒန္တံ-ယဉ်ကျေးသိမ်မွေ့၊ ပြကတေ့ နူးညံ့သော၊ စိတ်ရှိတော်မူသော၊
သုခါဝဟံ-လူနတ်ဗြဟ္မာ၊ သတ္တ၀ါတို့၊ ချမ်းသာလေအောင်၊ အစဉ်ရွက်ဆောင်တော်မူတတ်သော၊
စတ္တာလီသ သမဒန္တံ-စွယ်တော်လေးဆူ၊ ပါဝင်မူ၍၊ စင်ဖြူတင့်တယ်၊ အမျှလေးဆယ်သော၊ ပြည့်ကြွယ်ကြံ့ခိုင်၊ ပုလဲဆိုင် ပုလဲသွေးကဲ့သို့၊ ဖြူဖွေးသော သွားတော်မြတ်တို့နှင့် ပြည့်စုံတော်မူသော၊
ဗုဒ္ဓံ-သစ္စာလေးပါး၊ တရားသိမြင်၊ ဘုရားရှင်ကိုယ်တော်မြတ်ကြီးကို၊
အဟံ-(သွားဝေဒနာ၊ ခံရပါ၍၊ ကျင်နာခံခက်၊ ဆင်းရဲဖက်၍၊ နေရပါသော) ဘုရားတပည့်တော်သည်။
သာဒရံ-ရိုသေလေးစား ဦးညွတ်တွားလျက်၊ စိတ်ထားကြည်လင်၊ ဦးတော်တင်လျက်၊
ဝန္ဒာမိ-လက်ဆယ်စုံမိုး ပျပ်ဝပ်ကျိုးလျက် ရှိခိုးပါ၏ မြတ်စွာဘုရား၊ မြတ်စွာဘုရား။

( မြတ်မင်္ဂလာ ၁၉၉၅-ခု အောက်တိုဘာလ )

No comments: