Tuesday, April 7, 2009

ကံ ကံ၏အကျိုး ( ၄၅ )

( အလိုတော်ပြည့်ဘုရားမှ အပြန် )

ဝဲလောင်ရွာ၏ တံတားဦးရပ်ကွက်တွင် ကုန်အရောင်းအ၀ယ်အလုပ်ဖြင့် အသက်မွေးဝမ်းကျောင်း ပြုနေသည့် ဒေါ်စစ်ကြည်တို့ မိသားတစုရှိပါသည်၊ ခင်ပွန်းဖြစ်သူ ဦးလှသိန်းမှာ လွန်ခဲ့သော ၂-နှစ်ခန့်က ကွယ်လွန်သွားခဲ့သည်၊ သူတို့တွင် အသက် ၁၆-နှစ်ခန့် အရွယ်ရှိ မောင်ကျော်ဦးဆိုသည့်
သားလေးတယောက်သာ ထွန်းကားခဲ့သည်၊ သို့သော် ယခင်က ၂-ဦးစလုံး အိမ်ထောင်တဆက်စီ ရှိခဲ့ဖူး၍ ဦးလှသိန်းဘက်မှ သားတယောက်နှင့် ဒေါ်စစ်ကြည်ဘက်မှ သမီးတယောက်လည်း ရှိခဲ့ကြပါသည်။

သူတို့သည် ထိုသားသမီးများအားလုံးကို ကျောသားရင်သား မခွဲခြားဘဲ အညီအမျှချစ်ခဲ့ကြသည်။ သားသမီးအချင်းချင်းကလည်း တအူတုံဆင်း မောင်နှမရင်းများပမာ နေလာခဲ့ကြသည်၊ ထို့ကြောင့် မြင်တွေ့ရသူတိုင်း အံ့သြမဆုံး ရှိခဲ့ကြပါသည်။

ယခုအခါတွင် အကြီးဆုံးသားဖြစ်သူ မောင်ရဲမြင့်အောင်သည် အိမ်ထောင်သည်ဘ၀ဖြင့် မန္တလေးမြို့ နန်းရှေ့ရပ်ကွက်တွင် အခြေတကျ နေထိုင်လျက်ရှိသည်၊ သူသည် အိမ်ဝိုင်းခြံနှင့် မော်တော်ကားပွဲစား အလုပ်အကိုင် ဇောက်ချ လုပ်ကိုင်ခဲ့ရာ အတော်ပင် ကြီးပွားချမ်းသာနေပါသည်။

သူသည် ဖခင်ကြီးမရှိသည့်နောက် မိထွေးဖြစ်သူနှင့် ညီ ညီမများအပေါ် စောင်မကြည့်ရှုသည့်အနေဖြင့် သူပိုင် တီအီးကားသစ်ကြီးတစီးကို မိထွေးဖြစ်သူအား ရှိသလောက်ငွေကြေး ပေးထားပြီး လာယူရန် မှာကြားခဲ့ပါသည်။

မိထွေးဖြစ်သူ ဒေါ်စစ်ကြည်ကလည်း တန်ကြေး၏ထက်ဝက်ကျော်လောက်မှ မပေးနိုင်သေးလျှင် မယူသင့်ဟု ခံယူခဲ့ပြီး ငြင်းဆိုထားခဲ့သည်၊ သို့သော် အတူနေ သမီးဖြစ်သူ မမြင့်ဋ္ဌေးနှင့် သားဖြစ်သူ မောင်ကျော်ဦးတို့၏ ဘ၀ရှေ့ရေး ရင်အေးစေရန် စိတ်ထဲတွင် ဆန္ဒရှိနေခဲ့ပါသည်။

ဤသို့ဖြင့် လွန်ခဲ့သော နှစ်ဆန်း ၂-ရက်နေ့က ဒေါ်စစ်ကြည်၏အိမ်သို့ မြင်းခြံမြို့မှ သူ၏မိတ်ဆွေများဖြစ်ကြသည့် ဦးခင်မောင်မြင့်နှင့် ဒေါ်ခင်စောဝင်းတို့ ဇနီးမောင်နှံ ရောက်ရှိလာခဲ့သည်၊ သူတို့ဇနီးမောင်နှံသည် ပုဂံမြို့ရှိ အလိုတော်ပြည့်ဘုရားသို့ ဘုရားဖူးသွားကြမည်ဖြစ်ကြောင်း လိုအင်ဆန္ဒပြည့်ဝချင်လျှင် လိုက်ခဲ့စေလိုကြောင်း အတင်းအဓမ္မခေါ်ကြသဖြင့် ဒေါ်စစ်ကြည်တယောက် လိုက်ပါသွားခဲ့သည်။

ပုဂံမြို့ရှိ အလိုတော်ပြည့်ဘုရားသို့ ရောက်လျှင် ဘုရားလှိုဏ်ဂူအတွင်း ဤအလိုတော်ပြည့်ဘုရားသို့ ဖူးမြော်ရန် ရောက်ရှိသူတိုင်း ၅-ပါးသီလခံယူဆောက်တည်၍ ဂုဏ်တော် ၉-ပါးကို ပွားများကာ ဆန္ဒပြင်းပြစွာဖြင့် အဓိဋ္ဌာန်ပြုပြီး မိမိလိုအပ်သော ဆုတဆုကို ပန်ဆင်ပါက လိုအပ်သောဆန္ဒအတိုင်း ၇-ရက်အတွင်း၌သော်၎င်း။ ၃-လအတွင်း၌သော်၎င်း၊ ပြည့်စုံလုံလောက် အပြီးသို့ရောက်မည်-ဆိုသည့် လမ်းညွှန်စာတမ်းကို ဖတ်ရှုခဲ့ရပါသည်။

သူသည်ချက်ချင်းပင် စာတန်းပါအတိုင်း ၅-ပါးသီလခံယူခြင်း၊ ဂုဏ်တော် ၉-ပါးကို ပွားများခြင်းတို့ကို ယုံယုံကြည်ကြည်ဖြင့် ပြုလုပ်ခဲ့သည်၊ ထို့နောက်-
တပည့်တော်မကို လွန်ခဲ့သော ၁-နှစ်ကျော်လောက်ကတည်းက မန္တလေးမြို့ရှိ သားကြီးဖြစ်သူ မောင်ရဲမြင့်အောင်က သူပိုင် တီအီးကားကြီးတစီးကို ဈေးမဆိုဘဲ ပေးနေပါသည်၊ ငွေကြေးဥစ္စာမပြည့်စုံသေးသဖြင့် ခေတ္တငြင်းဆိုထားခဲ့သော်လည်း တပည့်တော်မ၏စိတ်ထဲတွင် ဆန္ဒရှိနေသည်မှာ အမှန်ပင်ဖြစ်ပါသည်။ ဤမှန်ကန်သောသစ္စာစကားကြောင့် မကြာမီအချိန်အတွင်း ငွေကြေးဥစ္စာ ပြည့်စုံကာ တီအီးကားကြီးကို ၀ယ်ယူနိုင်ရပါစေသား အရှင်မြတ်ဘုရား-ဟု စိတ်အကြံဖြင့် အဓိဋ္ဌာန်ဆုပန်ခဲ့ပါသည်။

ဤသို့ ပုဂံမြို့ရှိ အလိုတော်ပြည့်ဘုရားထံ မှန်ကန်စွာဆုပန်ခဲ့သည့်နောက်ပိုင်း သူ၏ရောင်းရေး ၀ယ်ရေးများ အထူးတိုးတက်ကောင်းမွန်လာခဲ့သည်၊ ကြွေးဟောင်းနှင့် မိဘအမွေအနှစ်များလည်း မမျော်လင့်ဘဲ ရရှိလိုက်သည်၊ ထို့ကြောင့် အလိုတော်ပြည့်ဘုရားမှအပြန် အိမ်ရောက်ပြီး ၃-လမပြည့်မီ ထိုတီအီးကားကြီးကို ငွေကြေးပေးကာ လက်ဝယ်ပိုင်ပိုင် ၀ယ်ယူနိုင်ခဲ့ပါတော့သည်။

( ခင်မောင်တင်-၀ဲလောင် )
*********************************************************************************

( မိခင်အတွက် အသက်ရှင်ခဲ့သူ )

အမေရေ၊ ဒီတခါတော့ အမေသားနဲ့ ပြန်မှတွေ့ရပါတော့မလား-ဟု ငိုကြွေးရင်း ပြောနေသူမှာ ကိုမောင်ကြီးဖြစ်သည်၊ ကိုမောင်ကြီးသည် ပင်လယ်ကမ်းခြေရှိ ဘောမိကျေးရွာတွင် မိခင်အိုကြီးနှင့် အတူနေထိုင်သည်၊ သားအမိနှစ်ယောက်တည်းရှိ၍ မိခင်ကြီးကို လုပ်ကိုင်ကျွေးမွေး ပြုစုနေသူဖြစ်သည်၊ ရေလုပ်ငန်းကိုလုပ်ကိုင်နေရသော်လည်း ဘာသာတရားကိုင်းရှိုင်းသည်၊

ပင်လယ်ပြင်တွင် လှိုင်းလေ ငြိမ်သက်နေသဖြင့် ငါးဖမ်းရန် စက်လှေများ ပင်လယ်ပြင်သို့ ထွက်ကြသည်။ ကိုမောင်ကြီးလည်း အဖော်သုံးယောက်နှင့်အတူ စက်လှေကလေးဖြင့် ထွက်လာခဲ့သည်၊ သုံးနာရီခန့် မောင်းထွက်လာရာ ငါးအုပ်တွေ့၍ ပိုက်ချအပြီးတွင် ကောင်းကင်တခွင်လုံး မည်းမှောင်လာတော့သည်။ မုန်တိုင်းကျတော့မည်ကို သိသဖြင့် တခြားစက်လှေများ ပြန်ကြကုန်ပြီ၊ ကိုမောင်ကြီးတို့လည်း ပိုက်သိမ်းပြီး မောင်းအထွက်တွင် မုန်တိုင်းကျလာလေတော့သည်။

လေဆန်ကို ဆန်မောင်းနေသော်လည်း စက်လှေမှာမရွေ့တော့ပေ၊ ထို့နောက် စက်ပျက်ကာ မုန်တိုင်းနှင့် ပါသွားခဲ့သည်။ တယောက်တလှည့် ရေပက်ရင်းဖြင့် ပင်လယ်ထဲတွင် မျောပါနေခဲ့သည်။ ကမ်းကိုလည်း မမြင်ရပေ၊ ဘယ်နေရာရောက်နေမှန်းလည်း မသိရတော့ပေ၊ စားစရာဘာမှမရှိသဖြင့် ရေသောက်၍သာ နေခဲ့ရသည်။

သုံးရက်မြောက်သောနေ့တွင် ကျန်လူများမှာ အစာမစားရသဖြင့် မလှုပ်နိုင်တော့ပေ၊ ကိုမောင်ကြီး က-ငါမရှိရင် ငါ့အမေကို ဘယ်သူရှာကျွေးမှာလဲ၊ အသက်ကြီးလို့ ဘာမှလဲ လုပ်နိုင်မှာမဟုတ်ဘူး၊ ငါမရှိလို့ မဖြစ်ဘူး၊ အမေရေ ဒီတခါတော့ အမေနဲ့သား ပြန်မှတွေ့ရပါတော့မလား-ဟု ငိုကြွေးပြောဆိုရင်း မိခင်ဇောနှင့် ရေကို ကြိုးစား၍ ပက်နေရသည်။

လေးရက်မြောက်နေ့တွင် ကိုမောင်ကြီးလည်း ရေမပက်နိုင်တော့ပေ၊ သို့သော် စက်လှေမြှုပ်ပါက ဘော့သီးတွဲနှင့် ရေပုံးယူကာ ခုန်ဆင်းရန် အဆင်သင့်ပြင်ထားတော့သည်။ လှိုင်း လေ အနည်းငယ် ငြိမ်သက်၍ စက်လှေမမြှုပ်ခဲ့ပေ၊ သို့သော် လူလေးယောက်စလုံးပင် မလှုပ်နိုင်တော့ပါ။

ငါးရက်မြောက်နေ့တွင် သံတွဲမှ သင်္ဘောတစီးက ဆယ်ယူကာ ဆေးရုံသို့ ပို့ပေးခဲ့သည်၊ သံတွဲဆေးရုံတွင် တလခန့် ကုသခဲ့ရသည်၊ ဆေးရုံက ငွေတထောင်နှင့် အ၀တ် သုံးစုံစီပေးလိုက်သည်၊ ဤသို့ဖြစ်ရခြင်းမှာ မိခင်ကိုလုပ်ကျွေးသဖြင့် အသက်ဘေးမှ လွတ်ခဲ့ကြောင်း ကိုမောင်ကြီးက ယုံကြည်စွာ ပြောဆိုသည်၊ ကျန်လူများကလည်း မောင်ကြီးကျေးဇူးကြောင့် ငါတို့အသက်ရှင်တာ-ဟု ယခုထိပြောဆိုနေတုန်းပင် ဖြစ်သည်။

( စိုးတင့် )
*********************************************************************************

( ကရုဏာရှင် )

စာရေးသူတို့ ဇာတိရွာကလေးတွင် ဒေါ်ခင်သန်း-ဟူသော အမျိုးသမီးကြီး တယောက် ရှိပါသည်၊ ထိုအမျိုးသမီးကြီးသည် တိရစ္ဆာန်ကလေးများကို အလွန်သနားတတ်ပါသည်၊ ဈေးထဲမှ အရှင်လတ်လတ် တောင်ပံချိုး၍ထားသော ငှက်များ၊ လေးခွမှန်၍ ဒဏ်ရာဖြင့် မသေမရှင်ဖြစ်နေသော ချိုး၊ စစ်စလီ၊ ရေဘဲ၊ စနိုက် စသော ငှက်ကလေးများကို ၀ယ်ယူ၍ ဒဏ်ရာ ပျောက်ကင်းသည်အထိ အိမ်တွင်ကုသပေးပြီး ပြန်လွှတ်ပေးလေ့ရှိပါသည်၊ သူတို့အိမ်တွင်လည်း အလေ့ကျ လာရောက်နေသော ခွေးနှင့်ကျောင်များ ရှိပါသည်၊ ဒေါ်ခင်သန်းသည် ခွေး ကြောင်များ အတွက် အမဲသား အစအန အရိုးအရင်းများကို ၀ယ်ယူ၍ ဆန်ကွဲနှင့် ရောပြုတ်ပြီး ကျွေးမွေးလေ့ရှိပါသည်၊ အိမ်ရှိခွေးများကိုသာ ကျွေးထားသည် မဟုတ်ပါ၊ ဈေးထဲတွင် အောက်ပိုင်း ခြေတရွတ်ဆွဲပြီး မျက်စိလုံးဝမမြင်ရှာသော ခွေးကြီးကိုလည်း နေ့စဉ် သွားရောက်ကျွေးမွေးလေ့ ရှိပါသည်။

တချို့ ရင်းနှီးသူများက ဒေါ်ခင်သန်း၊ ခင်ဗျားကတော့ အဲဒါတွေနဲ့ ဘ၀ချင်း နီးတယ်ထင်တယ် နော်။ ဒါကြောင့် ဒါတွေကို ခင်ဗျား သံယောဇဉ် ဒါလောက်ရှိနေတာ-ဟု ပြောလာလျှင်
အေးဟေ့-ဟုတ်တယ်ဟ၊ ဒါလဲ တကြောင်းပဲ၊ နောက်ပြီး လူတွေက ဘယ်လိုရှာစား ရှာစား ရတယ်ဟ၊ တိရစ္ဆာန်တွေက လူကျွေးမှ စားရတာ၊ ဟင်းမကောင်းဘူးလို့လဲ ချေးမများဘူး၊ ကျွေးတာပဲ စားတယ်၊ ကျေးဇူးတရားလဲ နားလည်တယ်-ဟု ပြန်ပြောတတ်ပါသည်။

ထိုကဲ့သို့ တိရစ္ဆာန်များကို သနားကြင်နာစွာ ကျွေးမွေးပြုစုတတ်သောကြောင့် ထင်သည်။ ဒေါ်ခင်သန်းတယောက် ဖျားနာ၍ အိပ်ရာထဲ လဲနေသည်ဟု တခါမှ မကြားဖူးပေ၊ အခြားသူများ ကျပ်တည်းခက်ခဲနေချိန်မှာပင် သူတို့မိသားစု အခြေမပျက်ခဲ့ပေ။

ဤသည်တို့မှာ ဒေါ်ခင်သန်းတို့မိသားစု တိရစ္ဆာန်များကို ကရုဏာသက်စွာ ကျွေးမွေးတတ်သော စေတနာအကျိုးကြောင့်ဟု တရွာလုံးက ပြောဆိုချီးမွမ်းနေကြပါသည်။

( ရှင်ထွေး-ရွှေတောင် )

( မြတ်မင်္ဂလာ ၁၉၉၅-ခု မေလ )

No comments: