Wednesday, April 1, 2009

ကံ ကံ၏အကျိုး ( ၄၂ )

( သံသရာဝဋ် )

ကိုဘသည် ခွေးမွေးဝါသနာပါသူတဦး ဖြစ်သည်၊
သူ့အိမ်တွင် တကောင်သေ၊ တကောင်မွေး စနစ်ဖြင့် ခွေးများကို အလျဉ်မပြတ် မွေးထားလေ့ရှိ၏။
သူ့ခွေးများက ကလေးမြင်လျှင် လိုက်ဆွဲတတ်သည့် အကျင့်ဆိုး ရှိနေခဲ့သည်။
သည်ကိစ္စနှင့်ပတ်သက်၍ ကလေးမိဘရှင်များက ကိုဘကို ခွေးမမွေးရန် ပြောဆိုခဲ့ကြသည်၊
ကိုဘက လက်မခံခဲ့၊
ခွေးမျက်စိနောက်အောင် လုပ်တော့ ကိုက်မှာပေါ့၊ ကိုယ့်ကလေးကို နိုင်အောင်ထိန်းပါ-ဟု တုံ့ပြန်ကာ မသိသလို ပြုမူနေထိုင်ခဲ့လေသည်။
တနေ့တွင် အရပ်ထဲမှ ကလေးတဦးကို ကိုဘမွေးထားသော ခွေးတကောင်က ထွက်ကိုက်သည်။
ထိုကိစ္စနှင့်ပတ်သက်၍ ကလေးရှင်မိဘများက ရပ်ကွက်လူကြီးများကို တိုင်တန်းခဲ့သည်၊
ကျုပ် မွေးထားတဲ့ခွေးလို့ ပြောရအောင် ကျုပ်က ခွေးကို မှတ်ပုံတင်ထားတာမှ မဟုတ်ဘဲ-ကိုဘက လူကြီးများ ရှေ့တွင် တင်းတင်းမာမာ ပြောကာ ငြင်းဆန်လိုက်၏။

များမကြာမီတွင် ဖြစ်၏၊
ကိုဘ၏ကလေး ကျောင်းတက်အသွားတွင် ခွေးများလိုက်ဆွဲ၍ ကလေးမှာ ကြီးစွာ ဒဏ်ရာရသွားခဲ့သည်။
ကလေးကို ခွေးလိုက်ဆွဲစဉ်က အနီးအနားရှိ အိမ်များမှာ အလုပ်ဆင်းသွားကြ၍ ကယ်မည့်သူမရှိ ဖြစ်သွားခဲ့သည်။ ကံအားလျော်စွာ လမ်းသွားလမ်းလာများနှင့် တိုးသောကြောင့် ကိုဘ၏ကလေးမှာ အသက်ချမ်းသာရာ ရသွားခဲ့ခြင်း ဖြစ်တော့သည်။

သံသရာဝဋ်ကား ကြွေးမထားတတ်ကြောင်း ကိုဘတယောက် ကောင်းကောင်းကြီး သိသွားခဲ့ရပါတော့သည်။

( ကျော်မိုးလွင်-၀ါးခယ်မ )
*********************************************************************************

( မေး ) ( ယုံကြည်မှုရှိက အောင်မြင်မှုရ )
မြို့သစ်မြို့တွင် ၁၃-၇-၉၄-ရက်နေ့ နံနက် (၂-နာရီ ၃၅ မိနစ်) အချိန်တွင် မီးစတင်လောင်ကျွမ်းခဲ့ပါသည်၊ အိမ်ခြေ ၈၅-နှင့် ကြက်, ၀က်, တိရစ္ဆာန်များ မီးလောင်ကျွမ်းခဲ့သော်လည်း လူများ သေကြေမှုမရှိပါ။

မီး စတင်လောင်ကျွမ်းသော အိမ်နှင့် ကျွန်မတို့အိမ်မှာ တလမ်းနှစ်လမ်းသာ ခြားပါသည်၊ ပထမတွင် မီးသည် ကျွန်မတို့အိမ်ဘက်သို့ ဦးတည်နေပါသည်၊ ကျွန်မတို့သည် ငယ်ရွယ်သူများဖြစ်၍ မိဘများ ညွှန်ကြားသောနေရာတွင် နေထိုင်ရပါသည်၊ ပထမတွင် ကျွန်မတို့ကိုစု၍ မီးဘေးလွတ်ရာ ဒေသသို့ ရွှေ့ပြောင်း နေထိုင်ခိုင်းပါသည်။

ထို့နောက် ကျွန်မသည် မိခင်ထံ ခွင့်ပန်၍ အိမ်ဘက်သို့ အခြေအနေကို လာကြည့်ရာ ဖခင်နှင့်တွေ့သဖြင့် ကျောင်းဝိုင်းထဲသို့ဝင်ကာ ဘုရားကိုသာ ဦးချနေမိပါတော့သည်၊ မိမိကိုယ်ကို မြတ်စွာဘုရားသခင်အား လှူ၍ ဘုရားမှတပါး ကိုးကွယ်ရာ မရှိတော့ပြီ-ဟု ဆိုကာ မြတ်စွာဘုရားသခင်၏ ခြေဖမိုးတော်ကို ဦးတိုက်၍ ရှိခိုးကန်တော့ပြီးနောက် ဇယစက္ကော-ဂါထာ (ခေါ်) အောင်ဘုရားရှိခိုးခြင်း ဂါထာကို ရွတ်ဆိုနေပါသည်။

ထိုအချိန်တွင် မီးသည် ကျွန်မတို့အိမ်နှင့် အနည်းငယ်သာ ဝေးကွာပါတော့သည်၊ သို့သော် ကျွန်မ၏စိတ်တွင် ငါ့မှာ ဘုရားရှိတယ်၊ တရားရှိတယ်၊ သံဃာရှိတယ်၊ ဟု အောက်မေ့ယုံကြည်ထားရာ ကျွန်မ၏စိတ်သည် ပေါ့ပါးရွှင်လန်း၍ နေပါတော့သည်၊ ဤသည်ကား ဘုရား တရား သံဃာ အပေါ်၌ ကျွန်မ၏ စိတ်ချယုံကြည်မှုပင် ဖြစ်သည်။

ကျွန်မတို့အိမ်သည် မီးလောင်ကျွမ်းသောအိမ်၏ အရှေ့မြောက်ဘက်တွင် တည်ရှိပါသည်၊ ထိုအချိန်တွင် မီးသည် မြောက်ဘက်သို့တန်း၍ လောင်ကျွမ်းသွားပါသည်၊ မီးလောင်ခံရသော အိမ်များနှင့် ကျွန်မတို့အိမ်မှာ လမ်းနှင့် အိမ်နှစ်အိမ်ခန့်သာ ခြားပါသည်၊ ကျွန်မတို့မြို့မှာ တောမြို့ကလေး ဖြစ်သောကြောင့် လမ်းဆိုသော်လည်း ကားနှစ်စီးပင် ရှောင်၍မရပါ၊ ထို့ကြောင့် ကျွန်မတို့အိမ်များတွင် မီးများထိန်လင်း၍ နေပါသည်၊ ကျွန်မတို့လမ်းရှိ အိမ်များမှာ ပူးကပ်စွာ တည်ရှိနေပြီး ဆီပေပါများလည်း သိုလှောင်ထားသဖြင့် လမ်းအရှေ့ဘက်သို့ မီးကူးလျှင် တမြို့လုံးနီးပါးပင် လောင်နိုင်ဖွယ် ရှိပါသည်။

ထူးဆန်းသည်ကား ဘုရားကျောင်းဝိုင်း၏ ဘေးပတ်လည်တွင် မီးလောင်ကျွမ်းခဲ့သော်လည်း ကျောင်းဝိုင်းထဲတွင် မီးလောင်ကျွမ်းမှု မရှိခဲ့ခြင်းပင် ဖြစ်သည်။

မီးလောင်ကျွမ်းနေမှုသည် ဦးတည်ချက်ပြောင်းသွားသော်လည်း ကျွန်မသည် မီး-စတင်လောင်ကျွမ်းသော အိမ်မှ အိမ်သူအိမ်သားများအား မေတ္တာပို့ပါသည်။ ထို့နောက် ဝေနေယျသတ္တ၀ါများအား မေတ္တာပို့ပါသည်၊ ထို့နောက် ကျွန်မသည် မြတ်စွာဘုရားသခင်အား ယုံကြည်မှုအပြည့်ဖြင့် ရှိခိုးကန်တော့နေပါသည်၊ ဘုရားရိပ် တရားရိပ်သည် အလွန်ပင် အေးချမ်းလှပေသည်၊ ကျွန်မ၏စိတ်တွင်လည်း အေးချမ်းတည်ငြိမ်နေပါသည်။

လောက သဘာဝသည်ကား အလွန်ပင် ထူးဆန်းအံ့သြဖွယ် ကောင်းလှပါသည်၊ တစက္ကန့် တမိနစ် တနာရီ တရက်အတွင်းပင်လျှင် သေကြေပျက်စီးခြင်း အမျိုးမျိုးတို့ကို ဖြစ်ပေါ်စေနိုင်ပါသည်၊ ဤကဲ့သို့ အဖြစ်မျိုးတို့ကို ရင်ဆိုင်ကြုံတွေ့လာပါက ရဲဝံ့စွာ ရင်ဆိုင်နိုင်ရန်အတွက် မြတ်စွာဘုရားသခင်အား အမြဲမပြတ် ယုံကြည်အောက်မေ့၍ ရှိခိုးပူဇော်မှု အမြဲပြုနေရမည် ဖြစ်ပါတော့သည်။ ယုံကြည်မှုရှိက အောင်မြင်မှု ရရှိနိုင်ပါသည်၊ ကျွန်မ၏ကိုယ်တွေ့ ဖြစ်ရပ်မှန်ပင် ဖြစ်ပါတော့သည်။

( စိုးစိမ့်သူ-မြို့သစ် )

( မြတ်မင်္ဂလာ ၁၉၉၅-ခု ဖေဖော်ဝါရီလ )

No comments: